“KOENI te vai, pe kotea ae e ina taofi toku papitema’i?” Ko te fehu’i ’aia ne’e fai ’i te ’uluaki sēkulō e te tagata ’aliki Etiopea. Ko te Kilisitiano ko Filipo ne’e ina fakamahino age kiā ia, ko Sesu ne’e ko te Mesia ’aē ne’e fakapapau’i mai. Ne’e malave ki te loto ’o te tagata Etiopea ia te ’u me’a ’aē ne’e logo kiai mai te Tohi-Tapu, ’o ina kole ai ke papitema’i!—Gaue 8:26-36.

² Kapau ne’e koutou ako fakalelei te ’u ’uluaki kapite ’o te tohi ’aenī mo te kau Fakamo’oni ’a Sehova, lagi kua koutou fia fai ia te fehu’i ’aenī: ‘Koteā ’aē ’e ina tā’ofi au ke au papitema?’ Kua koutou mahino ki te fakapapau faka Tohi-Tapu ’o ’uhiga mo te ma’uli he’egata ’i te Palatiso. (Luka 23:43; Apokalipesi 21:3, 4) Kua koutou toe mahino ki te ’alu’aga mo’oni ’o te kau mate pea mo te ’amanaki ’o ’uhiga mo te fakatu’uake. (Tagata Tānaki 9:5; Soane 5:28, 29) Lagi kua koutou fakatahi mo te kau Fakamo’oni ’a Sehova ’i tanatou ’u fono pea mo sio ai ki tanatou ma’uli’i ia te lotu mo’oni. (Soane 13:35) Ko te fa’ahi ’aē ’e ma’uhiga tāfito, he’e kua koutou kamata fakatuputupu takotou ’u felogoi mo Sehova ’Atua.

³ E feafea’i hakotou fakahā ’e koutou fia kaugana ki te ’Atua? Ne’e ’ui fēnei e Sesu ki tana ’u tisipulo: “Koutou ’olo pea ke koutou fai ni ’u tisipulo ’i te haha’i ’o te ’u fenua fuli pe, ’o papitema’i ia nātou.” (Mateo 28:19, MN) Ne’e tuku e Sesu ia te fa’ifa’itaki lelei ’i tana papitema ’i te vai. Ne’e mole fufu’i pe tona sino, pe’e ko tona ulu. (Mateo 3:16) Ko te kupu “papitema” ’e ha’u mai te kupu faka Keleka ko tona faka ’uhiga ko te “fakauku.” Koia ko te papitema faka Kilisitiano ’e ko he fakauku kātoa ’o te sino ’i te vai.

⁴ ’E fakama’ua ia te papitema ’aē ’i te vai kiā nātou fuli ’aē ’e nātou fia felogoi mo Sehova ’Atua. ’I tokotou papitema iā mu’a ’o te kaugamālie, ’e koutou fakahā ai takotou fia tauhi ’aē ki te ’Atua. ’E koutou fiafia ’i te fai ’o te finegalo ’o Sehova. (Pesalemo 40:7, 8) Kae ke feala hokotou papitema’i, ’e ’i ai te ’u fa’ahi ’e tonu mu’a ke koutou fai.

TE ’ATAMAI MĀLAMA PEA MO TE TUI

⁵ Kua koutou fai ia te ’uluaki fa’ahi ’aē ’e fakama’ua kiā ia ’aē ’e fia papitema. Koteā te fa’ahi ’aia? Ko takotou ma’u ia te ’atamai mālama ’o ’uhiga mo Sehova ’Atua pea mo Sesu Kilisito, ’i takotou ako ia te Tohi-Tapu. (Soane 17:3) Kae ’e mole gata aipe. ’E tonu ki te kau Kilisitiano ke nātou ‘fonu ’i te ’atamai mālama totonu ’o ’uhiga mo te finegalo ’o te ’Atua.’ (Kolose 1:9) Pea ki te fa’ahi ’aia ’e ’aoga ’aupito anai kiā koutou ia te ’u fono ’a te kau Fakamo’oni ’a Sehova, koia ’e ma’uhiga ke koutou kau ki te ’u fono ’aia. (Hepeleo 10:24, 25) Ko takotou kau tu’uma’u ki te ’u fono, ’e ’aoga anai ki takotou tuputupu ’i te fa’ahi ’o te ’atamai mālama ’o ’uhiga mo te ’Atua.

⁶ Kae ’e mole ma’ua ke koutou mahino kātoa ki te Tohi-Tapu ke feala hakotou papitema. Ko te tagata ’aliki Etiopea ne’e mahino pe ki ’ihi koga ’o te Tohi-Tapu, koia ne’e kei ’aoga kiā ia he tokoni ke mahino ki te tahi ’u koga ’o te Tohi-Tapu. (Gaue 8:30, 31) ’O toe feiā pe, ’e kei lahi te ’u me’a ’aē ’e tonu ke koutou ako, he’e mole he gata’aga ’o te ’u me’a ’aē ’e tonu ke tou ako ’o ’uhiga mo te ’Atua. (Tagata Tānaki 3:11) Kae ’i mu’a ’o hakotou papitema, ’e tonu ke koutou mahino pea mo tali te ’u akonaki tāfito ’o te Tohi-Tapu. (Hepeleo 5:12) Ohage la, ’e tonu ke koutou mahino pea mo tali te mo’oni ’o ’uhiga mo te ’alu’aga ’o te kau mate pea mo te ma’uhiga ’o te huafa ’o te ’Atua pea mo tona Pule’aga.

⁷ Kae ko te ma’u ’o te ’atamai mālama ’e mole fe’auga ia, he’e “mole feala ki he tahi ke lelei ki te Atua, [mo] kapau e mole ina mau te tui.” (Hepeleo 11:6) ’E ’ui ’i te Tohi-Tapu, ’i te temi ’aē ne’e logo ai ’ihi ’i te kolo ’o Kolonito ki te fai faka mafola ’a te ’u tisipulo ’a Sesu, ne’e nātou “tui pea nee natou tali te papitema.” (Gaue 18:8) ’O toe feiā pe, ka koutou ako ia te Tohi-Tapu, ’e tonu ke koutou tui ’e ko te Folafola ’a te ’Atua. Ko te ako ’o te Tohi-Tapu ’e tokoni atu kiā koutou ke koutou tui ki te ’u fakapapau ’a te ’Atua pea mo faka fealagia ki te sākilifisio ’o Sesu ke ina hāofaki koutou.—Sosue 23:14; Gaue 4:12; 2 Timoteo 3:16, 17.

KOUTOU FAKAHĀ TE ’U MO’ONI ’O TE TOHI-TAPU KI TE HAHA’I

⁸ ’Aki te tuputupu ’o takotou tui, ’e koutou fia fakahā anai ki te haha’i te ’u me’a ’aē ne’e koutou ako. (Selemia 20:9) ’E koutou logo’i mālohi anai ’i tokotou loto ia takotou fia fakamahino ki te haha’i ia te ’Atua pea mo tana ’u fakatu’utu’u.—2 Kolonito 4:13.

⁹ ’E lagi koutou kamata fakamahino anai te ’u mo’oni faka Tohi-Tapu ki tokotou ’u kāiga, tokotou ’u kaume’a, tokotou ’u vāha’a fale, pea mo tokotou ’u kaugā gāue. ’Aki te temi, ’e koutou fia kau anai ki te gāue fai faka mafola ’a te kau Fakamo’oni ’a Sehova. ’I te temi leva ’aia, ’e koutou faka felogoi anai kiā ia ’aē ’e ina fai takotou ako Tohi-Tapu. Kapau kua feala hakotou kau ki te minisitelio, pea ’e fai anai he ’u fakatu’utu’u ’o ’uhiga mo koutou pea mo ia ’aē ’e ina fai takotou ako, ke koutou fai palalau ’o ’uhiga mo te fa’ahi ’aia mo he ’u tagata ’āfea e toko lua ’o te kokelekasio.

¹⁰ ’Aki te fakatu’utu’u ’aia ’e feala ai anai ke koutou fe’ilo’i’aki lelei mo ’ihi tagata ’āfea, ’aē ’e nātou le’ole’o ia te faga ōvi ’a te ’Atua. (Gaue 20:28; 1 Petelo 5:2, 3) Kapau ’e fakafuafua e te kau tagata ’āfea ’e koutou mahino pea mo tui ki te ’u ’akonaki tāfito ’o te Tohi-Tapu, mo koutou ma’uli’i te ’u pelesepeto faka Tohi-Tapu, mo fia liliu mo’oni ko he Fakamo’oni ’a Sehova, pea ’e nātou fakahā atu anai kua feala hakotou liliu ko he kaugā fagona ’o te logo lelei.

¹¹ ’E feala pe ke toe fakatokaga’i e te kau tagata ’āfea ’aia, ’e kei tonu ke koutou fai ni ’u fetogi ’i tokotou ma’uli pea mo takotou ’u agamāhani ’i mu’a ’o hakotou kau ki te minisitelio. Lagi ’e tonu ke koutou tuku ni ’u aga ’e kovi ’e kei koutou fai fakafūfū. Koia, ’i mu’a ’o hakotou kole ke koutou kaugā fagona, ’e tonu mu’a ke koutou ’āteaina mai te ’u agahala ohage ko te ’u felāve’i fakasino he’e’aoga, mo te konahia, pea mo te faka’aoga’i ’o te toloke.—1 Kolonito 6:9, 10; Kalate 5:19-21.

KOUTOU FAKAHEMALA PEA MO TAFOKI

¹² ’E ’i ai te tahi ’u fa’ahi ’e tonu ke koutou fai ’i mu’a ’o te papitema. Ne’e ’ui fēnei e te ’apositolo ko Petelo: “Koutou fakahemala… pea mo koutou mafuli, ke molehi ’akotou agahala.” (Gaue 3:19, MN) Ko te fakahemala ’e ko hata lotomamahi fakamalotoloto ’o ’uhiga mo te ’u me’a ’aē ne’e tou fai. ’E tonu ke fakahemala ia ia ’aē ne’e ina fai he ’u aga he’e’aoga, kae ’e toe ’aoga pe foki ke fakahemala mo ia ’aē ne’e mole fa’a agakovi fau. Koteā tona tupu’aga? Kote’uhi ko te haha’i fuli ’e nātou agahala pea ’e ’aoga kiā nātou te fakamolemole ’a te ’Atua. (Loma 3:23; 5:12) ’I mu’a ’o takotou ako te Tohi-Tapu, ne’e mole koutou ’ilo’i ia te finegalo ’o te ’Atua, koia ’aē ne’e mole feala ke koutou ma’uli’i tana ’u pelesepeto. Koia, ’e ma’uhiga ai te fakahemala.

¹³ Ka kua koutou fakahemala ’e tonu ki muli age ke koutou tafoki, pe’e koutou ‘litu’a.’ ’E mole fe’auga pe takotou fakahemala. ’E tonu ke koutou līaki tokotou ma’uli ’āfea pea mo fakapapau ’i te temi ’aia ’e koutou fai anai te me’a ’aē ’e totonu. ’E tonu ’i mu’a ’o takotou papitema, ke koutou fakahemala pea mo tafoki.

KOUTOU FOAKI TOKOTOU MA’ULI

¹⁴ ’I mu’a ’o te papitema, ’e ’i ai te tahi fa’ahi ma’uhiga ’e tonu ke koutou fai. Koutou foaki tokotou ma’uli kiā Sehova ’Atua.

¹⁵ Ka koutou faikole fakamalotoloto ’o foaki tokotou ma’uli kiā Sehova ’Atua, ’e koutou fakapapau kiā te ia ’e koutou pipiki ’āteaina anai kiā te ia ’o talu ai. (Teutalonome 6:15) Kae he ko’e ’e fia liliu he tahi ko he kaugana ’a te ’Atua? Tou to’o he fakatā: ka kamata fakatahi he tama mo he ta’ahine, ’aki te temi ’e ’ilo’i lelei e te tama ia te ta’ahine pea mo sio ki tona ’u kalitātē, pea ’e toe lahi age anai tana ’ofa ki ai. ’Aki te temi, ’e ina kole’i anai ke nā ’ohoana. ’E mo’oni, ko te ’ohoana ’e hilifaki kiai he tahi ’u ma’ua, kae ’e ina ’ohoana’i anai te ta’ahine he’e ’ofa ki ai.

¹⁶ Ka koutou ’ilo’i ia Sehova pea mo ’ofa kiā te ia, ’e tupu ai takotou fia tauhi pea mo atolasio kiā te ia ’aki tokotou loto kātoa. Ko he tahi ’e fia mulimuli ia Sesu Kilisito te ’Alo ’o te ’Atua, ’e “fakafisi kia te ia totonu.” (Maleko 8:34) ’E tou fakafisi kiā tatou totonu mo kapau ’e mole tou tuku totatou ’u holi pea mo tatatou ’u fakatu’utu’u ke nātou tā’ofi tatatou fakalogo kātoa ’aē ki te ’Atua. Pea ’i mu’a ’o takotou papitema, ’e tonu ’i tokotou ma’uli ke takimu’a tu’uma’u ia te finegalo ’o Sehova ’Atua.—1 Petelo 4:2.

’AUA NA’A KOUTOU MĀTATAKU

¹⁷ ’E lotolotolua ’ihi ’i te foaki ’o tonatou ma’uli kiā Sehova, kae ’e ko he fakatu’utu’u ma’uhiga. ’E manatu nātou ’e lelei age ia te mole foaki ’o tonatou ma’uli ki te ’Atua, he’e nātou tu’ania na’a mole nātou lava fakahoko ia te fakatu’utu’u ’aia pe’e ko te fakapapau ’aia, pea mo fakamamahi’i ia Sehova pe’e nātou fai he agahala.

¹⁸ ’O mulimuli pe ki te tuputupu ’o tokotou ’ofa ’aē kiā Sehova, ’e koutou fia foaki tokotou ma’uli kiā te ia pea mo mulimuli ki takotou fakapapau ’aia. (Tagata Tānaki 5:4) ’I takotou ’osi foaki ’o tokotou ma’uli, pea ’e koutou fia “ha’ele [anai] ’i he ’alu’aga ’e tāu mo fe’auga mo Sehova, ke koutou lelei kātoa kiā te ia.” (Kolose 1:10, MN) Pea ’e mole koutou manatu anai ’e faigata’a fau te fai ’o tona finegalo, he’e koutou ’ofa ki te ’Atua. ’E koutou manatu tahi anai mo te ’apositolo ko Soane, ’aē ne’e ina tohi fēnei: “Ko’eni te faka ’uhiga ’o te ’ofa ’aē ki te ’Atua: ke tou ma’uli’i tana ’u fakatotonu; pea ko tana ’u fakatotonu ’e mole mamafa ia.”—1 Soane 5:3, MN.

¹⁹ ’E mole ma’ua ke koutou haohaoa ke feala hakotou foaki tokotou ma’uli ki te ’Atua. ’E ’ilo’i e Sehova tokotou ’u tu’akoi pea ’e mole ina fakama’ua atu anai he me’a ’e mole koutou lava’i. (Pesalemo 103:14) ’E ina loto ke fua lelei te ’u me’a ’aē ’e koutou fakahoko, pea ’e lagolago atu anai pea mo tokoni atu. (Isaia 41:10) ’E feala hakotou tui papau kapau ’e koutou falala kiā Sehova ’aki tokotou loto kātoa, pea ’e ina “fakatonutonu’i anai [tokotou] ’u ala foufou.”—Tā’aga Lea 3:5, 6.

KOUTOU PAPITEMA MO’O FAKAHĀ KUA FOAKI TOKOTOU MA’ULI KI TE ’ATUA

²⁰ Kapau ’e koutou fakakaukau’i te ’u me’a ’aē ne’e tou vaka’i, pea ’e feala anai ’i te faikole ke koutou foaki tokotou ma’uli kiā Sehova. Ko nātou fuli ’aē ’e ’o’ofa mo’oni ki te ’Atua, ’e toe tonu foki ke nātou “tala iā mu’a ’o te kaugamālie ’o ’uhiga mo te hāofaki.” (Loma 10:10, MN) E feafea’i hakotou fai ia te fa’ahi ’aia?

²¹ Koutou fakahā ki te kootinatea ’o te kolesi ’o te kau tagata ’āfea ’o tokotou kokelekasio kua koutou fia papitema. ’E ina fai anai he fakatu’utu’u ke koutou vaka’i fakanounou mo ni ’u tagata ’āfea ia te ’u fehu’i ’o ’uhiga mo te ’u akonaki tāfito ’o te Tohi-Tapu. Kapau ko te ’u tagata ’āfea ’e nātou fakafuafua kua feala hakotou papitema, ’e nātou fakahā atu anai ’e feala hakotou papitema ’i te fakatahi lahi ’aē ka hoko mai.* ’I te agamāhani, ’i te ’u fakatahi lalahi ’aia, ’e fai ai te akonaki ’o ’uhiga mo te papitema. Pea ko te tēhina ’aē ’e ina fai te akonaki ’o te papitema, ’e ina fakaafe anai ia te kau papitema fuli ke nātou tali ki te ’u fehu’i nounou e lua mo’o fakahā tanatou tui “iā mu’a ’o te kaugamālie.”

²² Ko te papitema ’e ko he fakamo’oni ’aia kua koutou foaki tokotou ma’uli ki te ’Atua pea kua koutou kau ki te kau Fakamo’oni ’a Sehova. ’E fakauku kātoa ia te kau papitema ki te vai, mo’o fakahā iā mu’a ’o te kaugamālie kua foaki tonatou ma’uli kiā Sehova.

TE FAKA ’UHIGA ’O TOKOTOU PAPITEMA

²³ Ne’e ’ui e Sesu ko tana ’u tisipulo ’e papitema’i anai “’i te huafa ’o te Tāmai pea mo te ’Alo pea mo te laumālie ma’oni’oni.” (Mateo 28:19, MN) Ko tona faka ’uhiga ko ia ’aē ’e papitema ’e fakamo’oni ki te takitaki ’a Sehova ’Atua pea mo Sesu Kilisito. (Pesalemo 83:18; Mateo 28:18) ’E nātou toe fakamo’oni ki te tu’ulaga pea mo te gāue ’a te laumālie ma’oni’oni pe’e ko te mālohi gāue ’a te ’Atua.—Kalate 5:22, 23; 2 Petelo 1:21.

²⁴ Kae ko te papitema ’e mole ko he fakauku pe ’o kita ki te vai. ’E ina fakatā ia te fa’ahi ’e ma’uhiga ’aupito. Ko tokotou fakauku ’aia, ko tona faka ’uhiga kua koutou mate ’o ’uhiga mo tokotou ma’uli ’āfea. ’I tokotou laga’i ake ’i te vai, kua koutou ma’uli leva mo’o fai ia te finegalo ’o te ’Atua. Koutou manatu’i foki, ko tokotou ma’uli ne’e koutou foaki kiā Sehova ’Atua, kae ne’e mole koutou foaki ki he gāue, pe’e ki he ’u tagata, pe’e ki he kautahi. Ko te fakapapau pea mo te papitema ’e ko te kamata’aga ’aia ’o takotou felogoi lelei mo te ’Atua.—Pesalemo 25:14.

²⁵ Ko te papitema ’e mole ko he fakamo’oni ’aia kua hāofaki koutou. Ne’e tohi fēnei e te ’apositolo ko Paulo: “Koutou faigai toutou haofaki i te mataku mo te tuania.” (Filipe 2:12) Ko te papitema ’e ko te kamata’aga. Koutou fai ia te fehu’i ’aenī: E feafea’i haku nofo ’i te ’ofa ’o te ’Atua? ’E tali anai kiai ia te kapite faka’osi.

*  ’E fai tu’uma’u te ’u papitema ’i te ’u fakatahi lalahi ’a te kau Fakamo’oni ’a Sehova.