1, 2. Koteā te meʼa ʼofa ʼaē neʼe foaki mai e te ʼAtua ʼe maʼuhiga tāfito iā ʼaho nei, pea koteā tona tupuʼaga?

KO TATATOU Tamai ʼaē ʼe ʼi selō neʼe ina foaki mai te koloa maʼuhiga—ia te meʼa ʼofa ʼaē ko te maʼuli ki ni hahaʼi ʼatamai ʼe feala ke natou faʼifaʼitakiʼi tona ʼu kalitātē. (Senesi 1:27) ʼAki te meʼa ʼofa maʼuhiga ʼaia, ʼe tou lava fakakaukauʼi ai ia te ʼu pelesepeto ʼo te Tohi-Tapu. Pea ʼi tatatou maʼuliʼi ia te ʼu pelesepeto ʼaia, ʼe feala ai ke tou tuputupu ko ni hahaʼi fotufotuʼa ʼi te faʼahi fakalaumālie, ʼe tou ʼofa kiā Sehova pea “kua [tou] maʼu te ʼu fealagia fakakaukau ke akoʼi ke [tou] ʼiloʼi te meʼa ʼaē ʼe lelei pea mo te meʼa ʼaē ʼe kovi.”—Hepeleo 5:14.

² Ko te lava fakakaukauʼi ʼo he ʼu pelesepeto ʼi te Tohi-Tapu kua maʼuhiga tāfito iā ʼaho nei, heʼe ʼi te kua faigataʼa ʼo te mālamanei, ʼe mole tou maʼu he ʼu lao ʼi te temi fuli pē moʼo takitaki ia tātou ʼi te ʼu ʼaluʼaga fuli ʼo totatou maʼuli. Ohagē lā ʼi te faʼahi fakatōketā, ʼe mole tou maʼu he lao ʼe talanoa fakahagatonu mai ki te fakaʼaogaʼi ʼo te toto ʼi te ʼu faitoʼo pea mo te ʼu fai tafa. ʼE ko he faʼahi maʼuhiga ʼaia maʼa nātou fuli ʼaē ʼe natou fia fakalogo kiā Sehova. Koia, kapau ʼe tou mahino ki te ʼu pelesepeto ʼo te Tohi-Tapu ʼaē ʼe pipiki ki te faʼahi ʼaia, pea ʼe tou fai anai he ʼu tonu ʼe fakapotopoto ʼe mole hoha ai totatou leʼo ʼo loto pea ʼe tou haga nonofo aipē ʼi te ʼofa ʼo te ʼAtua. (Tāʼaga Lea 2:6-11) Tou vakaʼi he ʼu pelesepeto.

3, 4. Ko te temi fea ʼaē neʼe talanoa ai ʼi te Tohi-Tapu ki te taputapu ʼo te toto, pea ʼe fakatafito ki te ʼu pelesepeto fea?

³ ʼI te ʼosi matehi e Kaino ia Apele, neʼe hoki fakahā ai leva e Sehova ia te pikipikiga ʼaē ʼo te maʼuli pea mo te toto, ʼo fēia mo tonā ʼuhiga taputapu. Neʼe ʼui fēnei e te ʼAtua kiā Kaino: “ ʼE ke logo! Ko  te toto ʼo tou tehina, ʼe kalaga mai te kele kiā te au.” (Senesi 4:10) Kiā mata ʼo Sehova, ko te toto ʼo Apele neʼe ko tona maʼuli, pea ko he maʼuli ia neʼe fakagata fakafokifā. Koia, neʼe feala pē ke ʼui ko te toto ʼo Apele neʼe kalaga ki te ʼAtua ke ina fai he lagavaka.—Hepeleo 12:24.

⁴ Hili te Tulivio ʼi te temi ʼo Noe, neʼe fakagafua e te ʼAtua ki te hahaʼi ke natou kai ki te kanoʼi manu kae neʼe mole tonu ke natou kai ki tona toto. Neʼe ʼui fēnei e te ʼAtua: “Gata pē ki te kakano pea mo tona nefesi—tona toto—ʼe mole tonu ke kotou kai. ʼO hilifaki ki te meʼa ʼaia, ko te toto ʼo tokotou ʼu nefesi, ʼe au toe kumi atu anai.” (Senesi 9:4, 5) Ko te fakatotonu ʼaia neʼe fai kiā nātou fuli ʼaē ʼo te hōloga ʼo Noe ʼo aʼu mai ki totatou temi. Neʼe ko he fakatotonu ʼaia moʼo toe fakamoʼoni ia te manatu ʼa te ʼAtua ʼaē neʼe ina fai ki muʼa atu kiā Kaino ʼo ʼuhiga mo te toto—ko te nefesi, peʼe ko te maʼuli ʼo te ʼu meʼa maʼuli fuli pē ʼe fakatātā ʼaki te toto. ʼAki te fakatotonu ʼaia, ʼe toe fakahā ai e Sehova, te Matapuna ʼo te maʼuli, ʼe ina fakamāuʼi anai te hahaʼi fuli pē ʼaē neʼe mole natou fakaʼapaʼapa ki te maʼuli pea mo te toto.—Pesalemo 36:9.

5, 6. Neʼe fakahā feafeaʼi ʼi te Lao ʼa Moisese ko te toto ʼe taputapu pea mo maʼuhiga? (Vakaʼi ʼi te  pāsina 78, ia te fakamatala ʼaē ʼe ʼātakai.)

⁵ Neʼe hā lelei te ʼu moʼoni tāfito ʼaia e lua ʼi te Lao ʼa Moisese. ʼE tou lau fēnei iā Levitike 17:10, 11: “Ko te tagata pē . . . ʼaē ʼe kai ki he faʼahiga toto pē, ʼe mahino ia ʼe au fakahaga anai toku fofoga ki te nefesi ʼaē ʼe kai ki te toto pea ʼe au pulihi anai ia ia ʼi te lotolotoiga ʼo tana hahaʼi. Ko te maʼuli ʼo te kakano ʼe maʼu ʼi te toto, pea ko au neʼe au ʼai te toto maʼa koutou ki te ʼaletale moʼo faifakalelei ki ʼokotou maʼuli, koteʼuhi ko te toto ʼaē ʼe faifakalelei maʼa te maʼuli ʼaē ʼe nofo iā te ia.” *—Vakaʼi ʼi te pāsina 76, ia te fakamatala ʼaē ʼe ʼātakai ko tona kupu tāfito  “Te Maʼuhiga ʼAupitō ʼo Te Toto Ki Te Faifakalelei.”

⁶ Kapau neʼe mole fakaʼaogaʼi ki te ʼaletale ia te toto ʼo he manu neʼe matehi, pea neʼe tonu ke liligi ki te kele. Koia, ʼi hona ʼaluʼaga fakatātā, ko te maʼuli neʼe toe liliu kiā Ia ʼaē neʼe ina Foaki mai. (Teutalonome 12:16; Esekiele 18:4) Kae kotou tokagaʼi, neʼe mole faiga leva e te kau Iselaele ke mole toe ʼi ai he moʼi toto ʼi te sino ʼo  te manu. Kapau neʼe matehi fakalelei te manu pea mo fakahali tona toto, neʼe kua feala ki he Iselaele ke ina kai ia te kanoʼi manu ʼaia ʼaki he leʼo ʼo loto ʼe lelei, heʼe kua ina fakahā ia tana fakaʼapaʼapa kiā Ia ʼaē neʼe ina Foaki te maʼuli ʼi tana kua fai ia te faʼahi ʼaia.

7. Neʼe fakahā feafeaʼi e Tavite tana fakaʼapaʼapa ki te taputapu ʼo te toto?

⁷ Ko Tavite, ʼaē neʼe ‘ko he tagata neʼe leleiʼia e te loto ʼo te ʼAtua,’ neʼe mahino ia ki te ʼu pelesepeto ʼaē neʼe pipiki ki te lao ʼa te ʼAtua  ʼo ʼuhiga mo te toto. (Gāue 13:22) ʼI te tahi ʼaluʼaga, ʼi te kovi ʼo te fia ʼinu ʼa Tavite, neʼe hūfi e tana ʼu tagata e toko tolu te nofoʼaga ʼo tonatou ʼu fili moʼo ʼohu he moʼi vai mai te tane vai, pea ke natou ʼaumai ke ʼinu Tavite. Koteā ʼaē neʼe fai e Tavite? Neʼe ina fai ia te fehuʼi ʼaenī: “ ʼE au ʼinu anai koa ia te toto ʼo te ʼu tagata ʼaē neʼe ʼolo ʼo feala ai ke natou mamate?” Kiā mata ʼo Tavite, ko tana ʼinu ia te vai neʼe hagē pē ko hana ʼinu ia te toto ʼo tana ʼu tagata ʼaē neʼe feala pē ke natou tuʼutāmakiʼia ʼi tanatou ʼolo ʼo ʼohu mai te vai. Koia logolā tana fia ʼinu, kae neʼe ina “huaʼi iā muʼa ʼo Sehova.”—2 Samuele 23:15-17.

8, 9. Neʼe fetogi koa te manatu ʼa te ʼAtua ʼo ʼuhiga mo te maʼuli pea mo te toto ʼi te fakatuʼu ʼo te kōkelekāsio Fakakilisitiano? Kotou fakamahino.

⁸ Hili taʼu e 2 400 ki te ʼosi foaki kiā Noe ʼo te fakatotonu ʼo ʼuhiga mo te toto pea mo taʼu e teitei 1 500 ki te ʼosi fai ʼo te fuakava ʼo te Lao, neʼe takitaki e Sehova ia te kolesi pule ʼo te kōkelekāsio Fakakilisitiano ʼo te ʼuluaki sēkulō ke natou tohi fēnei: “Ko te laumālie māʼoniʼoni pea mo mātou totonu, kua matou fakafuafua ʼe lelei ke ʼaua naʼa matou hilifaki atu kiā koutou he tahi age kavega ʼi te ʼu meʼa ʼaenī ʼe ʼaoga: Ko te fakamamaʼo mai te ʼu meʼa ʼaē ʼe sākilifisioʼi ki te ʼu tamapua, pea mo te toto, pea mo te meʼa ʼaē neʼe tege, pea mo te fai folonikāsio.”—Gāue 15:28, 29.

⁹ ʼE hā lelei mai, neʼe mahino ki te kolesi pule ʼo te ʼuluaki sēkulō ko te toto ʼe taputapu pea ko tona fakaʼaogaʼi kovi neʼe ko he aga heʼeʼaoga, ʼe hagē pē ko he tauhi tamapua peʼe ko he fai folonikāsio. Ko te kau Kilisitiano iā ʼaho nei ʼe natou tali ia te manatu ʼaia. Tahi ʼaē meʼa, ʼi tanatou mahino ki te ʼu pelesepeto ʼo te Tohi-Tapu pea mo natou maʼuliʼi, ʼe feala ke natou fakafiafia ia Sehova mokā natou fai he ʼu tonu ʼo ʼuhiga mo te fakaʼaogaʼi ʼo te toto.

10, 11. (a) Koteā te manatu ʼa te kau Fakamoʼoni ʼa Sehova ʼo ʼuhiga mo te ʼu foʼi huki toto pea mo te ʼu koga tāfito ʼaē ʼe natou faʼufaʼu ia te toto? (b) Ko te ʼu faʼahi fea ʼo ʼuhiga mo te toto ʼaē ʼe feala ai ke manatu kehekehe te kau Kilisitiano?

¹⁰ ʼE mahino ki te kau Fakamoʼoni ʼa Sehova ko te “fakamamaʼo mai . . . te toto” ko tona fakaʼuhiga ke mole natou tali te ʼu foʼi huki toto pea ke mole natou foaki tonatou toto peʼe tānaki tonatou toto ke fai he foʼi huki toto. ʼI tanatou fakaʼapaʼapa ki te lao ʼa te ʼAtua,  ʼe mole natou toe tali mo te ʼu koga tāfito e fā ʼaē ʼe natou faʼufaʼu ia te toto: te ʼu globules kula, te ʼu globules hina, te ʼu plaquettes, pea mo te plasma.

¹¹ Iā ʼaho nei, ʼaki te fai foʼou ʼo te ʼu faitoʼo, kua feala ki te ʼu koga tāfito ʼaia ke vaevae takitahi ki he ʼu kihiʼi koga liliki, ʼo fakaʼaogaʼi ki ni ʼu faitoʼo kehekehe. ʼE feala koa ki he Kilisitiano ke ina fakaʼaogaʼi te ʼu kihiʼi koga liliki ʼaia ʼaē neʼe toʼo mai te toto? Kiā nātou ʼe ko te “toto” kātoa koa ʼaia? ʼE fakalogo kiā tātou takitokotahi te fai ʼo he tonu kiai. ʼE fēia mo te ʼu faitoʼo ohagē ko te tialisi, mo te hémodilution, pea mo te récupération du sang épanché (te fakaʼaogaʼi ʼo te toto ʼaē neʼe hali), ʼe ko te toto pē ʼo ia ʼaē ʼe faitoʼo ʼaē ʼe fakaʼaogaʼi, mo kapau neʼe mole tānaki.—Vakaʼi ia Te Tahi ʼu Fakamahino, ʼi te ʼu pāsina 215 ki te 218.

12. ʼE tonu ke feafeaʼi tatatou manatu ʼo ʼuhiga mo te ʼu faʼahi ʼaē ʼe fakalogo kiai ia tokita leʼo ʼo loto pea ʼe maʼu feafeaʼi he tonu kiai?

¹² ʼE maʼuhiga koa kiā Sehova te ʼu tonu ʼaē ʼe fakalogo pē kiā tātou  takitokotahi ia tona fai? ʼEī, heʼe tokaga tāfito ia ki tatatou ʼu manatu pea mo te ʼu meʼa ʼaē ʼi totatou loto. (Tāʼaga Lea 17:3; 21:2; 24:12) Koia ʼi tatatou ʼosi faikole pea mo fai he ʼu kumi ʼo ʼuhiga mo he faitoʼo peʼe ko he tafa, ʼe tonu ke tou fakalogo ki totatou leʼo ʼo loto ʼaē neʼe akoʼi e te Tohi-Tapu. (Loma 14:2, 22, 23) Pea ʼe mole fakamaʼua mai anai kiā tātou e niʼihi ia te tonu ʼaē neʼe natou fai, peʼe tou fehuʼi age: “Koteā anai te meʼa kā ke fai mo kanapau lā neʼe hoko kiā koe ia te meʼa ʼaenī?” ʼI te ʼu faʼahi ʼaia, ʼe tonu ki te Kilisitiano takitokotahi ke ina ‘ ʼamo tana ʼāmoga.’ *—Kalate 6:5; Loma 14:12; vakaʼi ʼi te pāsina 81, ia te fakamatala ʼaē ʼe ʼātakai ko tona kupu tāfito  “ ʼE Taputapu Koa Kiā Au Ia Te Toto?”

13. Koteā ʼaē ʼe hā mai ʼo ʼuhiga mo Sehova ʼi tana ʼu lao pea mo tana ʼu pelesepeto? Kotou tuku mai he faʼifaʼitaki.

¹³ ʼE hā ʼi te ʼu lao pea mo te ʼu pelesepeto ʼaē ʼe tou maʼu ʼi te Tohi-Tapu ko Sehova ʼe fakapotopoto ʼi te ʼu Lao ʼaē ʼe ina foaki mai pea ʼe ko he Tamai ʼofa, ʼe tokaga ʼaupitō ki te maʼuli fīmālie ʼo tana ʼu fānau. (Pesalemo 19:7-11) Logolā ko te fakatotonu ʼaē “ke fakamamaʼo mai . . . te toto” neʼe mole ina foaki ohagē ko he faitoʼo ke maʼu ai he fīmālie, kae ʼe ina puipui tātou mai te ʼu mahaki ʼaē ʼe feala ke tou maʼu mai te ʼu foʼi huki toto. (Gāue 15:20) ʼI tona fakahagatonu, tokolahi ʼi te kau tōketā ʼe natou manatu ko te ʼu tafa ʼaē ʼe mole fakaʼaogaʼi ai te toto ʼe ko “te faʼahiga faitoʼo lelei pē ʼaia” ʼi te temi nei. Maʼa te kau Kilisitiano moʼoni, ʼe hā mai te ʼu taʼi faitoʼo ʼaia ia te lahi ʼaupitō ʼo te poto ʼo Sehova pea mo tona ʼofa fakatamai.—Isaia 55:9; Soane 14:21, 23.

14, 15. (a) Ko te ʼu lao fea ʼaē ʼe hā ai ia te ʼofa ʼo te ʼAtua ki tana hahaʼi? (b) ʼE feafeaʼi hakotou lava fakaʼaogaʼi ia te ʼu pelesepeto ʼaē ʼe kotou maʼu mai te ʼu fakatotonu moʼo puipui te maʼuli?

¹⁴ ʼE lahi te ʼu lao ʼa te ʼAtua, neʼe hā ai tana tokaga ki te maʼuli fiafia ʼa te kau Iselaele ʼo te temi muʼa. Ohagē lā, neʼe ina fakamaʼua ki te kau Iselaele ke natou fai he ʼā ʼi tonatou ʼu fuga fale ke mole hoko he tuʼutāmaki, koteʼuhi neʼe lahi te ʼu gāue neʼe fai ʼi ai. (Teutalonome 22:8; 1 Samuele 9:25, 26; Nehemia 8:16; Gāue 10:9) Neʼe toe fakatotonu e te ʼAtua ke natou tōkakaga ki tanatou ʼu vītulo naʼa hoko he tuʼutāmaki. (Ekesote 21:28, 29) Kapau neʼe mole  natou mulimuli ki te ʼu fakatotonu ʼaia, pea ʼe natou fakahā ai tanatou mole fakaʼapaʼapa ki te maʼuli ʼo ʼihi pea neʼe feala ke mate ai he tahi.

¹⁵ ʼE feafeaʼi hakotou lava fakaʼaogaʼi ia te ʼu pelesepeto ʼaē ʼe kotou maʼu mai te ʼu lao ʼaia? ʼE lagi lelei ke kotou fakaʼaogaʼi te ʼu pelesepeto ʼaia moʼo vakavakaʼi takotou motokā peʼe lelei, ʼo fēia ki takotou ʼu agamāhani mokā kotou taki takotou motokā, mo te aga ʼaē ʼe kotou fai ki takotou ʼu manu. Kotou toe vakavakaʼi te ʼu pelesepeto ʼaia ʼo ʼuhiga mo tokotou ʼapi, mo tokotou fale gāue, pea mokā kotou filifili te ʼu fakafiafia ʼaē ke kotou kau ai. ʼI ʼihi fenua, ʼe mamate tāfito ia te kau tūpulaga ʼi te ʼu fakaʼī motokā, heʼe ʼi te agamāhani ʼe mole natou tōkakaga mokā natou taki motokā. Kae ko te kau tūpulaga ʼaē ʼe fia nonofo ʼi te ʼofa ʼo te ʼAtua ʼe maʼuhiga kiā nātou ia te maʼuli pea ʼe mole natou kumi he ʼu fakafiafia lahi ʼi he ʼu gāue peʼe ko he ʼu gaoʼi ʼe fakatupu tuʼutāmaki ki tonatou maʼuli. ʼE mole natou maʼu ia te taʼi manatu vale ʼaē ʼe ʼui, ʼe mole feala ke hoko ia he meʼa ʼe kovi ʼi tonatou temi tūpulaga. Kae ʼe natou leleiʼia tonatou temi tūpulaga ʼaki hanatou fakamamaʼo mai he ʼu mamahi ʼe feala pē ke mole hoko.—Tagata Tānaki 11:9, 10.

16. Ko te pelesepeto fea ʼaē ʼe pipiki ki te fakatō fatu? (Vakaʼi mo te kiʼi nota ʼi te lalo pāsina.)

¹⁶ Māʼiapē lā mo te maʼuli ʼo te kiʼi toe ʼaē kei fuafatuʼi ʼe maʼuhiga kiā mata ʼo te ʼAtua. ʼI te Iselaele ʼāfea, kapau neʼe lavea he fafine faitama pea neʼe mate peʼe ko tana tamasiʼi, kiā mata ʼo te ʼAtua ko ia ʼaē neʼe tupu ai te tuʼutāmaki, ʼe ina fakaʼuhiga ko hana fakapō pea neʼe tonu kiā ia ʼaia ke ina totogi ʼaki “he nefesi ki te nefesi.” * (Ekesote 21:22, 23) Pea kotou fakakaukauʼi age muʼa ki te loto ʼo Sehova ʼi tana sio ʼaē ki te fakatō ʼi te taʼu fuli ʼa te kihiʼi tamaliki tokolahi ʼaē kei fuafatuʼi, ʼuhi ko te fia maʼuli faʼifaʼitaliha ʼa te hahaʼi fafine pea mo tanatou fai te ʼu aga heʼeʼaoga.

17. ʼE kotou fakalotofīmālieʼi feafeaʼi anai he tahi neʼe fakatō fatu ʼi muʼa ʼo tana ʼiloʼi ia te ʼu lēkula ʼa te ʼAtua?

¹⁷ Kae ʼe feafeaʼi ʼo ʼuhiga mo he fafine neʼe fakatō fatu ʼi muʼa  ʼo tana ʼiloʼi te moʼoni ʼo te Tohi-Tapu? Ko tona fakaʼuhiga koa ʼe mole feala anai ki te ʼAtua ke ina fakamolemole tana agahala ʼaia? ʼE feala ki te ʼAtua ke fakamolemole ki ai! Ko he tahi ʼe fakahemala moʼoni ki hana hala neʼe ina fai, ʼe feala ke falala ki te loto fakamolemole ʼa Sehova, ʼaē ʼe fakatafito ki te taʼataʼa ʼo Sesu.  (Pesalemo 103:8-14; Efesi 1:7) He neʼe ʼui fēnei e Kilisito: “Neʼe mole au haʼu ko te pāuiʼi ʼo te kau agatonu, kae ko te kau agahala ke natou fakahemala.”—Luka 5:32.

18. ʼE fakahā feafeaʼi mai ʼi te Tohi-Tapu ia te tupuʼaga tāfito ʼaē ʼo te fai fakapō?

¹⁸ ʼE mole loto pē e Sehova ke ʼaua naʼa tou fai he meʼa ʼe kovi ki niʼihi, kae ke tou toe toʼo foki ʼi tokita loto ia te fehiʼa, ʼaē ko te tupuʼaga tāfito ʼaia ʼo te fai fakapō. Neʼe tohi fēnei e te ʼapositolo ko Soane: “Ko ʼaē ʼe fehiʼa ki tona tehina ʼe ko he tagata fai fakapō ia.” (1 Soane 3:15) Ko he tahi ʼe fēia, ʼe mole fehiʼa pē ia ki tona tehina kae ʼe ina fakaʼamu ʼi tona loto ke mate. ʼE lagi ʼasi tona fehiʼa ʼaia ki tona tehina ʼi hana ʼu fasituʼu ʼo ʼuhiga mo ia peʼe ina tukugākoviʼi neʼe ina fai he aga ʼe tonu ke fakamāuʼi e Sehova. (Levitike 19:16; Teutalonome 19:18-21; Mateo 5:22) Koia ʼe maʼuhiga ai ke tou toʼo ʼi totatou loto ia meʼa fuli ʼe kovi ʼe feala ke tou taupau!—Sake 1:14, 15; 4:1-3.

19. ʼE feafeaʼi ki he tahi ʼe takitaki tona maʼuli ʼaki ni ʼu pelesepeto Fakatohi-tapu ia hana mahino ki te ʼu palalau ʼaē iā Pesalemo 11:5 pea mo Filipe 4:8, 9?

¹⁹ Ko nātou ʼaē ʼe maʼuhiga kiā nātou te maʼuli ohagē ko tona maʼuhiga kiā Sehova pea mo fia haga nonofo ʼi tona ʼofa, ʼe natou toe tekeʼi ia te ʼu faʼahiga agamālohi kehekehe fuli. ʼE ʼui fēnei iā Pesalemo 11:5: “Ko ʼaē ʼe manako ki te agamālohi, ʼe mahino ia, ʼe fehiʼa ki ai [te] nefesi [ʼo Sehova].” Ko te vaega ʼaenī, ʼe mole gata pē ʼi tana talanoa ki te ʼulugaaga ʼo Sehova, kae ʼe ina toe fakahā mai ia te pelesepeto moʼo takitaki ia totatou maʼuli. Ko he pelesepeto ʼe ina uga ia nātou ʼaē ʼe kaumeʼa mo te ʼAtua ke natou tekeʼi te ʼu faʼahiga fakafiafia ʼaē ʼe fai ai te agamālohi. ʼO toe fēia pē, ko te ʼui ʼaē ko Sehova ʼe ko “te ʼAtua ʼo te tokalelei” ʼe ina uga tana ʼu kaugana ke natou fakafonu tonatou ʼatamai pea mo tonatou loto ʼaki ni ʼu meʼa ʼe ʼofainaʼi, mo maʼa, pea mo tāu ke vikiʼi, ko he ʼu faʼahi ʼe natou fakafealagia ia te tokalelei.—Filipe 4:8, 9.

20-22. ʼE feafeaʼi ia te kau Kilisitiano ki te mālamanei, pea koteā tona tupuʼaga?

²⁰ Kiā mata ʼo te ʼAtua, ko te mālamanei kātoa ʼa Satana ʼe fai fakapō.  Ko te tuʼu fakapolitike, ʼaē ʼe fakatātā ʼi te Tohi-Tapu ki he manu fekai, neʼe ina fakapōgi te ʼu toko lauʼi miliona hahaʼi, ʼo kau kiai te ʼu kaugana ʼa Sehova ʼe tokolahi. (Taniela 8:3, 4, 20-22; Fakahā 13:1, 2, 7, 8) Ko te tuʼu fakatau koloa pea mo te ʼu fakatuʼutuʼu poto ʼo te tagata, ʼo fakatahi mai kiā nātou ia te ʼu pule takitaki ʼaē ʼe fakatatau ki he ʼu manu, neʼe natou kaugā gāue fakatahi moʼo faʼu he ʼu mahafu tau fakamataku, ʼo natou maʼu koloa lahi ai. ʼE moʼoni “ko te mālamanei kātoa ʼe takoto ia ʼi te mālohi ʼo te agakovi”!—1 Soane 5:19.

²¹ ʼUhi ʼaē ko te ʼu tisipulo ʼa Sesu ʼe ‘mole natou kau ʼi te mālamanei’ pea ʼe mole natou lagolago ki he ʼu faʼahi fakapolitike pea mo ni ʼu tau, ʼe mole natou fakapōgi ai he tahi. * (Soane 15:19; 17:16) Pea ʼi tanatou faʼifaʼitakiʼi ia Kilisito, ʼe mole natou liufaki te agamālohi mokā fakatagaʼi ia nātou. Kae ʼe natou ʼofa ki tonatou ʼu fili, pea mo natou hūfakiʼi ia nātou.—Mateo 5:44; Loma 12:17-21.

²² Kae ko te faʼahi ʼaē ʼe maʼuhiga tāfito ki te kau Kilisitiano moʼoni, ʼe natou tōkakaga ke mole natou kau ki “Papiloni Lahi,” te kautahi fakamālamanei ʼo te ʼu lotu hala ʼaē neʼe lahi age tana fai  fakapō ʼi te ʼu kautahi fuli ʼaē. ʼE ʼui fēnei ʼi te Folafola ʼa te ʼAtua: “Neʼe maʼu iā te ia te toto ʼo te kau polofetā pea mo te kau māʼoniʼoni pea mo nātou fuli ʼaē neʼe fakapōgi ʼi te kele.” Koia, ʼe fakatokaga fēnei mai: “Kotou mavae mai iā te ia, ê taku hahaʼi.”—Fakahā 17:6; 18:2, 4, 24.

23. Koteā te fakaʼuhiga ʼo te mavae ʼaē mai Papiloni Lahi?

²³ Ko te mavae mai Papiloni Lahi, ʼe mole gata pē ki takita molehi ʼaē ʼo tokita higoa ʼi te tohi ʼo te ʼēkelesia ʼaē neʼe kita kau ai. ʼE tonu foki ke kita toe fehiʼa ki te ʼu aga ʼe kovi ʼaē ʼe tali e te lotu hala peʼe lagolago kiai, ohagē lā ko te aga heʼeʼaoga, te kau ki he faʼahi fakapolitike, pea mo te mānumānu koloa. (Pesalemo 97:10; Fakahā 18:7, 9, 11-17) Neʼe iku tuʼumaʼu pē te ʼu aga ʼaia ki te fai fakapō!

24, 25. Koteā ʼaē ʼe fakatafito kiai e te ʼAtua ia tana fakahā mai ʼaē ʼo tona manavaʼofa ki he tahi ʼe fakahemala he neʼe fai fakapō, pea neʼe fakatātā feafeaʼi te faʼahi ʼaia ʼi te temi muʼa?

²⁴ ʼI muʼa ʼo tatatou kau ʼaē ki te tauhi moʼoni, ko tātou takitokotahi, neʼe tou lagolago ʼi hona faʼahiga ʼaluʼaga pē ki te tuʼu ʼa Satana pea neʼe tou kau mo tātou ki te fai fakapō. Kae mai tona ʼaluʼaga ʼaē kua tou fetogi totatou maʼuli, kua tou tui ki te sākilifisio faitotogi ʼa Kilisito, pea mo foaki totatou maʼuli ki te ʼAtua, kua fakahā mai e te ʼAtua ia tona manavaʼofa pea mo tana puipui fakalaumālie ʼaē kiā tātou. (Gāue 3:19) Ko te puipui ʼaia neʼe fakatātā ʼi te temi muʼa ʼaki te ʼu kolo moʼo holaʼaga.—Faka  au 35:11-15; Teutalonome 21:1-9.

²⁵ Neʼe feafeaʼi te fakaʼaluʼalu ʼo te fakatuʼutuʼu ʼaia? Kapau ko he Iselaele neʼe ina matehi he tahi kae neʼe mole loto kiai, neʼe tonu ke hola ki he kolo ʼi te ʼu kolo holaʼaga. Kā kua ʼosi fai he tonu e te kau tuʼi fakamāu fakapotopoto ki te fihifihia ʼaē neʼe hoko, ko te Iselaele ʼaē neʼe ina matehi he tahi kae neʼe mole loto kiai, neʼe tonu ke nofo ʼi te kolo holaʼaga ʼo aʼu ki te mate ʼa te pelepitelō lahi. Kā kua mate leva ia te pelepitelō ʼaia, pea kua feala hana toe liliu mai ʼo maʼuli pē ʼi he potu ʼe fia nofo ai. ʼE ko he faʼifaʼitaki lelei ʼaia ʼo ʼuhiga mo te manavaʼofa ʼo te ʼAtua pea mo te maʼuhiga ʼaupitō ki ʼona mata ia te maʼuli ʼo he tahi! Ko te fakatuʼutuʼu ʼaia ʼo te ʼu kolo holaʼaga ʼi te temi muʼa, ʼe fakatatau iā ʼaho nei ki te fakatuʼutuʼu ʼa te ʼAtua, ʼaē ʼe fakatafito ki te sākilifisio faitotogi ʼa Kilisito, moʼo haofaki ʼo tātou mai te mate, ʼi tatatou maumauʼi tana fakatotonu  kae neʼe mole tou ʼiloʼi, ʼo ʼuhiga mo te ʼuhiga taputapu ʼo te maʼuli pea mo te toto. ʼE maʼuhiga koa kiā koutou ia te fakatuʼutuʼu ʼaia? ʼE feafeaʼi hakotou fakahā ʼe maʼuhiga kiā koutou ia te te fakatuʼutuʼu ʼaia? ʼE feala ke kotou fakahā ia te faʼahi ʼaia, ʼaki hakotou fakaafe niʼihi ke ʼomai ʼo fakatahi mo koutou ʼi te kolo holaʼaga fakatātā iā ʼaho nei, tāfito lā heʼe kua ovi mai te “mamahi lahi.”—Mateo 24:21; 2 Kolonito 6:1, 2.

26-28. ʼE tatau feafeaʼi totatou ʼaluʼaga iā ʼaho nei pea mo ʼaē ʼo te polofetā ko Esekiele, pea ʼe lava feafeaʼi hatatou haga nonofo ʼi te ʼofa ʼo te ʼAtua?

²⁶ Ko te ʼaluʼaga ʼo te hahaʼi ʼa te ʼAtua iā ʼaho nei ʼe ina fakamanatuʼi mai ia te ʼaluʼaga ʼo te temi ʼo te polofetā ko Esekiele ʼi te temi muʼa, ʼaē neʼe fekauʼi ia ia e Sehova ke liliu ko he tagata leʼo ki te ʼapi ʼo Iselaele. Neʼe ʼui fēnei e te ʼAtua: “ ʼE tonu ke ke fakalogo ki [taku] folafola pea mo ke fakatokaga ia nātou mai iā te au.” Kana neʼe mole fakahoko lelei e Esekiele tana gāue ʼaia, kanaʼaulā neʼe agahala ʼo ʼuhiga mo te toto ʼo nātou ʼaē neʼe mamate ʼi te te temi ʼaē neʼe fakaʼauha ai Selusalemi ʼi te kua lahi fau ʼo tana agakovi. (Esekiele 33:7-9) Kae neʼe fakalogo ia Esekiele ki te fakatotonu ʼa te ʼAtua pea neʼe maʼa mai te ligitoto ʼaē neʼe hoko.

²⁷ ʼE tou māʼuʼuli nei ʼi te temi fakaʼosi ʼo te mālamanei ʼa Satana. Koia, ki te kau Fakamoʼoni ʼa Sehova ʼe ko he maʼua pea mo he pilivilēsio ke natou tala “te ʼaho lagavaka” ʼo te ʼAtua pea mo te logo ʼo te Puleʼaga. (Isaia 61:2; Mateo 24:14) ʼE kotou lagolago mālohi koa ki te gāue maʼuhiga ʼaia? Neʼe tokaga fakalelei ia te ʼapositolo ko Paulo ʼo fakahoko ia tana gāue fai fakamafola. Koia neʼe feala ai ke ina ʼui fēnei: “ ʼE au maʼa ʼi te toto ʼo te tagata fuli pē, he neʼe mole au tatāʼofi ia au ʼi te fakahā atu kiā koutou te tokoni fuli ʼa te ʼAtua.” (Gāue 20:26, 27) ʼE ko he faʼifaʼitaki lelei ʼaia ke tou muliʼi!

²⁸ ʼE mahino papau ia, ke tou haga nonofo ʼi te ʼofa fakatamai ʼo Sehova, ʼe mole tonu pē ke kita maʼu te manatu ʼa Sehova ʼo ʼuhiga mo te maʼuli pea mo te toto. ʼE toe ʼaoga foki ke tou nonofo maʼa, peʼe māʼoniʼoni kiā mata ʼo Sehova, pea ʼe tou vakaʼi anai te faʼahi ʼaia ʼi te kāpite ʼaē kā hoa mai.