Ko te ʼu meʼa kovi ʼaē ʼe hoko nei ʼi te kele, ʼe nātou fakahā mai kua ōvi mai te Palatiso. Neʼe ʼui e te Tohi-Tapu ʼe tou sio anai ki he ʼu temi fakamataku ʼi muʼa ʼo te hoko mai ʼo te Palatiso. ʼE tou maʼuʼuli nei ʼi te ʼu temi ʼaia! Koʼeni ʼihi meʼa neʼe fakakikite e te Tohi-Tapu:

Te ʼu tau lahi. “E malaga ake anai te puleaga o fakafehagai ki te puleaga.” (Mateo 24:7) Kua hoko moʼoni te lea faka polofeta ʼaia. Talu mai te taʼu 1914, neʼe hoko te ʼu tau faka malamanei e lua pea ʼe lahi mo te ʼu tau veliveli. Ko te lauʼi miliona hahaʼi kua mamate ʼi te ʼu tau ʼaia.

Kua mafola te ʼu mahaki. ʼE ʼi ai anai ‘he u taimahaki ia potu kehekehe.’ (Luka 21:11) Kua hoko moʼoni koa te faʼahi ʼaia? Ei. Kua mamate te lauʼi miliona hahaʼi ʼuhi ko te kosea, te mahaki mafu, te fatafata vaivai, te fiva, te SITA, pea mo te tahi ʼu mahaki.

Te hoge meʼa kai. ʼI te kele katoa, ʼe ʼi ai te ʼu hahaʼi ʼe mole feʼauga tanatou meʼa kai. ʼI te taʼu fuli, ko te lauʼi miliona hahaʼi ʼe nātou mamate ʼi te pakupaku. ʼE ko te tahi ʼaia fakaʼiloga kua ōvi mai te Palatiso. ʼE ʼui fēnei e te Tohi-Tapu: “E i ai anai he u hoge.”—Maleko 13:8.

 Te ʼu mafuike. “E ʼi anai . . . he u mafuike ia potu kehekehe fuape.” (Mateo 24:7) Kua toe hoko moʼoni mo te faʼahi ʼaia ʼi totatou temi. Talu mai te taʼu 1914, kua mamate te lauʼi miliona hahaʼi ʼi te ʼu mafuike.

Te hahaʼi agakovi. Ko te hahaʼi ʼe nātou liliu anai “o manumanu paaga” pea mo “tahi ofa pe kia te ia.” ʼE nātou “manako [anai] ki te ʼu fiafia kae e mole he ofa ki te Atua.” Ko te fānau ʼe nātou “talagataa [anai] ki anatou matua.” (2 Timoteo 3:1-5) ʼE mole koutou ʼio koa la ʼe kua feiā te hahaʼi tokolahi ia ʼaho nei? ʼE mole nātou fakaʼapaʼapa ki te ʼAtua, pea ʼe nātou fakahalaʼi te hahaʼi ʼaē ʼe nātou faiga ke nātou ʼiloʼi te ʼAtua.

Te maumauʼi ʼo te lao. ʼE toe “ ʼāsili anai te manukinukiʼi ʼo te lao.” (Mateo 24:12, MN) ʼE koutou fakamoʼoni anai ki te kua kovi age ʼo te maumauʼi ʼo te lao ʼi te temi ʼaenī. ʼI potu fuli pe, ʼe feala ai ke kaihaʼa ai te hahaʼi, ke kākāʼi nātou, peʼe gaohi koviʼi nātou.

ʼE fakahā mai e te ʼu meʼa fuli ʼaia, kua ōvi mai te Puleʼaga ʼo te ʼAtua. ʼE ʼui fēnei e te Tohi-Tapu: “Moka koutou mamata ki te hoko o mea aia, e koutou iloi aipe e fakaovi mai te Puleaga o te Atua.” (Luka 21:31) Koteā te Puleʼaga ʼo te ʼAtua? ʼE ko te Puleʼaga ʼaē neʼe fakatuʼu e te ʼAtua ʼi selo, pea ʼe ina fakaliliu anai te kele ʼaenī ko he Palatiso. Ko te Puleʼaga ʼo te ʼAtua ʼe ina fetogi anai te ʼu puleʼaga fakatagata.—Taniela 2:44.