KĀPITE 11
“Let Marriage Be Honorable”
“Ke ke fiafia mo tou ʼohoana ʼo tou temi tūpulaga.”—TĀʼAGA LEA 5:18.
1, 2. Ko te fehuʼi fea ʼaē kā tou vakaʼi anai, pea koteā tona tupuʼaga?
KUA ke ʼohoana koa? Kapau kua ke ʼohoana, ʼe ke maʼu ai koa he fiafia? Peʼe ke tau koa mo he ʼu fihifihia fakataumātuʼa? ʼE mole kei ke felōgoi lelei koa mo tou ʼohoana? ʼE ke faʼa kātakiʼi koa tou maʼuli fakataumātuʼa pea ʼe mole kei ke leleiʼia ia te maʼuli ʼaia? Kapau ʼe fēia ia tou maʼuli fakataumātuʼa, ʼe lagi ke lotomamahi ʼi te mole kei mālohi ʼo te noʼo ʼo tokolua ʼofa fakataumātuʼa. ʼI tou ʼuhiga Kilisitiano, ʼe ke loto ke fakakolōlia e tou maʼuli fakataumātuʼa ia Sehova, te ʼAtua ʼaē ʼe ke ʼofa ai. Koia, ko te ʼu meʼa ʼaē ʼe hoko nei kiā koe, ʼe lagi tupu ai hou ʼu tuʼania pea mo mamahi ai tou loto. Logolā ia te faʼahi ʼaia, kae ʼaua naʼa ke manatu ʼe mole kei feala ke toe lelei tou maʼuli fakataumātuʼa.
2 Iā ʼaho nei, ʼe ʼi ai te ʼu taumātuʼa Kilisitiano ki muʼa atu neʼe natou māʼuʼuli fakatahi kae neʼe mole kei lelei tanatou ʼu felōgoi. Kae neʼe natou ʼiloʼi leva te meʼa ʼaē ʼe tonu ke natou fai moʼo fakamālohiʼi ia tanatou felōgoi fakataumātuʼa. ʼE feala mo koutou ke kotou maʼu he fiafia ʼe lahi age ʼi tokotou maʼuli fakataumātuʼa. ʼO feafeaʼi?
KOTOU FAKAOVI KI TE ʼATUA PEA MO TOKOTOU ʼOHOANA
3, 4. He koʼē ʼe felōgoi lelei anai he taumātuʼa mo kapau ʼe nā faiga ke nā fakaovi ki te ʼAtua? Kotou tuku mai he faʼifaʼitaki.
3 ʼE ke felōgoi lelei anai mo tou ʼohoana mo kapau ʼe ke faiga ke ke fakaovi ki te ʼAtua. Koteā tona tupuʼaga? Tou toʼo he faʼifaʼitaki: Kotou fakakaukauʼi age muʼa ia he moʼuga ʼe vanuvanu, ʼi te vaʼe moʼuga ʼe laulahi pea ʼe fakaʼaluʼalu ʼaia ʼo fāveliveli ki tona
tumutumu. Ko te tagata ʼe tuʼu ia ʼi te potu noleto ʼo te vaʼe moʼuga kae tuʼu te fafine ia ʼi te potu sautē ʼo te vaʼe moʼuga ʼaia. Pea ʼi tanā kamata kake toko lua ʼaia ʼi te moʼuga, ʼe nā vaha mamaʼo. Kae ʼe fakahaʼuhaʼu pē pea nā feovi ʼi tanā kake ʼaia ki te tumutumu ʼo te moʼuga. ʼE ke mahino koa ki te ako fakalotofīmālie ʼaē ʼe ke lava tāʼofi mai te fakatā ʼaia?4 Ko tau ʼu faiga ʼaē ke ke tauhi kātoa kiā Sehova, ʼe lava fakatatau ki tau ʼu faiga ʼaē ke ke kake ʼi he moʼuga. ʼUhi heʼe ke ʼofa iā Sehova, kua ke faiga lahi ʼi hona ʼaluʼaga fakatā ke ke kake. Kae kapau ʼe mole kei ke felōgoi lelei mo tou ʼohoana, pea ʼe hagē ʼe kolua tahi kake ʼi tona faʼahi ʼi te moʼuga ʼaia. Kae koteā ʼaē kā hoko mo kapau ʼe hoko atu pē takolua kake ʼi te moʼuga? ʼE lagi ʼi takolua kamata kake ʼaia neʼe kolua vaha mamaʼo. Kae ohagē pē ko takolua faiga lahi ʼaē ke kolua aʼu ki te tumutumu ʼo te moʼuga,
pea ʼe toe fēia pē mo kapau ʼe kolua faiga lahi ke kolua fakaovi ki te ʼAtua, ʼe kolua toe felōgoi lelei age ai anai. Koia, ko te fakaovi ki te ʼAtua ʼe ko te puleʼaki pē ʼaia ke ke felōgoi lelei ai mo tou ʼohoana. Kae ʼe feafeaʼi hau maʼuliʼi ia te tokoni ʼaenī?Kā maʼuliʼi ia te ʼatamai mālama ʼo te Tohi-Tapu, pea ʼe ko he toe mālohi ʼaia ki tokotou maʼuli fakataumātuʼa
5. (a) Koteā he faʼahiga fakatuʼutuʼu ke lava fakaovi ai he taumātuʼa kiā Sehova pea ke nā felōgoi lelei? (b) ʼE feafeaʼi kiā Sehova ia te ʼohoana?
5 Ko he fakatuʼutuʼu ke lelei ai tokolua maʼuli fakataumātuʼa, ʼe tonu kiā koulua taumātuʼa ke kolua mulimuli ki te ʼu tokoni ʼo ʼuhiga mo te ʼohoana, ʼaē ʼe tuku mai ʼi te Folafola ʼa te ʼAtua. (Pesalemo 25:4; Isaia 48:17, 18) Koia tou vakaʼi age muʼa te tokoni lelei neʼe fai e te ʼapositolo ko Paulo. Neʼe ina ʼui fēnei: “Ke fakamaʼuhigaʼi e te hahaʼi fuli te nofo ʼohoana.” (Hepeleo 13:4) Koteā tona fakaʼuhiga? Ko te kupu “fakamaʼuhigaʼi” ʼe fakaʼuhiga ki he meʼa ʼe maʼuhiga. Pea kiā Sehova ʼe fēia ia te ʼohoana, ʼe maʼuhiga kiā ia.
KO TOKOTOU ʼOFA ʼAĒ KIĀ SEHOVA ʼAKI TOKOTOU LOTO KĀTOA ʼAĒ ʼE TONU KE INA UGA KOUTOU
6. ʼI te ʼaluʼaga ʼaē neʼe fai ai e Paulo ia tana tokoni, koteā ʼaē ʼe tou mahino kiai ʼo ʼuhiga mo te nofo ʼohoana, pea he koʼē ʼe maʼuhiga ke manatuʼi ia te faʼahi ʼaia?
6 ʼE mahino ia ʼi tokolua ʼuhiga kaugana ʼa te ʼAtua, ko koe pea mo tou ʼohoana kua kolua ʼiloʼi ia te maʼuhiga ʼo te ʼohoana, tona taputapu. Neʼe ko Sehova totonu ʼaē neʼe ina fakatuʼu ia te ʼohoana. (Mateo 19:4-6) Kapau ʼe kolua tau nei mo he ʼu fihifihia fakataumātuʼa, logolā takolua ʼiloʼi ʼaē ʼe maʼuhiga ia te ʼohoana, kae ʼe lagi mole feʼauga moʼo uga ia koulua ke kolua feʼofaʼaki pea mo fefakaʼapaʼapaʼaki. Koteā ʼaē kā ina uga anai koulua ke kolua fai ia te ʼu faʼahi ʼaia? Kolua fakatokagaʼi fakalelei pe neʼe talanoa feafeaʼi ia Paulo ʼo ʼuhiga mo te fakamaʼuhigaʼi ʼaē ʼo te nofo ʼohoana . Neʼe mole ina ʼui “ ʼe maʼuhiga ia te nofo ʼohoana,” kae neʼe ina ʼui ‘ke fakamaʼuhigaʼi te nofo ʼohoana.’ Neʼe mole fakahā pē e Paulo te manatu ʼaē ʼe maʼuhiga ia te nofo ʼohoana, kae ko he tokoni ʼaē neʼe ina fai. * Ko takotou manatuʼi ia te tokoni ʼaia, ʼe kotou maʼu ai anai he tahi tupuʼaga ke maʼuhiga ai kiā koutou tokotou ʼohoana. He koʼē ʼe tonu ke fēia?
7. (a) Koteā te ʼu fakatotonu ʼi te Tohi-Tapu ʼe tonu ke tou fakahoko, pea koteā tona tupuʼaga? (b) Koteā te ʼu fua lelei ʼe tou maʼu ʼi tatatou fakalogo?
7 Tou vakaʼi age muʼa pe koteā takotou manatu ʼo ʼuhiga mo te tahi ʼu fakatotonu ʼi te Tohi-Tapu, ohagē lā ko te fakatotonu ʼo ʼuhiga mo te fai ʼo ni ʼu tisipulo peʼe ko te fakatotonu ʼaē ke tou fakatahitahi moʼo tauhi kiā Sehova. (Mateo 28:19; Hepeleo 10:24, 25) ʼE moʼoni, ʼi ʼihi temi ʼe feala ke faigataʼa ia te fakahoko ʼo te ʼu fakatotonu ʼaia. Ko te hahaʼi ʼaē ʼe kotou fai fakamafola ki ai, ʼe lagi mole natou fia logo, peʼe kotou gaʼegagaʼe ʼuhi ko takotou gāue fakamālama, ʼo faigataʼa ai hakotou kau ki te ʼu fono. Kae logolā te ʼu faʼahi ʼaia, ʼe kotou haga fakamafola aipē ia te logo ʼo te Puleʼaga pea mo kotou haga kau aipē ki te ʼu fono. ʼE mole he tahi ʼe ina lava tāʼofi ia koutou, māʼiapē lā mo Satana! Koteā tona tupuʼaga? Heʼe ko tokotou ʼofa ʼaē kiā Sehova ʼaki tokotou loto kātoa ʼe ina uga koutou ke kotou fakalogo ki tana ʼu fakatotonu. (1 Soane 5:3) Pea koteā tona ʼu fua lelei? Ko takotou kau ki te gāue fai fakamafola pea mo takotou kau ki te ʼu fono, ʼe kotou maʼu ai he loto ʼe tokalelei pea mo fiafia heʼe kotou ʼiloʼi ʼe kotou fai ia te finegalo ʼo te ʼAtua. Pea ʼaki te ʼu kalitātē ʼaia, ʼe kotou toe maʼu ai he mālohi. (Nehemia 8:10) Koteā te ako ʼe tou tāʼofi ʼi henī?
8, 9. (a) Koteā ʼaē ʼe feala ke ina uga tātou ke tou fakalogo ki te tokoni ʼaē ke fakamaʼuhigaʼi ia te nofo ʼohoana, pea koteā tona tupuʼaga? (b) Ko te ʼu puani e lua fea ʼaē kā tou vakaʼi anai?
8 Ko tokotou ʼofa lahi ki te ʼAtua ʼaē ʼe ina uga koutou ke kotou fakalogo ki te ʼu fakatotonu ʼaē ke kotou fai fakamafola pea mo kau ki te ʼu fono logolā te ʼu faigataʼaʼia. ʼO toe fēia pē, ko tokotou ʼofa ʼaē kiā Sehova kā ina uga anai koutou ke kotou fakalogo ki te tokoni Fakatohi-tapu ʼaē ‘ke kotou fakamaʼuhigaʼi takotou nofo ʼohoana’ tatau aipē peʼe mata faigataʼa. (Hepeleo 13:4; Pesalemo 18:29; Tagata Tānaki 5:4) Tahi ʼaē meʼa, ohagē pē ko takotou maʼu he ʼu tapuakina mai te ʼAtua ʼuhi ko takotou ʼu faiga ʼo kau ki te fai fakamafola pea mo te ʼu fono, ʼo toe fēia pē ʼe tokagaʼi anai e Sehova takotou ʼu faiga ʼaē ke kotou fakamaʼuhigaʼi ia tokotou maʼuli fakataumātuʼa pea mo ina tapuakina anai ia koutou.—1 Tesalonika 1:3; Hepeleo 6:10.
9 ʼE kotou lava fakamaʼuhigaʼi feafeaʼi tokotou maʼuli fakataumātuʼa? ʼE tonu ke kotou tekeʼi te aga ʼaē kā fakatupu kovi anai ki tokotou maʼuli fakataumātuʼa. Tahi ʼaē meʼa, ʼe tonu ke kotou fakahoko te ʼu gāue ʼaē kā ina fakamālohiʼi anai te noʼo ʼo te ʼofa fakataumātuʼa.
KOTOU TEKEʼI TE FAʼAHIGA PALALAU PEA MO TE AGA ʼAĒ ʼE MOLE FAKAMAʼUHIGAʼI IA TE NOFO ʼOHOANA
10, 11. (a) Ko te aga fea ʼaē ʼe tupu ai te mole fakamaʼuhigaʼi ʼo te nofo ʼohoana? (b) Koteā te fehuʼi ʼaē ʼe tonu ke tou vakaʼi mo totatou ʼohoana?
10 Kua hili nei kiai te ʼu taʼu, neʼe ʼui fēnei e te tuagaʼane kua ʼohoana: “Neʼe au faikole kiā Sehova ke ina foaki mai te mālohi ke au faʼa kātaki.” Koteā ʼaē neʼe tonu ke ina kātakiʼi? Neʼe ina fakamahino fēnei: “ ʼE lea kovi mai toku ʼohoana kiā au. Neʼe lagi mole ʼi ai hoku ʼu mataʼi lavea ʼi toku sino, kae ko toku loto ʼaē neʼe lavea ʼi tana ʼu lea kovi tuʼumaʼu. Ohagē lā mokā ina ʼui mai ‘Kua ke liliu ko he toe kavega kiā au! Ko koe ko te meʼa noa!’ ” ʼE lagaʼi e te fafine ʼohoana ʼaenī ia te faʼahi ʼe maʼuhiga ʼaupitō: Te ʼu lea kovi ʼaē ʼe fai ʼi te nofo ʼohoana.
11 ʼI meʼa fakaʼofaʼofa foki mokā ʼe fepalalau koviʼaki he taumātuʼa Kilisitiano, ʼo tupu ai he lavea ʼo tonā loto pea mo faigataʼa ai anai he pulihi ʼo tonā ʼu lotomamahi ʼaia! ʼE hā mai, ʼe mole fakamaʼuhigaʼi e te taumātuʼa ia tanā ʼohoana mo kapau ʼe nā fai ni ʼu palalau kovi. ʼE feafeaʼi tou maʼuli fakataumātuʼa ʼi te faʼahi ʼaia? Ko he puleʼaki ke ke ʼiloʼi ai peʼe feafeaʼi tou maʼuli fakataumātuʼa, ke ke fehuʼi age ʼaki he agavaivai ki tou ʼohoana: “ ʼE malave feafeaʼi ki tou loto ia taku ʼu palalau?” Kapau ʼe fakahā atu e tou ʼohoana ʼe lavea tuʼumaʼu tona loto ʼi tau ʼu palalau, pea ʼe tonu ke ke lotolelei ʼo fetogi ia tau aga ʼaia.—Kalate 5:15; Efesi 4:31.
12. Koteā ʼaē ʼe feala ai ke vaʼiganoa ki te ʼAtua ia te tauhi ʼa he tahi?
12 Kotou manatuʼi, ko takotou faʼahiga fakaʼaogaʼi ʼaē ʼo tokotou ʼalelo ʼi te nofo ʼohoana, ʼe ʼi ai tona fua ki takotou ʼu felōgoi ʼaē mo Sehova. ʼE ʼui fēnei ʼi te Tohi-Tapu: “Kapau ʼe manatu he tahi ʼe ina fai leleiʼi te tauhi, kā mole ina tāʼofi tona ʼalelo, kae ina Sake 1:26) ʼE ʼi ai te pikipikiga ʼo takotou faʼahiga palalau pea mo takotou tauhi. ʼE mole he vaega ʼi te Tohi-Tapu ʼe lagolago ki te manatu ʼaē, ko meʼa fuli ʼe hoko ʼi te loto fale ʼe mole maʼuhiga ki he tahi ʼe tauhi ki te ʼAtua. ʼAua naʼa kotou faihala. ʼE ko he faʼahi ia ʼe maʼuhiga. (1 Petelo 3:7) ʼE lagi ke poto pea mo faʼafai, kae kapau ʼe mamahi tou ʼohoana heʼe ke lea kovi age ki ai, pea ʼe mole ke fakamaʼuhigaʼi anai ia te nofo ʼohoana pea ʼe feala ke vaʼiganoa ki te ʼAtua ia tau tauhi.
haga kākāʼi tona loto, ko te tauhi ʼa te tagata ʼaia ʼe ʼalu noa.” (13. ʼE lava feafeaʼi ki he tahi kua ʼohoana ke ina fakalotomamahiʼi ia tona ʼohoana?
13 ʼE toe ʼaoga foki ke tōkakaga te taumātuʼa naʼa nā lotomamahi ʼaki he tahi age ʼu aga. Tou vakaʼi te ʼu faʼifaʼitaki ʼaenī e lua: Ko he faʼē ʼe ina taupau tokotahi tana fānau pea ʼe fai telefoni tuʼumaʼu ki he tagata Kilisitiano kua ʼohoana ʼo kole tokoni ki ai, pea ʼe nā fai palalau fualoa; peʼe ko he tagata Kilisitiano selipatea ʼe fai fakamafola fualoa ʼi te vāhaʼa fuli mo he fafine Kilisitiano kua ʼohoana. ʼI te ʼu faʼifaʼitaki ʼaenī, ʼe lagi ko nāua ʼaē kua ʼohoana ʼe nā fia foaki moʼoni ia he tokoni; kae ʼe malave feafeaʼi tanā aga ki te loto ʼo tonā ʼu ʼohoana? Ko te fafine Kilisitiano kua ʼohoana neʼe hoko ki ai ia te ʼaluʼaga fēia, neʼe ina ʼui fēnei: “Neʼe mamahi toku loto ʼi taku sio ʼaē ʼe nofo fualoa toku ʼohoana pea mo tokaga lahi ki he tahi fafine Kilisitiano ʼo te kōkelekāsio. ʼE hagē ia neʼe meʼa noaʼi au.”
14. (a) Koteā te maʼua fakataumātuʼa ʼe fakahā lelei mai iā Senesi 2:24? (b) Ko te fehuʼi fea ʼaē ʼe tonu ke tou fai kiā tātou takitokotahi?
14 ʼE mole tou punamaʼuli ki te lotomamahi ʼa te fafine ʼohoana ʼaia pea mo ʼihi atu ʼe hoko kiā nātou ia te ʼaluʼaga ʼaia ʼi tonatou maʼuli fakataumātuʼa. ʼE mole mulimuli tonatou ʼohoana ki te tokoni maʼuhiga ʼaē neʼe fai e te ʼAtua ʼo ʼuhiga mo te ʼohoana: “ ʼE mavae anai te tagata mai tana tamai pea mo tana faʼē, pea ʼe tonu anai ke pipiki ki tona ʼohoana.” (Senesi 2:24) ʼE moʼoni, ko nātou ʼaē kua ʼohoana ʼe kei natou fakaʼapaʼapa ki tanatou ʼu mātuʼa, kae ʼi te fakatuʼutuʼu ʼa te ʼAtua ko tonatou maʼua tāfito ke natou tōkakaga ki ʼonatou ʼohoana. ʼO toe fēia pē, ʼe ʼoʼofa te kau Kilisitiano ki tonatou ʼu tehina Kilisitiano, kae ko tonatou maʼua ʼuluaki ke natou tōkakaga ki ʼonatou ʼohoana. Koia kā lahi fau te temi ʼaē ʼe nofo ai he Kilisitiano kua ʼohoana mo he tahi kehe ʼo te kōkelekāsio peʼe kua nā aga fakakaumeʼa fau, tāfito mokā ko he tehina ʼohoana mo he tuagaʼane peʼe ko he tuagaʼane ʼohoana mo he tehina, ʼe feala ke fakatupu ai he ʼu faigataʼaʼia ʼi te noʼo ʼo te ʼofa fakataumātuʼa. ʼE feala koa ke hoko he fihifihia ʼi tou maʼuli fakataumātuʼa ʼuhi ko te faʼahi ʼaia? Ke ke fai ia te fehuʼi ʼaenī kiā koe totonu: ‘ ʼE au foaki moʼoni koa ki toku ʼohoana ia te temi ʼaē ʼe tonu ke au foaki ki ai, ʼo fēia mo te tokaga pea mo te ʼofa ʼaē ʼe tonu ke au fakahā ki ai?’
15. Iā Mateo 5:28, he koʼē ʼe mole tonu ki he Kilisitiano ʼohoana ke lahi fau hana tokaga ki he tahi ʼe mole ko hona ʼohoana?
15 Tahi ʼaē meʼa, ko he Kilisitiano ʼohoana ʼe lahi fau hana tokaga ki he tahi ʼe mole ko hona ʼohoana, ʼe mole aga fakapotopoto ia heʼe feala ai ke fua kovi ki tona maʼuli fakataumātuʼa. Kae meʼa fakaʼofaʼofa, heʼe ko ʼihi Kilisitiano ʼohoana neʼe natou kamata manako kiā nātou ʼaē neʼe natou aga fakakaumeʼa fau mo nātou. (Mateo 5:28) Pea ko te manako ʼaia neʼe iku ai ki he aga ʼe mole ina fakamaʼuhigaʼi ai te nofo ʼohoana. Tou vakaʼi pe koteā ʼaē neʼe ʼui e te ʼapositolo ko Paulo ʼo ʼuhiga mo te faʼahi ʼaia.
“KE ʼAUA NAʼA ʼULIHI TE MOEʼAGA FAKATAUMĀTUʼA”
16. Koteā te fakatotonu ʼe foaki e Paulo ʼo ʼuhiga mo te ʼohoana?
16 ʼI te ʼosi fai pē e Paulo ia te tokoni ʼaē ‘ke fakamaʼuhigaʼi te nofo ʼohoana,’ neʼe ina fai ia te fakatokaga ʼaenī: “Ke ʼaua naʼa ʼulihi te moeʼaga fakataumātuʼa, heʼe fakamāuʼi anai e te ʼAtua te kau fai folonikāsio pea mo te kau tono.” (Hepeleo 13:4) Neʼe fakaʼaogaʼi e Paulo te kupuʼi palalau “moeʼaga fakataumātuʼa” ʼo ʼuhiga mo te ʼu felāveʼi fakasino. Ko te ʼu felāveʼi fakasino ʼaia ʼe mole ‘ ʼuli’ pea ʼe maʼa, mo kapau ʼe fai pē ʼi te maʼuli fakataumātuʼa. Koia, ʼe mulimuli te kau Kilisitiano ki te ʼu palalau fakaʼatua ʼaenī: “Ke ke fiafia mo tou ʼohoana ʼo tou temi tūpulaga.”—Tāʼaga Lea 5:18.
17. (a) He koʼē ʼe mole tonu ki te manatu ʼa te mālama ʼo ʼuhiga mo te tono ke ina fetogi ia te manatu ʼa te kau Kilisitiano ʼo ʼuhiga mo te aga ʼaia? (b) ʼE feafeaʼi hatatou muliʼi ia te faʼifaʼitaki ʼa Sopo?
17 Ko ʼaē ʼe ina fai ni ʼu felāveʼi fakasino mo he tahi ʼe mole ko hona ʼohoana ʼe mole fakaʼapaʼapa ia ki te ʼu lao ʼa te ʼAtua ʼo ʼuhiga mo te aga ʼaē ʼe tonu ke fai. Iā ʼaho nei maʼa te hahaʼi tokolahi, ko te tono ʼe ko he aga ia kua fai e te hahaʼi ʼohoana fuli pē. Kae ko te manatu ʼa te hahaʼi ʼo ʼuhiga mo te tono, ʼe mole tonu ia ke fetogi ai te manatu ʼa te kau Kilisitiano ʼo ʼuhiga mo te tono. ʼE mahino ki te kau Kilisitiano, ʼe mole ko te tagata kae ko te ʼAtua ʼaē kā ina “fakamāuʼi anai . . . te kau fai folonikāsio pea mo te kau tono.” (Hepeleo 10:31; 12:29) Koia, ko te kau Kilisitiano moʼoni ʼe natou mulimuli ki te manatu ʼa Sehova ʼo ʼuhiga mo te aga ʼaia. (Loma 12:9) Tou manatuʼi te palalau ʼaenī neʼe fai e te pāteliaka ko Sopo: “Neʼe au fai te fuakava mo toku ʼu mata.” (Sopo 31:1) Koia ko te kau Kilisitiano moʼoni, ʼe natou tekeʼi anai te aga ʼaē ʼe feala ke iku ai ki te tono, ʼo natou tōkakaga naʼa natou sioʼi ʼaki he holi kovi ia he tahi ʼe mole ko tonatou ʼohoana.—Vakaʼi ia Te Tahi ʼu Fakamahino, ʼi te ʼu pāsina 219 ki te 221.
18. (a) ʼE feafeaʼi kiā mata ʼo Sehova ia te kovi ʼaē ʼo te tono? (b) Ko te faʼahi fea ʼaē ʼe tatau ai ia te tono pea mo te tauhi tamapua?
18 ʼE feafeaʼi kiā mata ʼo Sehova ia te kovi ʼaē ʼo te tono? ʼE tokoni mai ia te Lao ʼa Moisese ke tou mahino ki te manatu ʼa Sehova ʼo ʼuhiga mo te faʼahi ʼaia. ʼI te temi ʼo te kau Iselaele, ko te tono pea mo te tauhi tamapua neʼe kau ki te ʼu agahala ʼaē neʼe fakatūʼā ki te mate. (Levitike 20:2, 10) ʼE kotou mahino koa pe ko te faʼahi fea ʼaē ʼe tatau ai ia te tauhi tamapua pea mo te tono? Ko he Iselaele neʼe tauhi tamapua neʼe ina maumauʼi te fuakava ʼaē neʼe ina fai mo Sehova. ʼO toe fēia pē, ko he Iselaele neʼe tono neʼe ina maumauʼi te fuakava ʼaē neʼe ina fai mo tona ʼohoana. Ko ʼaē neʼe tauhi tamapua pea mo ʼaē neʼe tono, neʼe nā aga fakakākā lualua. (Ekesote 19:5, 6; Teutalonome 5:9; Malakia 2:14) Koia neʼe nā agahala iā muʼa ʼo Sehova, te ʼAtua agatonu ʼaē ʼe tāu mo te falala.—Pesalemo 33:4.
19. Koteā ʼaē ʼe feala ke ina fakamālohiʼi ia te fakatotonu ʼa he tahi ke ina tekeʼi ia te tono, pea koteā tona tupuʼaga?
19 ʼE mahino ia, ʼe mole kei fakamaʼua ki te kau Kilisitiano ke natou mulimuli ki te Lao ʼa Moisese. Kae kā tou manatuʼi te temi ʼo te kau Iselaele, ko te tono neʼe ko he agahala mamafa, pea ʼe lagi mālohi ai te fakatotonu ʼa te kau Kilisitiano ke mole natou fai ia te taʼi aga ʼaia. Koteā tona tupuʼaga? Tou vakaʼi ia te faʼifaʼitaki ʼaenī: ʼE kotou hū anai koa ki he ʼēkelesia, ʼo tuʼutuli pea mo faikole iā muʼa ʼo he fakatātā? ʼE kotou tali anai: ‘Kailoa ia!’ Kae kapau ʼe foaki atu he toe falā lahi, ʼe kotou fai anai koa ia te faʼahi ʼaia? ʼE kotou tali anai: ‘ ʼOho ia, ʼe mole feala tuʼa tahi ke au fai he meʼa fēia!’ ʼE mahino ia, ʼe mole feala ke hake ʼi te ʼatamai ʼo he Kilisitiano moʼoni ke ina fai he aga fakakākā kiā Sehova ʼaki hana tauhi ki he tamapua. ʼO toe fēia pē, ʼe mole loto e te kau Kilisitiano ke natou kākāʼi tonatou ʼAtua, ia Sehova, pea mo tonatou ʼohoana ʼaki hanatou tono mo he tahi kehe, tatau aipē peʼe Pesalemo 51:1, 4; Kolose 3:5) ʼE mole tou fia fai anai he aga ʼe fiafia ai anai ia Satana kae moamoagaʼi ia Sehova pea mo te fakatuʼutuʼu taputapu ʼaē neʼe ina fai ko te ʼohoana.
fakaneke nātou ke natou tono. (ʼE KOTOU LAVA FAKAMĀLOHIʼI FEAFEAʼI IA TE NOʼO ʼO TE ʼOFA FAKATAUMĀTUʼA?
20. Koteā ʼaē neʼe hoko ki ʼihi maʼuli fakataumātuʼa? Kotou tuku mai he faʼifaʼitaki.
20 ʼO mole gata pē ki takotou tekeʼi ʼaē ʼo te aga ʼe mole ina fakamaʼuhigaʼi te nofo ʼohoana, koteā te ʼu puleʼaki ʼe feala ke kotou fai moʼo toe fakatuputupu ia takotou fakaʼapaʼapa ki tokotou ʼohoana? Moʼo tali ki te fehuʼi ʼaenī, kotou fakatā ia te nofo ʼohoana ki he ʼapi. ʼOsi ʼaia, kotou fakatā ki he ʼu meʼa fakateuteu fale te ʼu palalau lelei, mo te ʼu agalelei, pea mo te ʼu fefakaʼapaʼapaʼaki ʼa te taumātuʼa. Kapau ʼe kolua felōgoi leleiʼaki, pea kua hagē tokolua maʼuli fakataumātuʼa ko he ʼapi neʼe teuteuʼi ʼaki ni ʼu meʼa matalelei ke liliu ai te loto fale ʼo matalelei pea mo fakatupu fiafia ki te nofo ʼaē ʼi ai. Kapau ʼe mole mālohi ia te ʼofa ʼaē ʼe kolua femaʼuʼaki, pea ohagē pē ko he ʼapi kua tuʼu gaʼasi heʼe kua puli māmālie tona ʼu meʼa fakateuteu, ʼe toe fēia mo tokolua maʼuli fakataumātuʼa kua puli ai te fiafia. Mai tona ʼaluʼaga ʼaē ʼe kotou fia fakalogo ki te fakatotonu ʼa te ʼAtua ‘ke fakamaʼuhigaʼi te nofo ʼohoana’ ʼe kotou loto anai ke lelei age tokotou maʼuli fakataumātuʼa. Kapau kua maumau ia he meʼa ʼe fakaʼeteʼete mo maʼuhiga, pea ʼe tonu ke toe faʼu peʼe ke fakafoʼou. Koteā ʼaē ʼe tonu ke kotou fai? ʼE ʼui fēnei ʼi te Folafola ʼa te ʼAtua: “ ʼE laga anai he loto fale ʼaki te poto, pea ʼe tuʼu mālohi anai ʼaki te fakasiosio tonu. Pea ʼaki te ʼatamai mālama ʼe fakafonu ai anai te ʼu kogafale ʼaki te ʼu meʼa maʼuhiga kehekehe pea mo fakafiafia.” (Tāʼaga Lea 24:3, 4) Tou vakaʼi pe lava fakaʼaogaʼi feafeaʼi ia te ʼu palalau ʼaia ki te nofo ʼohoana.
21. Koteā ʼaē ʼe feala ke tou fai ke toe fakahaʼuhaʼu ʼo mālohi tatatou nofo ʼohoana? (Vakaʼi mo te pāsina 131, ia te fakamatala ʼaē ʼe ʼātakai.)
21 Ko “te ʼu meʼa maʼuhiga” ʼaē ʼe natou fakafonu ia he loto fale ʼe fiafia, ʼe ko te ʼu kalitātē ohagē ko te ʼofa moʼoni, te manavasiʼi fakaʼatua, pea mo he tui mālohi. (Tāʼaga Lea 15:16, 17; 1 Petelo 1:7) ʼAki te ʼu kalitātē ʼaia, ʼe maʼu ai he nofo ʼohoana ʼe mālohi. Kae neʼe kotou fakatokagaʼi te tāʼaga lea ʼaē ʼe tuʼu ʼi te palakalafe 20, peʼe feafeaʼi te fakafonu ʼo te ʼu kogafale ʼaki te ʼu meʼa maʼuhiga? “ ʼAki te ʼatamai mālama.” ʼEī, kā maʼuliʼi ia te ʼatamai mālama ʼo te Tohi-Tapu pea ʼe ko he toe mālohi ʼaia moʼo fetogi te fakakaukau ʼa te hahaʼi pea mo uga nātou ke natou toe fakamālohi tanatou feʼofaʼaki. (Loma 12:2; Filipe 1:9) Koia ʼi takolua toʼo ʼaē he temi ke kolua fai palalau ai ki he vaega Tohi-Tapu, ohagē lā ko te koga tohi ʼo te ʼaho, peʼe ko he ʼalatike Fakatohi-tapu ʼo Te Tule Leʼo peʼe ko te Réveillez-vous ! ʼo ʼuhiga mo te nofo ʼohoana, ʼe hagē pē ʼe kolua vakavakaʼi ia he ʼu meʼa fakateuteu moʼo fakamataleleiʼi tokolua ʼapi. Kapau ko tokolua ʼofa ʼaē kiā Sehova ʼe ina uga koulua ke kolua maʼuliʼi ʼi tokolua maʼuli fakataumātuʼa ia te tokoni ʼaē neʼe kolua vakaʼi fakatahi, pea ʼe hagē pē ʼe kolua teuteuʼi “te ʼu kogafale” ʼaki te ʼu meʼa matalelei. Pea ʼe kolua toe maʼu pē anai tokolua maʼuli lelei pea mo fiafia ʼaē neʼe kolua maʼu ki muʼa atu.
22. Koteā te fiafia ʼe tou lava maʼu mo kapau ʼe tou faiga ke tou fakahoko totatou maʼua moʼo fakamālohi tatatou nofo ʼohoana?
22 ʼE mahino ia, ke toe mālohi ia te nofo ʼohoana ʼe ʼaoga anai kiai he temi loaloaga pea mo he ʼu faiga lahi. Kae kapau ʼe kotou faiga ke kotou fakahoko tokotou maʼua ʼo ʼuhiga mo te faʼahi ʼaia, ʼe kotou maʼu anai ia te fiafia lahi ʼi takotou ʼiloʼi ʼaē ʼe kotou fakalogo ki te fakatotonu ʼaenī ʼa te Tohi-Tapu: “ ʼO ʼuhiga mo takotou fefakaʼapaʼapaʼaki, koutou tuku he faʼifaʼitaki.” (Loma 12:10; Pesalemo 147:11) Kae ko te meʼa ʼaē ʼe maʼuhiga age, ko takotou faiga mālohi ʼaē ke kotou fakamaʼuhigaʼi ia tokotou maʼuli fakataumātuʼa, ʼe ina taupau anai koutou ʼi te ʼofa ʼo te ʼAtua.
^ pal. 6 ʼI te ʼaluʼaga ʼaē neʼe fai ai e Paulo ia tana tokoni ʼo ʼuhiga mo te nofo ʼohoana, ʼe kau ki te tahi ʼu tokoni neʼe ina fai.—Hepeleo 13:1-5.