1, 2. He koʼe neʼe mole punamaʼuli ia Paulo ʼe fakatagaʼi anai ia ia ʼi Selusalemi?

 NEʼE hao ia Paulo mai te hahaʼi itaita ʼi Selusalemi, pea koʼeni kua toe pilisoniʼi. Pea neʼe mole punamaʼuli te apositolo faʼafai ʼaia ki tona fakatagaʼi. Neʼe kua fakaha age kia ia, ʼe “pilisoniʼi mo fakatagaʼi anai” ia ia ʼi te kolo ʼaia. (Gaue 20:22, 23) Logo la neʼe mole ina iloʼi pe kotea ka hoko anai ki ai, kae neʼe iloʼi pe e Paulo ʼe hoko atu pe tona ʼu mamahi, ʼuhi ko te huafa ʼo Sesu.​—Gaue 9:16.

² Neʼe kua fakatokaga e he kau polofeta Kilisitiano ki ai, ʼe haʼi anai ia ia pea mo tuku age “ki te ʼu nima ʼo te hahaʼi ʼae ʼe mole Sutea.” (Gaue 21:4, 10, 11) Mole faʼa fualoa ki ai, neʼe faigaʼi e te kau Sutea ke natou matehi ia ia. Pea ki muli age, neʼe meihiʼi pe ke “matehi” ia ia e natou ʼo te Sanetualio, ʼi tanatou fihi ʼo ʼuhiga mo te ʼu palalau ʼae neʼe ina fai. Kua pilisoniʼi leva te apositolo e te kau solia Loma. ʼE toe fakamauʼi anai ia ia, pea ʼe tonu anai ke ina haofaki tana tui ki te ʼu tukugakoviʼi hala ʼae neʼe fai ʼo ʼuhiga mo ia. (Gaue 21:31; 23:10) Koia ʼae ʼe ʼaoga lahi ki te apositolo ko Paulo he fakalotomalohi.

3. ʼE tou maʼu ʼifea te ʼu fakalotomalohi ʼae ke tou hoko atu te gaue faifakamafola?

³ ʼE tou maʼuʼuli nei ʼi te ʼu temi fakamuli, pea “ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito Sesu, ʼe toe fakatagaʼi anai mo natou.” (2 Tim. 3:12) ʼI ʼihi temi, ʼe toe ʼaoga mo tatou he ʼu fakalotomalohi ke tou hoko atu te faifakamafola. ʼE tou fakafetaʼi lahi ki te ʼu palalau fakalotomalohi ʼae ʼe tou maʼu ʼi tona temi totonu, ʼi ʼatatou tohi, mo te ʼu fono ʼae neʼe fakatuʼutuʼu e “te tagata kaugana agatonu mo poto.” (Mat. 24:45) ʼE fakapapauʼi mai e Sehova ʼe mole feala anai ki te ʼu fili ke natou matehi ʼana kaugana fuli. Pea ʼe mole natou lava taʼofi anai ʼi he temi te gaue faifakamafola. (Esa. 54:17; Sel. 1:19) Kae kotea ʼae neʼe hoko kia Paulo? Neʼe ina maʼu koa he ʼu fakalotomalohi ke hoko atu tana fakamoʼoni katoa logo la te fakafeagai? Kapau koia, neʼe fakalotomalohiʼi feafeaʼi ia Paulo? Pea kotea ʼae neʼe ina logoʼi?

4, 5. Neʼe fakalotomalohi feafeaʼi ia Paulo? Pea he koʼe neʼe to lelei te fakalotomalohi ʼaia?

⁴ ʼI te po ʼae neʼe hoa mai ki te maveuveu ʼae neʼe hoko ʼi te Sanetualio, neʼe maʼu ai e Paulo he toe fakalotomalohi. ʼE ui fenei ʼi te Tohi-Tapu: “Neʼe tuʼu  ia te ʼAliki ʼi ʼona tafa ʼo ina ui fenei: ‘Ke ke lotomalohi! Koteʼuhi, ohage pe ko tau foaki he fakamoʼoni katoa ʼo ʼuhiga mo au ʼi Selusalemi, ʼe tonu ke ke toe foaki foki he fakamoʼoni ʼi Loma.’ ” (Gaue 23:11) Neʼe lotomalohi ʼosi ia Paulo ʼi te ʼu palalau ʼae neʼe fai age e Sesu. Neʼe ina iloʼi ai ʼe mole mate anai, kae ʼe alu anai ki Loma he ʼe ina maʼu te pilivilesio ʼae ke ina fakamoʼoni katoa ai ʼo ʼuhiga mo Sesu.

⁵ Neʼe to lelei te fakalotomalohi ʼo Paulo. ʼI te uhu ake, neʼe fonofono e te ʼu tagata Sutea ʼe toko 40 tupu ʼo natou fai ai he ‘fakapapau, ʼae ke mole natou kakai mo iinu mo kapau heʼeki natou matehi ia Paulo.’ Neʼe ha ʼi tanatou fakatuʼutuʼu tanatou loto ʼae ke natou matehi te apositolo. Pea kapau ʼe mole hoko tanatou fakatuʼutuʼu, neʼe natou ui ʼe hoko anai he malaʼia kia natou. (Gaue 23:12-15) Neʼe tali e te kau pelepitelo pule mo te kau takitaki Sutea te fakatuʼutuʼu, ʼae ke toe ʼave ia Paulo ki te Sanetualio, takua ke vakavakaʼi lelei ai tona aluʼaga. Kae ʼi tona fakahagatonu, neʼe natou fia ʼohofi ia Paulo pea mo matehi ia ia.

6. Neʼe iloʼi feafeaʼi te fakatuʼutuʼu ʼae ke matehi ia Paulo? Pea kotea te faʼifaʼitaki ʼe tuku mai ki te kau tupulaga ia ʼaho nei?

⁶ Kae neʼe logo ia te tama ʼa te tokolua ʼo Paulo ki tanatou fakatuʼutuʼu, pea neʼe alu ʼo fakamatala kia Paulo. Pea neʼe fekauʼi e Paulo ke alu ʼo fakaha ki te kamutoa Loma ʼae ko Kolote Lisiasi. (Gaue 23:16-22) ʼE tou tui papau, ʼe ʼofa ia Sehova ki te kau tupulaga, ohage ko te tama ʼa te tokolua ʼo Paulo, ʼae ʼe tokakaga lelei muʼa ki te ʼu kaugana ʼa te ʼAtua, ia natou totonu. ʼAki he lototoʼa, ʼe natou lagolago ki te fakamafola ʼo te logo lelei ʼo te Puleʼaga ʼo te ʼAtua.

7, 8. Kotea ʼae neʼe fai e Kolote Lisiasi ke puipui ai ia Paulo?

⁷ ʼI te fakaha age te fakatuʼutuʼu ʼae ke matehi ia Paulo, neʼe fakatotonu ai e Kolote Lisiasi, te pule ʼo he kautau ʼe toko 1 000, ke teuteuʼi te toko 470 kau solia, ke natou mavae mai Selusalemi ʼi te po pe ʼaia, ʼo ʼave haohaoa ia Paulo ki Sesalea. Neʼe ko he ʼu tagata solia, mo te ʼu tagata heka hosi, pea mo he ʼu tagata mo ʼanatou tao. Pea ʼi tanatou tau atu, neʼe tonu ke natou ʼave ia ia ki te Kovana ko Felise. a Ko Sesalea neʼe ko te kolo hau ʼo te puleʼaga Loma ʼi Sutea. Neʼe hahaʼi te kau Sutea neʼe maʼuʼuli ai, kae neʼe kaugamalie age te kau matapule. Neʼe tokalelei pe ia Sesalea, kae neʼe mole hage ia ko Selusalemi, ʼae neʼe hoko tuʼumaʼu ai te ʼu maveuveu fakalotu. Neʼe toe tuʼu foki ʼi Sesalea ia te fale solia lahi ʼo te kau Loma.

⁸ Neʼe momoli e Lisiasi te tohi kia Felise, ohage ko tona fakatotonu e te lao ʼa te kau Loma. Neʼe ina fakamahino ai te aluʼaga ʼae neʼe hoko. Neʼe ui e Lisiasi, ʼi tana iloʼi ʼae ko Paulo ʼe ko he tagata Loma, neʼe ina haofaki ai ia Paulo, he neʼe “ ʼamanaki matehi ia ia” e te kau Sutea. Neʼe ui e Lisiasi neʼe mole fai e Paulo he hala “ ʼe tuha ke matehi peʼe ke pilisoniʼi ia ia.” Kae ʼuhi ʼae neʼe fonofono ke matehi ia Paulo, neʼe ina foimo ʼave ia ia kia Felise te kovana lahi, ke logo kia natou ʼae neʼe natou tukugakoviʼi ia Paulo, pea ke ina toʼo he tonu ki te aluʼaga.​—Gaue 23:25-30.

9. (1) Neʼe ha feafeaʼi neʼe mole fakaʼapaʼapa ia Lisiasi ki te ʼuhiga tagata Loma ʼa Paulo? (2) He koʼe ʼe tonu ke tou fakaʼaogaʼi te ʼu fealagia ʼo te Lao?

 ⁹ Neʼe moʼoni koa te meʼa ʼae neʼe tohi e Lisiasi? Neʼe mole ina fakaha fuli te moʼoni. Neʼe hage pe ia ko hana fia matalelei ki te kovana. Neʼe mole ina haofaki ia Paulo ʼuhi ʼae ʼe ko he tagata Loma. Pea tahi, neʼe mole fakaha pe la e Lisiasi neʼe ina ‘haʼi ia Paulo ʼaki he ʼu seini ʼe lua,’ pea ki muli age, neʼe ina fakatotonu ke ‘fakafehuʼi pea mo huipiʼi ia ia.’ (Gaue 21:30-34; 22:24-29) Koia neʼe mole fakaʼapaʼapa ia Lisiasi ki te ʼu fealagia ʼae neʼe maʼu e Paulo ʼi tona ʼuhiga tagata Loma. Ia ʼaho nei, ʼe uga e Satana ia natou ʼae ʼe faʼafai ʼi te ʼu lotu hala ke natou fakatagaʼi te hahaʼi ʼa te ʼAtua. ʼE natou faigaʼi ke mole tou tauhi faʼifaʼitaliha ki totatou ʼAtua. Kae ohage pe ko Paulo, ʼe fakaʼaogaʼi e te hahaʼi ʼa te ʼAtua te ʼu fealagia ʼo te lao moʼo puipui ai tanatou tauhi.

10. Kotea te ʼu tukugakovi hala ʼae neʼe fai kia Paulo?

¹⁰ Neʼe ‘leʼoleʼo ia Paulo ʼi te fale hau ʼo Helote’ ʼi Sesalea, ʼo fakatalitali ke tau mai Selusalemi ia natou ʼae ʼe natou tukugakoviʼi ia ia. (Gaue 23:35) Hili ʼaho ʼe 5, neʼe tau age te Pelepitelo Lahi ko Ananiasi, mo te tagata poto palalau ko Teletulio mo ʼihi kau takitaki Sutea. Neʼe kamata vikiʼi ai e Teletulio ia Felise ki te ʼu meʼa ʼae neʼe ina fai maʼa te kau Sutea. b Neʼe fakalai kia Felise he neʼe loto ke ʼofainaʼi ia ia e te kovana. Pea ʼosi ʼaia, neʼe ina tukugakoviʼi ia Paulo, ʼo ui ko ‘he tagata ʼe fakatupu maveuveu, ʼe ina lagaʼi he ʼu agatuʼu ʼi te lotolotoiga ʼo te kau Sutea fuli, ʼi te ʼu potu fuli ʼo te kele, pea ʼe ko he takitaki ʼo te magaʼi lotu ʼa te kau Nasaleti. Neʼe natou toe ui ʼe ina moamoagaʼi ia te fale lotu, koia ʼae neʼe natou puke ai ia ia.’ Pea “neʼe toe lagolago foki mo te kau Sutea ki te ʼu tukugakovi ʼaia, ʼo natou ui ʼe moʼoni te ʼu faʼahi ʼaia.” (Gaue 24:5, 6, 9) Neʼe natou ui ʼe lagaʼi e Paulo he ʼu agatuʼu, mo takitaki he magaʼi lotu agakovi, pea ʼe ina moamoagaʼi ia te fale lotu. Ko he tahi ʼe ina fai te ʼu meʼa ʼaia ʼe tuha ke matehi.

11, 12. Kotea te tali ʼa Paulo ki te ʼu tukugakoviʼi hala ʼae neʼe fai kia ia?

¹¹ Neʼe fakagafua leva kia Paulo ke palalau, ʼo ina ui fenei: “ ʼE au fiafia ʼi te fakamahino ʼi ʼou muʼa toku aluʼaga.” Neʼe ina ui fakahagatonu age ko te ʼu tukugakovi ʼae neʼe fai kia ia ʼe mole moʼoni. Neʼe mole moamoagaʼi e te apositolo te fale lotu, pea neʼe mole ina fakamaveuveuʼi te hahaʼi. Neʼe ina ui neʼe mole ʼi Selusalemi lolotoga “ni taʼu,” kae neʼe haʼu ʼo ʼaumai he ʼu “meʼa ʼofa.” Pea neʼe foaki te ʼu meʼa ʼofa ʼaia ki te kau Kilisitiano ʼae neʼe masisiva, ʼuhi ko te hoge mo te fakataga. Neʼe fakamahino e Paulo ʼi muʼa ʼo tana hu  ki te fale lotu, neʼe ina ‘fakamaʼa ia ia ʼo mulimuli ki te Lao,’ pea neʼe ina faigaʼi tuʼumaʼu ke ina “taupau he leʼo ʼo loto ʼe maʼa ia muʼa ʼo te ʼAtua pea mo te tagata.”​—Gaue 24:10-13, 16-18.

¹² Kae neʼe ui e Paulo ʼe ina foaki he tauhi taputapu ki te ʼAtua ʼo ʼana kui “ ʼo mulimuli ki te tauhi ʼae ʼe natou fakahigoaʼi ko he magaʼi lotu,” pea ʼe tui “ki te ʼu meʼa fuli ʼae ʼe tuʼu ʼi te Lao pea mo te ʼu tohi ʼa te kau Polofeta.” Neʼe tui ia Paulo, ʼo feia mo natou ʼae neʼe fakafeagai ki ai, ki te ʼamanaki ʼae ʼe ʼi ai anai “he fakatuʼuake ʼo te kau faitotonu pea mo te kau heʼe faitotonu.” Pea neʼe ui e Paulo kia natou ʼae ʼe natou tukugakoviʼi ia ia: “Ke fakaha atu e te ʼu tagata ʼaeni te kovi ʼae neʼe natou maʼu ʼi tanatou fakamauʼi au ia muʼa ʼo te Sanetualio, naʼa meʼa age pe ko taku kalagaʼi fenei ʼi te lotolotoiga ʼo natou: ‘ ʼI te ʼaho nei ʼe fakamauʼi au ʼi ʼokotou muʼa, ʼuhi ko taku tui ki te fakatuʼuake ʼo te kau mate!’ ”​—Gaue 24:14, 15, 20, 21.

13-15. He koʼe ʼe tonu ke tou faʼifaʼitakiʼi ia Paulo moka fakamauʼi tatou e te ʼu pule taki ʼuhi ko tatatou tui?

¹³ Neʼe tuku mai e Paulo he faʼifaʼitaki lelei maʼa tatou, moka fakamauʼi tatou e te ʼu pule taki ʼuhi ko tatatou tui, peʼe ʼe tukugakoviʼi hala tatou takua ʼe tou agatuʼu ki te ʼu puleʼaga, mo fakatupu maveuveu, peʼe ʼe tou kau ki he “magaʼi lotu fakamataku.” Neʼe mole fakalai ia Paulo ki te kovana ʼaki ni palalau fakaoloolo, ke ʼofainaʼi ia ia e te kovana ohage ko tona fai e Teletulio. Kae neʼe nofo fakalogologo pe ia ʼaki he fakaʼapaʼapa. Neʼe tasilo ʼana palalau mo fakaʼeteʼete, kae neʼe fakahagatonu. Neʼe fakatokagaʼi e Paulo te mole ʼomai ʼihi “Sutea mai te potu fenua ʼo Asia” ʼae neʼe natou tukugakoviʼi ia ia, neʼe ina moamoagaʼi te fale lotu. Pea ʼo mulimuli ki te lao, neʼe tonu ke palalau ia Paulo mo natou, pea mo logo ki te ʼu tukugakovi ʼae neʼe natou fai ʼo ʼuhiga mo ia.​—Gaue 24:18, 19.

 ¹⁴ ʼE tou tokagaʼi neʼe mole mataku ia Paulo ʼi te palalau ʼo ʼuhiga mo tana tui. ʼAki he lototoʼa neʼe toe palalau ia Paulo ki tana tui ʼae ki te fakatuʼuake, logo la neʼe ko te aluʼaga ʼaia ʼae neʼe tupu ai te maveuveu ʼi te Sanetualio. (Gaue 23:6-10) Neʼe ina fakamahino lelei age kia natou ʼe ʼi ai anai he fakatuʼuake. Kotea tona tupuʼaga? Koteʼuhi neʼe fakamoʼoni e Paulo ʼo ʼuhiga mo Sesu, mo tona fakatuʼuake mai te mate. Kae neʼe faigataʼa kia natou ʼae neʼe fakafeagai kia ia, ke natou tui ki te faʼahi ʼaia. (Gaue 26:6-8, 22, 23) ʼI tona fakahagatonu, neʼe fakamauʼi ia Paulo ʼuhi ko tana tui ʼae ki te fakatuʼuake, kae tafito ki te fakatuʼuake ʼo Sesu.

¹⁵ Ohage ko Paulo, ʼe feala ke tou faifakamafola ʼaki he lototoʼa, pea ke tou lotomalohi ʼi te ʼu palalau ʼae neʼe fai e Sesu ki ʼana tisipulo, ʼi tana ui ʼae: “ ʼE fehiʼaʼinaʼi anai koutou e te hahaʼi fuli ʼuhi ko toku huafa, kae ko ʼae ʼe kataki ʼo kaku ki te fakaʼosi ʼe haofaki anai.” ʼE tonu koa ke tou tuʼania ki te ʼu palalau ʼae ka tou fai? Kailoa, he neʼe fakapapauʼi fenei mai e Sesu: “Pea ka puke koutou, ʼaua naʼa kotou tuʼania ki te ʼu palalau ʼae ka kotou fai. Kae ke kotou fai te ʼu palalau ʼae ka foaki atu anai ʼi te temi ʼaia, he ʼe mole ko koutou ʼae ʼe palalau, kae ʼe ko te laumalie maʼoniʼoni.”​—Mko. 13:9-13.

16, 17. (1) Kotea ʼae neʼe ui pea mo fai e Felise ʼi te fakamauʼi ʼo Paulo? (2) He koʼe neʼe mataku ia Felise? Pea he koʼe neʼe toe fia felaveʼi ia ia mo Paulo?

¹⁶ Neʼe mole ko te hoki logo ʼae ʼo te Kovana Lahi ko Felise ki te tui ʼa te kau Kilisitiano. ʼE ui fenei ʼi te Tohi-Tapu: “Neʼe iloʼi lelei pe e Felise te ʼu faʼahi ʼo ʼuhiga mo te Ala ʼaia [neʼe ko te kupu neʼe fakaʼuhigaʼi ki te lotu ʼo te kau ʼuluaki Kilisitiano], koia neʼe ina toe holo atu ki muli te fakamau, ʼo ina ui fenei: ‘Ka tau mai anai ia Lisiasi te kamutoa, pea hoki au fai anai he tonu ʼo ʼuhiga mo te faʼahi ʼaia.’ Pea neʼe ina fakatotonu age ki te pule solia ke leʼoleʼo ia Paulo kae ke tuku age hona ʼateaina, pea ke fakagafua age ki tana hahaʼi ke natou tokakaga ki te ʼu meʼa ʼae ʼe ʼaoga kia ia.”​—Gaue 24:22, 23.

¹⁷ Hili ki ai ni ʼaho, neʼe haʼu ia Felise mo tona ʼohoana ko Tulusila, te fafine Sutea pea neʼe ina fekauʼi ke ʼaumai ia Paulo. Neʼe nā “fagono leva ki tana palalau age ʼo ʼuhiga mo te tui kia Kilisito Sesu.” (Gaue 24:24) Kae ʼi te palalau age leva ʼa Paulo ʼo ʼuhiga mo “te faitotonu, mo te lotololomi pea mo te fakamau ʼae ka hoko mai, neʼe mataku ia Felise.” Neʼe mole kei tokalelei tana fakakaukau, koteʼuhi neʼe lahi te ʼu agakovi neʼe ina fai ʼi tona maʼuli. Koia ʼae neʼe ina ui age kia Paulo ke ‘alu muʼa, pea ka maʼu hona faigamalie, ʼe toe fakatotonu anai ke ʼaumai ia ia.’ ʼE moʼoni, neʼe palalau liuliuga ia Felise mo Paulo ki muli age. Kae neʼe mole ko tana fia iloʼi ʼaia te moʼoni, neʼe ʼamanaki ia ʼe foaki age e Paulo hana paʼaga.​—Gaue 24:25, 26.

18. He koʼe neʼe palalau ia Paulo kia Felise mo tona ʼohoana ʼo ʼuhiga “te faitotonu, mo te lotololomi pea mo te fakamau ʼae ka hoko mai”?

¹⁸ He koʼe neʼe palalau ia Paulo kia Felise mo tona ʼohoana ʼo ʼuhiga mo “te faitotonu, mo te lotololomi pea mo te fakamau ʼae ka hoko mai”? Koteʼuhi neʼe nā fia iloʼi pe kotea te fakaʼuhiga ʼo ‘te tui ʼae kia Kilisito Sesu.’ Neʼe iloʼi  e Paulo ko Felise mo tona ʼohoana neʼe nā fai he ʼu aga heʼe ʼaoga, neʼe nā agakovi mo heʼe faitotonu. Koia neʼe fia fakamahino age e Paulo kia naua, pe ʼe kotea ʼae ʼe fakamaʼua e te ʼAtua ki he tahi ʼe fia liliu ko he tisipulo ʼa Sesu. Neʼe ina fakaha te kehekehe ʼaupito ʼo te ʼu lekula ʼa te ʼAtua mo te faʼahiga maʼuli ʼa Felise mo tona ʼohoana. Neʼe tonu ke nā mahino ʼe fakamauʼi anai e te ʼAtua te hahaʼi fuli ʼo ʼuhiga mo ʼanatou manatu, mo ʼanatou palalau pea mo te ʼu meʼa ʼae ʼe natou fai. Pea ko te fakamau ʼa te ʼAtua ʼo ʼuhiga mo naua ʼe mamafa age ia ʼi te fakamau ʼae ka fai e Felise kia Paulo. Koia ʼae neʼe ‘mataku ai ia Felise’.

19, 20. (1) Kotea ʼae ʼe tonu ke tou fai ʼo ʼuhiga mo natou ʼae ʼe natou fia iloʼi te moʼoni, kae ʼi tona fakahagatonu, ʼe mole natou fia fakalogo ki te ʼAtua? (2) ʼE tou iloʼi feafeaʼi neʼe mole fia kaumeʼa ia Felise mo Paulo?

¹⁹ ʼI ʼihi temi moka tou faifakamafola, ʼe tou felaveʼi mo ni hahaʼi ʼe natou hage pe ko Felise. ʼI te kamata, ʼe hage ʼe natou fia iloʼi te moʼoni. Kae ʼi tona fakahagatonu, ʼe mole natou fia fakalogo ki te ʼAtua, pea mo fetogi ʼonatou maʼuli. ʼE tonu ke tou tokakaga moka tou tokoni ki te ʼu hahaʼi ʼaia. Kae ohage pe ko Paulo, moka tou palalau mo natou ki te ʼu lekula faitotonu ʼa te ʼAtua, ʼe tonu ke tou palalau fakaʼeteʼete. ʼE feala pe anai ke malave te moʼoni ki ʼonatou loto. Kae kapau ʼe tou tokagaʼi ʼe mole natou fia tuku tanatou aga ʼae ʼe kovi, pea tou tuku natou, kae tou olo tatou ki te hahaʼi ʼae ʼe natou kumi te moʼoni.

²⁰ ʼE ha ʼi te vaega ʼaeni te meʼa ʼae neʼe loto moʼoni ki ai ia Felise: “Hili taʼu ʼe lua, neʼe fetogi leva e Polokio Feseto ia Felise. Pea neʼe loto e Felise ke ʼofainaʼi ia ia e te kau Sutea, koia neʼe ina tuku ai ia Paulo ke pilisoniʼi.” (Gaue 24:27) Neʼe ha lelei ai neʼe mole fia kaumeʼa ia Felise mo Paulo. Neʼe iloʼi pe e Felise ko te hahaʼi ʼae ʼe kau ki “Te Ala,” neʼe mole ko he ʼu hahaʼi agatuʼu pea mo fakatupu maveuveu. (Gaue 19:23) Neʼe toe iloʼi e Felise neʼe mole maumauʼi e Paulo te lao ʼa te kau Loma. Kae neʼe ina tuku ia Paulo ke pilisoniʼi, he neʼe loto ke “ ʼofainaʼi ia ia e te kau Sutea.”

21. Kotea ʼae neʼe hoko kia Paulo ʼi te temi ʼae neʼe kovana ai ia Polokio Feseto? Kotea ʼae neʼe tupu ai tana lotomalohi tuʼumaʼu?

²¹ Ohage ko tona ui ʼi te vaega fakaʼosi ʼo Gaue kapite 24, neʼe kei pilisoniʼi ia Paulo ʼi te fetogi e Polokio Feseto te kovana foʼou ia Felise. Koia neʼe kamata ai te feʼaveʼaki liuliuga ʼo Paulo ki te ʼu tuʼi fakamau. ʼEi, neʼe taki te apositolo lototoʼa ʼaia “kia muʼa ʼo te ʼu hau pea mo te ʼu kovana.” (Luka 21:12) Pea ʼe tou vakaʼi ki muli age, neʼe ina foaki he fakamoʼoni ki te pule lahi ʼae neʼe maʼoluga age ʼi te temi ʼaia. Logo la tana fakalaka ʼi te ʼu aluʼaga faigataʼa ʼaia, kae neʼe mole vaivai pe la ʼi he temi te tui ʼa Paulo. ʼE tou tui papau neʼe lotomalohi pe ia Paulo, ʼuhi ko te ʼu palalau ʼae neʼe fai age e Sesu ʼae: “Ke ke lotomalohi!”