KAPITE 16

Kotea Neʼe Fai e Sesu ʼi Te Kele?

LAU

Tokolahi ʼe natou manatu ko Sesu ko he kiʼi toe, peʼe ko he polofeta peʼe ko he tagata ʼe tugaki mate. Kae kotea te tahi ʼu aluʼaga ʼe feala ke ke iloʼi ʼi te maʼuli ʼo Sesu? ʼE tou talanoa anai ki he ʼu gaue maʼuhiga ʼaupito neʼe ina fai pea mo tona ʼaoga kia koe.

1. Neʼe kotea te gaue tafito ʼa Sesu?

Neʼe fai e Sesu te gaue tafito ʼaeni ʼe ko te “tala te logo lelei ʼo te Puleʼaga ʼo te ʼAtua.” (Lau ia Luka 4:43.) Neʼe ina fakamafola ʼe fakatuʼu anai e te ʼAtua he puleʼaga ka ina fakatokatoka te ʼu fihifihia fuli ʼo te malamanei. a Neʼe tala tuʼumaʼu e Sesu te logo ʼaia ia taʼu ʼe tolu vaelua.—Mateo 9:35.

2. Kotea ʼe ha ai ʼi te ʼu milakulo ʼa Sesu?

ʼE ui ʼi te Tohi-Tapu ʼe lahi ‘te ʼu gaue malohi pea mo te ʼu meʼa fakaofoofo pea mo te ʼu milakulo neʼe fakahoko e te ʼAtua ʼaki ia Sesu.’ (Gaue 2:22) ʼAki te malohi ʼo te ʼAtua, neʼe lava puleʼi e Sesu te ʼu malohi fakanatula, mo fafaga he toko lauʼi ʼafe hahaʼi, mo fakamalolo te kau mahaki pea mo fakatuʼuake te kau mate. (Mateo 8:23-27; 14:15-21; Maleko 6:56; Luka 7:11-17) Neʼe ha ʼi te ʼu mikulo ʼa Sesu neʼe fekauʼi moʼoni mai ia ia e te ʼAtua pea ʼe maʼu e Sehova te malohi moʼo fakatokatoka ʼou fihifihia fuli.

3. Kotea ʼe ke ako mai te maʼuli ʼo Sesu?

Neʼe fakalogo ia Sesu kia Sehova ia aluʼaga fuli pe. (Lau ia Soane 8:29.) Loga la te fakafeagai, kae neʼe fai e Sesu ia meʼa fuli neʼe kole age e tana Tamai ʼo kaku ʼosi pe ki tona mate. Neʼe ina fakaha ai ʼe feala ke tauhi te tagata ki te ʼAtua, tatau aipe pe ʼe faigataʼa. Koia, neʼe tuku mai e Sesu ‘he faʼifaʼitakiʼaga ke tou mulimuli fakalelei ki ai.’—1 Petelo 2:21.

TA FAKALOLOTO

Ta vakaʼi te ʼu gaue pea mo te ʼu milakulo ʼae neʼe fai e Sesu.

4. Neʼe ina tala te logo lelei

Neʼe tonu ke iloʼi e te hahaʼi fuli ia te logo lelei. Koia, neʼe haele ai Sesu ʼi ni lauʼi kilometa, ʼi he ʼu ala efuʼia. Lau ia Luka 8:1, pea fai te ʼu fehuʼi ʼaeni:

Neʼe faifakamafola pe koa ia Sesu ki te hahaʼi ʼae neʼe omai ʼo fagono kia ia?
Kotea neʼe fai e Sesu ke felaveʼi ai mo te hahaʼi?

Neʼe fakakikite e te ʼAtua ʼe tala anai e te Mesia he logo lelei. Lau ia Esaia 61:1, 2 pea fai te ʼu fehuʼi ʼaeni:

Neʼe fakahoko feafeaʼi e Sesu te lea fakapolofeta ʼaia?
ʼI tau manatu la, ʼe ʼaoga koa ke logo te hahaʼi ki te logo lelei ʼaia?

5. Neʼe ina akoʼi ni moʼoni maʼuhiga

Neʼe fakamafola e Sesu te logo lelei ʼo te Puleʼaga ʼo te ʼAtua. Kae neʼe ina toe akoʼi he ʼu ako maʼuhiga. Ta vakaʼi he ʼu faʼifaʼitaki mai tana Akonaki ʼi te moʼuga. Lau ia Mateo 6:14, 34 mo te 7:12, pea fai te ʼu fehuʼi ʼaeni:

Kotea te ʼu tokoni ʼaoga neʼe fakaha e Sesu ʼi te ʼu vaega ʼaeni?
Kia koe la ʼe kei ʼaoga koa ia ʼaho nei te ʼu tokoni ʼaia?

6. Neʼe ina fai he ʼu milakulo

Neʼe foaki e Sehova te malohi kia Sesu moʼo fakahoko ni tuʼuga milakulo. Ta toʼo he faʼifaʼitaki: Lau ia Maleko 5:25-34 peʼe vakaʼi te ʼATA VITEO. Pea fai te ʼu fehuʼi ʼae ʼe hoa mai ki ai.

ʼATA VITEO: ʼE Fakamalolo ʼe Sesu He Fafine ʼe Mahaki (5:10)

Kotea ʼae neʼe tui papau ki ai te fafine ʼae neʼe mahaki?
Kotea ʼe ke leleiʼia ʼi te milakulo ʼaeni?

Lau ia Soane 5:36, pea fai te fehuʼi ʼaeni:

ʼI te ʼu milakulo ʼae neʼe fai e Sesu, kotea ʼae ʼe “fakamoʼoni” ai?

Kua ke iloʼi koa?

ʼE tou iloʼi te maʼuli ʼo Sesu ʼi te ʼu tohi ʼaeni ʼe fa ʼo te Tohi-Tapu, ʼae ʼe ui ko te ʼu Evaselio: ko Mateo, mo Maleko, mo Luka pea mo Soane. ʼE tahi maʼu ai te ʼu manatu kehekehe ʼo ʼuhiga mo Sesu. Pea ka tou lau te ʼu tohi ʼaia ʼe fa, ʼe tou fiafia ʼi te iloʼi lelei age ia tona maʼuli.

MATEO

Ko ia ʼae neʼe ina ʼuluaki tohi tana Evaselio. ʼE ina fakamaʼuhigaʼi te ʼu akonaki ʼa Sesu, tafito moka talanoa ki te Puleʼaga ʼo te ʼAtua.
MALEKO

Ko tana Evaselio ʼae ʼe nounou. ʼE lahi te ʼu aluʼaga neʼe ina tohi pea ʼe maʼuli moka ina fakamatala.
LUKA

Neʼe ina fakamaʼuhiga te faikole mo te agalelei ʼa Sesu ki te hahaʼi fafine.
SOANE

ʼE talanoa ki te ʼu faipalalau ʼa Sesu mo ʼona kaumeʼa peʼe ko ʼihi hahaʼi. Pea ʼe lahi te ʼu faʼahi ʼe tou ako ai ʼo ʼuhiga mo te agaaga ʼo Sesu.