KAPITE HOGOFULU-MA-HIVA
Koutou Nonofo ’i Te ’Ofa ’o Te ’Atua
Koteā tona faka ’uhiga ke tou ’ofa ki te ’Atua?
Koteā ’aē ’e tonu ke tou fai ke feala hatatou nonofo ’i te ’ofa ’o te ’Atua?
Koteā anai te fakapale ’aē ka foaki e Sehova kiā nātou ’aē ’e nonofo ’i tona ’ofa?
KAPAU la ’e koutou ha’ele ’i te ala, kae ’e lalahi te matagi pea ’e kamata fakapō’uli te lagi. ’E tapa te hila, mo pā te mana, pea mo ’ua lalahi. ’E koutou lele ’o kumi he koga me’a ke koutou fakamalumalu ai. Pea ’e koutou sio ’e tu’u ōvi mai ki te ala ia te fale mālohi, ’e moamoa, pea mo matalelei. ’E koutou lelei’ia ’aupito anai ia te fale ’aia!
![Ko te tagata ’e kumi haofaki’aga mai te matagi lahi](https://assetsnffrgf-a.akamaihd.net/assets/l/bh/bh_WA/184.jpg)
’E liliu anai koa ia Sehova ko hokotou hola’aga ’i te ’u temi faigata’a’ia ’aenī?
2 ’E tou mā’u’uli ’i te ’u temi maveuveu, pea ’e faka’āsili kovi te ’u ’alu’aga ’o te malamanei. Kae ’e ’i ai totatou hola’aga ’e ina lava hāofaki tatou mai he tu’utāmaki lahi. Ko ai totatou hola’aga ’aia? ’E ’ui fēnei ’i te Tohi-Tapu: “’E au fia ’ui kiā Sehova: ‘Ko koe toku hola’aga pea mo toku tule mālohi, toku ’Atua, ’aē ’e au falala anai ki ai.’”—Pesalemo 91:2.
3 ’E koutou tokaga’i, ’e feala ke hāofaki tatou e Sehova, te Tupu’aga pea mo te Tu’i ’Aliki ’o te ’atulaulau. ’E feala ke ina hāofaki tatou, he’e mālohi age ’i te tagata fuape pe’e ’i he fa’ahiga me’a pe ’e feala ke tou tu’utāmaki ai. Tatau aipe pe’e hoko kiā tatou he tu’utāmaki, kae ’e feala kiā Sehova ke ina molehi tona ’u fua kovi. Koteā ’aē ’e tonu ke tou fai ke liliu ia Sehova ko hotatou hola’aga? ’E tonu ke tou falala kiā te ia, pea mo mulimuli ki te tokoni ’aenī ’i te Folafola ’a te ’Atua: “Koutou nonofo ’i te ’ofa ’o te ’Atua.” (Suta 21, MN) Ei, ’e tonu ke tou nonofo ’i te ’ofa ’o te ’Atua, ’o taupau he ’u felogoi ’ofa mo tatatou Tāmai ’aē ’i selo. Kapau ’e tou fai te fa’ahi ’aia, ’e tou lava falala ai ’e ina hāofaki anai tatou. Kae koteā ’aē ’e tonu ke tou fai ke feala hatatou felogoi mo te ’Atua?
TOU MAHINO KI TE ’OFA ’O TE ’ATUA KIĀ TATOU PEA MO TOU TALI KI TONA ’OFA
4 Ke feala hatatou nonofo ’i te ’ofa ’o te ’Atua, ’e tonu ke tou mahino pe ne’e fakahā feafea’i mai e te ’Atua tona ’ofa ’aē kiā tatou. Koutou manatu’i te ’u akonaki faka Tohi-Tapu ’aē ne’e koutou ako ’i te tohi ’aenī: Ko Sehova, te Tupu’aga, ne’e ina foaki mai te kele, ke liliu ko hotatou nofo’aga taulekaleka. Ne’e ina fakatupu ’i ai te ’u me’a kehekehe, ohage ko te me’a kai, mo te vai, mo te ’u vao ’akau, te ’u manu matalelei, pea mo te ’u koga me’a taulekaleka. ’I tona ’uhiga Matapuna ’o te Tohi-Tapu, ne’e fakahā mai e Sehova tona huafa pea mo tona ’u kalitātē. Tahi ’aē me’a, ’e fakahā mai ’i tana Folafola ne’e ina fekau’i mai tona ’Alo ko Sesu ke ha’u ki te kele, ’o tali mamahi pea mo mate ma’a tatou. (Soane 3:16) Pea koteā te ’aoga ’o te me’a ’ofa ’aia kiā tatou? ’E ina foaki mai he ’amanaki ki he ka ha’u taulekaleka.
5 ’E toe fakalogo tatatou ’amanaki ’o ’uhiga mo te ka ha’u ki te tahi fakatu’utu’u ’a te ’Atua. Kua fakatu’u e te ’Atua te pule’aga ’i selo, ’e ko te Pule’aga Faka Mesia. Kua vave hoko mai te temi ’aē ka ina pulihi anai ia te ’u mamahi fuli pea mo fakaliliu te kele ko he palatiso. ’I me’a lelei foki hatatou mā’u’uli ai ’o he’egata ’i te tokalelei pea mo te fiafia. (Pesalemo 37:29) ’I te temi ’aenī, ’e ina foaki mai he takitaki ke tou faka’aoga’i lelei totatou ma’uli ’i te temi nei. Ne’e ina foaki mai mo te fealagia ’o te faikole, ke tou felogoi fa’ifa’italiha mo ia ’i he temi pe ’e tou loto kiai. Ko’ena pe he ’u ’alu’aga ne’e tou vaka’i ’o ’uhiga mo te ’ofa ’o Sehova ki te malamanei pea mo tatou takitokotahi.
6 Ko’eni te fehu’i ma’uhiga ’aē ’e tonu ke koutou tali kiai: Koteā anai taku tali ki te ’ofa ’o Sehova? Tokolahi ’e nātou ’ui anai: “’E tonu ke au ’ofa kiā Sehova.” ’E koutou manatu feiā koa? Ne’e tala mai e Sesu te fakatotonu ’aē ’e lahi tokotahi: “’E tonu ke ke ’ofa kiā Sehova, tou ’Atua, ’aki tou loto kātoa, pea mo tou nefesi kātoa, pea mo tou laumālie kātoa.” (Mateo 22:37, MN) ’E lahi te ’u tupu’aga ke koutou ’o’ofa ai kiā Sehova ’Atua, kae koteā ’aē ’e tonu ke tou fai mo’o ’ofa kiā Sehova ’aki totatou loto kātoa, mo totatou nefesi kātoa, pea mo totatou laumālie kātoa? ’E fe’auga pe koa ’i hakita manatu ’ofa kiā te ia?
![Ko te tega’i ’apo](https://assetsnffrgf-a.akamaihd.net/assets/l/bh/bh_WA/186.jpg)
7 ’E ’ui ’i te Tohi-Tapu ko te ’ofa ki te ’Atua ’e laka ia ’i te ’u me’a ’aē ’e tou logo’i ’i totatou loto. ’E mo’oni ’e ma’uhiga ke tou logo’i ’e tou ’o’ofa kiā Sehova, kae ’e ko te kamata’aga pe ia ’o tatatou ’ofa mo’oni kiā te ia. Ko’eni tona fa’ifa’itaki: ’E ’aoga he tega’i ’apo mo’o fakahomo he fu’u ’apo. Kapau ’e koutou fia kai hakotou fo’i ’apo, ’e koutou lelei’ia koa ke foaki atu pe he tega’i ’apo? Kailoa! ’O toe feiā pe, ko tatatou manatu ’ofa ’aē kiā Sehova ’Atua, ’e ko te kamata’aga pe ia. ’E ’ui fēnei mai ’i te Tohi-Tapu: “Ko’eni te faka ’uhiga ’o te ’ofa ’aē ki te ’Atua: ke tou ma’uli’i tana ’u fakatotonu; pea ko tana ’u fakatotonu ’e mole mamafa ia.” (1 Soane 5:3, MN) Ko te ’ofa mo’oni ki te ’Atua, ’e tonu ke ’i ai hona ’u fua matalelei, pea ’e tonu ke fai ’aki he ’u gāue.—Mateo 7:16-20.
8 ’E tou fakahā totatou ’ofa ki te ’Atua mokā tou mulimuli ki tana ’u fakatotonu pea mo ma’uli’i tana ’u pelesepeto. ’E mole faigata’a fau ia te fa’ahi ’aia. ’E mole mamafa te ’u lao ’a Sehova, kae ’e nātou faka fealagia mai ke lelei totatou ma’uli, ke tou mā’u’uli fiafia pea mo mā’u’uli haohaoa. (Isaia 48:17, 18) Kapau ’e tou mulimuli ki te takitaki ’a Sehova, pea ’e tou fakahā ai ki tatatou Tāmai ’aē ’i selo ’e tou fakafeta’i kiā me’a fuli ’aē ne’e ina fai ma’a tatou. Kae ko te tokosi’i iā ’aho nei ’e nātou ma’u te ta’i loto fakafeta’i ’aia. ’E mole tou fia hage ko ’ihi haha’i ’aē ne’e nātou ma’uli galo, ’i te temi ’aē ne’e kei ma’uli ai Sesu ’i te kele. Ne’e fakamālōlō e Sesu te ’u tagata kilia e toko hogofulu, kae ko te tokotahi pe ’aē ne’e liliu mai ’o fakamālo kiā Sesu. (Luka 17:12-17) ’E mahino ia ’e tou fia hage anai ko te tagata ’aē ne’e loto fakafeta’i, kae mole tou hage ko te toko hiva ’aē ne’e nātou ma’uli galo!
9 Kae koteā te ’u fakatotonu ’a Sehova ’e tonu ke tou mulimuli kiai? Ne’e tou vaka’i ’ihi ’o te ’u fakatotonu ’aia ’i te tohi ’aenī, koia tou toe vaka’i age mu’a. Kapau ’e tou mulimuli ki te ’u fakatotonu ’a te ’Atua, pea ’e feala anai hatatou nonofo ’i tona ’ofa.
TOU FAKAŌVI KIĀ SEHOVA
10 Ko te kumi ’aē ke kita mahino kiā Sehova, ’e ko he potu ma’uhiga ke kita fakaōvi kiā te ia. Ko te fa’ahiga fakatu’utu’u ’aia ’e mole tonu ke fakagata ’i he temi. Kanapaula ne’e koutou ’i tu’a lolotoga he pō momoko, pea mo koutou fakamāfana iā tafa ’o he afi, ’e koutou tuku anai koa ke mate te afi? Kailoa. ’E koutou haga ’ai anai he ’u mo’i fafie ke haga ’ulo ia te afi. ’E fakalogo tokotou ma’uli kiai. Ohage pe ko te mo’i fafie ’e ina haga faka’ulo ia te afi, ’e toe feiā mo “te ’atamai mālama ’o te ’Atua,” ’e ina fakamālohi’i totatou ’ofa ’aē kiā Sehova.—Ta’aga Lea 2:1-5.
Ko tokotou ’ofa kiā Sehova, ’e hage ko he afi ’e tonu ke koutou haga ’ai kiai he ’u fafie ke haga ’ulo
![Ko te tagata ’e fakamāfana iā tafa ’o te afi](https://assetsnffrgf-a.akamaihd.net/assets/l/bh/bh_WA/187.jpg)
11 Ne’e loto ia Sesu ke haga fakama’uli pea mo fakamālohi’i e tana kau tisipulo ia tonatou ’ofa ’aē kiā Sehova pea mo Tana Folafola mo’oni taputapu. ’I tona ’osi fakatu’uake, ne’e ako’i age e Sesu ki tana ’u tisipulo e toko lua ’ihi lea faka polofeta ’o te Tauhi ’Āfea ne’e ina fakahoko. Ne’e malave feafea’i kiā nāua? Ne’e nā ’ui fēnei: “Pe nee mole vela [koa la] ota loto, i tana talanoa mai kia taua i te ala, pea mo tana [“fakamahino,” MN] mai kia taua [ia] te Tohitapu?”—Luka 24:32.
12 ’I takotou kamata ako ia te ’u me’a ’aē ’e ako’i mo’oni mai ’i te Tohi-Tapu, ne’e koutou fakatokaga’i koa ko tokotou loto, ne’e fiafia ’o ’uhiga mo Sehova, mo loto māfana, pea mo ’ofa ki ai? ’E mahino ia, pea ko te tokolahi ne’e nātou logo’i te me’a ’aia. Ko te me’a ’aē ’e faigata’a, ’e ko te taupau ’o te ’ofa mālohi ’aia ke haga ma’uli pea mo tuputupu. ’E mole tou fia mulimuli ki te aga ’a te malamanei iā ’aho nei, he ne’e fakakikite fēnei e Sesu: “Ko te ’ofa ’o te tokolahi ’e [puli] anai ia.” (Mateo 24:12, MN) Koteā ’aē ’e tonu ke koutou fai ke mole puli tokotou ’ofa ’aē kiā Sehova pea mo te ’u mo’oni ’o te Tohi-Tapu?
13 Koutou haga ako ke koutou ’ilo’i ia Sehova ’Atua pea mo Sesu Kilisito. (Soane 17:3) Koutou metitāsio’i, pe’e koutou fakakaukau’i, te ’u me’a ’aē ’e koutou ako ’i te Folafola ’a te ’Atua, ’o koutou fehu’i fēnei kiā koutou totonu: ‘Ko te fa’ahi ’aenī ’e ina ako’i mai teā ’o ’uhiga mo Sehova ’Atua? Koteā te tahi tupu’aga ke au ’ofa ai kiā te ia ’aki toku loto kātoa, mo toku ’atamai kātoa, pea mo toku nefesi kātoa?’ (1 Timoteo 4:15) Ko te ta’i metitāsio ’aia ’e ina haga taupau anai ke mālohi tokotou ’ofa kiā Sehova, ohage ko he afi ’e mole mate.
14 Ko te faikole tu’uma’u, ’e ko te tahi ’aia fa’ahi mo’o taupau ke mālohi totatou ’ofa kiā Sehova. (1 Tesalonika 5:17) ’I te Kapite 17 ’o te tohi ’aenī, ne’e tou vaka’i ai ko te faikole ’e ko he me’a ’ofa ma’uhiga mai te ’Atua. Ohage pe ko he ’u felogoi fakatagata ’e tuputupu ’uhi ko he felogoi ’e fai tu’uma’u pea mo fa’ifa’italiha, ’o toe feiā pe, ko tatatou ’u felogoi mo Sehova ’e haga mālohi anai pea mo tuputupu mo kapau ’e tou faikole tu’uma’u kiā te ia. ’E ma’uhiga ke tou tōkakaga ki tatatou ’u faikole, na’a liliu ko he ’u palalau ’e tou lau liuliuga, kae mole kei ’alu ai totatou loto pe’e mole kei ’i ai hona ’uhiga kiā tatou. ’E tonu ke tou palalau kiā Sehova ohage ko he ki’i tamasi’i ’e palalau ki tana tāmai agalelei. ’E mo’oni ’e tou palalau anai kiā te ia ’aki he aga faka’apa’apa, kae ke tou palalau fakahagatonu ki te ’u me’a ’aē ’i totatou loto. (Pesalemo 62:8) Ei, ko te ako takitokotahi ’o te Tohi-Tapu pea mo te ’u faikole fakamalotoloto, ’e ko he ’u koga ma’uhiga ’o tatatou tauhi, pea ’e feala ’aki te ’u fa’ahi ’aia ke tou nonofo ’i te ’ofa ’o te ’Atua.
KOUTOU MA’U TE FIAFIA ’I TAKOTOU TAUHI
15 Ko te ako takitokotahi ’o te Tohi-Tapu pea mo te faikole, ’e ko he ’u agaaga ’o te tauhi ’e tou fai takitokotahi. Kae ’i te lakaga nei, tou vaka’i he koga ’o te tauhi ’e tou fakahoko iā mu’a ’o te kaugamālie: ko tatatou fakamatala te ’u me’a ’aē ’e tou tui kiai. Kua koutou vaevae koa mo ’ihi he ’u mo’oni ’a te Tohi-Tapu? Kapau koia, pea kua koutou kau ki te pilivilesio taulekaleka. (Luka 1:74) Ka tou vaevae mo ’ihi te ’u mo’oni ’aē ’e tou ako ’o ’uhiga mo Sehova ’Atua, ’e tou fakahoko ai te gāue ma’uhiga ’aē ne’e fakatotonu ki te kau Kilisitiano mo’oni fuli: ia te faka mafola ’o te logo lelei ’o te Pule’aga ’o te ’Atua.—Mateo 24:14; 28:19, 20.
16 Ne’e ’ui e te ’apositolo ko Paulo, ko tana minisitelio ’e ko he me’a ma’uhiga, ’o ina fakatatau ki he koloā. (2 Kolonito 4:7) Ko te gāue lelei ’aupito ’aē ’e feala ke koutou fai, ’e ko te fai palalau mo te haha’i ’o ’uhiga mo Sehova ’Atua pea mo tana ’u fakatu’utu’u. ’E ko he gāue ’e tou fai ma’a te Pule ’aē ’e lelei ’aupito, pea ’e tou ma’u ai anai he ’u fakapale ’e lahi ’aupito. Ka koutou kau ki te gāue ’aia, pea ’e koutou tokoni ai ki te haha’i loto mo’oni, ke nātou fakaōvi ki tatatou Tāmai ’aē ’i selo, pea ke nātou ha’ele ’i te ala ’aē ’e ina taki ki te ma’uli he’egata. ’E mole he tahi age gāue ’e fakafiafia ’aupito! Tahi ’aē me’a, ko te fagonogono ’o ’uhiga mo Sehova pea mo tana Folafola, ’e ina fakatuputupu takotou tui pea mo ina toe fakamālohi age tokotou ’ofa kiā te ia. Pea ’e ma’uhiga kiā Sehova takotou ’u faiga. (Hepeleo 6:10) Kapau ’e koutou lagolago mālohi ki te gāue ’aia, pea ’e feala anai hakotou nonofo ’i te ’ofa ’o te ’Atua.—1 Kolonito 15:58.
17 ’E ma’uhiga ke tou manatu’i ko te faka mafola ’o te Pule’aga, ’e ko he gāue ’e tonu ke foimo fai. ’E ’ui fēnei ’i te Tohi-Tapu: “Faka mafola te Folafola, ’o haga fai [ia te gāue ’aia].” (2 Timoteo 4:2, MN) He ko’e ’e tonu ke tou foimo fai ia te gāue ’aia? He’e ’ui fēnei mai ’i te Tohi-Tapu: “Ko te ’aho lahi ’o Sehova kua ōvi mai. Kua ōvi mai, pea ’e fakavilivili ’aupito mai.” (Sofonia 1:14) Ei, ’e fakavilivili mai te temi ’aē ka faka’auha kātoa ai e Sehova te mālama ’aenī. Koia ’e tonu ai ke tou faka’ilo’ilo ia te fa’ahi ’aia ki te haha’i! ’E tonu ke nātou ’ilo’i ’e ko te temi ’aenī ’aē ’e tonu ke nātou filifili ai ia Sehova, ko honatou Tu’i ’Aliki. “’E mole tauhala anai” te faka’osi.—Hapakuke 2:3.
18 ’E loto e Sehova ke tou fakatahi mo te kau Kilisitiano mo’oni ’o atolasio kiā te ia. Koia ’aē ’e ’ui fēnei ai ’i tana Folafola: “Tou fetokaga’aki ke tou uga ia tatou ki te ’ofa pea mo te ’u gāue matalelei, ’o mole tou tuku tatatou ’u fakatahi, ohage ko te agamāhani ’a ’ihi, kae ke tou fefakaloto mālohi’aki, tāfito la he’e kua koutou sio ki te fakaōvi mai ’o te ’aho.” (Hepeleo 10:24, 25, MN) Ka tou fakatahitahi mo ’otatou ’u tēhina mo tuaga’ane ’i te ’u fono faka Kilisitiano, ’e ko he faigamālie ’aia ke tou fakavikiviki ai pea mo atolasio ki totatou ’Atua ’ofa. Tahi ’aē me’a, ’e tou fe’uga’aki pea mo fefakaloto mālohi’i aki.
19 Ka tou fakatahi mo te kau atolasio ’a Sehova, ’e toe mālohi te ’u no’o ’o te ’ofa pea mo tatatou ’u fakakaume’a ’i te kokelekasio. ’E ma’uhiga ia te kumi ’o te me’a ’aē ’e lelei ’i totatou ’u kaugā fagona Kilisitiano, ohage pe ko Sehova ’e ina tokaga’i ia te me’a ’aē ’e lelei iā tatou. ’Aua na’a koutou fakama’ua ia te ma’oni’oni ki ’okotou ’u kaugā fagona. Tou manatu’i, ’e tou kehekehe ’i tatatou tuputupu fakalaumālie, pea ko tatou fuli ’e tou agahala. (Kolose 3:13) Koutou faiga ke koutou fakakaume’a lelei mo nātou ’aē ’e ’o’ofa mālohi kiā Sehova, pea ’e koutou tuputupu anai ’i te fa’ahi fakalaumālie. Ei, ’e feala anai hakotou nonofo ’i te ’ofa ’o Sehova, mo kapau ’e koutou tauhi fakatahi kiā te ia mo tokotou ’u tēhina mo tuaga’ane. Koteā te fakapale ’aē ’e foaki e Sehova kiā nātou ’aē ’e nātou tauhi agatonu kiā te ia pea mo nātou nonofo ’i tona ’ofa?
TOU FAIGA KI “TE MA’ULI MO’ONI”
20 Mo’o fakapale tana ’u kaugana agatonu, ’e foaki age e Sehova ia te ma’uli, kae ko te fa’ahiga ma’uli fea? ’E koutou mā’u’uli mo’oni koa ’i te temi nei? ’E ’io anai kiai te tokolahi, he’e tou mānava, ’e tou kakai, pea mo tou ’i’inu. ’E mo’oni ’e tou mā’u’uli. Pea ’i te ’u temi ’aē ’e tou fiafia ’aupito ai, ’e lagi tou ’ui fēnei: “Ko’eni la te ma’uli mo’oni!” Kae ’e fakahā mai ’i te Tohi-Tapu, ’i tona fakahagatonu, ’e mole he tahi iā ’aho nei ’e ma’uli mo’oni.
![Ko te fāmili ’e natou lelei’ia te fa’ahiga ma’uli ’i te palatiso](https://assetsnffrgf-a.akamaihd.net/assets/l/bh/bh_WA/190.jpg)
’E loto e Sehova ke koutou ma’u ia “te ma’uli mo’oni.” ’E koutou ma’u anai koa ia te ma’uli ’aia?
21 ’E ’ui ’i te Folafola ’a te ’Atua, ke tou “puke ma’u ia te ma’uli mo’oni.” (1 Timoteo 6:19, MN) ’E hā ’aki te ’u palalau ’aia, ko “te ma’uli mo’oni” ’e ko he faka’amu ’e tou ma’u anai ’i te ka ha’u. Ei, ka tou liliu anai ’o haohaoa, ’e tou lava ’ui ai anai kua tou mā’u’uli mo’oni, he’e tou mā’u’uli anai ohage ko te me’a ’aē ne’e finegalo kiai te ’Atua ’i te kamata. ’E tou ma’u anai “te ma’uli mo’oni,” ia te ma’uli he’egata, ’i te temi ’aē ka tou mā’u’uli ai anai ’i te Palatiso fakakelekele, ’i te haohaoa mai te mahaki, ’i te tokalelei pea mo te fiafia. (1 Timoteo 6:12) ’I ’amanaki taulekaleka leva!
22 E feafea’i hatatou “puke ma’u ia te ma’uli mo’oni”? ’I te koga tohi ’aia, ’e fakaloto mālohi’i e Paulo ia te kau Kilisitiano ke nātou “gāue mo’o fai te me’a ’aē ’e lelei” pea ke nātou “koloa’ia ’i te ’u gāue lelei.” (1 Timoteo 6:18, MN) Koia ’e mahino mai, ’e fakalogo tatatou ma’u ia te ma’uli mo’oni ki tatatou mulimuli ki te ’u mo’oni ’aē ne’e tou ako ’i te Tohi-Tapu. Kae ’e faka ’uhiga koa ’i te ’u palalau ’a Paulo, ’e tou ma’u “te ma’uli mo’oni” he’e tou fai he ’u gāue lelei? Kailoa, he’e ’i tona fakahagatonu, ko te ma’uli taulekaleka ’aia ’e fakalogo ki “te ’ofa makehe” ’o te ’Atua. (Loma 5:15, MN) Kae ’e fiafia ia Sehova ’i te fakapale ’o nātou ’aē ’e nātou tauhi agatonu kiā te ia, pea ’e ina faka’amu ke koutou ma’u ia “te ma’uli mo’oni.” Ko nātou ’aē ’e nātou nonofo ’i te ’ofa ’o te ’Atua, ’e nātou ma’u anai te ma’uli fiafia mo tokalelei ’aia, ia te ma’uli he’egata.
23 ’E lelei kiā tatou takitokotahi ke tou fai te ’u fehu’i ’aenī: ‘’E au mulimuli koa ki te fa’ahiga atolasio ’aē ne’e fakatotonu mai e te ’Atua ’i te Tohi-Tapu?’ Kapau ’i te ’aho fuli, ’e tou sivi ia tatou totonu ’o tou sio ’e tou fai ia te fa’ahi ’aia, pea ’e tou ha’ele ’i te ala ’aē ’e lelei. ’E tou lava falala kiā Sehova ’e ko totatou hola’aga. ’E ina hāofaki anai tana kau agatonu ’i te ’u ’aho fakamataku ’o te mālama ’āfea ’aenī. Tahi ’aē, ’e puipui anai tatou e Sehova ’i te tu’u fo’ou ’o te ’u me’a ’aē ’e faka kolōlia, ’aē kua ōvi mai leva. ’I me’a fakafiafia anai hatatou mā’u’uli ’i te temi ’aia! Kapau ’e koutou filifili lelei te me’a ’aē ’e koutou loto kiai, pea ’e koutou ma’u anai ia “te ma’uli mo’oni,” ’aē ne’e loto kiai e Sehova ’Atua, ia te ma’uli he’egata.
KOTEĀ ’AĒ ’E AKO’I MAI ’I TE TOHI-TAPU?
- Ko te ’ofa mo’oni ki te ’Atua, ko tona faka ’uhiga ke tou mulimuli ki tana ’u fakatotonu pea mo ma’uli’i tana ’u pelesepeto.—1 Soane 5:3.
- ’E tou lava nonofo anai ’i te ’ofa ’o te ’Atua, mo kapau ’e tou ako Tana Folafola, mo tou faikole kiā te ia ’aki totatou loto kātoa, mo tou ako ia te haha’i ke nātou ’ilo’i ia ia, pea mo tou atolasio kiā te ia ’i te ’u fono faka Kilisitiano.—Mateo 24:14; 28:19, 20; Soane 17:3; 1 Tesalonika 5:17; Hepeleo 10:24, 25.
- Ko nātou ’aē ’e nonofo ’i te ’ofa ’o te ’Atua, ’e nātou ’amanaki ke nātou ma’u “ia te ma’uli mo’oni.”—1 Timoteo 6:12, 19; Suta 21.
Te ’u Fehu’i Ako
1, 2. Ko ai totatou hola’aga ia ’aho nei?
3. Koteā ’ae ’e tonu ke tou fai ke liliu ia Sehova ko hotatou hola’aga?
4, 5. Koteā he ’u fa’ahi ’e hā ai te ’ofa ’o Sehova kiā tatou?
6. E feafea’i hakotou tali ki te ’ofa ’aē ne’e fakahā atu e Sehova kiā koutou?
7. Ko te ’ofa ki te ’Atua ’e tonu koa ke gata ’aki pe he me’a ’e kita logo’i? Koutou fakamahino.
8, 9. E feafea’i hatatou fakahā totatou ’ofa pea mo loto fakafeta’i ki te ’Atua?
10. Koutou fakamahino pe ko’e ’e ma’uhiga ke tou haga ako ke tou ’ilo’i ia Sehova ’Atua.
11. Ne’e malave feafea’i te faiakonaki ’a Sesu ki tana ’u tisipulo?
12, 13. (a) E feafea’i te aga ’a te tokolahi ia ’aho nei, ’o ’uhiga mo te ’ofa ki te ’Atua pea mo te Tohi-Tapu? (b) Koteā ’aē ’e tonu ke tou fai ke mole puli totatou ’ofa?
14. He ko’e ’e ’aoga te faikole mo’o fakatuputupu tatatou ’ofa kiā Sehova?
15, 16. He ko’e ’e tou lava ’ui ko te faka mafola ’o te logo ’o te Pule’aga, ’e ko he pilivilesio pea ’e ko he koloā?
17. He ko’e ia ’aho nei, ’e tonu ke tou foimo fai ia te minisitelio faka Kilisitiano?
18. He ko’e ’e tonu ke tou fakatahi mo te kau Kilisitiano mo’oni ’o atolasio kiā Sehova?
19. Koteā ’aē ’e tonu ke tou fai ke toe mālohi ai te ’u no’o ’o te ’ofa ’i te kokelekasio faka Kilisitiano?
20, 21. Koteā ia “te ma’uli mo’oni,” pea he ko’e ’e ko he ’amanaki taulekaleka?
22. E feafea’i hatatou “puke ma’u ia te ma’uli mo’oni”?
23. He ko’e ’e ma’uhiga ke tou nonofo ’i te ’ofa ’o te ’Atua?