HISITOLIA 38
Te ʼu Malomu e Toko 12
KOUTOU sio muʼa ki te ʼu fuaʼi ʼakau ʼaē ʼe ʼamo e te ʼu tagata. ʼE koutou sisio ki te fua lahi ʼo te ʼu fuhiga. ʼE tonu ke ʼamo e he ʼu tagata e toko lua. Pea koutou sio muʼa ki te ʼu fiku pea mo te ʼu kelenate. ʼE haʼu maifea te ʼu fuaʼi ʼakau matalelei ʼaia? Mai Kanaane. ʼE tou manatuʼi ʼi te tahi temi neʼe nonofo ia Apalahamo, mo Isaake pea mo Sakopo ʼi Kanaane. Kae ʼuhi ko te hoge ʼaē neʼe hoko ʼi te fenua ʼaia, neʼe mavae ai ia Sakopo mo tona famili ʼo ʼolo ki Esipito. ʼI te temi nei, hili kiai taʼu e 216, neʼe toe taki e Moisese te kau Iselaelite ki Kanaane. Kua nātou aʼu ki te koga meʼa ʼo te toafa neʼe higoa ko Katesi.
Neʼe agakovi te hahaʼi ʼaē neʼe nonofo ʼi Kanaane. Koia neʼe fekauʼi ai e Moisese te ʼu malomu e toko 12, pea neʼe ina ʼui age kia nātou: ‘Koutou ʼolo ʼo vakaʼi peʼe kaugamālie te hahaʼi ʼaē ʼe nonofo ai, pea mo koutou vakaʼi peʼe nātou mālolohi. Koutou vakaʼi peʼe lelei te kele ki te to ʼakau. Pea koutou tokaga ʼo ʼaumai he ʼu fuaʼi ʼakau.’
ʼI te liliu mai ʼa te ʼu malomu ki Katesi, neʼe nātou ʼui fēnei kia Moisese: ‘ ʼE ko he fenua matalelei.’ Neʼe nātou fakamoʼoni te faʼahi ʼaia ʼo nātou fakahā age kia Moisese te ʼu fuaʼi ʼakau. Kae ko te toko 10 ʼi te ʼu malomu ʼaia neʼe nātou ʼui fēnei: ‘Ko te hahaʼi ʼaē ʼe nonofo ai ʼe lalahi pea mo mālolohi. ʼE tāmateʼi anai tatou mo kapau ʼe tou faiga ke tou toʼo te fenua.’
Neʼe matataku te kau Iselaelite ʼi tanatou logo ki te ʼu palalau ʼaia. Neʼe nātou ʼui fēnei: ‘Neʼe lelei age pe hatatou mamate ʼi Esipito peʼe ʼi te toafa ʼaenī. ʼE tou mamate anai ʼi te tau, pea ʼe puke anai totatou ʼu ʼohoana pea mo tatatou fānau. Tou fili hotatou pule foʼou ke ina fetogi ia Moisese, pea ke tou toe liliu ki Esipito!’
Kae ko te ʼu malomu e toko lua neʼe nā falala kia Sehova, pea neʼe nā faiga ke fakafimālie te loto ʼo te hahaʼi. Ko tonā ʼu higoa ko Sosue pea mo Kalepe. Neʼe nā ʼui fēnei: ‘Tuku takotou matataku. ʼE nofo ia Sehova mo tatou. ʼE faigafua anai tatatou maʼu te fenua.’ Kae neʼe mole fakalogo te hahaʼi. Neʼe nātou fia tāmateʼi ia Sosue pea mo Kalepe.
Neʼe tupu ai te ʼita lahi ʼo Sehova, pea neʼe ina ʼui fēnei kia Moisese: ‘ ʼE mole he tahi ʼi te hahaʼi ʼaia ʼe hū anai ki te fenua ʼo Kanaane, mai ia nātou ʼaē ʼe taʼu 20 ʼo aʼu kia nātou ʼaē kua fotufotuʼa tagata. Neʼe nātou sio ki te ʼu milakulo ʼaē neʼe ʼau fai ʼi Esipito pea mo te ʼu milakulo ʼaē neʼe ʼau fai ʼi te toafa, kae ʼe mole heʼeki nātou falala kia te ʼau. Koia ʼe nātou haʼele anai ʼi te toafa lolotoga taʼu e 40 ʼo aʼu ki tanatou mamate fuli. ʼE gata pe kia Sosue pea mo Kalepe ʼe nā hū anai ki te fenua ʼo Kanaane.’