1. Kotea ʼae ʼe tatau ai te kau ʼuluaki Kilisitiano mo te kau Fakamoʼoni ʼa Sehova ia ʼaho nei?

 NEʼE natou faifakamafola ʼaki he faʼafai. ʼAki he agavaivai, neʼe natou tuku ke takitaki natou e te laumalie maʼoniʼoni. Logo la te ʼu fakataga, neʼe mole natou tuku tanatou palalau ki te logo lelei, pea neʼe lahi tonatou tapuakinaʼi e Sehova. Kapau neʼe hoko feia ki te kau ʼuluaki Kilisitiano, pea ʼe toe feia pe ki te kau Fakamoʼoni ʼa Sehova ia ʼaho nei.

2, 3. He koʼe ʼe makehe te tohi ʼo Gaue?

² ʼE mahino ia neʼe fakalotomalohiʼi koe e te ʼu fakamatala ʼae ʼi te Tohi ʼo Gaue. Ko te tohi ʼaia ʼe makehe ʼaupito, he ʼe fakamatala ai te hisitolia fakaofoofo ʼa te kau ʼuluaki Kilisitiano, pea neʼe loto e te ʼAtua ke tohi.

³ ʼE talanoa ʼi te tohi ʼo Gaue ki ni hahaʼi ʼe 95 mai ia fenua peʼe potu fenua ʼe 32, mo he ʼu kolo ʼe 54, pea mo he ʼu motu ʼe 9. ʼE ko he fakamatala ʼo he ʼu hahaʼi mahani mo ʼihi ʼe fialahi, mo he ʼu takitaki puleʼaga agatuʼu, pea mo he kau fakataga. Kae ʼe fakamatala tafito ai ki ʼotatou tehina mo tuagaʼane ʼo te ʼuluaki sekulo, neʼe tau mo te ʼu fihifihia ʼi tonatou maʼuli, kae neʼe natou hoko atu pe tanatou fakamafola ʼaki he faʼafai te logo lelei.

4. Kotea te pikipikiga ʼo tatou mo te apositolo ko Paulo, mo Tapita, pea mo ʼihi atu kau fakamoʼoni ʼo te temi muʼa?

⁴ Kua hili nei ki ai teitei taʼu ʼe 2 000, talu te temi ʼae neʼe maʼuʼuli ai te ʼu apositolo faʼafai ko Petelo mo Paulo, mo te toketa ʼofaina ko Luka, mo te tagata lotofoaki ko Palenapa, mo te tagata lototoʼa ko Setefano, mo te fafine agalelei ko Tapita, mo te fafine tali kaiga lelei ko Litia, pea mo ʼihi atu kau fakamoʼoni agatonu. Logo la kua fualoa tanatou pupuli, kae ʼe ʼi ai tonatou pikipikiga mo tatou. ʼE tou fakahoko ohage ko natou te gaue ʼae ko te fai ʼo ni tisipulo. (Mat. 28:19, 20) Mole koa la ko he toe pilivilesio ʼaia.

5. Neʼe kamata ʼifea e te ʼu ʼuluaki tisipulo ʼa Sesu tanatou faifakamafola?

⁵ Tou fakakaukauʼi age muʼa te gaue ʼae neʼe foaki e Sesu ki ʼana tisipulo. Neʼe ina ui fenei: “ ʼE kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:8) ʼUluaki, ʼaki te laumalie maʼoniʼoni, neʼe maʼu ai e te kau tisipulo te malohi ke natou fakamoʼoni “ ʼi Selusalemi.” (Gaue 1:1–8:3) Hili ia, ʼaki te takitaki  ʼa te laumalie, neʼe natou fakamoʼoni ai ʼi “Sutea katoa pea mo Samalia.” (Gaue 8:4–13:3) Ki muli age leva, neʼe natou kamata fakamafola te logo lelei “ ʼo kaku ki te ʼu potu taupotu ʼo te kele.”​—Gaue 13:4–28:31.

6, 7. Kotea ʼae ʼe tou maʼu ia ʼaho nei, neʼe mole maʼu e ʼotatou tehina mo tuagaʼane ʼo te ʼuluaki sekulo?

⁶ Neʼe mole maʼu katoa e ʼotatou tehina mo tuagaʼane ʼo te ʼuluaki sekulo, ia te Tohi-Tapu ki tanatou faifakamafola. Neʼe hoki maʼu pe te Evaselio ʼo Mateo ʼi te taʼu 41 H.T.S. Neʼe tohi e Paulo ʼihi ʼo ʼana tohi ʼi muʼa ʼo te taʼu 61 H.T.S., ʼae neʼe fakaʼosi ai te tohi ʼo Gaue. Kae neʼe mole maʼu katoa e te kau ʼuluaki Kilisitiano takitokotahi he ʼu hiki ʼo te ʼu Tohi Taputapu, peʼe ko he ʼu tohi ke natou tuku ki te hahaʼi ʼae neʼe fia logo. ʼI muʼa ʼo tanatou liliu ko ni tisipulo ʼa Sesu, neʼe logo te kau Kilisitiano Sutea ki te lau ʼo te ʼu Koga Tohi-Tapu Fakahepeleo ʼi te sinakoka. (2 Ko. 3:14-16) Maʼia mo natou ʼaia, neʼe tonu ke natou ako fakamalotoloto te ʼu koga tohi, ke natou lau fakaʼatamai ai.

⁷ Ia ʼaho nei, tokolahi ia tatou kua tou tahi maʼu pe tana Tohi-Tapu mo he ʼu tuʼuga tohi Fakatohi-tapu. ʼE tou tala te logo lelei mo fai ni tisipulo ia fenua ʼe 240, pea ia lea kehekehe.

8, 9. (1) Kotea ʼae neʼe lava fai e te ʼu tisipulo ʼa Sesu ʼaki te laumalie maʼoniʼoni? (2) Kotea te ʼu gaue ʼae ʼe fai e te tagata kaugana agatonu ʼaki te tokoni ʼa te laumalie ʼo te ʼAtua?

⁸ ʼI te fakatotonu e Sesu ki ʼana tisipulo ke natou liliu ko ni fakamoʼoni, neʼe ina ui fenei: “ ʼE kotou maʼu anai te malohi moka hifo mai ia te laumalie maʼoniʼoni kia koutou.” ʼAki te takitaki ʼa te laumalie ʼo te ʼAtua, peʼe ko tona malohi gaue, ʼe liliu anai te ʼu tisipulo ʼa Sesu ko ni fakamoʼoni ʼi te kele katoa. Koia neʼe feala ai kia Petelo mo Paulo ke nā fakamalolo te kau mahaki, mo kapu te ʼu temonio, pea mo te fakatuʼuake te kau mate. Kae ʼaki te laumalie maʼoniʼoni neʼe maʼu ai e te kau ʼuluaki Kilisitiano te malohi ke natou fakahoko he gaue ʼe toe maʼuhiga age. Neʼe feala ai ki te kau apositolo mo te kau tisipulo ke natou fakamafola te ʼatamai malama totonu, ʼae ʼe fakaʼuhiga ki te maʼuli heʼe gata.​—Soa. 17:3.

⁹ ʼI te ʼaho ʼo te Penikosite 33 H.TS., neʼe kamata palalau ia te ʼu tisipulo ʼa Sesu “ ʼi te ʼu lea kehekehe, ʼo mulimuli pe ki tona fakafealagia age kia natou e te laumalie ke natou palalau.” Koia neʼe natou fakamoʼoni ai ki “te ʼu gaue taulekaleka ʼa te ʼAtua.” (Gaue 2:1-4, 11) ʼE mole tou palalau fakamilakulo tatou ʼi he ʼu lea kehekehe ia ʼaho nei. Kae ʼaki te tokoni ʼo te laumalie ʼo te ʼAtua, ʼe ta ʼe te tagata kaugana agatonu mo poto ni tuʼuga tohi Fakatohi-tapu ʼi te ʼu lea kehekehe. Ohage la, ko te lauʼi miliona nusipepa ʼae ko Te Tule Leʼo mo te Kotou ʼAʼala! ʼe ta ʼi te mahina fuli. Pea ʼe toe maʼu ʼi tatatou tuʼasila ʼi te neti jw.org, te ʼu tohi mo ni ʼata viteo Fakatohi-tapu ia lea ʼe 1 000 tupu. ʼAki te ʼu meʼa gaue fuli ʼaia, ʼe feala ai ke tou tala “te ʼu gaue taulekaleka ʼa te ʼAtua” ki te hahaʼi mai te ʼu puleʼaga fuli, mo te ʼu telepi pea mo te ʼu lea fuli.​—Fkha. 7:9.

10. Kotea ʼae neʼe fai talu mai te taʼu 1989 ʼo ʼuhiga mo te fakaliliu ʼo te Tohi-Tapu?

¹⁰ Talu mai te taʼu 1989 mo te fakamaʼuhigaʼi e te tagata agatonu mo poto te ta ʼo te Tohi-Tapu. Fakaliliu ʼo Te Malama Foʼou ʼi he ʼu lea kehekehe. Neʼe  kua fakaliliu te Tohi-Tapu ʼaia ia lea ʼe 200 tupu, pea neʼe ta ni Tohi-Tapu ʼe lauʼi afe, kae neʼe mole gata ai. Neʼe lava te toe gaue lahi ʼaia ʼuhi pe ko te ʼAtua pea mo tona laumalie.

11. ʼE feafeaʼi te fakaliliu ʼo ʼatatou tohi?

¹¹ Ko te toko lauʼi afe kau Kilisitiano ʼae ʼe kau ki te gaue faifakaliliu ia fenua mo potu fenua ʼe 150 tupu, pea ʼe mole totogi natou. ʼE mole tou punamaʼuli tatou ki te faʼahi ʼaia, koteʼuhi ʼe mole he tahi age kautahi ʼi te kele ʼe takitaki e te laumalie maʼoniʼoni ke “fakamoʼoni katoa” ai ʼi te ʼu potu fuli ʼo te kele kia Sehova ʼAtua, mo tana Hau Fakamesia, pea mo tona Puleʼaga ʼae kua fakatuʼu ʼi selo.​—Gaue 28:23.

12. Kotea ʼae neʼe tokoni kia Paulo pea mo ʼihi tisipulo ke natou lava faifakamafola?

¹² ʼI te faifakamafola ʼa Paulo ki te kau Sutea pea mo te hahaʼi matapule ʼi Atiokia ʼo Pisitia, “ko natou fuli ʼae neʼe lelei ʼonatou loto ke natou maʼu te maʼuli heʼe gata, neʼe natou tui leva.” (Gaue 13:48) ʼI te fakaʼosi e Luka te tohi ʼo Gaue, neʼe ina ui neʼe ‘fakamafola e Paulo te Puleʼaga ʼo te ʼAtua ʼaki he lototoʼa pea mo faʼifaʼitaliha.’ (Gaue 28:31) ʼE faifakamafola ʼifea te apositolo? ʼI Loma, te kolo hau ʼo te malohi fakamalamanei ʼo te temi ʼaia. Neʼe takitaki e te laumalie maʼoniʼoni te ʼu ʼuluaki tisipulo ʼa Sesu ke natou lava faifakamafola ʼaki ni akonaki mo ni gaue.

13. He koʼe ʼe maʼuhiga ke tou faikole moka hoko mai he fakataga?

¹³ Neʼe kole e te ʼu ʼuluaki tisipulo ʼa Sesu kia Sehova te lototoʼa ke natou lava tauʼi te ʼu fakataga. Koia neʼe natou fonu fuli ai ʼi te laumalie maʼoniʼoni ʼo natou tala ai te Folafola ʼa te ʼAtua ʼaki he lototoʼa. (Gaue 4:18-31) ʼO toe feia pe mo tatou, ʼe tou haga kole ki te ʼAtua te poto mo te malohi ke tokoni mai ke tou hoko atu tatatou fakamoʼoni logo la te ʼu ʼahiʼahi. (Sakp. 1:2-8) ʼI tatatou sio ʼae ki te tokoni mai ʼo tona laumalie pea mo tana tapuakiʼi tatou, ʼe tou haga hoko atu pe tatatou faifakamafola. Pe ʼe fakafeagai mai peʼe fakatagaʼi tatou, ʼe mole he meʼa ʼe feala ke ina taʼofi tatatou faifakamafola. Kapau ʼe fakatagaʼi tatou, ʼe tonu ke tou kole ki te ʼAtua tona laumalie maʼoniʼoni, mo tona poto pea mo te lototoʼa ke tou haga tala te logo lelei.​—Luka 11:13.

14, 15. (1) Kotea te ʼu fua lelei ʼo “te fakataga ʼae neʼe hoko hili te mate ʼo Setefano”? (2) ʼI totatou temi, neʼe iloʼi feafeaʼi e te hahaʼi ʼo Sibérie te moʼoni?

¹⁴ ʼI muʼa ʼo te taumakaʼi ʼo Setefano e ʼona fili, neʼe ina fakamoʼoni katoa kia Sehova ʼaki he lototoʼa. (Gaue 6:5; 7:54-60) Neʼe hoko te ‘fakataga lahi’ ʼi te temi ʼaia, pea neʼe mavetevete fuli ai te ʼu tisipulo ʼi te ʼu potu fenua ʼo Sutea pea mo Samalia, gata pe ki te kau apositolo. Kae neʼe mole taʼofi ai te gaue faifakamafola. Neʼe alu ia Filipo ki te kolo ko Samalia ʼo ‘kamata faifakamafola ai ʼo ʼuhiga mo Kilisito.’ (Gaue 8:1-8, 14, 15, 25) Pea tahi, “ko natou ʼae neʼe mavetevete ʼuhi ko te fakataga ʼae neʼe hoko hili te mate ʼo Setefano, neʼe natou kaku ki Fenisia, mo Sipele pea mo Atiokia, kae neʼe natou tala pe te folafola ki te kau Sutea. Kae neʼe nonofo mo natou ni tagata mai Sipele pea mo Silene neʼe ʼomai ki Atiokia pea neʼe natou palalau ki te hahaʼi ʼae neʼe lea Fakakeleka, ʼo natou tala age ia te logo lelei ʼo ʼuhiga mo te ʼAliki ko Sesu.” (Gaue 11:19, 20) ʼI te temi ʼaia, neʼe haga mafola te logo lelei ʼuhi ko te fakataga.

 ¹⁵ Neʼe kua hoko te aluʼaga feia ʼi totatou temi ʼi te Lusia ʼAfea, tafito ʼi te ʼu taʼu 1950. ʼI te temi ʼaia, neʼe ko te toko lauʼi afe kau Fakamoʼoni ʼa Sehova neʼe ʼave pilisoniʼi ʼi Sibérie. Neʼe mavetevete natou ʼi te ʼu kiʼi kolo, koia neʼe tokoni lahi ai ke hoko atu pe te fakamafola ʼo te logo lelei ʼi te toe fenua lahi ʼaia. Neʼe mole pe feala ki he ʼu Fakamoʼoni hanatou totogi honatou folau ki te toe fenua ʼaia ʼae ʼe vaha mamaʼo ia kilometa ʼe 10 000, ke natou fakamafola ai te logo lelei. Kae neʼe ko te puleʼaga pe ʼae neʼe ina avahi te faigamalie ʼaia ke natou kaku ki Sibérie. Neʼe ui fenei e te tehina: “Neʼe ko te kau pule taki pe ʼae neʼe natou fakafealagia ke iloʼi te moʼoni e te toko lauʼi afe hahaʼi fakamalotoloto ʼo Sibérie.”

16, 17. Kotea ʼae ʼe fakamoʼoni ʼi te tohi ʼo Gaue, ʼe haga tapuakiʼi e Sehova te gaue faifakamafola?

¹⁶ ʼE mahino papau ia neʼe tapuakiʼi lahi e Sehova ia te kau ʼuluaki Kilisitiano. Ko Paulo mo ʼihi ʼae neʼe natou to mo fakavai, “kae neʼe haga fakatuputupu e te ʼAtua.” (1 Ko. 3:5, 6) ʼE lahi te ʼu fakamatala ʼi te tohi ʼo Gaue ʼe fakamoʼoni ai ʼe hoko te tuputupu ʼaia, ʼuhi he ʼe tapuakiʼi e Sehova te gaue faifakamafola. Ohage la, “neʼe hoko atu te mafola ʼo te folafola ʼa te ʼAtua, pea neʼe haga tuputupu ʼo kaugamalie age ia te ʼu tisipulo ʼi Selusalemi.” (Gaue 6:7) Pea ʼi te hoko atu ʼo te gaue faifakamafola, “ko te ʼu kokelekasio fuli ʼae ʼi Sutea, mo Kalilea pea mo Samalia neʼe natou maʼuʼuli ʼi te tokalelei, pea mo natou ʼaʼasili malolohi ʼi te tui. Pea neʼe natou haga tuputupu he neʼe natou manavasiʼi [ʼaki he fakaʼapaʼapa] kia Sehova pea mo maʼuʼuli ʼi te fakafimalie ʼo te laumalie maʼoniʼoni.”​—Gaue 9:31.

¹⁷ ʼI Atiokia ʼo Silia, neʼe logo te kau Sutea mo te hahaʼi ʼae lea Fakakeleka ki te moʼoni, he neʼe faifakamafola kia natou e te ʼu fakamoʼoni lototoʼa. ʼE ui fenei ʼi te Tohi-Tapu: “Pea tahi, neʼe nofo ia Sehova mo natou, pea neʼe liliu te hahaʼi kaugamalie ʼo tui pea mo tafoki ki te ʼAliki.” (Gaue 11:21) ʼE ui fenei ʼo ʼuhiga mo te kolo ʼaia: “Neʼe mafola te folafola ʼa Sehova pea neʼe tuputupu ʼo kaugamalie ʼaupito te kau tisipulo.” (Gaue 12:24) Neʼe faʼafai ia Paulo mo ʼihi atu ʼi te faifakamafola ki te kau matapule, koia “ ʼi hona aluʼaga fakaofoofo, neʼe haga mafola aipe te folafola ʼa Sehova pea mo malohi age.”​—Gaue 19:20.

18, 19. (1) ʼE tou iloʼi feafeaʼi ‘ ʼe nofo ia Sehova mo tatou’? (2) Fakamatala mai he faʼifaʼitaki ʼe ha ai ʼe lagolago ia Sehova ki tana hahaʼi.

¹⁸ ʼO toe feia pe ia ʼaho nei, ʼe tou tui papau ‘ ʼe nofo ia Sehova’ mo tatou. Koia ʼe tou sisio ai ki te tokolahi kua natou tui, mo foaki tonatou maʼuli ki te ʼAtua pea mo papitema. Pea tahi, ʼaki pe te tokoni ʼa Sehova mo tana tapuakina, ʼe tou lava ʼutakiʼi te ʼu fakataga kehekehe, mo hoko atu totatou minisitelio, ohage pe ko Paulo mo te ʼu ʼuluaki Kilisitiano. (Gaue 14:19-21) ʼE nofo tuʼumaʼu pe ia Sehova mo tatou, kotea pe he ʼahiʼahi ʼe hoko mai, ʼe ina ‘fata anai tatou ʼo heʼe gata.’ (Tet. 33:27) Pea ʼaua naʼa galo kia tatou, ʼe mole liʼaki anai e Sehova tana hahaʼi ʼuhi ko tona huafa lahi.​—1 Sam. 12:22; Pes. 94:14.

¹⁹ Ohage la ʼi te lolotoga ʼo te Lua Tau Fakamalamanei, neʼe ʼave e te kau Nasi ia te tehina ko Harald Abt ki te lotoʼa fakamamahi ʼo Sachsenhausen, ʼuhi ko tana mole fia taʼofi tana faifakamafola. ʼI Maio 1942, neʼe puke e te  kau polisi ʼo te Gestapo tona ʼohoana ko Elsa, pea neʼe natou ʼave mo tona kiʼi ʼofafine. Neʼe feʼaveʼaki ia Elsa ʼi te ʼu lotoʼa kehekehe. Neʼe ui fenei leva e Elsa: “Neʼe au taʼofi te ako maʼuhiga ʼi te ʼu taʼu ʼae neʼe au pilisoni ai ʼi te ʼu lotoʼa fakamamahi ʼo Siamani. Kua au mahino papau leva, ʼe feala ke tokoni mai ia te laumalie ʼo Sehova kia tatou moka tou tau mo he ʼu fakataga lalahi. ʼI muʼa ʼo toku puke, neʼe au lau te tohi ʼa te kiʼi tehina neʼe ina ui fenei mai, ka tou tau mo ni fakataga lalahi, ʼe tokoni mai te laumalie ʼo Sehova ke tou logoʼi te tokalelei ʼo te loto. Kae neʼe au ui pe au ʼi te moʼi temi ʼaia, ʼe lagi ko hana pe fakahuahua, ʼe mole ko he moʼoni ia. Kae ʼi taku tau mo te ʼu tuʼuga mamahi neʼe au mahino ai leva, tālā ko te ʼu meʼa ʼae neʼe ui mai e te tehina neʼe ko he moʼoni pe ia. Ko ia ʼae neʼe heʼeki fakalaka ʼi te ʼu mamahi ʼaia, ʼe faigataʼa hana tui ki ai. Kae ʼe au fakamoʼoni ʼosi au ki ai, ʼei, ʼe tokoni tuʼumaʼu mai ia Sehova kia tatou.”

20. Kotea ʼae neʼe fai e Paulo ʼi te fale ʼae neʼe leʼohi ai? Pea kotea te fakalotomalohi neʼe ina tuku ki ʼihi ʼi ʼotatou tehina mo tuagaʼane?

²⁰ ʼE ui ʼi te fakaʼosi ʼo te tohi ʼo Gaue, neʼe ‘fakamafola e Paulo te Puleʼaga ʼo te ʼAtua’ ʼaki he lototoʼa. (Gaue 28:31) Neʼe mole feala ke alu ʼo faifakamafola ʼi te ʼu ʼapi ʼi Loma, koteʼuhi neʼe nofo ʼi he fale neʼe leʼohi ai ia ia. Kae neʼe hoko atu pe e Paulo tana faifakamafola kia natou fuli ʼae neʼe ʼomai ki tona ʼapi. ʼE feia pe ia ʼaho nei, ko ʼihi ʼi ʼotatou tehina mo tuagaʼane kua nonofo pe natou ʼi fale, peʼe ʼi ʼonatou palepale, peʼe nonofo ʼi te ʼu fale mahaki, peʼe ko ʼu fale ʼe taupau ai te hahaʼi vaivavai matuʼa, peʼe maʼimoa. Kae, ʼe kei malohi ʼosi pe tonatou ʼofa ʼae ki te ʼAtua mo tanatou faifakamafola. ʼE tou hufakiʼi natou mo kole ki tatatou Tamai ʼae ʼi selo, ke natou felaveʼi mo he ʼu hahaʼi ʼe natou kumi fakamalotoloto te ʼAtua, pea ke natou iloʼi ʼana fakatuʼutuʼu taulekaleka.

21. He koʼe ʼe tonu ke tou faifakamafola mo manatuʼi kua nounou te temi?

²¹ Tokolahi ia tatou ʼe tou faifakamafola ʼi te ʼu ʼapi, peʼe ko ʼihi atu faʼahiga faifakamafola. Koia, tou faiga malohi ke tou liliu ko he kau faifakamafola faiva, pea ke tou fakamoʼoni katoa ki te Puleʼaga ʼo te ʼAtua “ ʼo kaku ki te ʼu potu taupotu ʼo te kele.” ʼE tonu ke tou faifakamafola ʼo manatuʼi kua nounou te temi, he kua ha lelei mai “te fakailoga” ʼae kua tou maʼuʼuli ʼi te ʼu ʼaho fakamuli. (Mat. 24:3-14) ʼAua naʼa pulinoa totatou temi, heʼe ‘lahi te ʼu gaue ʼi te ʼAliki’ ʼe tonu ke tou fai.​—1 Ko. 15:58.

22. ʼI tatatou fakatalitali ke hoko mai te ʼaho lahi ʼo Sehova, kotea ʼae ka tou faiga malohi ke tou fai?

²² ʼI tatatou fakatalitali ke ‘hoko mai te ʼaho lahi mo fakamanavahe ʼo Sehova,’ tou lotomalohi ʼo fakamafola agatonu mo he lototoʼa, ia te Puleʼaga ʼo te ʼAtua. (Soe. 2:31) ʼE tou maʼu anai he ʼu hahaʼi ohage ko te kau Pelea ʼae neʼe natou “tali te folafola mo he loto fakamalotoloto.” (Gaue 17:10, 11) Koia tou faifakamafola ʼo kaku ki te temi ʼae ka fakagata ai te gaue ʼaia, ʼe tou logo ai ki te ui: “ ʼE lelei ʼosi, tagata [peʼe fafine] faifekau agalelei mo agatonu!” (Mat. 25:23) Kapau ʼe tou faʼafai ʼi te gaue ʼae ke tou fai ʼo ni tisipulo, mo nonofo agatonu kia Sehova, tou tui papau ʼe tou fiafia lahi anai ki te heʼe gata, he neʼe tou maʼu te pilivilesio ʼae ke tou foaki he “fakamoʼoni katoa” ki te Puleʼaga ʼo te ʼAtua.