’E TOKAGA ’aupito ia Sehova ’Atua kiā tatou pea ’e fia tokoni mai kiā tatou. Kapau ’e tou tauhi kiā te ia ’o mulimuli ki tona finegalo, pea ’e tou fiafia pea mo teke’i anai te ’u tu’uga fihifihia ’o te ma’uli. ’E tou toe ma’u anai tana tapuakina pea mo tana tokoni. (Isaia 48:17) Kae ’e lau’i teau te ’u lotu ’e nātou lau ’e nātou tala ia te mo’oni ’o ’uhiga mo te ’Atua. Kae ’i tona fakahagatonu, ’e mole nātou fakahā te mo’oni ’o ’uhiga mo te ’Atua pea mo te ’u me’a ’aē ’e ina fakama’ua mai.

² E feafea’i hakotou ’ilo’i ia te fa’ahiga tauhi ’aē ’e lelei’ia e Sehova? ’E mole he ’uhiga ’o hakotou ako pea mo fakatatau te ’u akonaki ’a te ’u lotu fuli mo’o ’ilo’i pe’e kofea te lotu mo’oni. ’E tonu pe ke koutou ako te ’u me’a ’aē ’e fakahā mo’oni ’i te Tohi-Tapu ’o ’uhiga mo te tauhi mo’oni. Tou to’o he fakatā: ’E lahi te ’u fenua, ’e nātou fihifihia ’uhi ko te falā loi. Kapau ’e foaki atu hakotou gāue ke koutou kumi te falā loi, ’e koutou kumi feafea’i anai ia te falā ’aia? ’E koutou ako faka’atamai anai koa ke koutou ’ilo’i kehe ia te agaaga ’o te ’u fa’ahiga falā loi? Kailoa ia. ’E koutou faka’aoga’i lelei anai tokotou temi mo’o akoako fakalelei pe’e feafea’i te falā mo’oni. Ka koutou ’ilo’i leva te agaaga ’o te falā mo’oni, ’e feala ai leva hakotou ’ilo’i kehe ia te falā loi. ’E toe feiā pe, kapau ’e tou ako ke tou ’ilo’i ia te lotu mo’oni, ’e feala ai hatatou ’ilo’i ia te ’u lotu hala.

³ ’E ma’uhiga ke tou tauhi kiā Sehova ’o mulimuli ki tona finegalo. ’I te manatu ’a te tokolahi, ko te ’u lotu fuli ’e lelei’ia e te ’Atua, kae ’e mole ’ui ’i te Tohi-Tapu ia te me’a ’aia. ’E ’i ai te tahi me’a ’e tonu ke fai e ia ’aē ’e ina ’ui ’e Kilisitiano. Ne’e ’ui fēnei e Sesu: “’E mole ko nātou ’aē ’e nātou ’ui mai kiā te au: ‘’Aliki, ’Aliki,’ ka nātou hū anai ki te pule’aga ’o selo, kae ko ’aē ’e ina fai te finegalo ’o taku Tāmai ’aē ’e ’i selo.” Koia ke tali tatou e te ’Atua, ’e tonu ke tou ’ilo’i te ’u me’a ’aē ’e ina fakama’ua mai pea mo tou ma’uli’i. Ne’e fakahigoa’i e Sesu ia te haha’i ’aē ’e mole nātou fai te finegalo ’o te ’Atua ko “he ’u tagata ’e nātou manuki ki te lao.” (Mateo 7:21-23, MN) Ohage ko te falā loi, ko te lotu hala ’e mole hona ’aoga. Pea ’e toe kovi age, he’e ko te lotu ’aia ’e fakatupu tu’utāmaki mo’oni ki te ma’uli ’o te haha’i.

⁴ ’E foaki e Sehova ki te haha’i fuli ia te fealagia ’aē ke nātou ma’u te ma’uli he’egata. Kae ke feala hatatou ma’u ia te ma’uli he’egata ’i te Palatiso, ’e tonu ke tou tauhi ki te ’Atua ’aki te tauhi ’aē ’e ina lelei’ia, pea mo tou mā’u’uli ’i te temi nei ’o mulimuli ki te fa’ahiga ma’uli ’aē ’e ina lelei’ia. Kae ko te tokolahi ’e nātou fakafisi ki te ’u fa’ahi ’aia. Koia ’aē ne’e ’ui ai e Sesu: “Koutou hū ’i te matapā fāveliveli; he’e laulahi pea mo ’ātea ia te ala ’aē ’e fakatau ki te faka’auha, pea e tokolahi ia nātou ’e hū ai; kae fāveliveli ia te matapā pea mo lauveliveli ia te ala ’aē ’e fakatau ki te ma’uli, pea e tokosi’i ia nātou ’e nātou ma’u.” (Mateo 7:13, 14, MN) Ko te lotu mo’oni ’e ina taki tatou ki te ma’uli he’egata, kae ko te lotu hala ’e ina taki tatou ki te faka’auha. ’E mole loto e Sehova ke faka’auha he tahi, koia ’aē ne’e ina foaki ai ki te haha’i ’i te ’u potu fuli ’o te kele ia te faigamālie ’aē ke nātou ’ilo’i ia ia. (2 Petelo 3:9) Koia ko tatatou fa’ahiga tauhi ’aē ki te ’Atua ’e feala ke ina fakaiku ai tatou ki te ma’uli pe’e ki te mate.

E FEAFEA’I HATATOU ’ILO’I IA TE LOTU MO’ONI?

⁵ ’E tou lava ma’u feafea’i ‘te ala ’o te ma’uli’? Ne’e ’ui e Sesu, ’e ’iloga anai te lotu mo’oni ’i te ma’uli ’o te haha’i ’aē ’e nātou ma’uli’i. Ne’e ina ’ui fēnei: “’E koutou ’ilo’i anai ia nātou ’i tonatou ’u fua… ko te ’akau lelei fuli pe ’e fua ’aki te ’u fua matalelei.” (Mateo 7:16, 17, MN) Ko tona faka ’uhiga, ’e ’iloga anai te haha’i ’aē ’e nātou ma’uli’i te lotu mo’oni ’i tanatou tauhi pea mo tanatou ’u aga. Logola ’e nātou he’e haohaoa pea mo nātou lakahala, kae ko te kau atolasio mo’oni ’e nātou faiga ke nātou fai ia te finegalo ’o te ’Atua. Tou vaka’i age mu’a te ’u puani e ono mo’o ’ilo’i ia te haha’i ’aē ’e nātou ma’uli’i te lotu mo’oni.

KO NĀTOU ’AĒ ’E NĀTOU TAUHI KI TE ’ATUA MO’ONI

• ’e nātou fakatafito tanatou ’u akonaki ki te Tohi-Tapu
• ’e nātou tauhi pe kiā Sehova pea mo faka’ilo’ilo tona huafa
• ’e nātou ma’u te fe’ofa’ofani mo’oni
• ’e nātou tali ia Sesu Kilisito ko tonatou fakama’uli ’aē ne’e hino’i e te ’Atua
• ’e mole nātou kau ki te malamanei
• ’e nātou faka mafola ko te Pule’aga ’o te ’Atua ’e ko te falala’aga pe ’aia e tahi ’a te tagata

⁶Ko te ’u kaugana ’a te ’Atua ’e nātou fakatafito tanatou ’u akonaki ki te Tohi-Tapu. ’E ’ui fēnei ’i te Tohi-Tapu: “Ko te Tohi-Tapu kātoa ’e ha’u mai te ’Atua pea ’e ’aoga mo’o ako’i, mo’o fakatonutonu’i, mo’o fakatokatoka ’o te ’u me’a, mo’o akonaki’i ’i te faitotonu, kote’uhi ke kātoa lelei te tagata [pe’e ko te fafine] ’a te ’Atua, pea mo teuteu lelei ki te ’u gāue lelei fuli pe.” (2 Timoteo 3:16, 17, MN) Ne’e ’ui e te ’apositolo ko Paulo ki tona ’u kaume’a Kilisitiano: “I tautou tali te folafola a te Atua nee koutou logo ki ai maià matou, nee mole koutou tali o hage ko he tala a te tagata, kae nee koutou tali i tona uhiga mooni, ko he folafola a te Atua.” (1 Tesalonika 2:13) Koia, ’e mole fakatafito te ’u akonaki pea mo te ’u gāue ’a te lotu mo’oni ki te ’u manatu fakatagata pe’e ki he ’u talatisio. ’E fakatafito ki te Folafola ’a te ’Atua, te Tohi-Tapu.

⁷ Ne’e tuku e Sesu Kilisito te fa’ifa’itaki lelei he ne’e ina fakatafito tana ’u akonaki ki te Folafola ’a te ’Atua. ’I tana faikole ki tana Tāmai ’aē ’e ’i selo, ne’e ina ’ui fēnei: “E ko te Mooni tau folafola.” (Soane 17:17) Ne’e tui ia Sesu ki te Folafola ’a te ’Atua, pea ko me’a fuli ne’e ina ako’i ki te haha’i ne’e alutahi mo te Tohi-Tapu. Ne’e tautau ’ui e Sesu: “’E tohi fēnei.” (Mateo 4:4, 7, 10, MN) Pea ne’e faka’aoga’i e Sesu he vaega. ’O toe feiā pe, ko te haha’i ’a te ’Atua ia ’aho nei ’e mole nātou ako’i tanatou ’u manatu totonu. ’E nātou faka tui ko te Tohi-Tapu ’e ko te Folafola ’a te ’Atua, pea ’e nātou fakatafito tanatou ’u akonaki kiai.

⁸Ko te haha’i ’aē ’e nātou ma’uli’i te lotu mo’oni ’e nātou atolasio pe kiā Sehova pea ’e nātou faka mafola tona huafa. Ne’e ’ui fēnei e Sesu: “Ko Sehova, tou ’Atua, ’aē ’e ma’ua ke ke atolasio ki ai pea ’e ko ia tokotahi pe ’aē ’e ma’ua ke ke tauhi ki ai ’aki he tauhi tapu.” (Mateo 4:10, MN) Koia ko te ’u kaugana ’a te ’Atua ’e nātou tauhi pe kiā Sehova. ’E fakama’ua ’i te tauhi ’aia ke ’ilo’i e te haha’i pe’e ko ai te huafa ’o te ’Atua mo’oni pea e feafea’i te ’Atua ’aia. ’E ’ui iā Pesalemo 83:18: “Ko koe, ’aē ko tou huafa ko Sehova, ko koe tokotahi pe, te Mā’oluga ’Aupito ’i te kele kātoa.” Ne’e tuku mai e Sesu te fa’ifa’itaki ’o ’uhiga mo te tokoni ’aē ke fai ki te haha’i ke nātou ’ilo’i ia te ’Atua, ohage ko tana ’ui ’i tana faikole ’aenī: “Ne’e au faka’ilo tou huafa ki te kau tagata ’aē ne’e ke foaki mai kiā te au, mai te lotolotoiga ’o te malamanei.” (Soane 17:6, MN) ’O toe feiā pe, ko te kau atolasio mo’oni ia ’aho nei ’e nātou ako’i ki te haha’i ia te huafa ’o te ’Atua, mo tana ’u fakatu’utu’u pea mo tona ’u kalitātē.

⁹Ko te haha’i ’a te ’Atua ’e nātou ma’u te fe’ofa’ofani mo’oni. Ne’e ’ui e Sesu: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te fe’ofa’ofani.” (Soane 13:35) Ne’e ma’u e te kau ’uluaki Kilisitiano te ta’i fe’ofa’ofani ’aia. ’Aki te ’ofa ’aē ’e ako’i mai e te ’Atua, ’e tou lava tau’i te ’u fihifihia fakafenua, faka sosiale, faka pule’aga, pea mo ina fakatahi’i te haha’i ke nātou liliu ko he fo’i famili fale tautehina mo’oni. (Kolose 3:14) ’E lahi te ’u lotu hala ’e mole ’asi ’i tonatou ’u haha’i ia te ta’i ’ofa ’aia. Koteā tona fakamo’oni? ’E tou sio ki tanatou ’u haha’i ’e fefakapogi’aki ’uhi ko te ’u tokakovi faka pule’aga pe’e fakafenua. Kae ko te kau Kilisitiano mo’oni ’e mole nātou faka’aoga’i te ’u mahafu tau mo’o matehi tonatou ’u tēhina Kilisitiano pe’e ko ni’ihi age. ’E ’ui ’i te Tohi-Tapu: “Aki te mea aeni e ha ai te u fanau a te Atua mo te u fanau a te temonio: Ko he tahi e mole ina mauli’i te susitisia e mole ’a te Atua, pea mo ia ae e mole ofa ki tona tehina…. E tonu ke tou fe’ofa’aki. E mole hage ko Kaino, nee fakatahi mo te Kovi, pea nee ina fakapogi tona tehina.”—1 Soane 3:10-12; 4:20, 21.

¹⁰ Kae ko te ’ofa mo’oni ’e mole gata ’aki tatatou mole matehi ’o ni’ihi. Ko te kau Kilisitiano mo’oni ’e nātou faka’aoga’i lahi tonatou temi, mo tonatou mālohi, pea mo tonatou ’u koloā mo’o fetokoni’aki pea mo fefakaloto mālohi’aki. (Hepeleo 10:24, 25) ’E nātou fetokoni’aki ’i te ’u temi faigata’a’ia, pea ’e mole nātou fai he ’u aga fakakākā ki te haha’i. ’E nātou ma’uli’i te tokoni ’a te Tohi-Tapu ’aē ’e ’ui ai ke nātou “fai ia te lelei ki te tagata fuape.”—Kalate 6:10.

¹¹’E tali e te kau Kilisitiano mo’oni ia Sesu Kilisito ’e ko tonatou fakama’uli ’aē ne’e hino’i e te ’Atua. ’E ’ui ’i te Tohi-Tapu: “E mole mau te mauli heegata i he tahi’age, koteuhi e mole he tahi’age higoa nee kua foaki ki te tagata i te lalolagi e tonu ke fakamauli ai tatou.” (Gaue 4:12) Ohage ko tona fakahā ’i te Kapite 5, ne’e foaki e Sesu tona ma’uli mo’o totogi ia te haha’i fakalogo mai te agahala. (Mateo 20:28) Tahi ’aē me’a, ko Sesu ’e ko te Hau ’aē ne’e fakanofo e te ’Atua ’i te Pule’aga ’i selo mo’o takitaki ia te kele kātoa. Pea ko te ’Atua ’e ina fakama’ua mai mo kapau ’e tou fia ma’u te ma’uli he’egata, ke tou fakalogo kiā Sesu pea mo ma’uli’i tana ’u akonaki. Koia ’e ’ui ai ’i te Tohi-Tapu: “Kia ia e tui ki te Alo e ina maù te mauli heegata; pea kia ia e mole fakalogo ki te Alo e mole mamata anai ki te mauli.”—Soane 3:36.

¹²Ko te kau atolasio mo’oni ’e mole nātou kau ’i te malamanei. ’I tona fakamāu’i iā mu’a ’o te pule Loma ko Pilato, ne’e ’ui fēnei e Sesu: “E mole i te malama aeni toku puleagahau.” (Soane 18:36) ’I te ’u potu fuli ’aē ’e mā’u’uli ai te ’u tisipulo mo’oni ’a Sesu, ’e nātou fakalogo ki te takitaki ’o tona Pule’aga ’i selo pea ’e mole nātou kau ki te ’u me’a faka politike ’o te malamanei, pea mo tona ’u tokakovi. Kae ’e mole tā’ofi e te kau atolasio ’a Sehova ia te haha’i ke nātou kau ki te ’u me’a faka politike, ohage la ko te fia ma’u tu’ulaga ’i he kūtuga faka politike pe’e ko te vote. Logola tanatou mole kau ki te ’u me’a faka politike, kae ’e nātou faka’apa’apa ki te ’u lao a te pule’aga. Koteā tona tupu’aga? Kote’uhi ko te Folafola ’a te ’Atua ’e ina fakatotonu age kiā nātou ke nātou “fakalogo” ki te “’u pule mā’oluga.” (Loma 13:1, MN) Ka mole ’alutahi te ’u lao ’a te ’Atua pea mo te ’u fakatu’utu’u ’a te kau politike, pea ’e muli’i anai e te kau atolasio mo’oni ia te fa’ifa’itaki ’a te kau ’apositolo, ’aē ne’e nātou ’ui fēnei: “E maua ke fakalogo ki te Atua i te fakalogo ki te tagata.”—Gaue 5:29; Maleko 12:17.

¹³Ko te ’u tisiplo mo’oni ’a Sesu ’e nātou faka mafola ko te Pule’aga ’o te ’Atua ’e ko te falala’aga pe ’aia e tahi ’a te malamanei. Ne’e fakakikite fēnei e Sesu: “Pea ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.” (Mateo 24:14) Ko te kau tisipulo mo’oni ’a Sesu Kilisito ’e nātou faka mafola ko te Pule’aga ’o te ’Atua ’i selo ’e ko te falala’aga pe ’aia ki te malamanei, kae ’e mole nātou uga te haha’i ke nātou falala ki te kau takitaki ’o te tu’u ’aenī mo’o fakatokatoka tonatou ’u fihifihia. (Pesalemo 146:3) Ne’e ako’i mai e Sesu ke tou faikole ki te pule’aga haohaoa ’aia, ’i tana ’ui ’aenī: “Ke hoko mai tou pule’aga. Ke fai tou finegalo i te kele ohage ko selo.” (Mateo 6:10, MN) Ne’e fakakikite ’i te Folafola ’a te ’Atua, ko tona Pule’aga ’e ’i selo ’e ina “laliki anai pea mo fakagata anai te ’u pule’aga fuli ’aia [’o te temi nei], pea ko ia totonu ’e tu’u anai ’o a’u ki he ’u temi ’e mole ’ilo’i hona gata’aga.”—Taniela 2:44.

¹⁴ ’Aki te ’u puani ’aē ne’e tou talanoa kiai, koutou fai te ’u fehu’i ’aenī: ‘Ko te lotu fea ’aē ’e fakatafito tana ’u akonaki ki te Tohi-Tapu pea mo ina faka’ilo’ilo te huafa ’o Sehova? Ko te lotu fea ’aē ’e ina ma’uli’i te ’ofa ’aē ’e ako’i mai e te ’Atua, mo tui kiā Sesu, ’e mole kau ki te ’u me’a ’o te malamanei, pea ’e ina faka mafola ko te Pule’aga ’o te ’Atua ’e ko te falala’aga pe ’aia ’o te malamanei? ’I te ’u lotu fuli ’aē ’e ma’u ’i te malamanei, ko te lotu fea ’aē ’e ina fakahoko te ’u fa’ahi fuli ’aia?’ ’E lahi te ’u fakamo’oni ’e ’asi lelei ai, ’e ko te kau Fakamo’oni ’a Sehova.—Isaia 43:10-12.

KOTEĀ ’AĒ KA KOUTOU FAI ANAI?

¹⁵ ’E mole fe’auga pe hatatou tui ki te ’Atua ke feala hana tali tatou. ’E ’ui ’i te Tohi-Tapu, mā’iape la mo te ’u temonio ’e nātou tui ’e ’i ai te ’Atua. (Sakopo 2:19) Kae ’e mole nātou fai te finegalo ’o te ’Atua pea ’e mole ina tali nātou. Koia ke lelei’ia tatou e te ’Atua, ’e mole tonu pe ke tou tui ’e ma’uli mo’oni kae ’e toe tonu foki ke tou fai tona finegalo, mo tou mavae mai te lotu hala pea mo tou kau ki te tauhi mo’oni.

¹⁶ Ne’e fakahā e te ’apositolo ko Paulo, ’e tonu ke tou mavae mai te lotu hala. Ne’e ina tohi fēnei: “ ‘Koutou mavae mai te lotolotoiga ’o nātou, pea ke koutou mavae mai ai, ko te ’ui ’aia ’a Sehova, pea ’aua na’a koutou fāfā ki te me’a ’aē ’e he’ema’a’; ‘pea ’e au tali anai koutou.’ ” (2 Kolonito 6:17, MN; Isaia 52:11) Koia ko te kau Kilisitiano mo’oni ’e nātou fakafeagai kiā me’a fuli ’e ’i ai hona pikipikiga mo te tauhi hala.

¹⁷ ’E fakahā ’i te Tohi-Tapu ko te ’u lotu hala fuli ’e nātou kau ki te “Papiloni Lahi.”* (Apokalipesi 17:5, MN) Ko te higoa ’aia ’e ina fakamanatu’i mai ia te kolo ’āfea ko Papiloni, ’aē ne’e ko te kamata’aga ’aia ’o te lotu hala ’i te ’osi ’o te Tulivio ’i te temi ’o Noe. ’E lahi te ’u akonaki pea mo te ’u to’oto’oga ’e fai ’i te temi nei ’i te ’u lotu hala ’e ha’u mai te Papiloni ’āfea. Ohage la, ko te haha’i ’o Papiloni ne’e nātou atolasio ki te ’u atua e tolu, pe’e ko te ’u tahitolu. Ia ’aho nei, ’e lahi te ’u lotu ko tanatou akonaki tāfito ’e ko te Tahitolu. Kae ’e ako’i lelei mai ’i te Tohi-Tapu ko te ’Atua mo’oni pe e tahi, ko Sehova, pea ko Sesu Kilisito ’e ko tona ’Alo. (Soane 17:3) Ne’e toe tui te kau Papiloni ko te haha’i ’e ’i ai tonatou nefesi tuputupua mokā nātou mamate pea ’e feala ke fakamamahi’i te ’u nefesi ’aia ’i he ifeli. Ia ’aho nei, ’e lahi te ’u lotu ’e nātou ako’i ki te haha’i ko te nefesi tuputupua pe’e ko te laumālie ’e feala ke fakamamahi’i ’i he ifeli.

¹⁸ Mai tona ’alu’aga ’aē kua mafola ’i te malamanei kātoa ia te tauhi faka Papiloni, koia ’e feala ke tou ’ui ko te Papiloni Lahi ’o te temi nei ’e ko te kautahi faka malamanei ’o te ’u lotu hala. Pea ko te ’Atua ne’e ina fakakikite, ’e faka’auha fakafokifā anai ia te kautahi ’aia ’o te ’u lotu hala. (Apokalipesi 18:8) Kua mahino koa ’i te temi nei pe ko’e ’e ma’uhiga ke koutou mavae mai te ’u fa’ahi fuli ’o Papiloni Lahi? ’E loto e Sehova ’Atua ke koutou foimo “mavae maia te ia” he’e kei ma’u te temi ke koutou feholaki.—Apokalipesi 18:4.

¹⁹ Kapau ’e koutou mavae mai te lotu hala, ko ’ihi ’o tokotou ’u kaume’a ’e mole nātou toe fia fakatahi anai mo koutou. Kae ’e lahi age anai te ’u tapuakina ’aē ka koutou ma’u mo kapau ’e koutou tauhi mo tana haha’i kiā Sehova. Ohage ko te ’u ’uluaki tisipulo ’a Sesu ’i tanatou līaki te ’u me’a fuli ’aē, kae nātou muli ia te ia, ’e koutou ma’u anai tokotou ’u tēhina mo tuaga’ane e tokolahi. ’E koutou kau ’i te fo’i famili ’i te malamanei kātoa ’o te toko lau’i miliona kau Kilisitiano mo’oni ’e nātou ’o’ofa mo’oni kiā koutou. Pea ’e koutou ma’u anai ia te ’amanaki taulekaleka ’o te ma’uli he’egata “’i te tu’u ’o te ’u fa’ahiga me’a ka ha’u.” (Maleko 10:28-30, MN) ’E feala ’aki te temi, kiā nātou ’aē ne’e nātou fakafisi kiā koutou ’uhi ko takotou tui, ke nātou ako ia te Tohi-Tapu, ’o nātou liliu ko he kau atolasio ’a Sehova.

²⁰ ’E ako’i mai ’i te Tohi-Tapu, kua tou fakaōvi ki te temi ’aē ka faka’auha ai e te ’Atua ia te mālama agakovi ’aenī, kae ina fakatu’u he mālama fo’ou mo faitotonu ’e fakalogo ki te takitaki ’o tona Pule’aga. (2 Petelo 3:9, 13) ’E ko he mālama taulekaleka anai! Pea ’i te mālama fo’ou pea mo faitotonu ’aia, ’e ko te lotu pe anai e tahi, ia te tauhi mo’oni. Koia ’e lelei anai ke koutou fai te ’u fetogi ’aē ka nātou faka fealagia anai ke koutou kau fakatahi mo te kau atolasio mo’oni ’o te temi nei.

*  Kapau ’e koutou fia ma’u he tahi ’u fakamahino pe ko’e ko Papiloni Lahi ’e ina fakatātā ia te kautahi fakamalamanei ’o te ’u lotu hala, koutou vaka’i Te Tahi ’u Fakamahino.