KAPITE LUA
Te Tohi-Tapu ’e Ko He Tohi ’e Ha’u Mai Te ’Atua
Koteā ’aē ’e kehekehe ai ia te Tohi-Tapu mo te ’u tohi ’aē?
’E lava tokoni feafea’i atu ia te Tohi-Tapu ke koutou ma’u he ’u pule’aki ki tokotou ’u fihifihia?
He ko’e ’e feala hakotou falala ki te ’u lea faka polofeta ’aē ’e tu’u ’i te Tohi-Tapu?
’E KOUTOU manatu’i koa ia te ’aho ’aē ne’e ’avatu ai e hokotou kaume’a he me’a ’ofa ne’e koutou lelei’ia? Ne’e ko he lakaga fakafiafia ’aia pea ne’e malave ki tokotou loto. Kote’uhi ’aki te me’a ’ofa ’aia, ’e koutou ’ilo’i ai ko ia ’aē ne’e ina ’avatu ’e ma’uhiga kiā ia takotou faka kaume’a. ’E mahino ia ’e koutou loto fakafeta’i ki te me’a ’ofa ’o tokotou kaume’a, he’e hā ’aki ai tana faka ma’uhiga’i koutou.
2 Ko te Tohi-Tapu ’e ko he me’a ’ofa ’o te ’Atua, pea ’e tonu ke tou fakafeta’i mo’oni ki ai. Ko te tohi makehe ’aia ’e ina fakahā mai ia te ’u me’a ’e mole feala hatatou ma’u ’i he tahi age fa’ahi. Ohage la, ’e ina fakamatala mai ia te fakatupu ’o te lagi mo ’ona fetu’u, mo te kele, pea mo te ’uluaki tagata mo te ’uluaki fafine. ’E tu’u ’i te Tohi-Tapu te ’u pelesepeto ’e feala hatatou falala kiai, pea ’e tokoni mai ke tou lava ’utaki’i ia te ’u fihifihia ’o te ma’uli pea mo ’ona tu’ania. ’E ina fakamahino mai te ’u me’a ’aē ka fai anai e te ’Atua mo’o fakahoko ’o tona finegalo, pea mo fetogi ia te ’u ’alu’aga faka’ofa’ofa ’o te kele. Ei, ko te Tohi-Tapu ’e ko he me’a ’ofa ’e fakaloto fiafia!
3 ’E toe ’ui ko te Tohi-Tapu ’e ko he me’a ’ofa ’e malave ki ’otatou loto, kote’uhi ’e ina fakahā mai te agaaga ’o ia ’aē ne’e ina foaki mai, ia Sehova ’Atua. ’I tana foaki mai ia te tohi ’aia, ’e ko he fakamo’oni ’aia ’e ina loto ke tou ’ilo’i lelei ia ia. Ei ko te Tohi-Tapu ’e lava tokoni atu ke koutou fakaōvi kiā Sehova.
4 ’E ’i ai takotou Tohi-Tapu, ohage ko te tokolahi. Ko te Tohi-Tapu kua tā kātoa pe’e fakakoga ia lea e 2 300, pea ko te teitei haha’i fuli ’e nātou ma’u te tohi ’aia. ’E fakafuafua, ko te lau’i miliona Tohi-Tapu ’e tufa ’i te vāha’a fuli. Kua tā te ’u lau’i miliale Tohi-Tapu kātoa pe’e fakakoga. Ei, ’e mole he tohi ’e tatau mo te Tohi-Tapu.
5 Tahi ’aē me’a, ko te Tohi-Tapu “’e ha’u mai te ’Atua.” (2 Timoteo 3:16, MN) ’O feafea’i? ’E tali fēnei ’i te Tohi-Tapu: “’Aki te takitaki ’o te laumālie ma’oni’oni, ne’e palalau ni ’u tagata ’o ’uhiga mo te ’Atua.” (2 Petelo 1:21, MN) Ko’eni tona fakatā: Ko he patolo ’e ina kole age ki tana fafine gāue ke ina tā te tohi. Ko te tohi ’aia ’e tu’u ai te ’u manatu pea mo te ’u fakatu’utu’u ’a te patolo. ’E ko tana tohi, kae mole ko he tohi ’o tana fafine gāue. ’O toe feiā aipe, ’e tu’u ’i te Tohi-Tapu te logo mai te ’Atua, kae mole ko he logo mai te ’u tagata ’aē ne’e nātou tohi. Koia ’e tou lava faka tui papau ai ko te Tohi-Tapu kātoa ’e ko “te Folafola ’a te ’Atua.”—1 Tesalonika 2:13, MN.
’E ’ALUTAHI TANA ’U MANATU PEA MO TOTONU
6 Ne’e tohi ia te Tohi-Tapu kua hili kiai ta’u e 1 600 tupu. Ne’e mā’u’uli tana kau tagata faitohi ’i ni ’u temi kehekehe, pea ne’e kehekehe tonatou fa’ahiga ma’uli. Ko ’ihi ne’e gāue kele, ko ’ihi ne’e ko te ’u tautai, pea ko ’ihi ne’e tauhi ōvi. Ko ’ihi ne’e ko he kau polofeta, ko ’ihi ne’e ko te ’u tu’i fakamāu, pea ko ’ihi ne’e ko te ’u hau. Ko te tagata faitohi Evaselio ko Luka, ne’e ko te tōketā. Logola ne’e kehekehe tonatou fa’ahiga ma’uli, kae ko te Tohi-Tapu ’e ’alutahi tana ’u manatu mai te kamata ’o a’u ki te faka’osi.*
7 Ko te ’uluaki tohi ’o te Tohi-Tapu, ’e ina fakamatala mai te kamata’aga ’o te ’u fihifihia ’o te malamanei. Ko te tohi fakamuli ’e ina fakahā mai ko te kele kātoa ’e liliu anai ko he palatiso, pe’e ko he ’ōloto. ’E fakamatala ’i te Tohi-Tapu te ’u lau’i afe ta’u mo ta’u ’o te hisitolia ’o te tagata, pea ’i hona fa’ahiga ’alu’aga, ’e tokoni mai ke tou mahino pe’e koteā te finegalo ’o te ’Atua pea ’e ina fakahoko feafea’i anai. ’E ko he me’a fakaofoofo ia te ’alutahi ’a te ’u manatu ’a te Tohi-Tapu, pea ’e mole tonu ke tou punama’uli ki te fa’ahi ’aia he’e ko te tohi ’e ha’u mai te ’Atua.
8 ’E totonu te ’u fakamatala ’a te Tohi-Tapu ’o ’uhiga mo te ’u me’a fakapoto lalahi. Ne’e kua talanoa ia ki he ’u me’a ne’e mole he’eki ’ilo’i ’i tona temi. Ohage la, ko te tohi ’o Levitike, ’e tu’u ai te ’u lao ma’a te Iselaele ’āfea, ’o ’uhiga mo te fakamama’o kehe ’o te haha’i mahaki, pea mo te fakama’a, kae ko te ’u pule’aga ’o tonatou ’u tafa’aki ne’e mole nātou ’ilo’i nātou ia te ’u fa’ahi ’aia. ’I te ’u temi ’āfea ne’e lahi ia te ’u manatu hala ’a te haha’i ’o ’uhiga mo te agaaga fa’u ’o te kele, kae ne’e tu’u ’i te Tohi-Tapu ko te kele ’e takafuafua. (Isaia 40:22) Ne’e mo’oni ia te ’ui ’a te Tohi-Tapu ko te kele ‘ ’e tautau ’i te noa.’ (Sopo 26:7) ’E mo’oni ko te Tohi-Tapu ’e mole ko he tohi mo’o ako’i mai ia te ’u me’a fakapoto lalahi, kae ’e totonu tana ’u fakamatala ’o ’uhiga te ’u fa’ahi feiā. ’E mole tonu ke tou punama’uli ki te fa’ahi ’aia, he’e ko te tohi ’e ha’u mai te ’Atua.
9 Tahi ’aē me’a, ko te ’u fakamatala ’a te Tohi-Tapu ’e totonu pea mo tou lava falala kiai. ’E fakamatalatala lelei ai te ’u higoa ’o te ’u haha’i pea mo tonatou ’u ha’u’aga.# Ko te ’u tagata fai fakamatala hisitolia ’o te temi mu’a, ’i te agamāhani ne’e mole nātou fakamatala ia te ’u tau ’aē ne’e mole mālo ai tonatou fenua. Kae ko te kau tagata faitohi ’o te Tohi-Tapu, ne’e nātou talanoa ki te ’u me’a ’aē ne’e hoko mo’oni, mā’ia mo tanatou ’u agahala pea mo te ’u agahala ’o tonatou fenua. Ohage la, ’i te tohi ’o Faka au, ko te tagata faitohi ko Moisese, ne’e ina fakahā fakahagatonu tana agahala mamafa ’aē ne’e iku ai mo tona fakatonutonu’i mālohi. (Faka au 20:2-12) ’I te tahi ’u fakamatala ’o te ’u hisitolia ’āfea, ’e ma’u tahitahiga ai te ta’i fakamatala fakahagatonu ’aia, kae ’e ma’u ia te fa’ahi ’aia ’i te Tohi-Tapu, he’e ko te tohi ’e ha’u mai te ’Atua.
KO HE TOHI ’E MA’U AI TE POTO ’AOGA
10 Mai tona ’uhiga ’aē ko te Tohi-Tapu ’e ha’u mai te ’Atua, koia “’e ’aoga ai mo’o ako’i, mo’o fakatonutonu’i, mo’o fakatokatoka ’o te ’u me’a.” (2 Timoteo 3:16, MN) Ei ko te Tohi-Tapu ’e ko he tohi ’e ’aoga. ’E ina fakahā lelei mai te nātula ’a te tagata, pea ’e mole tou punama’uli ki te fa’ahi ’aia, he’e ko te Tohi-Tapu ’e ha’u mai ia Sehova ’Atua, te Tupu’aga. ’E mahino lelei age ia Sehova ki tatatou ’u manatu pea mo te ’u me’a ’aē ’i ’otatou loto. Tahi ’aē me’a, ’e ’ilo’i e Sehova te ’u me’a ’aē ’e ’aoga ki totatou ma’uli fiafia, pea mo ina ’ilo’i te ’u aga ’aē ’e mole tonu ke tou fai.
11 Tou vaka’i age mu’a te faiakonaki ’a Sesu ’aē ’e higoa ko te Akonaki ’i te Mo’uga, ’aē ’e tohi iā Mateo kapite 5 ki te 7. ’I tana akonaki makehe ’aia, ne’e lahi te ’u fa’ahi ne’e talanoa kiai ia Sesu, ohage la ko te ’u fa’ahi ’aē ’e tonu ke tou fai ke feala hatatou ma’u ia te fiafia mo’oni, te fa’ahiga fakatokatoka ’o te ’u tokakovi, te fa’ahiga fai ’o te faikole, pea mo te manatu ’aē ’e tonu ke tou ma’u ’o ’uhiga mo te ’u koloā faka mālama. Ia ’aho nei, ko te ’u folafola ’a Sesu ’e kei mālohi pea mo ’aoga ohage pe ko tona temi.
12 Ko ’ihi pelesepeto faka Tohi-Tapu, ’e ’aoga ki te ma’uli faka famili, ki te ’u agamāhani ’i te gāue, pea mo te ’u felogoi mo ’ihi. Ko te ’u pelesepeto faka Tohi-Tapu ’e ’aoga ki te haha’i fuli, pea ko tana ’u tokoni ’e ’aoga tu’uma’u. Ko te poto ’aē ’e ma’u ’i te Tohi-Tapu, ’e lava fakanounou ’aki te ’u palalau faka’atua ’aē ne’e tohi e te polofeta ko Isaia: “Ko au, Sehova, ko au tou ’Atua, ia Ia ’aē ’e ina ako’i koe ke ’aoga kiā te koe.”—Isaia 48:17.
KO HE TOHI ’E TU’U AI TE ’U LEA FAKA POLOFETA
13 ’E lahi ’aupito te ’u lea faka polofeta ’e tu’u ’i te Tohi-Tapu, pea ’e lahi te ’u lea faka polofeta kua ’osi hoko. Ohage la ko te lea faka polofeta ’aē ne’e tohi e te polofeta ko Isaia, ’i te valu sēkulō ’i mu’a ’o totatou temi. Ne’e fakakikite ai e Sehova ’e faka’auha anai ia te kolo ’o Papiloni. (Isaia 13:19; 14:22, 23) Ne’e ina fakahā age kiā Isaia pe’e hoko feafea’i anai ia te faka’auha ’aia. Ko te ’u kautau mai te tahi ’u fenua ’e nātou fakamamaha anai te vaitafe ’o Papiloni, pea mo nātou hūfi anai te kolo, kae mole fai he tau. ’E mole gata ai, he’e ko te lea faka polofeta ’aia ’a Isaia, ne’e ina fakahā mo te higoa ’o Siliusi, ia te hau ’aē ka ina fakatō anai ia Papiloni.—Isaia 44:27-45:2.
14 Hili kiai ta’u e 200, ’i te pō ’o te ’aho 5 ki te ’aho 6 ’o ’Oketopeli ’o te ta’u 539 ’i mu’a ’o totatou temi, ne’e ’ōmai ia te ’u kautau ’o fakaōvi mai tonatou nofo’aga ki te kolo ’o Papiloni. Ne’e ko ai tonatou kamutoa? Ne’e ko te hau Pelesia ’e higoa ko Siliusi. Ne’e ko te kamata’aga ’aia ’o te fakahoko ’o te lea faka polofeta fakaofoofo. Kae ohage ko tana tala fakakikite, ne’e hoko koa te hūfi ’o Papiloni e te ’u kautau ’o Siliusi kae mole hoko he tau?
15 ’I te pō ’aia, ko te kau Papiloni ne’e nātou fai tanatou fakafiafia pea ne’e mole nātou tu’ania he me’a he ne’e puipui nātou e te ’u fo’i kaupā lalahi pea mo mātolu ’o tonatou kolo. Kae lolotoga te pō ’aia, ’aki he fakakaukau poto, ne’e ōfe’i kehe e Siliusi te vaitafe ’aē ne’e fakalaka ’i te kolo. ’I te kua maha ’o te vaitafe, ne’e fakalaka tana ’u kautau ’i te vai pea mo nātou fakaōvi ki te ’u kaupā ’o te kolo. Kae ’e feafea’i anai ki te ’u kautau ’o Siliusi hanatou fakalaka ’i te ’u kaupā? ’E mole ’ilo’i pe koteā tona tupu’aga, kae ’i te pō ’aia ne’e tuku ava te ’u matapā ’o te kolo, pea ne’e mole ’i ai hona ’u tagata le’o.
16 ’O ’uhiga mo Papiloni, ne’e fakakikite fēnei: “’E mole toe nofo’i anai, pea ’e mole tu’u anai mai he ta’iake ki he tahi ta’iake. Ko te Alape ’e mole ina fakatu’u ai anai tona fale fehikitaki, pea ko te kau tauhi ōvi ’e mole nātou fakatakoto ai anai tanatou ’u faga manu.” (Isaia 13:20) Ko te lea faka polofeta ’aia ne’e mole ina fakakikite pe ia te faka’auha ’o te kolo, kae ne’e ina toe fakakikite foki mo tana tu’u lāvaki ’o talu ai. Ne’e hoko mo’oni te ’u palalau ’aia, kote’uhi ia kilometa e 80 ’i te potu saute ’o Bagdad, ’i Ilakia, ’e tu’u lāvaki ai te tu’ulaga ’āfea ’o Papiloni. Ko he fakamo’oni ’aia kua hoko ia te ’u palalau ’aē ne’e tala age e Sehova kiā Isaia: “’E au hiko’i anai te kolo ’aia ’aki te taufale hiko ’o te faka’auha.”—Isaia 14:22, 23.%
17 ’E tou fakamo’oni ko te Tohi-Tapu, ’e ko he tohi ’e ina fakaloto mālohi’i tatatou tui, kote’uhi ’e tou ma’u ai te ’u lea faka polofeta ne’e hoko mo’oni. Koia ’e tou falala mālohi ko Sehova ’Atua ’e ina toe fakahoko anai mo tana fakapapau, ’aē ko te fakaliliu ia te kele ko he palatiso, he ne’e ina fakahoko tana ’u fakapapau ’i mu’a atu. (Faka au 23:19) Ei, ’e tou ma’u “te ’amanaki ’o te ma’uli he’egata ’aē ne’e fakapapau ’i mu’a atu ’o he ’u temi loaloaga, e te ’Atua ’aē ’e mole feala ke loi.”—Tito 1:2, MN.^
“KO TE FOLAFOLA ’A TE ’ATUA ’E MA’ULI”
18 ’Aki te ’u fa’ahi ’aē kua tou vaka’i ’i te kapite ’aenī, ’e mahino lelei mai ko te Tohi-Tapu ’e ko he tohi ’e makehe mo’oni. Pea ’e mole makehe ’uhi pe he’e ’alutahi tana ’u manatu, mo totonu tana fakamatala ia te ’u me’a fakapoto lalahi, mo tona ’u hisitolia, mo ma’u ai te poto ’aoga, pea mo te ’u lea faka polofeta ’aē ’e tou lava falala kiai. Ne’e tohi fēnei e te ’apositolo Kilisitiano ko Paulo: “Ko te folafola ’a te ’Atua ’e ma’uli pea mo mālohi, pea ’e māsila age ia ’i te heletā mata lua fuape pea ’e ulu ia ’o kaku ki tana vahe’i te nefesi pea mo te laumālie, pea mo te ’u hokoga hui mo ’onatou gako’i hui, pea ’e feala ke ina ’ilo’i lelei te ’u manatu pea mo te ’u fakatu’utu’u ’o te loto.”—Hepeleo 4:12, MN.
19 Ko te “folafola” pe’e ko te logo ’o te ’Atua ’aē ’e tou lau ’i te Tohi-Tapu, ’e ina lava fetogi totatou ma’uli. ’E lava tokoni mai ke tou sivisivi lelei ia tatou totonu. ’E lagi tou lau ’e tou ’ofa ki te ’Atua, kae ’e tou ’ilo’i anai tatatou ’u manatu mo’oni, pea mo te ’u fakatu’utu’u mo’oni ’o totatou loto, ’i tatatou fa’ahiga tali ki te ’u me’a ’aē ’e ako’i mai e te Folafola, ia te Tohi-Tapu.
20 Ko te Tohi-Tapu ’e ko he tohi ’e ha’u mo’oni mai te ’Atua, pea ’e tonu ke tou lau, mo tou ako, pea mo tou lelei’ia. Koutou fakahā takotou loto fakafeta’i ki te me’a ’ofa ’aia ’o te ’Atua, ’o koutou haga lau te ’u manatu ’aē ’e tu’u ai. Kapau ’e koutou fai feiā, pea ’e toe lahi age anai takotou mahino ki te fakatu’utu’u ’o te ’Atua ’o ’uhiga mo te malamanei. ’I te kapite ’aē ka hoa mai, ’e tou vaka’i ai anai pe’e koteā te fakatu’utu’u ’aia pea ’e hoko feafea’i anai.
KOTEĀ ’AĒ ’E AKO’I MAI ’I TE TOHI-TAPU?
- Ko te Tohi-Tapu ’e ha’u mai te ’Atua, pea ’e totonu pea mo tou lava falala kiai.—2 Timoteo 3:16.
- Ko te ’u tokoni ’aē ’e tou ma’u ’i te Folafola ’a te ’Atua, ’e ’aoga ki totatou ma’uli ’o te ’aho fuli.—Isaia 48:17.
- ’E hoko mo’oni anai te ’u fakapapau ’a te ’Atua ’aē ’e tu’u ’i te Tohi-Tapu.—Faka au 23:19.
* Ko ’ihi ’e nātou ’ui ’e ’i ai te ’u koga ’o te Tohi-Tapu ’e fakafeagai ki tona tahi ’u koga, kae ’e mole he fakatafito’aga ’o tanatou ’u valoki. Koutou vaka’i iā te kapite 7 ’o te tohi La Bible : Parole de Dieu ou des hommes ? ’aē ne’e tā e te kau Fakamo’oni ’a Sehova.
# Ohage la, ’e fakamatalatala lelei te ha’u’aga ’o Sesu iā Luka 3:23-38.
% Kapau ’e koutou fia ma’u he tahi ’u fakamahino ’o te ’u lea faka polofeta ’a te Tohi-Tapu, koutou vaka’i te kaupepa ’aē ne’e tā e te kau Fakamo’oni ’a Sehova, Un livre pour tous, ’i te pasina 27 ki te pasina 29.
^ Ko te faka’auha ’o Papiloni, ’e mole ko te lea faka polofeta pe ’aia ’o te Tohi-Tapu kua hoko. Ne’e hoko mo te ’u lea faka polofeta ’o ’uhiga mo te faka’auha ’o Tile pea mo Ninive. (Esekiele 26:1-5; Sofonia 2:13-15) ’O feiā mo te lea faka polofeta ’a Taniela, ’aē ne’e ina fakakikite te fefakahoahoa’aki ’a te ’u pule’aga lalahi ’o te malamanei, ’o hoa atu ki Papiloni. Ohage la ko Metia mo Pelesia, pea mo Keleka. (Taniela 8:5-7, 20-22) Vaka’i Te Tahi ’u Fakamahino ’aē ’e fakamatala ai te ’atu ’u lea faka polofeta ’o ’uhiga mo te Mesia, pea ne’e fakahoko e Sesu Kilisito.
Te ’u Fehu’i Ako
1, 2. He ko’e ’e tou ’ui ko te Tohi-Tapu ’e ko he me’a ’ofa ’e fakaloto fiafia mai te ’Atua?
3. Koteā ’aē ’e fakahā mai e te Tohi-Tapu ’o ’uhiga mo Sehova, pea he ko’e ’e malave ki ’otatou loto?
4. Kiā koutou, koteā ’aē ’e makehe ai ia te Tohi-Tapu?
5. He ko’e ’e tou ’ui ko te Tohi-Tapu “’e ha’u mai te ’Atua”?
6, 7. He ko’e ’e fakaofoofo te ’alutahi ’a te ’u manatu ’a te Tohi-Tapu?
8. Koutou tuku mai he ’u fa’ifa’itaki ’e hā ’aki mai ai ia te totonu ’a te Tohi-Tapu ’i te ’u me’a fakapoto lalahi.
9. (a) Ko te ’u fa’ahi fea ’aē ’e totonu pea mo’oni ai ia te ’u hisitolia ’a te Tohi-Tapu? (b) Koteā ’aē ’e tou lava ’ui ’o ’uhiga mo te Tohi-Tapu, ’i te fakamatala fakahagatonu ’o tona ’u tagata faitohi?
10. He ko’e ’e mole tou punama’uli ki te ’aoga ’o te Tohi-Tapu?
11, 12. (a) Koteā te ’u fa’ahi ’aē ne’e talanoa kiai ia Sesu ’i tana Akonaki ’aē ’i te Mo’uga? (b) Koteā te tahi ’u fa’ahi ’aoga ’e talanoa kiai ’i te Tohi-Tapu, pea he ko’e koa ko tana ’u tokoni ’e ’aoga tu’uma’u?
13. Koteā te ’u fa’ahi ’aē ne’e fakahā e Sehova ki te polofeta ko Isaia ke ina tohi ’o ’uhiga mo Papiloni?
14, 15. Ne’e hoko feafea’i ia te lea faka polofeta ’o Isaia ’o ’uhiga mo Papiloni?
16. (a) Koteā ’aē ne’e fakakikite e Isaia ’o ’uhiga mo te iku’aga faka’osi ’o Papiloni? (b) Ne’e hoko feafea’i te lea faka polofeta ’a Isaia ’o ’uhiga mo te tu’u lāvaki ’o Papiloni?
17. He ko’e ’e ko he fakaloto mālohi ki tatatou tui, ia te hoko ’a te ’u lea faka polofeta ’o te Tohi-Tapu?
18. Koteā te ’u palalau ’aē ne’e fai e te ’apositolo ko Paulo, ’e hā ai te mālohi ’o “te folafola ’o te ’Atua”?
19, 20. (a) ’E lava tokoni feafea’i mai ia te Tohi-Tapu ke tou sivisivi ia tatou totonu? (b) ’E feafea’i hakotou fakahā takotou loto fakafeta’i ki te me’a ’ofa makehe ’o te ’Atua, ia te Tohi-Tapu?