ʼE mole he tahi age meʼa ʼe fakatupu lotomamahi ʼaupitō kiā tātou, ʼi te mamahi ʼaē ʼe tau mo tātou mokā fakamavae ʼi te kōkelekāsio he tahi ʼo totatou fāmili peʼe ko hotatou kaumeʼa lelei, he neʼe mole fakahemala mai tana agahala. Ko te aga ʼaē ʼe tou maʼu ʼi te temi ʼaia ʼo ʼuhiga mo te ʼu fakatuʼutuʼu Fakatohi-tapu ki te faʼahi ʼaia, ʼe fakahā ai te loloto ʼo totatou ʼofa ʼaē ki te ʼAtua pea mo tatatou fia nonofo agatonu ki tana ʼu fakatuʼutuʼu. * Tou vakaʼi age ni ʼu fehuʼi ʼe lagaʼi ʼo ʼuhiga mo te faʼahi ʼaia.

ʼE tonu ke feafeaʼi tatatou aga ki he tahi kua fakamavae? ʼE ʼui fēnei ʼi te Tohi-Tapu: “ ʼAua naʼa kotou fakatahi mo he tagata ʼe fakahigoaʼi ko he tehina kae ʼe ko he tagata fai folonikāsio, peʼe ko he tagata mānumānu, peʼe ko he tagata ʼe tauhi tamapua, peʼe ko he tagata ʼe gutu tauvele, peʼe ʼinu fakavale, peʼe ko he tagata agakākā, pea ʼaua pē lā mo takotou kai mo te taʼi tagata ʼaia.” (1 Kolonito 5:11) ʼO ʼuhiga mo ia ʼaē ʼe “mole haga nofo maʼu ʼi te akonaki ʼa Kilisito,” ʼe tou lau fēnei: “ ʼAua naʼa kotou tali ia ia iō koutou pea ʼaua naʼa kotou ʼalofa kiā ia. Heʼe ko ia ʼaē ʼe fakaʼalofa ki ai ʼe kau mo ia ki tana ʼu aga ʼaē ʼe kovi.” (2 Soane 9-11) ʼE mole tonu ke tou toe fai palalau mo nātou ʼaē kua fakamavae ki he ʼu manatu fakalaumālie peʼe tou gaohi meʼa fakatahitahi mo nātou. ʼE ʼui fēnei ʼi Te Tule Leʼo (Fakafalani) ʼo te ʼaho 15 ʼo Tesepeli 1981, ʼi te pāsina 23: “Ko he ʼalofa pē ki he tahi ʼe feala ke tupu ai hatatou fai palalau mo ia pea lagi fakatuputupu ai mo hatatou ʼu felōgoi fakakaumeʼa. ʼE tou fia fakatupu koa he ʼaluʼaga fēia mo he tahi kua fakamavae?”

ʼE ʼaoga moʼoni koa ke tou fakagata ʼosi tatatou felōgoi mo nātou kua fakamavae? ʼEī, heʼe lahi tona ʼu tupuʼaga. ʼUluaki, ʼe tou fakahā ai ʼe tou agatonu ki te ʼAtua pea mo tana Folafola. ʼE mole tou fakalogo pē anai kiā Sehova ʼi te temi ʼaē ʼe faigafua ai, kae ʼe tou toe fakalogo pē anai ʼi te temi ʼaē ʼe faigataʼa ai kiā tātou ia tatatou fakalogo. Ko totatou ʼofa ʼaē ki te ʼAtua ʼe ina uga tātou ke tou fakalogo ki tana ʼu fakatotonu fuli, ʼo tou ʼiloʼi ʼe faitotonu pea mo  ʼofa pea ʼe fua lelei ʼaupitō tana ʼu lao kiā tātou. (Isaia 48:17; 1 Soane 5:3) Lua, ko tatatou fakamamaʼo mai he tahi neʼe agahala kae mole fakahemala, ʼe ko he puipui ʼaia kiā tātou pea mo te kōkelekāsio naʼa tou heʼemaʼa ʼi te faʼahi fakalaumālie pea mo maumauʼi ia te aga ʼaē ʼe tonu ke fai, pea ʼe ko he fakatuʼutuʼu lelei moʼo taupau ia te matagafua ʼo te kōkelekāsio. (1 Kolonito 5:6, 7) Tolu, ko tatatou pipiki maʼu ki te ʼu pelesepeto ʼo te Tohi-Tapu ʼe toe feala pē ke fua lelei kiā ia ʼaē neʼe fakamavae. Kapau ʼe tou lagolago ki te tonu ʼaē neʼe fai e te komitē faifakamāu, pea ʼe feala ke malave ki te loto ʼo ia ʼaē neʼe agahala, ʼaē talu mai tona kua fakamavae neʼe kei fakafeagai pē ki te ʼu faiga ʼaē ʼa te kau tagata ʼāfea ke natou tokoni ki ai. ʼI tana mole kei maʼu tana ʼu felōgoi mo nātou ʼaē ʼe ʼofa ai, ʼe feala ki te faʼahi ʼaia ke tokoni ki ai ke “toe mālama . . . tona ʼatamai,” ʼo mahino ki te mamafa ʼaē ʼo tana agahala, pea mo faiga ke toe liliu mai kiā Sehova.—Luka 15:17.

ʼE feafeaʼi mokā fakamavae he tahi ʼo te fāmili? ʼI te ʼu ʼaluʼaga ʼaia, ʼe feala ke liliu tatatou ʼu felōgoi lelei fakafāmili ʼe ko he hele ʼo ʼuhiga mo totatou ʼofa ʼaē ki te ʼu lao ʼa Sehova. ʼE tonu ke feafeaʼi tatatou aga ki he tahi ʼi totatou fāmili kua fakamavae? ʼE mole feala anai ke tou talanoa ki te ʼu ʼaluʼaga fuli ʼaē ʼe feala ke hoko, kae ʼe tou vakaʼi anai ia faʼahi tāfito e lua.

ʼI ʼihi ʼaluʼaga, ʼe lagi kei nofo pē ʼi te loto fale ia ia ʼaē ʼo te fāmili kua fakamavae. Mai tona ʼaluʼaga ʼaē ʼe mole motuhi anai ia te ʼu noʼo fakafāmili ʼi tona kua fakamavae ʼaia, koia kei feala pē ke hoko atu tanatou ʼu gāue māhani fakafāmili ʼaē ʼe nātou fai ʼi te ʼaho fuli. Kae ʼaki te aga ʼaē neʼe ina fai, neʼe ina fakahā ai tana mole kei fia felōgoi fakalaumālie mo tona fāmili ʼaē ʼi te moʼoni. Koia ʼe mole kei feala anai ki te fāmili ke natou felōgoi mo ia ki he ʼu manatu fakalaumālie pea mo fai he ʼu gāue fakalaumālie. Ohagē lā, kapau ʼe nofo ʼi te loto fale ia ia ʼaē kua fakamavae, ʼe mole kau anai ia ki te ako fakatohi-tapu fakafāmili. Kae kapau ʼe kei veliveli ʼona taʼu, pea ʼe kei fakamaʼua pē ki te ʼu mātuʼa ke nā akoʼi pea mo fakatonutonuʼi ia ia. Koia, ʼe feala anai ki ni ʼu mātuʼa ʼofa ke nā fakatuʼutuʼu ke fai he ako Tohi-Tapu mo tanā tamasiʼi ʼaia. *—Tāʼaga Lea 6:20-22; 29:17.

 ʼI te tahi age ʼaluʼaga, ko ia ʼaē ʼo te fāmili kua fakamavae ʼe lagi mole kei maʼuli ʼi te loto fale. Logolā ʼe lagi maʼua ke fakatahitahi ʼi ʼihi ʼu lakaga moʼo palalau ki he faʼahi maʼuhiga ʼo te fāmili, kae ʼe tonu ke fakatuʼakoi te ʼu felōgoi ʼaia. Ko te ʼu Kilisitiano agatonu ʼo te fāmili ʼe mole natou kumi anai he ʼu takuʼaki ke tupu ai hanatou fakatahi mo ia ʼaē ʼo te fāmili kua fakamavae kae ʼe mole kei maʼuli ʼi te loto fale. Ko te agatonu ʼaē kiā Sehova pea mo tona kautahi ʼaē ʼe ina uga nātou ke natou lagolago ki te fakatuʼutuʼu Fakatohi-tapu ʼo ʼuhiga mo te fakamavae. ʼE natou taupau tanatou agatonu heʼe natou loto ke fua lelei kiā ia ʼaē neʼe agahala, pea ʼe tokoni anai ki ai ia te fakatonutonuʼi ʼaia. *—Hepeleo 12:11.