Neʼe fakatapuʼi e Sehova * ʼAtua ia te ʼuluaki taumatuʼa. ʼE tuʼu ʼi te Tohi-Tapu, neʼe ina fakatupu ia te ʼuluaki fafine pea “nee ina aumai leva te fafine ki te tagata.” ʼI te lahi ʼo te fiafia ʼo Atama, neʼe ina ui fenei: “Koeni ae e hui ki oku hui pea kakano ki toku kakano!” (Senesi 2:22, 23) ʼE kei loto pe e Sehova ke maʼuli fiafia ia te ʼu taumatuʼa. ʼI te kaupepa lahi ʼaeni, ʼe talanoa ki te ʼu ʼohoana ʼae neʼe fai ʼo mulimuli ki te lao.

ʼI takolua ʼohoana, neʼe lagi kolua manatu ʼe taulekaleka anai ia meʼa fuli. Kaʼe ʼi tona fakahagatonu, maʼia mo te taumatuʼa ʼae ʼe feʼofaʼofaniʼaki moʼoni, ʼe hoko anai kia naua te ʼu fihifihia. (1 Kolinito 7:28) ʼI te kaupepa lahi ʼaeni, ʼe kolua maʼu ai anai te ʼu pelesepeto Fakatohi-tapu ke fiafia ai tokolua maʼuli fakataumatuʼa pea mo fakafamili, mo kapau ʼe kolua maʼuliʼi.—Pesalemo 19:9-12.

KOTEA TE MANATU ʼI TE TOHI-TAPU? ʼE ko te tagata ʼohoana ia te pule ʼo te famili.—Efeso 5:23.

Kia koe tagata ʼohoana, ʼe loto e Sehova ke ke tokaga fakalelei ki tou hoa. (1 Petelo 3:7) Neʼe ina fakatupu ia te fafine ke liliu ko hou fakakatoa pea ʼe ina loto ke ke fakaʼapaʼapa pea mo ke ʼofa ki ai. (Senesi 2:18) ʼE tonu ke lahi age tou ʼofa ʼae ki tou hoa, ʼo ke fakamuʼamuʼa ia te ʼu meʼa ʼae ʼe loto ki ai.—Efeso 5:25-29.

Pea kia koe fafine ʼohoana, ʼe loto e Sehova ke ke fakaʼapaʼapa ki tou hoa pea mo ke tokoni ki ai ke ina fakahoko tona tuʼulaga. (1 Kolinito 11:3; Efeso 5:33) ʼE tonu ke ke lagolago lelei ki ʼana tonu pea mo ke tokoni ki ai ʼaki tou loto katoa. (Kolose 3:18) ʼI tau fai feia, ʼe leleiʼia anai koe e tou hoa, ʼo toe feia mo Sehova.—1 Petelo 3:1-6.

KOTEA ʼAE ʼE FEALA KE KOLUA FAI?

• Fakalavelave ki tou hoa pe kotea ʼae ʼe feala ke ke fai ke ke liliu ai ko he tagata peʼe ko he fafine ʼohoana lelei. Fakalogo fakalelei ki tana tali, pea mo ke fai ia te ʼu fetogi ʼae ʼe ʼaoga

• Ke ke faʼa kataki. ʼE ʼaoga anai he temi kia koulua ke feala ai hakolua fefakafiafiaʼaki

KOTEA TE MANATU ʼI TE TOHI-TAPU? ʼE tonu ke ke tokaga ki te ʼu faʼahi ʼae ʼe loto ki ai tou hoa. (Filipe 2:3, 4) Fakamaʼuhigaʼi tou hoa, ʼo ke manatuʼi ʼe fakamaʼua e Sehova ki ʼana kaugana ke natou “agalelei ia ki te hahai fuli.” (2 Timoteo 2:24) “Ko he tahi, ae e palalau fakafuanoa, e ina fakalaveai te loto o hage ko he heleta, kae ko te alelo o te kau poto e ina ave te faitoo.” Koia ʼe tonu ke ke fakakaukauʼi lelei ʼau palalau. (Taaga Lea 12:18) ʼE tokoni atu anai te laumalie ʼo Sehova ke ke palalau ʼaki te agalelei mo te ʼofa.—Kalate 5:22, 23; Kolose 4:6.

KOTEA ʼAE ʼE FEALA KE KOLUA FAI?

• ʼI muʼa ʼo takolua faipalalau ki he ʼu manatu ʼe maʼuhiga, kolua faikole ki te ʼAtua ke tokoni atu ke kolua maʼu ia te tokalelei pea mo te lotomahino

• Kolua fakakaukauʼi lelei te ʼu palalau ʼae ka kolua fai anai pea mo tona faʼahiga foaki

KOTEA TE MANATU ʼI TE TOHI-TAPU? ʼI te temi ʼae ʼe kolua ʼohoana ai, ʼe kolua liliu ai ko “he kakano e tahi”. (Mateo 19:5) Kaʼe ʼe kehekehe pe ʼakolua aga mo ʼakolua manatu. Koia ʼe ʼaoga ai ke kolua fakaalu tahi ʼakolua manatu pea mo te ʼu meʼa ʼae ʼe kolua logoʼi. (Filipe 2:2) ʼE maʼuhiga ke kolua logotahi moka kolua toʼo he ʼu tonu. ʼE ui fenei ʼi te Tohi-Tapu: “ ʼAki te fetokoniʼaki, ʼe lava lelei te ʼu fakatuʼutuʼu.” (Taʼaga Lea 20:18, MN) Kolua mulimuli ki te ʼu pelesepeto Fakatohi-tapu moka kolua fai ia he ʼu tonu maʼuhiga.—Taaga Lea 8:32, 33.

KOTEA ʼAE ʼE FEALA KE KOLUA FAI?

• Fakaha ki tou hoa ia te ʼu meʼa ʼae ʼe ke logoʼi

• ʼI muʼa ʼo tau ʼio ki he faʼahi, palalau muʼa mo tou hoa