Kotea Te Fakatuʼutuʼu ʼa Te ʼAtua Maʼa Tatou?
KA KE lau te ʼu sulunale, kotea ʼae ʼe talanoa ki ai? Kotea ʼe ke logo ki ai ʼi te televisio pea mo te latio? Ko te agamalohi, mo te tau pea mo te faifakapo. Pea ʼe lagi ke toe tau la mo he aluʼaga fakalotomamahi ʼuhi ko te mahaki peʼe ko he tahi kua mate neʼe ke ʼofa mamahi ai.
Ke ke fai kia koe te ʼu fehuʼi ʼaeni:
-
ʼE ko te fakatuʼutuʼu koa ʼaia ʼa te ʼAtua maʼa ʼaku pea mo toku famili?
-
ʼE au lava maʼu ʼifea he tokoni moʼo tauʼi ʼoku fihifihia?
-
ʼE maʼu anai koa te tokalelei ʼi he ʼaho ʼi te kele?
ʼE tou maʼu ʼi te Tohi-Tapu te ʼu tali ki te ʼu fehuʼi ʼaia.
ʼE AKOʼI MAI ʼI TE TOHI-TAPU, ʼE FAKAHOKO ANAI E TE ʼATUA IA HE ʼU FETOGI KI TE KELE.
-
ʼE mole toe maʼuli mamahi anai te hahaʼi, ʼe mole natou toe matutuʼa anai pea ʼe mole natou toe mamate anai.—Fakaha 21:4
-
“E hopohopo anai te ketu o hage ko he tia.”—Esaia 35:6
-
“E avahi anai te u mata o te u kivi.”—Esaia 35:5
- ʼE fakatuʼuake anai te kau mate.—
-
ʼE mole toe mahaki anai he tahi.—Esaia 33:24
-
ʼE mahu anai te meʼa kai maʼa te hahaʼi fuli.—Pesalemo 72:16
ʼE TOKONI ATU KIA KOE TE ʼU FAʼAHI ʼAE ʼE AKOʼI MAI ʼI TE TOHI-TAPU
ʼE ke lagi manatu ko te ʼu fakapapau ʼae ʼe tuʼu ʼi te pasina 4 mo te 5 ʼo te tohi ʼaeni ʼe ko he ʼu moemisi. Kaʼe, ʼe fakapapau mai e te ʼAtua ʼe kua vave pe tona fakahoko. Pea ʼe fakamahino ʼi te Tohi-Tapu pe ʼe ina fakahoko feafeaʼi anai.
Kaʼe ʼe mole gata ai. He ʼe toe talanoa foki ʼi te Tohi-Tapu pe ʼe tou lava maʼu feafeaʼi te fiafia moʼoni ʼi te temi nei. Kotea te ʼu aluʼaga ʼe ke hoha ai ʼi te temi nei? ʼE lagi ko he ʼu fihifihia fakapaʼaga, peʼe ko te mahaki, peʼe ko te ʼu fihifihia fakafamili peʼe ko te mate ʼo he tahi ʼe ke ʼofa mamahi ai. ʼE feala ke tokoni atu ia te Tohi-Tapu ke ke lava tauʼi te ʼu fihifihia ʼaia. Pea ʼe toe feala foki ke ke toe maʼu ai he ʼu tali fakalotofimalie ki te ʼu fehuʼi ʼaeni:
-
He koʼe ʼe tou maʼuli mamahi?
-
ʼE tou lava tauʼi feafeaʼi ʼotatou fihifihia?
-
Kotea ʼe lava maʼuli fiafia ai toku famili?
-
Kotea ʼae ʼe hoko moka tou mamate?
-
ʼE tou toe sisio anai koa kia natou ʼae ʼe tou ʼoʼofa mamahi ai, kaʼe kua mamate?
-
He koʼe ʼe tou tui papau ʼe fakahoko anai e te ʼAtua ʼana fakapapau?
ʼI tau lau te tohi ʼaeni, ʼe ke fakaha ai ʼe ke fia iloʼi te ʼu moʼoni ʼae ʼe akoʼi mai ʼi te Tohi-Tapu. ʼEi, ʼe tokoni atu anai te tohi ʼaeni kia koe. ʼI te ʼu palakalafe takitahi, ʼe ʼi ai te ʼu fehuʼi ʼe tokoni atu anai ke ke mahino lelei age ki te Tohi-Tapu. ʼE lauʼi miliona te hahaʼi ʼae ʼe natou fiafia ʼi te palalau ki te Tohi-Tapu mo te kau Fakamoʼoni ʼa Sehova. Pea ʼe matou fakaʼamu ʼe ke toe fiafia anai mo koe. ʼOfa pe ke tapuakinaʼi e te ʼAtua ʼau faiga ʼae ke ke iloʼi te ʼu faʼahi ʼae ʼe akoʼi mai ʼi te Tohi-Tapu.