ʼE koutou lava ʼiloʼi ia Sehova mokā koutou lau te Tohi-Tapu. Kua fualoa ki muʼa atu, neʼe fakaʼaogaʼi e te ʼAtua te ʼu tagata, ke nātou tohi tana ʼu manatu. Ko te ʼu meʼa ʼaē neʼe nātou tohi ʼe fakahigoaʼi ko te Tohi-Tapu. ʼI te temi nei, ʼe tou lava ʼiloʼi te ʼAtua mokā tou lau te Tohi-Tapu. Mai tona ʼuhiga ʼaē ʼe maʼu ʼi te Tohi-Tapu te ʼu folafola ʼa Sehova, pe ko tana logo, koia ʼe toe fakahigoaʼi ai ko te Folafola ʼa te ʼAtua. ʼE tou lava tui ki te ʼu meʼa ʼaē ʼe ʼui e te Tohi-Tapu, heʼe mole loi ia Sehova. “E mole feala ki te Atua ke lohi.” (Hepeleo 6:18) ʼE maʼu te moʼoni ʼi te Folafola ʼa te ʼAtua.—Soane 17:17.

Ko te Tohi-Tapu ʼe kau ki te ʼu meʼa ʼofa maʼuhiga ʼaē neʼe foaki mai e te ʼAtua. ʼE hage ko he tohi ʼa he tāmai ʼofa ki tana fānau. ʼE talanoa te tohi ʼaia ki te fakapapau ʼa te ʼAtua ke ina fakaliliu te kele ko he nofoʼaga taulekaleka—ko he palatiso. ʼE ina fakamatala mai te ʼu meʼa ʼaē neʼe fai e te ʼAtua ʼi te temi muʼa, te ʼu meʼa ʼaē ʼe ina fai anai ʼi te temi ʼaenī, pea mo te ʼu meʼa ʼaē ka ina fai ʼi te temi ka haʼu maʼa tana fānau agatonu. Tahi ʼaē meʼa, ko te tohi ʼaia ʼe tokoni mai kia tatou ke tou fakatokatoka totatou ʼu fihifihia pea mo tou maʼuli fiafia.—2 Timoteo 3:16, 17.

 Ko te kau Fakamoʼoni ʼa Sehova ʼe ko he ʼu kaumeʼa ʼo te ʼAtua; ʼe nātou tokoni atu anai ke koutou mahino pe koteā ʼaē ʼe akoʼi mai e te Tohi-Tapu. Koutou fakahā age kia nātou ʼe koutou fia ako te Tohi-Tapu. ʼE mole nātou kole atu anai ke koutou totogi te faʼahi ʼaia. (Mateo 10:8) Tahi ʼaē meʼa, ʼe feala hakotou ʼolo ki te ʼu fono faka Kilisitiano. ʼE fai ʼi te ʼu fale tauhi ʼe higoa ko te ʼu Fale ʼo te Puleʼaga. Kapau ʼe koutou ʼolo ki te ʼu fono ʼaia, pea ʼe lahi anai te ʼu meʼa ʼaē ka koutou ako ai ʼo ʼuhiga mo te ʼAtua.

ʼE koutou lava ʼiloʼi te ʼAtua ʼi te ʼu meʼa ʼaē neʼe ina fakatupu. Ohage la, ʼe ʼui fēnei e te Tohi-Tapu: “Neʼe fakatupu e te ʼAtua te lagi pea mo te kele.” (Senesi 1:1) ʼI te fakatupu e te ʼAtua ia “te lagi,” neʼe ina fakatupu te laʼā. Koteā ʼaē ʼe akoʼi mai e te laʼā ʼo ʼuhiga mo te ʼAtua? ʼE ina fakahā mai ko Sehova ʼe ʼi ai tona mālohi lahi. Ko ia tokotahi pe neʼe feala ke ina fakatupu he meʼa feiā ʼe mālohi ohage ko te laʼā. ʼE ina toe fakahā mai, ko Sehova ʼe poto, heʼe maʼua ke kita poto moʼo fakatupu te laʼā, ʼaē ʼe ina fakamāfana pea mo faka mālamagia tatou, ka mole ina tutu tatou.

Ko te ʼu meʼa ʼaē neʼe fakatupu e Sehova, ʼe hā ʼaki mai ʼe ʼofa kia tatou. Koutou fakakaukauʼi age muʼa te ʼu faʼahiga fuaʼi ʼakau kehekehe ʼaē ʼe tou maʼu ʼi te kele. Neʼe feala pe kia Sehova ke ina foaki mai he faʼahiga fuaʼi ʼakau pe e tahi—peʼe mole ina foaki mai. Kae neʼe foaki mai e Sehova te ʼu faʼahiga fuaʼi ʼakau kehekehe, mo tonatou ʼu agaaga kehekehe, ko ʼihi ʼe fua lalahi pea ko ʼihi ʼe fua veliveli, mo tonatou ʼu lanu kehekehe, pea ko ʼihi ʼe malie ka ko ʼihi ʼe kona. ʼE hā ʼaki mai ko Sehova ʼe ko he ʼAtua ʼofa, pea ʼe toe loto fia foaki, mo agapoto pea mo agalelei.—Pesalemo 104:24.