KĀPITE 1
“Koʼenī Te Fakaʼuhiga ʼo Te ʼOfa ʼAē Ki Te ʼAtua”
“Koʼenī te fakaʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole fakamafasia ia.”—1 SOANE 5:3.
1, 2. Koteā ʼaē ʼe ina uga koutou ke kotou ʼofa kiā Sehova ʼAtua?
ʼE KOTOU ʼofa koa ki te ʼAtua? Kapau kua kotou foaki ia tokotou maʼuli kiā Sehova ʼAtua, pea ʼe mahino ia ʼe kotou ʼio anai ki te fehuʼi ʼaia, pea ʼe ko he faʼahi ʼe lelei! ʼE tonu ke tou ʼoʼofa fuli kiā Sehova, he neʼe ko ia ʼaē neʼe ʼofa kiā tātou. ʼE ʼui fēnei ʼi te Tohi-Tapu: “Pea kiā tātou, ʼe tou ʼofa, he neʼe ko [Sehova] ʼaē neʼe ʼuluaki ʼofa kiā tātou.”—1 Soane 4:19.
2 Neʼe ko Sehova ʼaē neʼe ina ʼuluaki fai ia te fakatuʼutuʼu moʼo fakahā mai ia tona ʼofa ʼaē kiā tātou. Neʼe ina foaki mai he kele matalelei ke tou nonofo ai. ʼE tokaga ia ki totatou maʼuli fakasino. (Mateo 5:43-48) Kae ʼe tokaga tāfito ki totatou maʼuli fakalaumālie. ʼE ina foaki mai ia tana Folafola, te Tohi-Tapu. Pea ʼe ina fakaafe tātou ke tou faikole age kiā te ia, ʼo tou falala ʼe fagono mai pea mo ina foaki mai anai tona laumālie māʼoniʼoni ke tokoni mai kiā tātou. (Pesalemo 65:2; Luka 11:13) Kae ko te faʼahi ʼaē ʼe maʼuhiga age, he neʼe ina fekauʼi mai ia tona ʼAlo ʼofaina ke haʼu ʼo Totogi tātou, ke feala ai hatatou ʼāteaina mai te agahala pea mo te mate. ʼE ko he toe ʼofa lahi neʼe fakahā mai e Sehova kiā tātou!—Soane 3:16; Loma 5:8.
3. (a) Ke tou nonofo ʼi te ʼofa ʼo te ʼAtua, koteā ʼaē ʼe fakamaʼua mai ke tou fai? (b) Ko te fehuʼi maʼuhiga fea ʼaē ʼe tonu ke tou vakaʼi, pea ʼe tou maʼu ʼifea tona tali?
3 ʼE loto ia Sehova ke fua lelei kiā tātou ia tona ʼofa ki he ʼu Suta 21) Ko te kupuʼi palalau “kotou haga nonofo” ʼe fakaʼuhiga ki te nofo ʼaē ʼi te ʼofa ʼo te ʼAtua, ʼe fakamaʼua mai ke tou fai he ʼu gāue. ʼE tonu ke tou tali ki tona ʼofa ʼaki he ʼu gāue. Koia ʼe tou vakaʼi anai ia te fehuʼi maʼuhiga ʼaenī kiā tātou takitokotahi: “ ʼE au lava fakahā feafeaʼi ia toku ʼofa ʼaē ki te ʼAtua?” ʼE tou maʼu tona tali ʼi te ʼu palalau ʼaenī neʼe fai e te ʼapositolo ko Soane ʼaki te takitaki ʼa te ʼAtua: “Koʼenī te fakaʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole fakamafasia ia.” (1 Soane 5:3) ʼE tonu ke tou mahino fakalelei ki te fakaʼuhiga ʼo te ʼu palalau ʼaia, heʼe tou fia fakahā ki totatou ʼAtua ia totatou ʼofa lahi ʼaē kiā te ia.
temi ʼe heʼegata. Kae ʼe fakalogo te faʼahi ʼaia kiā tātou, peʼe tou loto kiai peʼe kailoa. ʼE fakalotomālohiʼi fēnei tātou ʼi te Folafola ʼa te ʼAtua: “Kotou haga nonofo ʼi te ʼofa ʼo te ʼAtua . . . [ʼaki te ʼamanaki ʼaē] ki te maʼuli heʼegata.” (“KOʼENĪ TE FAKAʼUHIGA ʼO TE ʼOFA ʼAĒ KI TE ʼATUA”
4, 5. Kotou fakamatala pe neʼe kamata tuputupu feafeaʼi ʼi tokotou loto ia tokotou ʼofa ʼaē kiā Sehova.
4 “Te ʼofa ʼaē ki te ʼAtua”—koteā ʼaē neʼe manatu kiai te ʼapositolo ko Soane ʼi tana tohi ia te ʼu palalau ʼaia? ʼE fakaʼuhiga tana ʼu palalau ki te loloto ʼaē ʼo totatou ʼofa takitokotahi ki te ʼAtua. ʼE kei kotou manatuʼi koa ia te temi ʼaē neʼe kamata tuputupu ai ʼi tokotou loto ia tokotou ʼofa ʼaē kiā Sehova?
5 Kotou fakakaukauʼi age muʼa te temi ʼaē neʼe kotou kamata logo ai ki te moʼoni ʼo ʼuhiga mo Sehova pea mo tana ʼu fakatuʼutuʼu pea mo kotou kamata maʼu ai ia te tui. Neʼe mahino ai kiā koutou, logopē takotou tutupu ake ʼaē ʼi te agahala pea mo mamaʼo mai te ʼAtua, kae ko Sehova ʼaki ia Sesu neʼe ina fakafealagia ke kotou maʼu ia te maʼuli haohaoa ʼaē neʼe pulihi e Atama pea mo te maʼuli heʼegata. (Mateo 20:28; Loma 5:12, 18) Neʼe kotou kamata mahino ai ki te maʼuhiga ʼaupitō ʼo te sākilifisio ʼaē neʼe fai e Sehova ʼi tana fekauʼi mai ia tona ʼAlo ʼofaina ke haʼu ʼo mate maʼa koutou. Neʼe malave ki tokotou loto ia tana fakatuʼutuʼu ʼaia, pea neʼe kotou kamata ʼofa ai ki te ʼAtua ʼaē neʼe ina fakahā ia te toe ʼofa lahi ʼaia kiā koutou.—1 Soane 4:9, 10.
6. ʼE feafeaʼi ia te fakahā ʼo te ʼofa moʼoni, pea koteā ʼaē neʼe kotou fai ʼuhi ko tokotou ʼofa ʼaē ki te ʼAtua?
6 Kae ko te ʼofa ʼaia neʼe kotou logoʼi ʼi tokotou loto, neʼe ko te kamataʼaga pē ʼaia ʼo tokotou ʼofa moʼoni ʼaē kiā Sehova. ʼE mole ko he meʼa pē ia ʼe kita logoʼi ʼi tokita loto. Ko te ʼofa moʼoni ʼaē ki te ʼAtua ʼe mole gata ʼaki pē tata ʼui ʼaē: “ ʼE au ʼofa ia Sehova.” Ohagē ko te tui, ko te ʼofa moʼoni ʼe ina uga tātou ke tou fai ni ʼu gāue. (Sake 2:26) Ohagē lā, ʼe hā ia totatou ʼofa ʼi te ʼu gāue ʼaē ʼe tou fai moʼo fakafiafia ia ia ʼaē ʼe tou ʼofa ai. Koia, ʼi te temi ʼaē neʼe kotou logoʼi ai ʼi tokotou loto ia te ʼofa ʼaē kiā Sehova, neʼe kotou loto ai ke kotou maʼuli ʼi hona ʼaluʼaga ʼe fiafia ai takotou Tamai ʼaē ʼe ʼi selō. Kua kotou papitema koa? Kapau kua kotou ʼosi papitema, pea neʼe hoko te faʼahi maʼuhiga ʼaia ʼi tokotou maʼuli he neʼe tupu ko tokotou ʼofa lahi pea mo takotou agatonu ʼaē kiā Sehova. Neʼe kotou foaki tokotou maʼuli kiā Sehova moʼo fai ia tona finegalo, pea neʼe kotou fakahā ia te faʼahi ʼaia ʼaki te papitema. (Loma 14:7, 8) Moʼo fakahoko ia te fakapapau ʼaē neʼe kotou fai takitokotahi kiā Sehova, ʼe tonu ke kotou mulimuli ki te ʼu palalau ʼaē neʼe fai e te ʼapositolo ko Soane ki muli age.
“KE TOU MAʼULIʼI TANA ʼU FAKATOTONU”
7. Koteā ʼihi ʼu fakatotonu ʼa te ʼAtua, pea kapau ʼe tou fia maʼuliʼi ia te ʼu fakatotonu ʼaia, koteā ʼaē ʼe tonu ke tou fai?
7 ʼE fakamahino mai e Soane ia te fakaʼuhiga ʼaē ʼo te ʼofa ki te ʼAtua: “Ke tou maʼuliʼi tana ʼu fakatotonu.” Koteā te ʼu fakatotonu ʼa te ʼAtua? ʼI tana Folafola, ia te Tohi-Tapu, ʼe foaki mai e Sehova ia te ʼu tuʼuga fakatotonu kua natou hinoʼi fakahagatonu mai te ʼu aga ʼaē ke mole tou fai. Ohagē lā, ʼe ina tapuʼi ia te ʼu aga ohagē ko te ʼinu kava fakavale, te fai folonikāsio, te tauhi tamapua, te kaihaʼa, pea mo te loi. (1 Kolonito 5:11; 6:18; 10:14; Efesi 4:28; Kolose 3:9) Kapau ʼe tou fia maʼuliʼi ia te ʼu fakatotonu ʼa te ʼAtua pea ʼe tonu ke maʼuliʼi te ʼu lēkula ʼo te Tohi-Tapu ʼo ʼuhiga mo te aga ʼaē ʼe tonu ke fai.
8, 9. Māʼiapē lā mo te ʼu ʼaluʼaga ʼaē ʼe mole ʼi ai he lao kiai ʼi te Tohi-Tapu, kae ʼe tou lava ʼiloʼi feafeaʼi te aga ʼaē ʼe leleiʼia e Sehova? Kotou tuku mai he faʼifaʼitaki.
8 Kae ke leleiʼia tātou e Sehova, ʼe mole tonu pē ke tou fakalogo ki he ʼu lao kua natou hinoʼi fakahagatonu mai te aga ʼaē ke mole tou fai. ʼE mole fakakinauʼi mai e Sehova ni ʼu lao ke tou muliʼi ʼi te ʼu faʼahi fuli pē ʼo totatou maʼuli. Koia ʼi te ʼaho fuli pē, ʼe feala ke tou felāveʼi ai mo ni ʼu ʼaluʼaga ʼe mole ʼi ai he lao ʼi te Tohi-Tapu ki te ʼu ʼaluʼaga ʼaia. Koia, ʼe tou lava ʼiloʼi feafeaʼi te aga ʼaē ʼe leleiʼia anai e Sehova? ʼE tou maʼu ʼi te Tohi-Tapu ia te ʼu pelesepeto lelei ʼo ʼuhiga mo te manatu ʼa te ʼAtua ki he meʼa. ʼI tatatou ako ia te Tohi-Tapu, ʼe tou ʼiloʼi ai te meʼa ʼaē ʼe leleiʼia e Sehova pea mo te meʼa ʼaē ʼe fehiʼa kiai. (Pesalemo 97:10; Tāʼaga Lea 6:16-19) ʼE tou ʼiloʼi ai te ʼu aga pea mo te ʼu gāue ʼaē ʼe ina leleiʼia. Kapau ʼe lahi tatatou mahino ki te ʼulugaaga ʼo Sehova pea mo tana ʼu fakatotonu, pea ʼe toe lahi age anai mo tatatou tuku ʼaē ke takitaki e tana manatu te ʼu tonu pea mo te ʼu gāue ʼaē ʼe tou fai. Koia, māʼiapē lā mo te ʼu ʼaluʼaga ʼaē ʼe mole ʼi ai he lao kiai, kae ʼi te agamāhani ʼe feala pē hatatou ʼiloʼi “peʼe koteā te finegalo ʼo Sehova.”—Efesi 5:17.
9 Ohagē lā, ʼe mole tou maʼu ʼi te Tohi-Tapu he lao ʼe ina ʼui mai ke mole tou sioʼi te ʼu ʼata ʼaē ʼe fakahā ai te agamālohi peʼe ko te ʼu aga heʼeʼaoga. Kae ʼe ʼaoga moʼoni koa ke tohi he lao ʼo ʼuhiga mo te sioʼi ʼo te ʼu taʼi ʼata ʼaia? ʼE tou ʼiloʼi te manatu ʼa Sehova ʼo ʼuhiga mo te ʼu faʼahi ʼaia. ʼE ʼui fakalelei mai ʼi tana Folafola: “Ko ʼaē ʼe manako ki te agamālohi, ʼe mahino ia, ʼe fehiʼa ki ai [te] nefesi [ʼo Sehova].” (Pesalemo 11:5) ʼE ina toe ʼui fēnei mai: “[ʼE] fakamāuʼi anai e te ʼAtua te kau fai folonikāsio pea mo te kau tono.” (Hepeleo 13:4) Kapau ʼe tou metitāsioʼi te ʼu palalau ʼaia ʼe haʼu mai te ʼAtua, pea ʼe tou mahino lelei aipē peʼe koteā ia te finegalo ʼo Sehova. Koia, ʼe mole tou sioʼi ai anai ni ʼu ʼata ʼe fakahā ai ni ʼu aga ʼe fehiʼa kiai totatou ʼAtua. ʼE tou ʼiloʼi ʼe fiafia ia Sehova mokā ʼe tou tekeʼi ia te aga heʼeʼaoga ʼaē ʼe faigaʼi e te mālamanei ke meʼa noaʼi, ʼo ʼui ʼe mole ʼi ai anai hona fua kovi kiā nātou ʼaē ʼe natou sioʼi te ʼu taʼi ʼata ʼaia. *
10, 11. He koʼē ʼe tonu ke tou filifili ke tou fakalogo kiā Sehova, pea ko te faʼahiga fakalogo feafeaʼi ʼaē ʼe tonu ke tou fakahā kiā te ia?
10 Koteā te tupuʼaga tāfito ʼo tatatou fakalogo ki te ʼu fakatotonu ʼa te ʼAtua? He koʼē ʼi te ʼaho fuli pē ʼe tou fia maʼuliʼi ai te manatu ʼa te ʼAtua? ʼE mole tou filifili ia te taʼi faʼahiga maʼuli ʼaia ke mole fakatūʼā tātou peʼe ke mole tou utu ia te ʼu fua kovi ʼaē ʼe hoko kiā nātou ʼaē ʼe natou meʼa noaʼi ia te finegalo ʼo te ʼAtua. (Kalate 6:7) Kae ʼe tou mahino ko te fakalogo ʼaē kiā Sehova ʼe ko he faigamālie lelei ʼaia moʼo fakahā ia totatou ʼofa ʼaē kiā te ia. Ohagē pē ko te loto ʼa he tamasiʼi ke leleiʼia ia ia e tana tamai, ʼe tou loto mo tātou ke leleiʼia tātou e Sehova. (Pesalemo 5:12) Ko ia tatatou Tamai, pea ʼe tou ʼofa ia te ia. ʼE mole he tahi age faʼahi ʼe tou fiafia lahi ai ʼi tatatou ʼiloʼi ʼaē ko totatou maʼuli “ ʼe ina maʼu te tapuakina ʼa Sehova.”—Tāʼaga Lea 12:2.
11 Koia, ko tatatou fakalogo ʼe mole fakakinauʼi, peʼe vaelua, peʼe fai ʼi te temi ʼaē ʼe tou loto kiai. * ʼE mole tonu ke tou filifili te ʼu fakatotonu ʼaē kā tou fakalogo anai kiai, ʼo tou fakalogo pē anai mokā ʼe mole fakafeagai ki te meʼa ʼaē ʼe kita loto kiai peʼe mokā mole faigataʼa fau. ʼE mole fēia anai tatatou fakalogo, kae ʼe tou ‘fakalogo anai mo he loto kātoa.’ (Loma 6:17) ʼE tou manatu ohagē ko te tagata fai pesalemo ʼi te Tohi-Tapu, ʼaē neʼe ina tohi fēnei: “ ʼE au pipiki anai ki tau ʼu fakatotonu ʼaē neʼe au manako kiai.” (Pesalemo 119:47) ʼEī, ʼe tou leleiʼia te fakalogo ʼaē kiā Sehova. ʼE tou fakamoʼoni ʼe tāu mo ia, pea ʼe tonu ke tou fakalogo kātoa kiā te ia. (Teutalonome 12:32) ʼE tou loto ke fai e Sehova ʼo ʼuhiga mo tātou ia tana ʼu palalau ʼaē neʼe ina fai ʼo ʼuhiga mo Noe ʼi tana Folafola. ʼO ʼuhiga mo te pāteliaka agatonu ʼaia, ʼaē neʼe ina fakahā tona ʼofa ki te ʼAtua ʼo fakalogo lolotoga ni ʼu taʼu, ʼe ʼui fēnei ʼi te Tohi-Tapu: “Neʼe fai e Noe ia meʼa fuli, ʼo mulimuli pē ki te ʼu meʼa ʼaē neʼe fakatotonuʼi age e te ʼAtua. Pea neʼe ina fai fēia ʼo mulimuli kātoa pē kiai.”—Senesi 6:22.
12. Ko te temi fea ʼaē ʼe fiafia ai te loto ʼo Sehova mokā tou fakalogo?
12 ʼE feafeaʼi ia Sehova mokā ʼe tou fia fakalogo age kiā te ia? ʼE ʼui ʼi tana Folafola ʼe tou “fakafiafia [ai tona] loto.” (Tāʼaga Lea 27:11) Ko tatatou fakalogo ʼe ina fakafiafia moʼoni koa ia te loto ʼo te Tuʼi ʼAliki ʼo te ʼatulaulau? ʼEī, pea ʼe ko he faʼahi ʼe lelei! Neʼe fakatupu tātou e Sehova ʼaki te loto faʼifaʼitaliha. Ko tona fakaʼuhiga ʼe feala ke tou filifili ia te meʼa ʼaē ʼe tou loto kiai: Ke tou fakalogo ki te ʼAtua peʼe ke tou talagataʼa kiā te ia. (Teutalonome 30:15, 16, 19, 20) Kā tou filifili ke tou fakalogo kiā Sehova pea kā tou fai te tonu ʼaia heʼe lahi totatou ʼofa ki te ʼAtua, pea ʼe fiafia lahi ʼaupitō ai tatatou Tamai ʼaē ʼe ʼi selō. (Tāʼaga Lea 11:20) ʼE tou toe filifili ai foki mo te faʼahiga maʼuli ʼaē ʼe lelei tokotahi age.
“KO TANA ʼU FAKATOTONU ʼE MOLE FAKAMAFASIA IA”
13, 14. He koʼē ʼe feala ke tou ʼui ko te ʼu ‘fakatotonu ʼa te ʼAtua ʼe mole fakamafasia ia,’ pea koteā ʼaē ʼe feala ke tou fakatā kiai?
13 ʼE ʼui mai e te ʼapositolo ko Soane te manatu ʼe fakalotofīmālie ʼo ʼuhiga mo te ʼu fakatotonu ʼa Sehova: “Ko tana ʼu fakatotonu ʼe mole fakamafasia ia.” Ko te kupu Fakakeleka ʼaē neʼe fakaliliu ʼaki te kupu “fakamafasia” ʼaē iā 1 Soane 5:3, ʼe fakaʼuhiga ki te kupu “mamafa.” * Ko te ʼu fakatotonu ʼa Sehova ʼe mole fefeka ia. Ko tana ʼu lao ʼe mole mamafa fau ia ke mole feala leva ki te hahaʼi agahala hanatou fakalogo kiai.
14 ʼE feala ke tou toʼo ia te fakatā ʼaenī. Ohagē lā ko hokotou kaumeʼa lelei ʼe ina kole atu ke kotou tokoni age ki te laga ʼo tona ʼapi. ʼE lahi te ʼu papa ʼe tonu ke fetuku. Ko ʼihi papa ʼe maʼamaʼa, ʼo feʼauga pē ki he tokotahi tona ʼamo, kae ko ʼihi papa ʼe mamafa, pea ʼe maʼua anai ke ʼamo e he toko lua. ʼE filifili e tokotou kaumeʼa ia te ʼu papa ʼaē ʼe ina loto ke kotou fetuku. ʼE ina kole atu anai koa ke kotou ʼamo ia te ʼu papa ʼaē ʼe ina ʼiloʼi e mamafa fau kiā koutou? Kailoa ia. ʼE mole ina loto anai ke kotou lavea ʼi takotou faiga ʼaē ke kotou fetuku takitokotahi te ʼu papa mamafa ʼaia. ʼO toe fēia pē ki totatou ʼAtua ʼofa pea mo agalelei, ʼe mole ina kole mai anai ke tou fakalogo ki he ʼu fakatotonu ʼe faigataʼa fau kiā tātou. (Teutalonome 30:11-14) ʼE mole ina kole mai anai ke tou ʼamo he kavega mamafa fēia. ʼE mahino ia Sehova ki totatou ʼu tuʼakoi, heʼe “ina ʼiloʼi lelei pe neʼe faʼu tātou ʼaki teā, ʼo ina manatuʼi ko tātou ʼe tou efu.”—Pesalemo 103:14.
15. He koʼē ʼe feala ke tou falala ʼe fua lelei anai kiā tātou te ʼu fakatotonu ʼa Sehova?
15 Ko te ʼu fakatotonu ʼa Sehova ʼe mole fakamafasia ia, kae ʼe fua lelei ia kiā tātou. (Isaia 48:17) Neʼe feala ke ʼui fēnei e Moisese ki te kau Iselaele ʼo te temi muʼa: “Neʼe fakatotonu mai e Sehova ke tou fakalogo ki te ʼu lēkula fuli ʼaenī, ke tou manavasiʼi kiā Sehova totatou ʼAtua ke fua lelei tuʼumaʼu pē kiā tātou, ke tou māʼuʼuli ohagē ko te ʼaho ʼaenī.” (Teutalonome 6:24) Mo tātou foki ʼe feala ke tou toe falala ʼi tana foaki mai ʼaē ʼo tana ʼu lao, ʼe loto ia Sehova ke fua lelei kiā tātou, ke tou māʼuʼuli lelei ʼo talu ai. ʼE mole feala ke fua kovi kiā tātou te ʼu fakatotonu ʼa Sehova. Ko Sehova ʼe ko he ʼAtua ʼe ina maʼu ia te toe poto lahi. (Loma 11:33) ʼE ina ʼiloʼi ia te meʼa ʼaē ʼe lelei age kiā tātou. Pea ko Sehova ʼe ko ia foki te ʼofa. (1 Soane 4:8) Ko te ʼofa, tona kalitātē tāfito ʼaia, ʼe hā ʼi tana ʼu palalau pea mo tana ʼu gāue fuli. Ko te fakatafitoʼaga ʼaia ʼo tana ʼu fakatotonu fuli ʼaē ʼe ina foaki ki tana ʼu kaugana.
16. Logolā te ʼu fakaneke ʼo te mālama aga heʼemaʼa ʼaenī pea mo te ʼu holi ʼo totatou kakano agahala, kae he koʼē ʼe feala pē ke tou hoko atu tatatou fakalogo ʼaē kiā Sehova?
16 ʼE mole tou ʼui leva ʼe faigafua ia te fakalogo ʼaē ki te ʼAtua. ʼE tonu ke tou tauʼi ia te ʼu fakaneke ʼo te mālama heʼemaʼa ʼaenī, ʼaē “ ʼe takoto . . . ʼi te mālohi ʼo te agakovi.” (1 Soane 5:19) ʼE toe maʼua foki ke tou tauʼi ia totatou kakano agahala, ʼaē ʼe ina fakaneke tātou ke tou talagataʼa ki te ʼu lao ʼa te ʼAtua. (Loma 7:21-25) Kae ʼaki totatou ʼofa ʼaē ki te ʼAtua ʼe feala ke tou mālo ʼi te mālamanei. ʼE tapuakina e Sehova ia nātou ʼaē ʼe natou fia fakahā ia tonatou ʼofa ʼaē kiā te ia ʼaki tanatou fakalogo age kiā te ia. ʼE ina foaki tona laumālie māʼoniʼoni “kiā nātou ʼaē ʼe fakalogo kiā te ia ohagē ko hanatou pule.” (Gāue 5:32) Ko te laumālie ʼaia ʼe ina fakatupu iā tātou ia te fua ʼe matalelei: Te ʼu kalitātē maʼuhiga ʼe tokoni mai anai kiā tātou ke tou hoko atu tatatou fakalogo ʼaē kiā Sehova.—Kalate 5:22, 23.
17, 18. (a) Koteā ʼaē kā tou vakaʼi anai ʼi te tohi ʼaenī, pea ʼi tatatou fai te faʼahi ʼaia, koteā ʼaē ʼe tonu ke tou manatuʼi? (b) Koteā ʼaē kā tou talanoa anai kiai ʼi te kāpite ʼaē kā hoa mai?
17 ʼI te tohi ʼaenī, ʼe tou vakaʼi ai anai te ʼu pelesepeto pea mo te ʼu lēkula ʼa Sehova ʼo ʼuhiga mo te aga ʼaē ʼe tonu ke fai, pea mo te tahi age ʼu faʼahi ʼe hā ai te meʼa ʼaē ʼe loto kiai. ʼI tatatou fai te faʼahi ʼaia, ʼe tonu ke tou manatuʼi te ʼu faʼahi maʼuhiga. Tou manatuʼi ʼe mole fakakinauʼi tātou e Sehova ke tou fakalogo ki tana ʼu lao pea mo tana ʼu pelesepeto; ʼe loto ia ke tou fakalogo age kiā te ia ʼaki totatou loto kātoa. Tou manatuʼi ʼe kole mai e Sehova ke tou maʼu ia te faʼahiga maʼuli ʼaē kā tapuakina ai anai tātou ʼi te temi nei pea mo taki tātou ki te maʼuli heʼegata ʼi te kā haʼu. Pea tou manatuʼi ko tatatou fakalogo ʼaē kiā Sehova ʼaki he loto kātoa ʼe ko he faigamālie lelei ʼaia moʼo fakahā ia totatou ʼofa lahi kiā te ia.
18 Moʼo tokoni mai ke tou ʼiloʼi te meʼa ʼaē ʼe lelei pea mo te meʼa ʼaē ʼe kovi, neʼe foaki mai e Sehova ia totatou leʼo ʼo loto. Kae ke feala hatatou falala ki te takitaki ʼo totatou leʼo ʼo loto, ʼe tonu ke akoʼi, pea ʼe tou talanoa anai ki te faʼahi ʼaia ʼi te kāpite ʼaē kā hoa mai.
^ pal. 9 Vakaʼi ia te Kāpite 6 ʼo te tohi ʼaenī, ʼe talanoa ai pe feafeaʼi he filifili ʼo he ʼu fakafiafia ʼe lelei.
^ pal. 11 Māʼia mo te kau ʼāselo agakovi ʼe feala ke natou fakalogo fakakinau. ʼI te fakatotonu ʼaē e Sesu ki te kau temonio ke natou hū ki tuʼa mai te ʼu hahaʼi ʼaē neʼe natou ʼulusino ai, logolā te mole loto kiai ʼa te kau temonio kae neʼe tonu ke natou fakalogo ki tana takitaki.—Maleko 1:27; 5:7-13.
^ pal. 13 Iā Mateo 23:4, ʼe fakaʼaogaʼi ia te kupu ʼaia moʼo talanoa ʼo ʼuhiga mo te ʼu “kavega mamafa,” te ʼu lao pea mo te ʼu talatisio fakatagata ʼaē neʼe hili e te kau sekelipa pea mo te kau Faliseo ki te hahaʼi. Iā Gāue 20:29, 30, ʼe fakaʼaogaʼi ai ia te kupu “pule fakamālohi” pea ʼe fakaʼuhiga ki te kau ʼapositā aga fefeka ʼaē ʼe natou “palalau [anai] ki te ʼu meʼa pikopiko” pea mo kumi ke natou kākāʼi te hahaʼi.