KAMATA HE FAIPALALAU
AKO 5
Tou Aga Fakaʼeteʼete
Pelesepeto: “Ke lelei tuʼumaʼu ʼakotou palalau.”—Kol. 4:6.
Te Meʼa ʼAe Neʼe Fai e Paulo
1. Sioʼi te ʼATA VITEO, peʼe lau ia Gaue 17:22, 23. Pea tali ki te ʼu fehuʼi ʼaeni:
-
Kotea ʼae neʼe logoʼi e Paulo ʼi tana sio ki te fai ʼo te tauhi hala ʼi Ateni?—Vakaʼi ia Gaue 17:16.
Kotea ʼAe ʼe Tou Ako Mai Ai?
2. Kapau ʼe ke loto ke fia fakalogo atu he tahi, filifili leleiʼi ʼau palalau, mo te temi pea mo tona faʼahiga ui age.
Faʼifaʼitakiʼi Ia Paulo
3. Tokaga ki ʼau palalau. Ohage la, kapau ʼe ke palalau ki he tahi ʼe mole hana lotu, ke ke tokagaʼi te faʼahi ʼaia moka ke palalau age ki te Tohi-Tapu peʼe ko Sesu.
4. ʼAua naʼa ke foimo ui age ʼe hala tana manatu. Tuku te kilisitiano ʼaia ke ina fakaha tana manatu, maʼia pe mole alu tahi tana manatu mo te Tohi-Tapu. (Sakp. 1:19) Ka ke toʼo he temi ke ke fagono ki ai, ʼe ke iloʼi lelei age anai ia ia pea mo te ʼu akonaki ʼe tui ki ai.—Taag. 20:5.
5. Ka kita sio ʼe lelei tana manatu, tou fakamoʼoni mo fakavikiviki ki ai. ʼE lagi ina toʼo fakamalotoloto te ʼu akonaki ʼae ʼe tui ki ai. Faiga muʼa ke maʼu he ʼu felogoi lelei mo ia, pea ke tokoni mamalie ki ai ke ina tali te manatu ʼae ʼe akoʼi mai ʼi te Tohi-Tapu.
