ʼE fakahalaʼi e Satana te hahaʼi ke nātou fai te ʼu meʼa ʼaē ʼe kovi. Ko he tahi ʼe fia kaumeʼa mo te ʼAtua, ʼe tonu ke fehiʼa ki te ʼu meʼa ʼaē ʼe fehiʼa kiai Sehova. (Pesalemo 97:10) Koʼeni te ʼu aga ʼaē ʼe mole fai e te ʼu kaumeʼa ʼo te ʼAtua:

Te ʼu felāveʼi fakasino heʼeʼaoga. “ ʼAua naʼa ke tono.” (Ekesote 20:14) ʼE toe kovi mo te ʼu felāveʼi fakasino ʼaē ʼe kita fai ka mole heʼeki kita ʼohoana.—1 Kolonito 6:18.

Te konahia. “Te hahai konahia . . . e mole natou tofià anai i te Puleaga o te Atua.”—1 Kolonito 6:10.

Te fai fakapō, te fakatō fatu. “ ʼAua naʼa ke fai fakapō.”—Ekesote 20:13.

Te kaihaʼa. “ ʼAua naʼa ke kaihaʼa.”—Ekesote 20:15.

Te loi. ʼE fehiʼa Sehova ki “te gutuloi.”—Tāʼaga Lea 6:17.

 Te agamālohi pea mo te ʼita ʼaē ʼe mole lolomi. “Ko ʼaē ʼe manako ki te agamālohi, ʼe fehiʼa moʼoni ki ai [Sehova].” (Pesalemo 11:5) “Te u gaue a te kakano [ʼe kau kiai] . . . te ita.”—Kalate 5:19, 20.

Te gaoʼi paʼaga. “Aua naa ke fakatahi mo he tahipe e . . . manumanu.”—1 Kolonito 5:11.

Te fehiʼa ki te tahi ʼu lanu. “Koutou oʼofa ki outou fili pea koutou hufaki natou e natou fakatagai koutou.”—Mateo 5:43, 44.

Ko te ʼu meʼa ʼaē ʼe tala mai e te ʼAtua ʼe ʼaoga kia tatou. ʼE mole faigafua tuʼumaʼu te tekeʼi ʼo te ʼu meʼa ʼaē ʼe kovi. ʼAki te tokoni ʼa Sehova pea mo te tokoni ʼo tana kau Fakamoʼoni, ʼe koutou lava tekeʼi anai te fai ʼo te ʼu meʼa ʼaē ʼe fehiʼa kiai te ʼAtua.—Isaia 48:17; Filipe 4:13; Hepeleo 10:24, 25.