1, 2. He koʼē ʼe fiafia ia Sehova ʼi tana sio ifo ʼaē ki tatatou ʼu faiga ke tou aga fakahagatonu iā meʼa fuli pē? Kotou tuku mai he faʼifaʼitaki.

KO TE faʼē pea mo tana kiʼi tama ʼe nā mavae ʼi te fale koloa. Fokifā pē ʼe tuʼu te kiʼi tama, pea mo punamaʼuli. ʼE ina toʼo ʼi tona nima te kiʼi meʼa gaoʼi neʼe ina toʼo ʼi te fale koloa. Neʼe galo ke ina toe hili te kiʼi meʼa gaoʼi ʼaia ki tona ʼaiʼaga peʼe ke kole ki tana faʼē peʼe feala lā hana totogi ia te kiʼi meʼa gaoʼi ʼaia. ʼE tagi ki tana faʼē pea mo kole ki ai ke tokoni age. ʼE fakanaʼanaʼa e te faʼē tana kiʼi tama pea toe liliu mo ia ki te fale koloa, ke liufaki e te kiʼi tama ia te kiʼi meʼa gaoʼi ʼaē neʼe ina toʼo pea ke fai hana fakalelei ʼo ʼuhiga mo te faʼahi ʼaia. ʼI te fai e te kiʼi tama ia te faʼahi ʼaia, ʼe fiafia ai ia te loto ʼo tana faʼē. Koteā tona tupuʼaga?

² ʼE fiafia tuʼumaʼu ia te ʼu mātuʼa mokā ʼe natou fakatokagaʼi ʼe mahino ki tanatou fānau ia te maʼuhiga ʼaē ke natou fai fakahagatonu ia te ʼu meʼa. Pea ʼe toe fēia mo tatatou Tamai ʼaē ʼe ʼi selō, “te ʼAtua ʼo te moʼoni.” (Pesalemo 31:5) ʼI tana sio ifo ʼaē ki tatatou tuputupu ʼi te faʼahi fakalaumālie, ʼe fiafia ia ʼi tana sio mai ʼaē ʼe tou faiga ke tou fai fakahagatonu ia te ʼu meʼa. Mai tona ʼaluʼaga ʼaē ʼe tou fia fakafiafia ia tona loto pea mo nonofo ʼi tona ʼofa, ʼe tou fai mo tātou ia te ʼu palalau ʼaenī neʼe fai e te ʼapositolo ko Paulo: “ ʼE matou loto ke matou aga fakahagatonu iā meʼa fuli pē.” (Hepeleo 13:18) Tou vakaʼi age muʼa ia faʼahi maʼuhiga e fā ʼi totatou maʼuli ʼe feala ai ʼi ʼihi temi ke faigataʼa hatatou aga fakahagatonu iā meʼa fuli. Pea tou vakaʼi anai ni ʼu lelei ʼe tou maʼu mokā tou aga fakahagatonu iā meʼa fuli pē.

3-5. (a) Koteā te fakatokaga ʼe fai ʼi te Folafola ʼa te ʼAtua ki te ʼu tuʼutāmaki ʼaē ʼe feala ke hoko mo kapau ʼe tou kākāʼi pē ia tātou totonu? (b) Koteā ʼaē kā tokoni mai anai ke tou sivisivi fakahagatonu ia tātou totonu?

³ Ko te ʼuluaki faʼahi ʼaē ʼe faigataʼa anai kiā tātou, ke tou sivisivi fakahagatonu ia tātou totonu. ʼI totatou ʼuhiga heʼe haohaoa, ʼe faigafua pē hatatou kākāʼi ia tātou totonu. Ohagē lā, neʼe ʼui e Sesu ki te kau Kilisitiano ʼo Laotisē, neʼe natou kākāʼi pē ia nātou totonu ʼi tanatou manatu ʼaē ʼe natou koloaʼia, kae ʼi tona fakahagatonu, neʼe natou “masiva, mo kivi pea mo telefua” ʼi te faʼahi fakalaumālie, ʼaē ko he ʼaluʼaga ʼe fakaʼofaʼofa ʼaupitō. (Fakahā 3:17) ʼI tanatou kākāʼi pē ia nātou totonu, neʼe liliu ai tonatou maʼuli ʼo kovi ʼosi age.

⁴ ʼE lagi kotou toe manatuʼi te fakatokaga ʼaenī ʼa te tisipulo ko Sake: “Kapau ʼe manatu he tahi ʼe ina fai leleiʼi te tauhi, kā mole ina tāʼofi tona ʼalelo, kae ʼe ina haga kākāʼi pē tona loto, ko te tauhi ʼa te tagata ʼaia ʼe noa ia.” (Sake 1:26) Kapau ʼi tatatou manatu ʼe feala pē ke tou fakaʼaogaʼi kovi ia totatou ʼalelo heʼe leleiʼia pē e Sehova ia tatatou tauhi, ʼe tou kākāʼi pē e tātou totonu ia totatou loto. Ko tatatou tauhi ʼaē kiā Sehova ʼe vaʼiganoa anai, ʼe mole hona ʼaoga tuʼa tahi. Koteā ʼaē ʼe feala ke tou fai ke mole tou tō ki te aga ʼaia ʼe kovi?

⁵ ʼI te vaega Fakatohi-tapu ʼaia, ʼe fakatatau e Sake ia te moʼoni ʼo te folafola ʼa te ʼAtua ki he sioʼata. ʼE tokoni mai ke tou sio loloto ki te lao haohaoa ʼa te ʼAtua pea mo tou fai te ʼu fetogi ʼaē ʼe ʼaoga ki te faʼahi ʼaia. (Sake 1:23-25) ʼE feala ke tokoni mai te Tohi-Tapu ke tou sivisivi fakahagatonu ia tātou totonu ke tou ʼiloʼi ai te ʼu faʼahi ʼaē ʼe tonu ke tou fetogi ʼi totatou maʼuli. (Tagilāulau 3:40; Asea 1:5) ʼE toe feala foki ke tou faikole kiā Sehova pea mo kole ki ai ke ina sivisivi tātou, mo tokoni mai ke tou ʼiloʼi pea mo tali ia te ʼu faʼahi ʼaē ʼe tou tōtō ai, ʼo tou faigaʼi ke tou fetogi ʼi te ʼu faʼahi ʼaia. (Pesalemo 139:23, 24) Ko te aga fakakākā ʼe ko he vaivaiʼaga ia ʼe mole hā fakahagatonu, pea ʼe tonu ke tou manatu ohagē ko tatatou Tamai ʼaē ʼe ʼi selō ʼo ʼuhiga mo te vaivaiʼaga ʼaia. ʼE ʼui fēnei iā Tāʼaga Lea 3:32: “Ko te tagata ʼaē ʼe haʼele fakapikopiko ʼe ko he meʼa fakalialia ia kiā Sehova, kae ʼe kaumeʼa ia mo te hahaʼi faitotonu.” ʼE feala ke tokoni mai ia Sehova ke tou manatu ohagē ko ia pea mo tou sio kiā tātou ohagē ko tana sio mai ʼaē kiā tātou. Kotou manatuʼi neʼe ʼui fēnei e Paulo: “ ʼE matou loto ke matou aga fakahagatonu.” ʼE mole heʼeki feala ʼi te temi nei ke tou haohaoa, kae ʼe tou loto moʼoni pea mo faiga fakamālotoloto ke tou aga fakahagatonu.

6. He koʼē ʼe tonu ki he taumātuʼa ke nā aga fefakahagatonuʼaki, pea ko te ʼu fihifihia fea ʼaē kā nā hao anai mai ai?

⁶ Ko te aga fakahagatonu ʼe tonu ko he fakaʼiloga makehe ʼaia ʼi te fāmili Fakakilisitiano. Koia, ko te tagata pea mo tona ʼohoana ʼe tonu ke nā aga fefakahagatonuʼaki. ʼE mole tonu ke maʼu ʼi te maʼuli ʼo he taumātuʼa Kilisitiano ia te ʼu aga fakalotomamahi, heʼemaʼa ohagē ko te manako ʼaē ki he tahi ʼe mole ko tokita ʼohoana, peʼe ko te faitohi fakafufū ʼi te Internet mo he tahi ʼe tou manako ai, peʼe ko te sioʼi ʼo he ʼu pāki ʼe fai ai ni ʼu felāveʼi fakasino heʼeʼaoga. Ko ʼihi Kilisitiano ʼohoana neʼe natou fai te taʼi aga ʼaia ʼe kovi, ʼo natou fufū ki tonatou ʼohoana. ʼE ko he agakākā ʼaia. Kotou tokagaʼi ia te ʼu palalau neʼe fai e te Hau agatonu ko Tavite: “Neʼe mole au nofo mo te hahaʼi kākā; pea ʼe mole au hū ki te hahaʼi ʼaē ʼe natou fufū tonatou ʼuhiga moʼoni.” (Pesalemo 26:4) Kapau kua kotou ʼohoana, ʼaua naʼa kotou kamata fai he aga ʼe ina taki anai koutou ke kotou fufū tokotou ʼuhiga moʼoni ki tokotou ʼohoana.

7, 8. Ko te ʼu faʼifaʼitaki fea ʼi te Tohi-Tapu ʼe feala ke tokoni ki te fānau ke natou ako ia te maʼuhiga ʼo te aga fakahagatonu?

⁷ ʼI tanatou akoʼi ʼaē ki tanatou fānau ia te maʼuhiga ʼaē ke natou aga fakahagatonu, ʼe aga fakapotopoto anai te ʼu mātuʼa mo kapau ʼe natou fakaʼaogaʼi ia he ʼu faʼifaʼitaki mai te Tohi-Tapu. ʼE tou maʼu ʼi te Tohi-Tapu ia te ʼu fakamatala ʼo ʼuhiga mo nātou ʼaē neʼe aga fakakākā, ohagē ko Akani ʼaē neʼe ina kaihaʼa pea mo faiga ke ina fufū te meʼa ʼaē neʼe ina kaihaʼa; ʼe ʼi ai mo te kākā ʼaē neʼe fai e Kehasi ʼaē neʼe loi ke foaki age hona ʼu koloa, pea mo Sutasi ʼaē neʼe kaihaʼa pea mo loi ke tupu ai he matehi ʼo Sesu.—Sosue 6:17-19; 7:11-25; 2 Hau 5:14-16, 20-27; Mateo 26:14, 15; Soane 12:6.

 ⁸ ʼE tou maʼu leva ʼi te Tohi-Tapu ia te fakamatala ʼo nātou ʼaē neʼe aga fakahagatonu, ohagē lā ko te fakamatala ʼo Sakopo ʼaē neʼe ina uga tona ʼu foha ke natou toe liufaki ia te falā ʼaē neʼe natou maʼu ʼi tanatou ʼu taga, heʼe ʼi tana manatu neʼe lagi ʼai hala te ʼu koloa ʼaia ki tanatou ʼu taga; ʼe ʼi ai mo te fakamatala ʼo Sefeteo mo tona ʼofafine, ʼaē neʼe mulimuli ki te fakapapau neʼe fai e tana tamai ke fai e tona ʼofafine ia he toe sākilifisio lahi; pea mo ʼaē leva ʼo Sesu, ʼaē neʼe lototoʼa ʼo ina fakahā iā muʼa ʼo te hahaʼi tokolahi mo ʼitaʼita, ʼe ko ia ʼaē neʼe natou ʼomai ʼo kumi, ʼo ina fakahoko ai ia te lea fakapolofetā pea mo puipui ai tona ʼu kaumeʼa. (Senesi 43:12; Kau Tuʼi Fakamāu 11:30-40; Soane 18:3-11) ʼAki te ʼu faʼifaʼitaki ʼaia, ʼe lagi maʼu ai e te ʼu mātuʼa he ʼu tuʼuga koloa ʼi te Folafola ʼa te ʼAtua ʼe feala ke tokoni kiā nātou ke natou akoʼi tanatou fānau ke natou manako pea mo fakamaʼuhigaʼi ia te aga fakahagatonu.

9. Koteā ʼaē ʼe tonu ke tekeʼi e te ʼu mātuʼa mo kapau ʼe natou fia tuku he faʼifaʼitaki lelei ki tanatou fānau ʼo ʼuhiga mo te aga fakahagatonu, pea he koʼē ʼe maʼuhiga ia te taʼi faʼifaʼitaki ʼaia?

⁹ ʼE hā mai ʼi te taʼi faʼahiga akoʼi fānau ʼaia, ʼe ko he maʼua maʼuhiga ʼaē ʼe tuku ke fai e te ʼu mātuʼa ki tanatou fānau. Neʼe fehuʼi fēnei e te ʼapositolo ko Paulo: “Ko koe ʼaē ʼe ke akonakiʼi te hahaʼi kehe, ʼe mole ke akonakiʼi koe ia koe totonu? Ia koe ʼaē ʼe ke fakamafola ‘ ʼAua naʼa ke kaihaʼa,’ ʼe ke kaihaʼa koe?” (Loma 2:21) Ko ʼihi fānau ʼe mole kei natou mahino ki te fakaʼuhiga ʼo te aga fakahagatonu, heʼe akoʼi age e tanatou ʼu mātuʼa ia te aga ʼaia kae ʼe mole ʼalutahi ia mo te ʼu aga ʼaē ʼe natou fai. ʼE lagi natou takuʼaki ʼe ko he kihiʼi kaihaʼa pē ia pea mo natou loi ʼo ʼui fēnei: “ ʼE natou fakagafua pē ke kaihaʼa te ʼu meʼa ʼaia” peʼe natou ʼui: “ ʼE ko he kihiʼi loi pē ia. ʼE mole kovi ia.” ʼI tona fakahagatonu, ʼe mole feala ke fakalakatonuʼi te kaihaʼa, tatau aipē pe koteā ʼaē neʼe kaihaʼa, pea toe fēia ki te loi, tatau aipē pe koteā ʼaē neʼe tou palalau kiai peʼe ko te lahi ʼo te loi ʼaē neʼe fai. * (Luka 16:10) ʼE mahino vave ki te tamaliki ia he aga ʼe mālualoi pea ʼe feala pē ki te taʼi maʼuli ʼaia ke fua kovi kiā nātou. (Efesi 6:4) Kae kapau ʼe natou akoako ia te aga fakahagatonu mai te faʼifaʼitaki ʼo tanatou ʼu mātuʼa, pea ʼe feala anai mokā ʼe natou lahilahi ake ke natou fakakolōlia ia Sehova ʼi te mālamanei aga fakakākā ʼaenī.—Tāʼaga Lea 22:6.

10. ʼO ʼuhiga mo te ʼu fai palalau fakahagatonu ʼa te ʼu tehina peʼe ko he ʼu tuagaʼane, ko te ʼu fakatokaga fea ʼaē ʼe tonu ke tou manatuʼi tuʼumaʼu?

¹⁰ ʼI tatatou fakatahitahi ʼaē mo totatou ʼu tehina mo tuagaʼane, ʼe tou maʼu ai te ʼu faigamālie ke lelei age tatatou aga fakahagatonu. Ohagē ko tatatou ako ʼi te Kāpite 12, ʼe tonu ke tou tōkakaga ki tatatou fakaʼaogaʼi ia te meʼa ʼofa ʼaē ko te palalau, tāfito lā mokā tou fakatahitahi mo totatou ʼu tehina mo tuagaʼane. Ko he hoko palalau ki he meʼa, ʼe faigafua pē hona liliu ko he fai fatufatu peʼe ko he fasituʼu! Kapau ʼe tou fakamatala he meʼa kae ʼe mole tou ʼiloʼi papau peʼe moʼoni, ʼe feala pē ke tou kau ki te fakamafola ʼo he loi, koia ʼe lelei age hatatou tōkakaga ki te ʼu palalau ʼaē ʼe tou fai. (Tāʼaga Lea 10:19) ʼI te tahi age faʼahi, ʼe lagi tou ʼiloʼi ʼe moʼoni te meʼa ʼaē ʼe tou fia palalau kiai, kae ʼe mole fakaʼuhiga leva ʼe tonu ke tou palalau kiai. Ohagē lā, ʼe lagi mole ʼi ai hotatou pikipikiga mo te meʼa ʼaia, peʼe lagi mole ko he agalelei anai te palalau kiai. (1 Tesalonika 4:11) Ko ʼihi ʼe natou takuʼaki ia tanatou ʼu palalau fefeka ʼaki hanatou ʼui ʼe natou aga fakahagatonu, kae ko tatatou ʼu palalau ʼe tonu pē ia ʼi te temi fuli ke matalelei pea mo lelei.—Kolose 4:6.

11, 12. (a) Neʼe feafeaʼi ki ʼihi ʼaē neʼe agahala mamafa hanatou fakaʼāsili age ia te fihifihia? (b) Koteā he ʼu loi ʼe fakamafola e Satana ʼo ʼuhiga mo te ʼu agahala mamafa, pea ʼe feafeaʼi hatatou tauʼi te ʼu loi ʼaia? (c) ʼE feafeaʼi hatatou aga fakahagatonu ki te kautahi ʼa Sehova?

¹¹ ʼE maʼuhiga tāfito ke tou aga fakahagatonu kiā nātou ʼaē ʼe natou takitaki ʼi te kōkelekāsio. Ko ʼihi ʼaē neʼe natou fai he agahala mamafa ʼe natou fakaʼāsili age ia te fihifihia ʼi tanatou fufū ʼo tanatou agahala pea mo loi mokā kumikumi age e te kau tagata ʼāfea ia te  meʼa ʼaē neʼe hoko. Ko nātou ʼaia ʼe natou kamata māʼuʼuli fakakākā, ʼo natou lau ʼe natou tauhi kiā Sehova kae ʼe natou māʼuʼuli ʼi te agahala. ʼE mahino ia ko he tahi ʼe maʼuli fēia pea ʼe ko tona maʼuli kātoa ʼe fakatafito pē ki te loi. (Pesalemo 12:2) Ko ʼihi ʼe mole natou fakahā fuli ia te moʼoni ki te kau tagata ʼāfea, ʼo natou fufū te ʼu faʼahi maʼuhiga ʼaē neʼe hoko. (Gāue 5:1-11) ʼI te agamāhani, ko te taʼi aga fakakākā ʼaia ʼe tupu mai te tui ki te ʼu loi ʼaē ʼe fakamafola e Satana.—Vakaʼi ʼi te ʼu  pāsina 164 ki te 165, ia te fakamatala ʼaē ʼe ʼātakai ko tona kupu tāfito “Te ʼu Loi Fakasatana ʼo ʼUhiga Mo He ʼu Agahala Mamafa.”

¹² ʼE toe maʼuhiga foki ke tou aga fakahagatonu ki te kautahi ʼa Sehova mokā tou tohi he ʼu pepa. Ohagē lā, ʼi te temi ʼaē ʼe tou tohi ai tatatou kiʼi pepa tānaki gāue, tou tōkakaga naʼa tou tohi loi tatatou ʼu gāue ʼaē neʼe tou fai. ʼO toe fēia mokā ʼe tou tohi he pepa heʼe tou fia maʼu hotatou pilivilēsio, ʼe mole tonu ke tou fufū hotatou mahaki peʼe ko he tahi age faʼahi ʼo ʼuhiga mo tātou.—Tāʼaga Lea 6:16-19.

13. ʼE feafeaʼi hatatou aga fakahagatonu mo kapau ʼe tou fakatuʼutuʼu ki he gāue fakamālama mo he tehina peʼe ko he tuagaʼane?

¹³ ʼE tonu foki ke tou toe aga fakahagatonu mo totatou ʼu tehina mokā tou fakatuʼutuʼu mo nātou ki he ʼu gāue fakamālama. ʼI ʼihi temi, ʼe lagi felōgoi anai ni ʼu tehina mo tuagaʼane Kilisitiano ke natou fai he gāue fakamālama. ʼE natou tōkakaga anai naʼa natou felōgoi ki tanatou ʼu gāue ʼaia ʼi te Fale ʼo Te Puleʼaga peʼe ʼi te minisitelio. ʼE lagi ko he fakatuʼutuʼu gāue ʼa he pātolō pea mo he tagata gāue. Kapau ko hatatou matani gāue ʼe tou fakagāue ai he ʼu tehina mo he ʼu tuagaʼane, ʼe tou tōkakaga anai ke tou aga fakahagatonu kiā nātou, ʼo totogi ia nātou ʼi tona temi totonu, pea mo foaki kātoa age kiā nātou tonatou totogi ʼaē neʼe kotou fakatuʼutuʼu kiai, pea mo te pilime ʼaē ʼe fakatuʼutuʼu peʼe fakamaʼua e te lao. (1 Timoteo 5:18; Sake 5:1-4) Pea kapau ko totatou pātolō ʼe ko he tehina peʼe ko he tuagaʼane, pea ʼe tou fai fakalelei anai ia te gāue ʼaē ʼe totogi ia tātou kiai. (2 Tesalonika 3:10) ʼE mole tou fakaʼamu anai ke gaohi fakaleleiʼi tātou ʼuhi heʼe tou gāue ki hotatou tehina peʼe ko hotatou tuagaʼane, ohagē leva ʼi tatatou manatu ʼe tonu ke tuku mai e totatou pātolō ia he ʼu ʼaho mālōlō, peʼe ke ina hilifaki he falā peʼe ko he tahi age ʼu meʼa ʼe mole ina foaki anai ki te tahi age kau gāue.—Efesi 6:5-8.

14. Kā fakatuʼutuʼu he ʼu Kilisitiano ki he gāue fakamālama ʼe fakaʼapē lua, koteā ʼaē ʼe tonu ke natou fai, pea koteā tona tupuʼaga?

¹⁴ ʼE feafeaʼi mo kapau ʼe fakaʼuhiga ki he matani gāue ʼe fakaʼapē  lua, ʼe lagi tou foaki he falā moʼo lagolago kiai peʼe tou kole maʼua moʼo lagolago ki te matani gāue ʼaia? ʼE foaki ʼi te Tohi-Tapu ia he pelesepeto ʼe maʼuhiga pea mo ʼaoga: Tou tohi ki he pepa ia te ʼu fakatuʼutuʼu fuli ʼaē neʼe tou felōgoi tahi kiai! Ohagē lā, ʼi te temi ʼaē neʼe totogi ai e Selemia ia te moʼi kele, neʼe ina tohi te faʼahi ʼaia ki te pepa iā muʼa ʼo te ʼu fakamoʼoni e lua, pea neʼe ina taupau fakalelei ia te pepa ʼaia ke feala hana toe fakaʼaogaʼi ki muli age moʼo fakamoʼoni ʼaki ia tana kua ʼosi totogi ʼaē ia te kele ʼaia. (Selemia 32:9-12; vakaʼi mo Senesi 23:16-20.) Kā kotou fakatuʼutuʼu ki he gāue fakamālama mo he ʼu tehina peʼe ko he ʼu tuagaʼane, ʼe mole fakaʼuhiga leva ʼe mole kotou falala kiā nātou mo kapau ʼe kotou tohi fakalelei ia meʼa fuli ki he pepa, mo sinie te pepa ʼaia, iā muʼa ʼo he ʼu fakamoʼoni. Kae ko te pepa ʼaia ʼe tokoni ki te ʼu tehina mo tuagaʼane ke ʼaua naʼa hoko he ʼu femahinohalaʼaki pea mo he ʼu tokakovi, ʼo tupu ai he ʼu felotomamahiʼaki iā nātou. Ko te ʼu Kilisitiano ʼaē ʼe natou felōgoi ke natou fakatuʼutuʼu he gāue fakamālama, ʼe tonu ke natou manatuʼi ʼe mole tonu ki he gāue ʼe fakaʼapē lua ke ina maumauʼi ia te logotahi pea mo te tokalelei ʼo te kōkelekāsio. *—1 Kolonito 6:1-8.

15. Koteā te manatu ʼa Sehova ki te ʼu aga fakakākā ʼo ʼuhiga mo he ʼu faifakatau, pea ʼe tonu ke feafeaʼi te kau Kilisitiano ʼo ʼuhiga mo te taʼi aga ʼaia ʼe fai e te hahaʼi tokolahi?

¹⁵ ʼE mole gata pē ʼi te kōkelekāsio ke aga fakahagatonu ai he Kilisitiano. Neʼe ʼui fēnei e Paulo: “ ʼE matou loto ke matou aga fakahagatonu iā meʼa fuli pē.” (Hepeleo 13:18) Kā tou fakatuʼutuʼu ni ʼu gāue paʼaga, pea ʼe loto e totatou Tupuʼaga ke tou aga fakahagatonu. ʼI te tohi pē ʼo Tāʼaga Lea, ʼe talanoa tuʼa fā ai ki he ʼu meʼa fua neʼe kākāʼi. (Tāʼaga Lea 11:1; 16:11; 20:10, 23) ʼI te temi muʼa, neʼe ko he agamāhani ia te fakaʼaogaʼi ʼo he ʼu meʼa fua pea mo he ʼu meʼa fakamamafa ʼi te ʼu faifakatau moʼo fua ʼaki ia te ʼu meʼa ʼaē neʼe totogi pea mo te paʼaga ʼaē neʼe fakaʼaogaʼi moʼo totogi ʼaki te ʼu meʼa ʼaia. Ko te ʼu hahaʼi faifakatau kākā neʼe natou fakaʼaogaʼi te ʼu meʼa fakamamafa ʼe lua pea mo te ʼu meʼa fua neʼe kākāʼi moʼo kaihaʼa ia te  hahaʼi ʼaē neʼe ʼomai ʼo toʼo tanatou ʼu meʼa. * ʼE fehiʼa ia Sehova ki te ʼu aga ʼaia! Ke tou nonofo ʼi tona ʼofa, ʼe tonu ke tou tekeʼi ia te ʼu aga fakakākā fuli ʼo ʼuhiga mo he ʼu faifakatau.

16, 17. Ko te ʼu faʼahiga aga fakakākā fea ʼaē kua lahi tona fai ʼi te mālamanei, pea koteā ʼaē kua fakatotonu kiai ia te kau Kilisitiano moʼoni ke natou fai?

¹⁶ ʼUhi ko Satana ia te pule ʼo te mālamanei, ʼe mole tou punamaʼuli ki te kua mafola ʼo te ʼu aga fakakākā ʼi te potu fuli ʼo te kele. ʼI te ʼaho fuli ʼe fakahalaʼi ia tātou ke tou aga fakakākā. Kā tohi e te hahaʼi he pepa ki he kumi gāue, ʼi te agamāhani ʼe natou loi pea mo hilifaki kiai he ʼu meʼa, ʼo natou loi ʼo ʼuhiga mo te ʼu pepa ʼaē neʼe natou maʼu ʼi te faleako pea mo te ʼu taʼu gāue ʼaē kua natou fai. Kā fai pepa te hahaʼi mokā natou ʼolo ki he tahi fenua, peʼe ko he pepa ʼo ʼuhiga mo te ʼu tukuhau, mo te ʼu pepa assurances, pea mo he tahi age pē ʼu pepa fēia, ʼi te agamāhani ʼe natou loi ke tupu ai hanatou maʼu ia te ʼu meʼa ʼaē ʼe natou loto kiai. Tokolahi te kau ako ʼi te faleako ʼe natou kākā ʼi te ʼu sivi peʼe kā natou fai he ʼu fakamatala ki te ako, ʼe lagi natou vakaʼi ʼi te Internet pea mo hiki mai ai te ʼu manatu, ʼo natou loi ʼe ko tanatou gāue, kae ko te gāue ia ʼa he tahi age. Pea kā felōgoi te hahaʼi mo he kau takitaki aga fakakākā, ʼi te agamāhani ʼe faigafua tanatou totogi ia te kau takitaki ʼaia, ke natou maʼu ai ia te meʼa ʼaē ʼe natou loto kiai. ʼE mole tou punamaʼuli anai mo kapau ʼe tou sio ki te aga ʼaia ʼe fai ʼi te mālamanei ʼaē kua tokolahi ai “te hahaʼi ʼe kaumeʼa pē . . . mo nātou totonu, kaumeʼa mo te paʼaga, . . . [ʼe] mole [natou] manako ki te meʼa ʼaē ʼe lelei.”—2 Timoteo 3:1-5.

¹⁷ Kua fakatotonu ia te kau Kilisitiano moʼoni ke ʼaua naʼa natou fai te ʼu aga ʼaia. ʼI ʼihi temi, ʼe faigataʼa te aga fakahagatonu heʼe ko nātou ʼaē ʼe aga fakakākā ʼe hagē pē ia te ʼu meʼa ʼaē ʼe natou fai ʼe fua lelei pē ia kiā nātou pea mo natou maʼu tuʼulaga ʼi te mālamanei. (Pesalemo 73:1-8) Kae ki te kau Kilisitiano ia ʼe natou tau nātou mo ni ʼu fihifihia fakapaʼaga ʼi tanatou fia aga fakahagatonu “iā meʼa fuli pē.” ʼE ʼi ai koa he ʼaoga ʼo te ʼu sākilifisio ʼaia ʼe fai e te kau  Kilisitiano? ʼEī, koteā tona tupuʼaga? Koteā tona ʼu lelei ʼe natou maʼu mai tanatou aga fakahagatonu ʼaia?

18. He koʼē ʼe maʼuhiga ʼaupitō ke ʼiloa he tahi ʼi tana aga fakahagatonu?

¹⁸ ʼE mole lahi te ʼu meʼa ʼi tokotou maʼuli ʼe maʼuhiga age kiā koutou ʼi hakotou fai ʼo he ʼu gāue ke ʼiloa ai takotou aga fakahagatonu pea mo kotou liliu ko he tahi ʼe tāu mo koutou ia te falala ʼa te hahaʼi. (Vakaʼi ʼi te  pāsina 167, ia te fakamatala ʼaē ʼe ʼātakai ko tona kupu tāfito “ ʼE Au Aga Fakahagatonu Koa ʼi Te Temi Fuli Pē?”) Pea kotou fakakaukauʼi age muʼa ʼe feala pē ki te hahaʼi fuli ke natou fai ni ʼu gāue ke ʼiloa ai ia nātou ʼe natou aga fakahagatonu! ʼE mole fakalogo ia te faʼahi ʼaia ki hokotou poto, peʼe ko hokotou maʼuli haohaoa, peʼe ki hokotou agaaga matalelei, peʼe ki hokotou tuʼulaga ʼi te gāue, peʼe ko he tahi age meʼa ʼe mole kotou lava pule kiai. Kae tokolahi ʼe mole natou maʼu ia te koloa ʼaē ke ʼiloa ai ia nātou ʼe ko ni hahaʼi aga fakahagatonu. ʼE tahitahiga ia nātou ʼaē ʼe natou aga fakahagatonu. (Mikea 7:2) Ko ʼihi ʼe lagi natou manukiʼi koutou ʼi takotou aga fakahagatonu, kae ko ʼihi ʼe natou vikiʼi anai takotou aga ʼaia, pea mo natou falala anai kiā koutou pea mo fakaʼapaʼapa kiā koutou. Tokolahi ia te kau Fakamoʼoni ʼa Sehova neʼe natou maʼu te ʼu lelei ʼi te faʼahi ʼo te paʼaga ʼuhi ko tanatou aga fakahagatonu. Neʼe natou taupau tanatou gāue ʼi te temi ʼaē neʼe fakamavae ai ʼihi neʼe aga fakakākā, pe neʼe natou maʼu hanatou gāue ʼi te temi ʼaē neʼe faigataʼa ai te maʼu ʼo he gāue.

19. ʼE feafeaʼi totatou leʼo ʼo loto pea mo tatatou felōgoi mo Sehova mokā tou aga fakahagatonu ʼi totatou maʼuli?

¹⁹ Peʼe hoko kiā koutou ia te faʼahi ʼaia peʼe kailoa, kae ʼe kotou fakamoʼoni anai ʼe kotou maʼu he ʼu lelei ʼe lahi age mokā ʼe kotou aga fakahagatonu. ʼE kotou maʼu anai ia he leʼo ʼo loto ʼe maʼa. Neʼe tohi fēnei e Paulo: “[ʼE] matou ʼiloʼi papau ʼe aga fakahagatonu tomatou leʼo ʼo loto.” (Hepeleo 13:18) Tahi ʼaē meʼa, ʼe mole meʼa noaʼi ia koutou e tatatou Tamai ʼofa ʼaē ʼe ʼi selō, pea ʼe ʼofa ia ki te hahaʼi ʼaē ʼe aga fakahagatonu. (Pesalemo 15:1, 2; Tāʼaga Lea 22:1) ʼEī, ko takotou aga fakahagatonu ʼe tokoni atu ke kotou nonofo ʼi te ʼofa ʼo te ʼAtua, pea ʼe ko te fakapale lahi pē ʼaia ʼe feala ke tou maʼu. ʼE tou vakaʼi anai ʼi te kāpite ʼaē kā hoa mai ia te faʼahi ʼe pipiki ki te ʼu manatu ʼo te kāpite ʼaenī, ia te manatu ʼa Sehova ʼo ʼuhiga mo te gāue.