ʼO kehekehe ia mo te tagata, neʼe ʼuluaki maʼuli ia Sesu ʼi selō ko he laumālie ʼi muʼa ʼo tana haʼu ʼo tupu ʼi te kele. (Soane 8:23) Neʼe ko te ʼuluaki fakatupu ʼaia ʼa te ʼAtua, pea neʼe tokoni ia ia ki te fakatupu ʼo meʼa fuli. ʼE ko ia tokotahi pē neʼe fakatupu e Sehova totonu pea ko te tupuʼaga lā ʼaia ʼo tona fakahigoa ko te ʼAlo “ulutokotahi” ʼo te ʼAtua. (Soane 1:14) Neʼe gāue ia Sesu ko he Tagata ʼAve Folafola ʼa te ʼAtua, koia neʼe fakahigoa ai ko “te Folafola.”—Lau ia Taaga Lea 8:22, 23, 30; Kolose 1:15, 16.

Neʼe fekauʼi mai e te ʼAtua ia tona ʼAlo ki te kele ʼaki tana tuku ifo tona maʼuli mai te lagi ki te fatu ʼo te tāupoʼou Sutea neʼe higoa ko Malia. Koia neʼe mole ʼi ai he tamai tagata ʼa Sesu. (Luka 1:30-35) Neʼe haʼu ia Sesu ki te kele (1) moʼo ako te moʼoni ki te hahaʼi ʼo ʼuhiga mo te ʼAtua, (2) pea mo tuku mai he faʼifaʼitaki ʼo ʼuhiga mo te fai ʼo te finegalo ʼo te ʼAtua, tatau aipē peʼe tou felāveʼi mo he ʼu faigataʼaʼia, (3) pea mo foaki tona maʼuli haohaoa ko he “totogi” maʼa tātou.—Lau ia Mateo 20:28.

Ko he totogi ʼe ʼaoga moʼo fakahao he tahi mai te mate. (Ekesote 21:29, 30) Ko te mate pea mo te mātutuʼa neʼe mole kau ia ʼi te ʼuluaki fakatuʼutuʼu ʼa te ʼAtua ʼo ʼuhiga mo te tagata. ʼE tou ʼiloʼi feafeaʼi ia te faʼahi ʼaia? ʼAki te ʼui age ʼaē e te ʼAtua kiā Atama, kapau ʼe agahala pea ʼe mate anai. Kanapaulā neʼe mole agahala ia Atama, kanaʼaualā neʼe mole mate ia. (Senesi 2:16, 17; 5:5) Ohagē pē ko tona ʼui ʼi te Tohi-Tapu, neʼe “ulu” te mate ki te mālamanei ʼuhi ko Atama. Neʼe tuku ai e Atama ki ʼona hōloga ia te agahala pea mo tona tūʼā ʼaē ko te mate. Koia ʼe ʼaoga ai kiā tātou  te totogi moʼo fakahao ia tātou mai te tūʼā ʼo te mate ʼaē ʼe tou maʼu mai ia Atama.—Lau ia Loma 5:12; 6:23.

Ko ai ʼaē ʼe feala ke ina totogi tātou mai te mate? Kā tou mamate, pea ʼe tou totogi te tūʼā ʼo ʼatatou agahala takitokotahi. Ko he tagata heʼe haohaoa ʼe mole feala ke ina totogi te ʼu agahala ʼa he tahi age.—Lau ia Pesalemo 49:8-10.

ʼO kehekehe ia mo tātou, ko Sesu neʼe haohaoa. Neʼe mole ina fai he agahala, koia lā ʼaē neʼe mole tonu ai ke mate. Kae neʼe mate ia Sesu maʼa te ʼu agahala ʼa ʼihi. Neʼe fakahā e te ʼAtua tona ʼofa fakatalakitupua maʼa te tagata ʼaki tana momoli mai tona ʼAlo ke haʼu ʼo mate maʼa tātou. Neʼe toe fakahā foki e Sesu tona ʼofa ʼaē kiā tātou ʼaki tana fakalogo ki tana Tamai pea mo tana foaki tona maʼuli ʼuhi ko ʼatatou agahala.—Lau ia Soane 3:16; Loma 5:18, 19.

ʼI tana ʼi te kele, neʼe fakamālōlō e Sesu te hahaʼi māhahaki, neʼe ina fakatuʼuake te ʼu mate, pea neʼe ina fakafīmālieʼi te hahaʼi mai ʼonatou mamahi. ʼAki tana fai te ʼu meʼa ʼaia neʼe ina fakahā te ʼu meʼa ʼaē kā ina fai anai ʼi te kā haʼu maʼa te hahaʼi fuli pē ʼaē ʼe fakalogo. (Mateo 15:30, 31; Soane 5:28) ʼI te hili ʼo te mate ʼo Sesu, neʼe toe fakatuʼuake ia ia e te ʼAtua ki selō. (Efeso 1:20) Pea atali ai leva ia Sesu ʼi te toʼomataʼu ʼo te ʼAtua ʼo aʼu ki te temi ʼaē kā fakanofo ai ke Hau ke ina takitaki te kele kātoa. (Hepeleo 10:12, 13) ʼI te temi nei ʼe ʼafio ia Sesu ʼi selō ko te Hau, pea ko ʼana tisipulo ʼe natou fakahā te logo lelei ʼaia ʼi te mālamanei kātoa.—Lau ia Taniela 7:13, 14; Mateo 24:14.

Kua vave pē te haga ʼa Sesu ʼo fakaʼaogaʼi tana pule fakahau moʼo fakagata te ʼu mamahi fuli pea mo fakaʼauha ia nātou ʼaē ʼe natou fakatupu te ʼu mamahi ʼaia. Ko nātou fuli ʼaē ʼe tui kiā Sesu pea mo fakalogo kiā te ia, ʼe natou māʼuʼuli fiafia anai ʼi te palatiso ʼi te kele.—Lau ia Pesalemo 37:9-11.