1, 2. Koteā te tonu ʼe ʼaoga ke tou fai ʼo ʼuhiga mo te ʼu fakafiafia?

KOTOU fakakaukauʼi age muʼa, ʼe kotou kai he fuaʼi ʼakau ʼe kano lelei kae ʼe kotou tokagaʼi ʼe ʼi ai te faʼahi kua pala. Koteā anai kā kotou fai? ʼE feala pē hakotou kai te fuaʼi ʼakau kātoa pea mo tona faʼahi ʼaē kua pala; peʼe kotou liʼaki te fuaʼi ʼakau; peʼe kotou tofiʼi tona faʼahi ʼaē kua pala kae kotou kai tona faʼahi ʼaē kei lelei. Koteā anai te tonu ʼaē kā kotou fai?

² Pea ʼe feala pē ke toe fēia mo te ʼu fakafiafia. ʼI ʼihi temi, ʼe kotou fia fakafiafia, kae ʼe kotou ʼiloʼi ʼe lahi te ʼu fakafiafia iā ʼaho nei ʼe maʼu ai te ʼu aga heʼeʼaoga mo heʼemaʼa. Koteā anai kā kotou fai? Ko ʼihi ʼe lagi natou tali te meʼa ʼaē ʼe kovi pea mo te ʼu fakafiafia fuli pē ʼaē ʼe fai ʼi te mālama ʼaenī. ʼE lagi ko ʼihi ʼe natou tekeʼi anai te ʼu fakafiafia fuli ke mole natou tuʼutāmaki ai. Pea ko ʼihi leva, ʼe lagi natou fakafisi fakalelei ki te ʼu fakafiafia ʼaē ʼe feala ke natou tuʼutāmaki ai, kae ʼihi temi ʼe natou fakafiafia ʼi he ʼu fakafiafia ʼe lelei. Koteā anai te tonu ʼe ʼaoga ke kotou fai ke kotou haga nonofo ʼi te ʼofa ʼo te ʼAtua?

3. Koteā ʼaē kā tou vakaʼi anai ʼi te ʼalatike ʼaenī?

³ Tokolahi iā tātou ʼe tou filifili anai ia te tolu manatu. ʼE tou ʼiloʼi ʼe ʼaoga kiā tātou ke tou fakafiafia kae ʼe tou fia fakafiafia ʼi te ʼu meʼa pē ʼaē ʼe maʼa. Koia, ʼe ʼaoga ai ke tou mahino pe ko fea ia te fakafiafia ʼaē ʼe lelei pea mo ʼaē ʼe kovi. Kae ʼe tou vakaʼi muʼa peʼe malave feafeaʼi ki tatatou tauhi ʼaē kiā Sehova ia te ʼu fakafiafia ʼaē ʼe tou filifili.

4. Ko tatatou foaki ʼaē ʼo totatou maʼuli kiā Sehova ʼe malave feafeaʼi ki te ʼu fakafiafia ʼaē ʼe tou filifili?

⁴ Kua hili nei kiai te ʼu taʼu, ko te Fakamoʼoni kua matuʼa neʼe papitema ʼi te taʼu 1946, neʼe ina ʼui fēnei: “Neʼe au tokaga ke au kau tuʼumaʼu ki te ʼu akonaki fuli ʼaē ʼe fai ki te papitema pea mo au fakalogo lelei te ʼu akonaki ʼaia, ohagē kiā au ʼe au papitema ʼi te ʼaho ʼaia.” Koteā tona tupuʼaga? Neʼe ina fakamahino fēnei: “ ʼI taku manatuʼi tuʼumaʼu kua au foaki toku maʼuli kiā Sehova, neʼe ko he faʼahi maʼuhiga ʼaia ke au nofo agatonu ai.” ʼE mahino ia, ʼe kotou manatu tahi mo ia. Ko takotou manatuʼi ʼaē neʼe kotou fakapapau kiā Sehova ʼe kotou fakaʼaogaʼi anai tokotou maʼuli kātoa moʼo tauhi kiā te ia, ʼe ina uga anai koutou ke kotou faʼa kātaki. (Tagata Tānaki 5:4; Hepeleo 10:7) ʼI tona ʼuhiga moʼoni, ko takotou metitāsio ki takotou foaki ʼaē ʼo tokotou maʼuli kiā Sehova, ʼe mole malave pē anai ki tokotou minisitelio Fakakilisitiano, kae ʼe toe malave foki ki te ʼu faʼahi fuli ʼo tokotou maʼuli, pea ʼe kau kiai te ʼu fakafiafia. Neʼe fakamaʼuhigaʼi e te ʼapositolo ko Paulo ia te moʼoni ʼaia ʼi tana faitohi ki te kau Kilisitiano ʼo tona temi, ʼo ina ʼui fēnei: “Peʼe kotou kakai, peʼe kotou ʼiʼinu, peʼe ko he faʼahiga meʼa pē ʼe kotou fai, kotou fai te ʼu meʼa fuli moʼo fakakolōliaʼi ʼo te ʼAtua.”—1 Kolonito 10:31.

5. Ko te manatu ʼaē ia Levitike 22:18-20, ʼe tokoni feafeaʼi mai ke tou mahino ki te fakatokaga ʼaē ʼe fai mai kiā tātou iā Loma 12:1?

⁵ Ko meʼa fuli pē ʼe kotou fai ʼi  tokotou maʼuli ʼe ʼi ai tona pikipikiga mo takotou tauhi ʼaē kiā Sehova. ʼI tana tohi ki te kau Loma, neʼe fakaʼaogaʼi e Paulo ia te palalau ʼe mālohi ke manatuʼi e tona ʼu tehina ia te moʼoni ʼaē neʼe ina tohi. Neʼe ina fai te tokoni ʼaenī kiā nātou: “Kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi taputapu ʼaki tokotou ʼatamai.” (Loma 12:1) Ko tokotou sino ʼe fakaʼuhiga ki tokotou ʼatamai, tokotou loto, pea mo tokotou mālohi fakasino. ʼE kotou fakaʼaogaʼi te ʼu faʼahi fuli ʼaia moʼo tauhi ki te ʼAtua. (Maleko 12:30) ʼE ʼui e Paulo ko te taʼi tauhi ʼaia ʼaē ʼe fai ʼaki totatou nefesi kātoa, ʼe ko he sākilifisio ia. ʼAki te kupu “sākilifisio” ʼe tou maʼu ai he fakatokaga ʼe fai mai kiā tātou. ʼI te Lao ʼa Moisese, neʼe mole tali e te ʼAtua ke fai age he sākilifisio neʼe ʼi ai hona mele. (Levitike 22:18-20) ʼO toe fēia pē, kapau ʼi te tauhi ʼa he Kilisitiano ʼe ʼi ai he faʼahi ʼe heʼemaʼa, pea ʼe mole tali anai e te ʼAtua. Kae ʼe lava hoko feafeaʼi ia te faʼahi ʼaia?

6, 7. ʼE lava ʼulihi feafeaʼi e he Kilisitiano tona sino, pea koteā anai tona ʼu fua kiā ia?

⁶ Neʼe fakatotonu fēnei e Paulo ki te kau Kilisitiano ʼo Loma: “ ʼAua naʼa kotou tuku te ʼu koga ʼo tokotou sino ki te agahala.” Neʼe toe ʼui age e Paulo ke natou “tāmateʼi te ʼu gāue ʼo te sino.” (Loma 6:12-14; 8:13) ʼI te kamata ʼo tana tohi, neʼe ina fai he ʼu faʼifaʼitaki ʼo ʼuhiga mo “te ʼu gāue ʼo te sino.” ʼO ʼuhiga mo te mālama agahala ʼaenī, ʼe tou lau fēnei: “ ʼE fonu tonatou gutu ʼi te faitutuku.” “ ʼE fakavilivili pē tonatou ʼu vaʼe ki te ligitoto.” “ ʼE mole he manavasiʼi ki te ʼAtua iā muʼa ʼo ʼonatou mata.” (Loma 3:13-18) ʼE ʼulihi anai e he Kilisitiano tona sino mo kapau ʼe ina fakaʼaogaʼi “te ʼu koga” ʼo tona sino moʼo fai ia te ʼu agahala ʼaia. Kapau lā iā ʼaho nei, ʼe sioʼi e he Kilisitiano he ʼu meʼa heʼeʼaoga ohagē ko te ʼu pāki ʼaē ʼe hā ai te ʼu felāveʼi fakasino fakalialia peʼe ko he ʼu ʼata ʼe ʼasi ai te toe agamālohi fakalialia heʼeʼaoga, pea ʼe ina lolotoga “tuku [tona ʼu mata] ki te agahala,” ʼo ina ʼulihi ai tona sino kātoa. Ko tana tauhi ʼe liliu anai ko he sākilifisio ʼe mole kei māʼoniʼoni pea ʼe mole tali e te ʼAtua. (Teutalonome 15:21; 1 Petelo 1:14-16; 2 Petelo 3:11) ʼI toe meʼa fakaʼofaʼofa leva ʼo tupu pē ko tatatou filifili ia he ʼu fakafiafia ʼe kovi!

 ⁷ ʼE hā lelei mai, ʼe maʼuhiga ki te Kilisitiano ke ina filifili lelei te ʼu fakafiafia ʼaē ke kau ai. ʼE mahino ia, ʼe tou loto anai ki te fakafiafia ʼaē kā ina fakamataleleiʼi tatatou sākilifisio ki te ʼAtua, kae mole ko te fakafiafia ʼaē kā ina ʼulihi tatatou sākilifisio ʼaia. Tou talanoa leva ʼi te temi ʼaenī peʼe feafeaʼi hatatou lava ʼiloʼi te fakafiafia ʼaē ʼe lelei pea mo ʼaē ʼe kovi.

8, 9. (a) He koʼē ʼe tou ʼui ko faʼahiga fakafiafia e lua? (b) Ko te ʼu faʼahiga fakafiafia fea ʼaē ʼe tonu ke tou situʼa kiai, pea koteā tona tupuʼaga?

⁸ ʼI te agamāhani, ʼe ko faʼahiga fakafiafia e lua. Ko te ʼuluaki faʼahiga fakafiafia, ʼe ko te ʼu fakafiafia ʼaē ʼe tekeʼi e te kau Kilisitiano, pea lua leva, ʼe ko te ʼu fakafiafia kehekehe ʼaē ʼe feala ke tali peʼe kailoa e te kau Kilisitiano. Tou vakaʼi muʼa ia te ʼuluaki faʼahiga fakafiafia, ʼaē ʼe fakafisi kiai te kau Kilisitiano.

⁹ Ohagē ko te ʼu manatu neʼe kua tou vakaʼi ʼi te Kāpite 1, ʼe maʼu ʼi ʼihi ʼu fakafiafia he ʼu aga ʼe tauteaʼi ʼi te Tohi-Tapu. Ohagē lā ko te Internet pea mo te ʼu ʼata, te ʼu polokalama ʼi te televisio, pea mo te ʼu musika ʼaē ʼe maʼu ai te aga fakalialia pea mo te fai fakalauʼakau, peʼe maʼu ai he ʼu pāki ʼo ni ʼu felāveʼi fakasino heʼeʼaoga peʼe lagolago ki te ʼu aga ʼaē ʼe kovi pea mo heʼeʼaoga. Mai tona ʼaluʼaga ʼaē ʼi te ʼu taʼi fakafiafia kovi ʼaia ʼe fakalakatonuʼi ai ni ʼu aga ʼe fakafeagai ki te ʼu pelesepeto Fakatohi-Tapu peʼe moamoagaʼi ai te ʼu lao ʼa te ʼAtua, koia ʼe tonu ai ki te kau Kilisitiano moʼoni ke natou fakamamaʼo mai ai. (Gāue 15:28, 29; 1 Kolonito 6:9, 10; Fakahā 21:8) Kapau ʼe kotou situʼa ki te ʼu fakafiafia kovi ʼaia, pea ʼe kotou fakahā moʼoni ai kiā Sehova ʼe “kotou fehiʼa [ʼaupitō] ki te meʼa ʼaē ʼe kovi” pea ʼe kotou “maliu [tuʼumaʼu] mai te meʼa ʼaē ʼe kovi.” Kapau ʼe kotou fai fēia, pea ʼe kotou maʼu ai “he tui ʼe mole mālualoi.”—Loma 12:9; Pesalemo 34:14; 1 Timoteo 1:5.

10. Koteā te faʼahiga manatu ʼo ʼuhiga mo te ʼu fakafiafia ʼe fakatupu tuʼutāmaki, pea koteā tona tupuʼaga?

¹⁰ Kae ʼe lagi ʼi te manatu ʼa ʼihi, ko te sioʼi ʼo te ʼu taʼi fakafiafia ʼaia ʼaē ʼe hā lelei ai te ʼu aga heʼeʼaoga, ʼe mole fakatupu kovi ia kiā nātou. ʼE natou manatu fēnei: ‘ ʼE feala pē haku sioʼi te ʼu taʼi aga ʼaia ʼi he ʼu ʼata peʼe ʼi te televisio, kae ʼe mole au fai anai  te ʼu taʼi aga ʼaia ʼi he temi.’ ʼE kākā pea mo fakatupu tuʼutāmaki te taʼi manatu ʼaia. (Selemia 17:9) Kapau ʼe tou fiafia ʼi te sio ki he ʼu aga ʼe tauteaʼi e Sehova, pea ʼe feala koa ke tou ʼui ʼe tou ‘fehiʼa moʼoni ki te meʼa ʼaē ʼe kovi’? Kapau ʼe tou sioʼi liuliuga he ʼu aga ʼe kovi, pea ʼe faifai pē anai ʼo mate noa totatou loto. (Pesalemo 119:70; 1 Timoteo 4:1, 2) Ko te taʼi aga ʼaia ʼe feala ke malave ki te ʼu meʼa ʼaē ʼe tou fai peʼe ki tatatou manatu ʼo ʼuhiga mo te maʼuli ʼa ʼihi ʼi te agahala.

11. Neʼe hā feafeaʼi ia te moʼoni ʼo te ʼu palalau ʼaē iā Kalate 6:7 ʼo ʼuhiga mo te ʼu fakafiafia?

¹¹ Neʼe hoko moʼoni ia te faʼahi ʼaia. Ko ʼihi Kilisitiano neʼe natou fai te ʼu aga heʼeʼaoga he neʼe malave kiā nātou te ʼu fakafiafia ʼaē neʼe natou sioʼi tuʼumaʼu. Neʼe mahino ai leva kiā nātou ʼi tanatou tō ki te hele ʼaia, ia te moʼoni ʼo te manatu ʼaenī: “Ko te meʼa ʼaē ʼe tō e te tagata, ʼe ko te meʼa pē ʼaia ʼaē kā ina utu anai.” (Kalate 6:7) Kae ʼe feala pē ke mole hoko te ʼu faʼahi ʼaia kiā koutou, mo kapau ʼe kotou fakahū ki tokotou ʼatamai he ʼu meʼa ʼe lelei, pea ʼe kotou fiafia anai ʼi te maʼu ʼo he ʼu fua ʼe lelei ʼi tokotou maʼuli.—Vakaʼi ʼi te pāsina 67, ia te fakamatala ʼaē ʼe ʼātakai ko tona kupu tāfito  “Ko Te ʼu Fakafiafia Fea ʼAē ʼe Tonu Ke Au Filifili?”

12. Koteā te pikipikiga ʼo Kalate 6:5 mo te ʼu fakafiafia, pea ko te tokoni fea ʼe tou maʼu moʼo fai hatatou ʼu tonu takitokotahi?

¹² Tou talanoa ʼi te temi nei ki te lua faʼahiga fakafiafia: Te ʼu fakafiafia ʼaē ʼe mole tauteaʼi peʼe fakagafua fakahagatonu mai ʼi te Folafola ʼa te ʼAtua. Kā filifili e he Kilisitiano ia he fakafiafia ʼi te ʼu faʼahiga fakafiafia ʼaia, pea ʼe fakalogo pē ki te Kilisitiano takitokotahi te fai ʼo he tonu ke ina fili te fakafiafia ʼaē ʼe lelei. (Kalate 6:5) Kae kā tonu ke tou fai he faʼahi fēia, pea ʼe ʼi ai totatou takitaki. ʼE tou maʼu ʼi te Tohi-Tapu te ʼu pelesepeto, peʼe ko he ʼu moʼoni tāfito, ʼe natou fakafealagia mai ke tou mahino ki te manatu ʼa Sehova ʼo ʼuhiga mo te ʼu fakafiafia ʼaia. ʼI tatatou fakaʼaogaʼi ia te ʼu pelesepeto ʼaia, ʼe feala ai anai ke tou mahino “peʼe koteā te finegalo ʼo Sehova” iā meʼa fuli pē, ʼo kau ai mo tatatou filifili ia he fakafiafia.—Efesi 5:17.

13. Koteā ʼaē kā ina uga anai tātou ke tou tekeʼi te ʼu fakafiafia ʼaē ʼe mole leleiʼia e Sehova?

 ¹³ ʼE mahino papau ia, ʼe mole tatau ia te tuputupu ʼa te kau Kilisitiano ʼi tanatou mahino ʼaē ki te aga ʼaē ʼe tonu ke fai, peʼe ko te fakasiosio tonu. (Filipe 1:9) Tahi ʼaē meʼa, ʼe mahino ki te kau Kilisitiano ʼo ʼuhiga mo te ʼu fakafiafia, ʼe kehekehe te ʼu meʼa ʼaē ʼe tou leleiʼia takitokotahi. Koia, ʼe mole feala anai ki te kau Kilisitiano fuli ke tatau ʼosi tanatou ʼu tonu ʼaē ʼe natou fai. Kae kapau ʼe tou fakahū ke lahi te ʼu pelesepeto fakaʼatua ki totatou  ʼatamai pea mo totatou loto, pea ʼe toe mālohi age anai tatatou tekeʼi ia te ʼu fakafiafia ʼaē ʼe mole leleiʼia e Sehova.—Pesalemo 119:11, 129; 1 Petelo 2:16.

14. (a) Ko te faʼahi fea ʼaē ʼe tonu ke tou tokagaʼi mokā tou filifili he ʼu fakafiafia? (b) ʼE feafeaʼi hatatou haga fakamuʼamuʼa ʼi totatou maʼuli ia te ʼu gāue ʼo te Puleʼaga?

¹⁴ Kā kotou filifili he ʼu fakafiafia, ʼe ʼi ai te tahi faʼahi maʼuhiga ʼe tonu ke kotou tokagaʼi, ʼe ko te temi ʼaē ʼe kotou fakaʼaogaʼi ki te ʼu fakafiafia. Ko te faʼahiga fakafiafia ʼaē ʼe kotou filifili, ʼe fakahā ai te meʼa ʼaē ʼe kotou leleiʼia, pea ko te temi ʼaē ʼe kotou fakaʼaogaʼi kiai ʼe fakahā ai te meʼa ʼaē ʼe maʼuhiga kiā koutou. ʼE mahino papau ia, ʼe maʼuhiga ʼaupitō age ki te kau Kilisitiano ia te ʼu gāue fakalaumālie. (Mateo 6:33) Koteā ʼaē ʼe feala ke kotou fai ke kotou fakamuʼamuʼa ai ʼi tokotou maʼuli ia te ʼu gāue ʼo te Puleʼaga? Neʼe ʼui fēnei e te ʼapositolo ko Paulo: “Ke kotou tōkakaga fakalelei ki takotou faʼahiga haʼele: ke ʼaua naʼa hagē ko he kau vavale, kae ke hagē ko ni kau popoto, ʼo kotou totogi maʼa koutou te temi faigamālie.” (Efesi 5:15, 16) Koia, kapau ʼe kotou fakatuʼakoi fakalelei te temi ʼaē ʼe kotou fakaʼaogaʼi ki te ʼu fakafiafia pea ʼe tokoni atu anai ke kotou maʼu he temi feʼauga ki “te ʼu meʼa ʼaē ʼe maʼuhiga tāfito”—te ʼu gāue ʼaē kā fua lelei anai ki tokotou maʼuli fakalaumālie.—Filipe 1:10.

15. Kā tou filifili he ʼu fakafiafia, he koʼē ʼe ko he aga fakapotopoto ke tou vakavakaʼi fakalelei ia te ʼu agaaga ʼo te ʼu fakafiafia ʼaia?

¹⁵ Kā tou filifili he ʼu fakafiafia, ʼe ko he aga fakapotopoto foki ke tou vakavakaʼi fakalelei ia te ʼu agaaga ʼo te ʼu fakafiafia ʼaia. Koteā tona fakaʼuhiga? Tou toe toʼo te faʼifaʼitaki ʼo te fuaʼi ʼakau. Ke mole kotou kai ki te faʼahi ʼaē kua pala, ʼe mole gata pē ʼi takotou toʼo ʼaē ia tona faʼahi kua kovi, kae ʼe kotou toe tofiʼi foki mo tona ʼu tafaʼaki. ʼO toe fēia mokā tou filifili he ʼu fakafiafia, ʼe tou aga fakapotopoto anai mokā ʼe tou vakavakaʼi fakalelei te ʼu agaaga ʼo te ʼu fakafiafia ʼaia. Ko he Kilisitiano ʼe aga fakapotopoto ʼe mole situʼa pē ia ki te ʼu fakafiafia ʼaē ʼe ina ʼiloʼi lelei ʼe fakafeagai ki te ʼu pelesepeto ʼo te Tohi-Tapu, kae ʼe toe situʼa anai ki te ʼu fakafiafia ʼaē ʼe mole faʼa lelei peʼe hagē tona ʼu agaaga ʼe feala ke tuʼutāmaki ai tona maʼuli fakalaumālie.  (Tāʼaga Lea 4:25-27) Kapau ʼe kotou mulimuli lelei ki te Folafola ʼa te ʼAtua pea ʼe tokoni atu anai ke kotou tekeʼi te ʼu taʼi fakafiafia ʼaia.

16. (a) ʼE tou lava fakahā feafeaʼi ʼe tou maʼu ia te manatu ʼa Sehova ʼo ʼuhiga mo te aga ʼaē ʼe tonu ke fai? (b) Ko takotou mulimuli ki te ʼu pelesepeto ʼo te Tohi-Tapu ʼe lava liliu feafeaʼi ko he meʼa ʼe kotou fai tuʼumaʼu pē anai ʼi tokotou maʼuli?

¹⁶ Kā natou filifili he ʼu fakafiafia, ʼe fia ʼiloʼi tāfito e te kau Kilisitiano moʼoni ia te manatu ʼa Sehova. ʼE fakahā ʼi te Tohi-Tapu ia te manatu pea mo te ʼu lēkula ʼa Sehova. Ohagē lā, ʼe tohi e te Hau ko Salomone te lisi ʼo te ʼu meʼa ʼaē ʼe fehiʼa kiai ia Sehova, ohagē lā “ko he ʼalelo loi, pea mo he ʼu nima ʼe natou liligi te toto ʼaē ʼe heʼe hala, ko he loto ʼe ina faʼufaʼu he ʼu fakatuʼutuʼu kovi, ko he ʼu vaʼe ʼe natou fia lele vave ki te meʼa ʼaē ʼe kovi.” (Tāʼaga Lea 6:16-19) ʼE tonu ke malave feafeaʼi kiā koutou ia te manatu ʼa Sehova? ʼE tokoni fēnei ia te tagata fai pesalemo: “Kiā koutou ʼaē ʼe ʼofa kiā Sehova, ke kotou fehiʼa ki te meʼa ʼaē ʼe kovi.” (Pesalemo 97:10) ʼE tonu ke hā ʼi te ʼu fakafiafia ʼaē ʼe kotou filifili ia takotou fehiʼa moʼoni ki te ʼu meʼa ʼaē ʼe fehiʼa kiai ia Sehova. (Kalate 5:19-21) ʼAua naʼa toe galo kiā koutou, ko te meʼa ʼaē ʼe kotou fai ʼi te lilo kae mole ʼiloʼi e te hahaʼi, ʼe kotou fakahā ai ko ai moʼoni ia koutou. (Pesalemo 11:4; 16:8) Koia, kapau ʼe kotou loto moʼoni ke kotou maʼu ʼi te ʼu faʼahi fuli ʼo tokotou maʼuli ia te ʼu manatu ʼa Sehova ʼo ʼuhiga mo te aga ʼaē ʼe tonu ke fai, ʼe kotou fai tuʼumaʼu pē anai  he ʼu tonu ʼe ʼalutahi mo te ʼu pelesepeto ʼo te Tohi-Tapu. Kapau ʼe kotou fai fēia, pea ʼe kotou fai tuʼumaʼu pē anai te faʼahi ʼaia ʼi tokotou maʼuli.—2 Kolonito 3:18.

17. ʼI muʼa ʼo hatatou filifili he ʼu fakafiafia, koteā te ʼu fehuʼi ʼe tonu ke tou fai?

¹⁷ Koteā he tahi age meʼa ʼe feala ke kotou fai ke kotou ʼiloʼi papau ai ʼe kotou mulimuli anai ki te faʼahiga manatu ʼa Sehova mokā kotou filifili he ʼu fakafiafia? Kotou fakakaukauʼi ia te fehuʼi ʼaenī: ‘ ʼE malave feafeaʼi te fakafiafia ʼaia kiā au pea mo toku vāhaʼa mo te ʼAtua?’ Ohagē lā, ʼi muʼa ʼo hakotou fakatuʼutuʼu ke kotou sioʼi he ʼata, kotou fai te fehuʼi ʼaenī: ‘Ko te ʼu meʼa ʼaē kā au sio anai kiai ʼi te ʼata ʼaia ʼe malave feafeaʼi anai ki toku leʼo ʼo loto?’ Tou vakaʼi ia te ʼu pelesepeto ʼaē ʼe ʼaoga kiā tātou ʼo ʼuhiga mo te faʼahi ʼaia.

18, 19. (a) ʼE tokoni feafeaʼi mai te pelesepeto ʼaē ʼe tou maʼu iā Filipe 4:8 ke tou ʼiloʼi ai peʼe lelei tatatou ʼu fakafiafia? (b) Koteā te tahi age ʼu pelesepeto ʼe feala ke tokoni atu ke kotou filifili he ʼu fakafiafia ʼe lelei? (Vakaʼi te kiʼi nota ʼi te lalo pāsina.)

¹⁸ Ko te pelesepeto maʼuhiga ʼe tou maʼu iā Filipe 4:8, ʼaē ʼe ʼui fēnei ai: “Ko te ʼu meʼa fuli ʼaē ʼe moʼoni, ko te ʼu meʼa fuli ʼaē ʼe tāu mo he fakaʼapaʼapa, ko te ʼu meʼa fuli ʼaē ʼe faitotonu, ko te ʼu meʼa fuli ʼaē ʼe maʼa, ko te ʼu meʼa fuli ʼaē ʼe fakavikiviki, ko te ʼu meʼa fuli ʼaē ʼe lelei hona talanoaʼi, kapau ʼe ʼi ai he faʼahiga vilitūtē pea kapau ʼe ʼi ai he meʼa ʼe tāu ke vikiʼi, kotou haga tokagaʼi te ʼu meʼa ʼaia.” ʼE moʼoni, neʼe mole talanoa Paulo ki te ʼu fakafiafia, kae neʼe talanoa ki te ʼu meʼa ʼaē ʼe metitāsio kiai te loto, te ʼu meʼa ʼaē ʼe tonu ko he ʼu meʼa ʼe leleiʼia e te ʼAtua. (Pesalemo 19:14) Kae ko te ʼu palalau ʼa Paulo ʼe feala ke fakaʼuhiga ki te ʼu fakafiafia. ʼO feafeaʼi?

¹⁹ Kotou fai te fehuʼi ʼaenī: ‘Ko te ʼu ʼata, mo te ʼu gaoʼi viteo, mo te musika, peʼe ko te tahi age ʼu faʼahiga fakafiafia ʼaē ʼe au filifili, ʼe natou fakafonu koa toku ʼatamai ʼaki “[he] ʼu meʼa . . . ʼe maʼa”?’ Ohagē lā, kā kua au ʼosi sioʼi he ʼata, koteā ia te ʼu pāki ʼaē ʼe tāʼofi e tokotou ʼatamai? Kapau ko he ʼu pāki ʼe fakaʼapaʼapa, mo maʼa, pea mo fakalotomālohi, pea ʼe kotou ʼiloʼi ai neʼe ko he fakafiafia ʼe lelei ʼaē neʼe kotou filifili. Kae kapau ʼi takotou ʼosi sioʼi he ʼata, ʼe kotou manatuʼi ni ʼu meʼa heʼemaʼa,  pea ʼe ko te fakafiafia ʼaia neʼe mole lelei, ʼe feala pē hakotou tuʼutāmaki ai. (Mateo 12:33; Maleko 7:20-23) Koteā tona tupuʼaga? Heʼe ʼi takotou fakakaukauʼi he ʼu meʼa heʼemaʼa ʼe mole kei kotou taupau ai he leʼo ʼo loto ʼe lelei, ʼe hoha ai tokotou leʼo ʼo loto ʼaē neʼe akoʼi ʼaki te Tohi-Tapu, pea ʼe fakatupu kovi ai ki takotou ʼu felōgoi ʼaē mo te ʼAtua. (Efesi 5:5; 1 Timoteo 1:5, 19) Mai tona ʼaluʼaga ʼaē, ko te ʼu taʼi fakafiafia ʼaia ʼe fakatupu tuʼutāmaki ki tokotou ʼulugaaga, kotou fakatotonu ke kotou tekeʼi te faʼahi ʼaia. * (Loma 12:2) Kotou hagē ko te tagata fai pesalemo ʼaē neʼe faikole fēnei kiā Sehova: “Leʼei kehe ʼoku mata ke ʼaua naʼa sio ki te meʼa ʼaē ʼe vaʼiganoa.”—Pesalemo 119:37.

20, 21. Koteā te pikipikiga ʼo te manatu ʼaē iā 1 Kolonito 10:23, 24 pea mo te filifili ʼaē ʼo te ʼu fakafiafia ʼe lelei?

²⁰ Neʼe talanoa ia Paulo ki te pelesepeto maʼuhiga ʼi te Tohi-Tapu ʼe ʼaoga ke kotou tokagaʼi mokā ʼe kotou fai he ʼu tonu ʼo ʼuhiga mo he ʼu faʼahi ʼo tokotou maʼuli takitokotahi. Neʼe ina ʼui fēnei: “ ʼE gafua ia meʼa fuli; kae ʼe mole laga ia meʼa fuli. Ke ʼaua naʼa kumi e he tahi te meʼa ʼaē ʼe lelei pē kiā te ia, kā ke ina toe kumi foki mo te meʼa ʼaē ʼe lelei ki niʼihi.” (1 Kolonito 10:23, 24) Koteā te pikipikiga ʼo te pelesepeto ʼaia pea mo te filifili ʼo he ʼu fakafiafia ʼe lelei? ʼE tonu ke kotou fai kiā koutou ia te fehuʼi ʼaenī: ‘ ʼE malave feafeaʼi anai ki niʼihi te fakafiafia ʼaenī neʼe au filifili?’

²¹ ʼE mole lagi hoha tokotou leʼo ʼo loto ʼi takotou filifili he faʼahiga fakafiafia, heʼe kiā koutou ia ʼe “gafua” peʼe lelei. Kae kapau ʼe kotou tokagaʼi ʼe koviʼia te fakafiafia ʼaia e ʼihi Kilisitiano ʼaē ʼe fakatuʼakoi age e tonatou leʼo ʼo loto te ʼu meʼa ʼaē ke natou fai, pea ʼe lagi kotou fakatuʼutuʼu ke mole kotou filifili ia te fakafiafia ʼaia. Koteā tona tupuʼaga? Koteʼuhi ʼe mole kotou fia “agahala . . . ki tokotou ʼu tehina”—peʼe ohagē ko tona ʼui e Paulo, ʼe mole kotou fia “agahala kiā Kilisito”—ʼi hakotou fai he meʼa ke faigataʼa ai ki tokotou ʼu tehina tanatou nonofo agatonu  ʼaē ki te ʼAtua. ʼE kotou mulimuli lelei anai ki te tokoni ʼaenī: “Ke kotou tōkakaga naʼa kotou liliu ko he ʼu meʼa fakatupu tūkia.” (1 Kolonito 8:12; 10:32) Iā ʼaho nei, ʼe mulimuli te kau Kilisitiano moʼoni ki te tokoni ʼofa pea mo lelei ʼaia, ʼo natou tōkakaga ki te ʼu fakafiafia ʼaē ʼe lagi “gafua” kae ʼe mole “laga” ai te tui ʼo tonatou ʼu tehina.—Loma 14:1; 15:1.

22. He koʼē ʼe tali e te kau Kilisitiano ia te ʼu manatu kehekehe ʼo ʼuhiga mo he ʼu meʼa ʼe tahi fakalogo pē ki te Kilisitiano takitokotahi?

²² Kae ʼe ʼi ai te tahi faʼahi ʼo ʼuhiga mo te kumi ʼaē ʼo te meʼa ʼaē ʼe lelei ki niʼihi. Ko he Kilisitiano ʼaē ʼe fakatuʼakoi age e tona leʼo ʼo loto te ʼu meʼa ʼaē ke ina fai, ʼe mole tonu anai ke ina fakamaʼua ki te kōkelekāsio kātoa ke natou mulimuli ki tana manatu ʼo ʼuhiga mo he fakafiafia ʼe ina ʼui ʼe lelei. Kapau ʼe ina fakamaʼua age kiā nātou ia he faʼahi fēia, pea ʼe hagē anai ko he tagata taki motokā ʼe loto ki te ʼu motokā fuli ʼaē ʼe kauala tahi mo ia ke natou gaholo fuli ohagē ko ia. Ko he aga fēia ʼe mole fakapotopoto ia. ʼUhi ko te ʼofa Fakakilisitiano, ko he tahi ʼe fakatuʼakoi e tona leʼo ʼo loto te ʼu meʼa ʼaē ke ina fai, ʼe tonu ke fakaʼapaʼapa ki te ʼu tehina ʼaē ʼe kehe age tanatou manatu ʼo ʼuhiga mo te ʼu fakafiafia kae ʼe mole natou maumauʼi he ʼu pelesepeto Fakakilisitiano. ʼAki tana fai fēia, ʼe “ ʼiloʼi [ai tana] aga fakapotopoto e te hahaʼi fuli pē.”—Filipe 4:5; Tagata Tānaki 7:16.

23. ʼE kotou lava ʼiloʼi papau feafeaʼi neʼe kotou filifili he ʼu fakafiafia ʼe lelei?

²³ Moʼo fakanounou ia te ʼu manatu fuli ʼo te ʼalatike ʼaenī, ʼe kotou lava ʼiloʼi papau feafeaʼi ʼe kotou filifili te ʼu fakafiafia ʼe lelei? Kotou situʼa ki te ʼu faʼahiga fakafiafia fuli ʼaē ʼe hā lelei ai he ʼu aga heʼemaʼa, mo heʼeʼaoga, ʼe tauteaʼi fakahagatonu ʼi te Folafola ʼa te ʼAtua. Kotou mulimuli ki te ʼu pelesepeto ʼo te Tohi-Tapu ʼaē ʼe feala ke fakaʼaogaʼi ki he filifili ʼo he ʼu fakafiafia ʼe mole talanoa fakahagatonu kiai te Tohi-Tapu. Kotou tekeʼi ia te ʼu fakafiafia ʼaē ʼe hoha ai tokotou leʼo ʼo loto, pea ke kotou lotolelei ʼo situʼa ki te ʼu faʼahiga fakafiafia ʼaē ʼe lagi koviʼia e niʼihi, tāfito lā totatou ʼu tehina. ʼOfa pē ke kotou fakatotonu mālohi ʼi tokotou loto ke kotou fakakolōliaʼi te ʼAtua pea mo kotou haga nonofo mo tokotou fāmili ʼi tona ʼofa.