ʼE MOLE ke gaue ʼi te ʼaho ʼaia, pea ʼe ke teuteu ke ke alu ʼo faifakamafola. Kaʼe ʼe ke logo gaʼegaʼe. ʼI meʼa lelei foki mo kapau ʼe hoko atu tau malolō! Kaʼe ʼe ke faikole pea hoki ke alu ai ʼo faifakamafola. ʼE ke hoa mo te tuagaʼane finematuʼa pea mo agatonu. ʼE malave kia koe ia tana faʼa kataki pea mo tana agalelei. Pea tahi, ʼi tau palalau ʼi te ʼu ʼapi ki te moʼoni, ʼe ke fakakaukauʼi ʼe toe fai feia pe ʼou tehina mo tuagaʼane ʼi te malamanei. ʼE tatau te logo ʼae ʼe tou tala, mo te ʼu tohi ʼae ʼe tou fakaʼaogaʼi pea mo te akoako ʼo tatou ki te faifakamafola. ʼI tau toe liliu ki ʼo koe, ʼe ke logo malohi. ʼE ke fiafia ʼi tau mole nofo ʼi fale!

Ia ʼaho nei, ʼe tokaga tafitō te Puleʼaga ʼo te ʼAtua ki te gaue faifakamafola. Neʼe fakakikite e Sesu ʼe mafola anai te fakahoko ʼo te gaue ʼaia ʼi te ʼu ʼaho fakaʼosi. (Mat. 24:14) Neʼe hoko feafeaʼi te fakakikite ʼaia? ʼI te faʼahi 2 ʼaeni, ʼe tou vakaʼi anai te hahaʼi ʼae ʼe faifakamafola, mo te ʼu faʼahiga fai ʼo te gaue ʼaia pea mo te ʼu meʼa gaue ʼae ʼe fakaʼaogaʼi. ʼE tokoni te gaue ʼaia ki te toko lau ʼi miliona hahaʼi ʼi te malamanei ke moʼoni kia natou ia te Puleʼaga ʼo te ʼAtua.