Ko te Puleʼaga ʼo te ʼAtua ʼe ko he puleʼaga ʼe tuʼu ʼi selō kae ʼe fakaʼaogaʼi anai e te ʼAtua moʼo puleʼi te kele. ʼE ina fetogi anai te ʼu puleʼaga fuli ʼo te kele pea mo fakahoko te finegalo ʼo te ʼAtua ʼi selō pea mo te kele. Ko te ʼu logo ʼaē ʼo ʼuhiga mo te Puleʼaga ʼo te ʼAtua ʼe lelei ia. Kua vave fakahoko e te Puleʼaga ʼo te ʼAtua ia te ʼu meʼa fuli ʼaē ʼe fakaʼamu kiai ia te tagata ʼo ʼuhiga mo he takitaki ʼe lelei. ʼE ina fakalogotahiʼi anai ia te tagata fuli pē ʼe maʼuli ʼi te kele.—Lau ia Taniela 2:44; Mateo 6:9, 10; 24:14.

Ko te puleʼaga fakahau fuli pē ʼe tonu ke ʼi ai hona hau. Neʼe hinoʼi e Sehova tona ʼAlo, ia Sesu Kilisito, ko te Hau ʼo Tona Puleʼaga.—Lau ia Apokalipisi 11:15.

Ko te ʼAlo ʼo te ʼAtua ʼe ko te Hau ʼe lelei tokotahi pē, kote- ʼuhi ʼe agalelei pea ʼe ina fai tuʼumaʼu ia te ʼu meʼa ʼaē ʼe totonu. (Soane 1:14) Pea ʼe ina maʼu ia he mālohi feʼauga moʼo tokoni ki te hahaʼi fuli pē koteʼuhi ʼe ina takitaki anai te kele kātoa mai te lagi. ʼI te ʼosi ʼo tona toe fakatuʼuake neʼe hake ia ki selō pea neʼe nofo ʼi te toʼomataʼu ʼo Sehova ʼo ʼatalitali mai ai. (Hepeleo 10:12, 13) Pea ki muli age, neʼe foaki e te ʼAtua kiā te ia te tuʼulaga hau ke kamata tana pule.—Lau ia Taniela 7:13, 14.

Ko te kiʼi kūtuga ʼe fakahigoa ko “te kau sagato,” peʼe ko te kau māʼoniʼoni, ʼe natou pule fakatahi anai mo Sesu ʼi selō. (Taniela 7:27) Ko nātou ʼaē neʼe ʼuluaki filifili e te ʼAtua ke liliu ko he kau māʼoniʼoni neʼe ko te kau ʼapositolo agatonu ʼa Sesu. Neʼe hoko atu pē e Sehova ʼo aʼu mai ki te temi nei, ia tana filifili ʼaē he ʼu hahaʼi tagata pea mo fafine agatonu ke natou liliu ko he kau māʼoniʼoni. Ohagē pē ko Sesu, ʼe fakatuʼuake ia nātou ko he ʼu sino fakalaumālie.—Lau ia Soane 14:1-3; 1 Kolinito 15:42-44.

 Ko te toko fia koa ʼaē ʼe ʼolo ki selō? Neʼe fakahigoaʼi nātou e Sesu ko te “kii fagaovi.” (Luka 12:32) Ko te kātoa ʼo tona hahaʼi ʼe ko te toko 144 000, pea ʼe natou takitaki anai mo Sesu ia te kele.—Lau ia Apokalipisi 14:1.

Neʼe kamata te pule ʼa te Puleʼaga ʼo te ʼAtua ʼi te taʼu 1914. * Ko te ʼuluaki gāue ʼaē neʼe fai e Sesu ʼi tona ʼosi fakanofo ʼaē ko te Hau, ko te kapu ifo ʼo Satana pea mo tana kau temonio ki te kele. Neʼe ʼita lahi ai ia Satana pea neʼe ina kamata fakatupu ai te ʼu tokakovi ʼi te kele. (Apokalipisi 12:7-10, 12) Talu mai ai ko te ʼu tokakovi ʼo te mālamanei kua ʼāsilisili kovi age. Ko te ʼu tau, te ʼu hoge, te ʼu taʼi mahaki lalahi, pea mo te ʼu mafuike ʼe natou kau ki te “fakailoga” ʼaē kua vave pē te fakatokatoka e te Puleʼaga ʼo te ʼAtua ia te ʼu faigataʼaʼia fuli ʼo te kele.—Lau ia Luka 21:7, 10, 11, 31.

ʼAki he gāue fai fakamafola fakamālamanei, ʼe lolotoga fakatahiʼi nei e te Puleʼaga ʼo te ʼAtua ia te toe hahaʼi tokolahi mai te ʼu puleʼaga kehekehe. Ko te toko lauʼi miliona hahaʼi agavaivai kua natou liliu ko he hahaʼi fakalogo ʼa Sesu. ʼE puipui anai e te Puleʼaga ʼo te ʼAtua ia nātou ʼaia ʼi te temi ʼaē kā ina fakaʼauha ai anai ia te tuʼu ʼo te ʼu faʼahiga meʼa agakovi ʼo te kele. Koia, ko nātou ʼaē ʼe natou fia maʼu te ʼu lelei ʼaē ʼe haʼu mai te Puleʼaga ʼo te ʼAtua, ʼe tonu anai ke natou ako ke natou liliu ko he ʼu hahaʼi fakalogo ʼa Sesu.—Lau ia Apokalipisi 7:9, 14, 16, 17.

ʼI te lolotoga ʼo te ʼu taʼu e 1 000, ʼe fakahoko anai e te Puleʼaga ia te ʼuluaki fakatuʼutuʼu ʼa te ʼAtua ʼo ʼuhiga mo te tagata. ʼE liliu anai te kele kātoa ko he palatiso. Pea ʼi te fakaʼosi, ʼe liufaki anai e Sesu ia te Puleʼaga ki tana Tamai. (1 Kolinito 15:24-26) ʼE ke ʼiloʼi lā he tahi ʼe ke fia palalau ki ai ʼo ʼuhiga mo te Puleʼaga ʼo te ʼAtua?—Lau ia Pesalemo 37:10, 11, 29.