KAPITE 6
Te Hahaʼi ʼAe ʼe Faifakamafola—Ko Te Kau Faifakamafola ʼe Natou Gaue ʼAki He Lotolelei
1, 2. Kotea te toe gaue lahi ʼae neʼe fakakikite e Sesu, pea ko te fehuʼi maʼuhiga fea ʼae ʼe lagaʼi?
ʼE TAUTAU fai e te kau takitaki politike he ʼu fakapapau kaʼe ʼe mole natou fakahoko. Pea maʼia mo te kau takitaki ʼae ʼe fakamalotoloto, ʼe mole lagi natou maʼu ia te malohi moʼo fakahoko ʼanatou fakapapau. Kaʼe meʼa lelei foki he ʼe mole feia ia te Hau Fakamesia, ia Sesu Kilisito. ʼE ina fakahoko tuʼumaʼu pe ʼana fakapapau.
2 Hili te fakanofo Hau ʼo Sesu ʼi te taʼu 1914, neʼe kua feala leva ke ina fakahoko ia te faʼahi ʼae neʼe ina fakakikite kua hili ki ai taʼu ʼe 1 900. ʼI muʼa ʼo tana mate, neʼe ina fakakikite ia te faʼahi ʼaeni: “E fakamafola anai te logo lelei aeni o te puleaga i te malamanei katoa.” (Mat. 24:14) Ko te hoko ʼo te ʼu palalau ʼaia ʼe kau ki te fakaʼiloga ʼo te ʼi heni ʼa Sesu ʼi tona ʼuhiga Hau. Kaʼe ʼe lagaʼi ai ia te fehuʼi maʼuhiga ʼaeni: ʼE lava maʼu feafeaʼi e te Hau ia he kau faifakamafola kaugā malie ʼi te ʼu ʼaho fakamuli? Koteʼuhi ʼi te temi ʼaia, ʼe tokolahi ai te hahaʼi ʼe natou manatu pe kia natou, mo heʼe ʼofa pea mo heʼe lotu. (Mat. 24:12; 2 Tim. 3:1-5) Ko te kau Kilisitiano moʼoni fuli ʼe tonu ke natou iloʼi te tali ki te fehuʼi ʼaia.
3. Kotea ʼae neʼe falala ki ai ia Sesu, pea neʼe ina maʼu feafeaʼi ia te taʼi lotofalala ʼaia?
3 Tou toe vakaʼi ia te fakakikite ʼae neʼe fai e Sesu. ʼI tana ui ʼae “e fakamafola anai,” ʼe ha lelei ai tana lotofalala. He neʼe tui papau ia ʼe ʼi ai pe anai te hahaʼi ʼe natou lagolago kia te ia ʼaki he lotolelei ʼi te ʼu ʼaho fakamuli. Neʼe ina maʼu feafeaʼi ia te taʼi lotofalala ʼaia? Neʼe ina faʼifaʼitakiʼi tana Tamai. (Soa. 12:45; 14:9) ʼI muʼa ʼo tana maʼuli ʼi te kele, neʼe sio ia Sesu ʼi selo ki te falala ʼa Sehova ʼe tauhi ʼAna kaugana kia te ia ʼaki he lotolelei. Tou vakaʼi pe neʼe fakaha feafeaʼi e Sehova tana lotofalala ʼaia.
“Ko Tau Hahaʼi ʼe Natou Foaki Anai Ia Natou ʼAki He Lotolelei”
4. Kotea te gaue ʼae neʼe kole e Sehova ke lagolago ki ai te kau Iselaele, pea kotea ʼae neʼe natou fai?
4 ʼE lagi ke manatuʼi te temi ʼae neʼe fakatotonu ai e Sehova kia Moisese ke ina laga ia te tapenakulo, te fale la ʼae neʼe tauhi ai te kau Iselaele kia Sehova. Neʼe ui e Sehova kia Moisese ke ina kole ki te hahaʼi ke natou lagolago ki te gaue. Neʼe ui fenei e Moisese kia natou: “Ko te u tagata fuli e lotolelei, e natou aumai anai he molaga [kia Sehova].” Pea kotea ʼae neʼe fai e te hahaʼi? ʼI te uhu fuli, neʼe natou “ave tuumau . . . ni molaga i te lotolelei.” ʼI te lahi fau ʼo te ʼu meʼa ʼofa, neʼe maʼua ai ke “taofi . . . te fai meaofa.” (Eke. 35:5; 36:3, 6) Koia, neʼe moʼoni pe te falala ʼa Sehova ki te kau Iselaele.
5, 6. Ohage ko tona fakakikite ia Pesalemo 110:1-3, ko te faʼahiga manatu fea neʼe falala ia Sehova pea mo Sesu ʼe maʼu anai e te kau atolasio moʼoni ʼi te ʼu ʼaho fakamuli?
5 Neʼe toe falala pe ia Sehova ʼe toe feia anai mo tana hahaʼi tauhi ʼi te ʼu ʼaho fakamuli. Koteʼuhi ia taʼu ʼe 1 000 tupu ʼi muʼa ʼo te tupu ʼa Sesu, neʼe takitaki e Sehova ia Tavite ke faifakakikite ʼo ʼuhiga mo te temi ʼae ka kamata ʼafio ai te Mesia. (Lau ia Pesalemo 110:1, 2.) ʼE ʼi ai anai ni fili ʼe natou fakafeagai kia Sesu, te Hau foʼou. Pea ʼe toe hoko atu fenei ʼi te vaega 3, MN: “Ko tau hahaʼi ʼe natou foaki anai ia natou ʼaki he lotolelei ʼi te ʼaho ʼo ʼou malohi fakasolia. ʼI te taulekaleka ʼo te maʼoniʼoni, ʼi te mafoa ʼo te ʼaho, kua ʼi ai tau kau tupulaga ohage ko he ʼu mosi ʼi hahau.” Koia, ʼe kaugā malie anai natou ʼae ka lagolago ki te Hau ʼaia. ʼE mole fakakinauʼi natou ke natou tauhi kia te ia. Maʼia mo te hahaʼi tupulaga ʼe natou lotolelei anai ʼo foaki ia natou, pea ʼe fakatatau natou ki he ʼu mosi ʼi hahau. a
6 Neʼe iloʼi e Sesu neʼe fakaʼuhiga kia ia ia te lea fakapolofeta ʼae ia Pesalemo 110. (Mat. 22:42-45) Koia, neʼe feala ai ke falala ʼe ʼi ai pe anai hana hahaʼi lagolago pea mo agatonu, ʼe natou lotolelei anai ʼo fakamafola ia te logo lelei ʼi te kele katoa. Kotea ʼae neʼe hoko ʼaki te teka ʼo te temi? Neʼe fakatuʼu koa e te Hau hana kau faifakamafola ʼe natou gaue ʼaki he lotolelei ʼi te ʼu ʼaho fakamuli ʼaeni?
“ ʼE Au Maʼu Te Pilivilesio Pea Mo Te Maʼua ʼAe Ke Au Tala Ia Te Logo ʼAia”
7. Hili te fakanofo Hau ʼo Sesu, kotea ʼae neʼe ina fai moʼo teuteuʼi ʼana tisipulo ki te gaue ʼae ka natou fakahoko?
7 Hili pe te fakanofo Hau ʼo Sesu, neʼe ina teuteuʼi ʼana tisipulo ki he toe gaue lahi ke natou fakahoko. Ohage ko tatatou vakaʼi ʼi te Kapite 2, neʼe ina ʼaʼahi pea mo fakamaʼa tana hahaʼi, ʼo kamata mai te taʼu 1914 ki te taʼu 1919. (Mala. 3:1-4) Pea ʼi te taʼu 1919, neʼe ina fakanofo leva ia te tagata faifekau agatonu moʼo takitaki ʼana tisipulo. (Mat. 24:45) Talu mai te taʼu ʼaia, neʼe kamata tufa e te tagata faifekau ia te meʼa kai fakalaumalie, ʼaki he ʼu akonaki ʼi te ʼu fakatahi lalahi pea mo te ʼu tohi, ʼo fakamanatuʼi tuʼumaʼu ai ia te maʼua ʼa te kau Kilisitiano fuli ke natou faifakamafola.
8-10. ʼI te ʼu fakatahi lalahi, neʼe feafeaʼi te fakalotomalohiʼi ʼo te kau Kilisitiano ke natou faifakamafola? Tuku mai he faʼifaʼitaki. (Vakaʼi mo te fakamatala ʼae ʼi te ʼa takai “ Te ʼu ʼUluaki Fakatahi ʼAe Neʼe Fakalotomalohiʼi Ai Ki Te Faifakamafola.”)
8 Te ʼu akonaki ʼi te ʼu fakatahi lalahi. Neʼe fakatahi te Kau Ako ʼo Te Tohi-Tapu ʼi Cedar Point, ʼi Amelika, mai te ʼaho 1 ki te ʼaho 8 ʼo Sepetepeli 1919. Neʼe ko te hoki fai ʼaia ʼo tanatou fakatahi lahi hili te ʼUluaki Tau Fakamalamanei. ʼI te lua ʼaho, neʼe fai e te tehina ko Rutherford ia te akonaki pea neʼe fakahagahaga ʼana palalau ki te kau teleke, ʼo ina ui fenei: “Ko te gaue ʼa te kau Kilisitiano ʼi te kele . . . ʼe ko te tala ʼo te logo ʼo te puleʼaga ʼa te ʼAliki.”
9 Neʼe hoko te aluʼaga maʼuhiga ʼi te tolu ʼaho ʼo te fakatahi lahi ʼaia. Neʼe fai e te tehina ko Rutherford ia te akonaki ʼae ko tona kupu tafitō “Akonaki Ki Te ʼu Kaugā Gaue.” Neʼe ta ia te akonaki ʼaia ʼi Te Tule Leʼo ʼi tona kupu tafitō “ ʼE Ina Tala Ia Te Puleʼaga.” Neʼe ui fenei e te tehina: “ ʼI te ʼu temi tokalelei, ʼe feʼekeʼaki fenei anai he Kilisitiano: ‘Kotea te tupuʼaga ʼo taku ʼi te kele?’ Pea ʼe ko te tali ʼaeni ʼe ina fai: ‘Neʼe manavaʼofa te ʼAliki ʼo ina fakanofo au ko hana tagata fakafofoga, ke au ʼave te logo fakaʼatua ʼaeni ʼo te fakatokatoka ki te malamanei, pea ʼe au maʼu te pilivilesio pea mo te maʼua ʼae ke au tala ia te logo ʼaia.ʼ ”
10 Pea ʼi te akonaki ʼaia, neʼe tala ifo e te tehina ko Rutherford ia te ta ʼo te nusipepa foʼou, te LʼÂge dʼOr (ʼi te temi nei ko te Réveillez-vous !). ʼE fakaʼaogaʼi te nusipepa ʼaia moʼo fakaha ki te hahaʼi, ʼe ko te Puleʼaga ia te puleʼaki pe ʼaia ʼe tahi ki te ʼu fihifihia ʼo te malamanei. Neʼe ina fehuʼi leva ki te nofoʼaki pe ko te tokofia ʼe natou fia kau ki te tufa ʼo te nusipepa ʼaia. Neʼe tohi fenei ʼi te fakamatala neʼe fai ʼo ʼuhiga mo te fakatahi ʼaia: “Neʼe hoko ai te aluʼaga fakatalakitupua. Ko te toko ono afe hahaʼi, neʼe natou tutuʼu ake.” b ʼE mahino ia, neʼe maʼu e te Hau tana hahaʼi lagolago neʼe natou lotolelei ke natou tala tona Puleʼaga!
11, 12. ʼI Te Tule Leʼo ʼo te taʼu 1920, kotea ʼae neʼe ui ai ʼo ʼuhiga mo te temi ʼae neʼe tonu ke fakahoko ai te gaue ʼae neʼe fakakikite e Sesu?
11 Te ʼu tohi. ʼAki Te Tule Leʼo, neʼe mahino lelei ai te kau Kilisitiano ki te gaue ʼae neʼe fakakikite e Sesu, ʼae ko te fakamafola ia te logo lelei ʼo te Puleʼaga. Koʼeni ʼihi fakamahino neʼe fai ʼi te kamata ʼo te ʼu taʼu 1920.
12 Moʼo fakahoko ia Mateo 24:14, kotea te logo ʼae neʼe tonu ke fakamafola? Ko te temi fea ʼae neʼe tonu ke fakahoko ai te gaue ʼaia? ʼI Te Tule Leʼo ʼo te ʼaho 1 ʼo Sulio 1920, ʼi te alatike ʼae ko tona kupu tafitō “Te Evaselio ʼo Te Puleʼaga,” neʼe fakamahino ai pe kotea te logo ʼaia. Neʼe ui fenei ai: “ ʼE ko te logo lelei ʼaeni ʼe tonu ke tala: Te pulihi ʼo te malama ʼafeā pea mo te fakatuʼu ʼo te puleʼaga Fakamesia.” Neʼe fakaha lelei ʼi te alatike ʼaia pe ko te temi fea ʼae ʼe fakamafola ai te logo ʼaia, ʼo ui fenei ai: “ ʼE tonu ke tala ia te logo ʼaia ʼo kamata ʼi te tau lahi fakamalamanei [te ʼUluaki Tau Fakamalamanei] ʼo kaku ki te ‘mamahi lahi.ʼ ” Pea neʼe hoko atu fenei ʼi te alatike: “ ʼE ko te temi ʼaeni . . . ʼe tonu ai ke fakamafola ia te logo lelei ki te ʼu lotu fuli ʼae ʼe natou ui ʼe natou tui kia Kilisito.”
13. ʼI Te Tule Leʼo ʼo te taʼu 1921, kotea ʼae neʼe ui ʼo ʼuhiga mo te lotolelei ʼae neʼe maʼu e te kau Kilisitiano fakanofo?
13 ʼE fakakinauʼi anai koa te hahaʼi ʼa te ʼAtua ke natou fakahoko ia te gaue ʼae neʼe fakakikite e Sesu? Kailoa ia. ʼI te alatike ko tona kupu tafitō “Kotou Lototoʼa” ʼi Te Tule Leʼo ʼo te ʼaho 15 ʼo Malesio 1921, neʼe talanoa ai ki te lotolelei ʼa te kau Kilisitiano ʼo fakahoko ia te gaue ʼaia. Neʼe fakalotomalohiʼi ai natou ke natou tahi fai ia te fehuʼi ʼaeni: “ ʼE mole koa la ko hoku pilivilesio lahi ʼaia pea mo hoku maʼua, ke au kau ki te gaue ʼaia?” Neʼe hoko atu fenei ʼi te alatike: “ ʼE matou tui papau, kapau ʼe kotou mahino ki ai [ia te pilivilesio ʼae ke kotou kau ki te gaue ʼaia], pea ʼe kotou tatau anai mo Selemia, ʼae neʼe hage kia ia te folafola ʼa te ʼAliki ko ‘he afi kakaha, ae e nofo i [ʼona] hui,ʼ neʼe mole feala ke tuku ai tana palalau.” (Sel. 20:9) Neʼe ha ʼi te fakalotomalohi ʼaia ia te falala ʼa Sehova pea mo Sesu ki tanā hahaʼi lagolago mo agatonu ʼo te Puleʼaga.
14, 15. ʼI Te Tule Leʼo ʼo te taʼu 1922, neʼe tonu ke fakakaku feafeaʼi e te kau Kilisitiano fakanofo ia te logo ki te hahaʼi?
14 ʼE tonu ke fakakaku feafeaʼi e te kau Kilisitiano moʼoni ia te logo ʼo te Puleʼaga ki te hahaʼi? ʼI Te Tule Leʼo ʼo te ʼaho 15 ʼo ʼAukusito 1922, neʼe ta ai ia te alatike nounou kaʼe maʼuhiga ko tona kupu tafitō “Te Selevisi ʼe Maʼuhiga.” Neʼe uga ai ia te kau Kilisitiano fakanofo ke natou “faʼafai ʼo ʼave te logo ʼae ʼi te ʼu tohi ki te hahaʼi pea mo palalau mo natou ʼi ʼonatou ʼapi, pea mo fakaha kua ovi mai te puleʼaga ʼo selo.”
15 ʼE ha lelei ai, talu mai te taʼu 1919 mo te fakaʼaogaʼi e Kilisito tana tagata faifekau agatonu mo poto moʼo fakaha tuʼumaʼu ʼe ko he pilivilesio pea mo he maʼua ki he Kilisitiano ʼi te kele ke ina tala te logo ʼo te Puleʼaga. Kaʼe kotea ʼae neʼe fai e te kau ʼuluaki Kau Ako ʼo Te Tohi-Tapu ʼi tonatou fakalotomalohiʼi ʼae ke natou tala te Puleʼaga?
“Ko Natou ʼAe ʼe Agatonu ʼe Ko Natou ʼAe Ka Lotolelei Anai ʼo Faifakamafola”
16. Kotea ʼae neʼe fai e ʼihi tagata ʼafeā ʼi te fakalotomalohiʼi ʼae ke natou kau ki te faifakamafola?
16 ʼI te ʼu taʼu 1920 pea mo 1930, neʼe mole tali e ʼihi te manatu ʼae ʼe ko te kau Kilisitiano fakanofo fuli ʼae ʼe tonu ke faifakamafola. ʼI Te Tule Leʼo ʼo te ʼaho 1 ʼo Novepeli 1927, neʼe fakamahino ai te meʼa ʼae neʼe hoko: “ ʼE ʼi ai natou ʼae ʼi te [kokelekasio] ʼe natou maʼu ia te tuʼulaga tagata ʼafeā . . . ʼe mole natou fia fakalotomalohiʼi ʼonatou tehina ke natou faifakamafola, pea ʼe mole natou fia faifakamafola. . . . Neʼe mole maʼuhiga kia natou te manatu ʼae ke natou olo ʼi te ʼu ʼapi ʼo ʼave ki te hahaʼi ia te logo ʼo te ʼAtua, mo tona Hau pea mo tona puleʼaga.” Neʼe ui fenei ʼi te alatike ʼaia: “Neʼe hoko leva te temi ʼae neʼe tonu ai kia natou ʼae ʼe agatonu ke natou fakatonutonuʼi natou ʼaia pea ke mole kei fakatahi mo natou, pea mo ui age ʼe mole kei natou tagata ʼafeā.” c
17, 18. Neʼe tali feafeaʼi e te tokolahi ʼi te ʼu kokelekasio ia te takitaki ʼa te tagata faifekau agatonu? Pea ʼi te ʼu taʼu ʼe 100 ʼaeni kua hili, neʼe tali feafeaʼi ki ai te toko lau ʼi miliona?
17 ʼI meʼa fakafiafia foki he ʼe tokolahi ʼi te ʼu kokelekasio neʼe natou mulimuli ki te takitaki ʼa te tagata faifekau agatonu. Neʼe ko he pilivilesio kia natou hanatou tala ia te logo ʼo te Puleʼaga. Neʼe ui fenei ʼi Te Tule Leʼo ʼo te ʼaho 15 ʼo Malesio 1926: “Ko natou ʼae ʼe agatonu ʼe ko natou ʼae ka lotolelei anai ʼo faifakamafola ki te hahaʼi.” Ko te kau agatonu ʼaia neʼe natou fakahoko ia te lea fakapolofeta ʼo Pesalemo 110:3, pea neʼe natou lagolago ʼaki he lotolelei ki te Hau Fakamesia.
18 ʼI te ʼu taʼu ʼe 100 ʼaeni kua hili, ko te toko lau ʼi miliona neʼe natou foaki ia natou ʼaki he lotolelei moʼo fakamafola ia te Puleʼaga. ʼI te ʼu kapite ka hoko mai, ʼe tou vakaʼi anai pe neʼe feafeaʼi tanatou faifakamafola, mo ʼanatou faʼahiga fai pea mo ʼanatou meʼa gaue, pea neʼe kotea ʼona fua. Kaʼe, tou vakaʼi muʼa pe ko ʼe ʼe ko te toko lau ʼi miliona ʼe kau ʼaki he lotolelei ki te fakamafola ʼo te Puleʼaga, ʼi he malama ʼe manatu pe te hahaʼi kia natou. ʼI tatatou vakaʼi ia te faʼahi ʼaia, ʼe tou fai anai kia tatou takitokotahi ia te fehuʼi ʼaeni: “He ko ʼe ʼe au tala ia te logo lelei?”
“Kotou Kumi Mua Te Puleaga”
19. He ko ʼe ʼe tou mulimuli ki te tokoni ʼa Sesu ʼae ke tou “kumi mua te puleaga”?
19 Neʼe tokoni ia Sesu ki ʼana tisipulo ke natou “kumi mua te puleaga.” (Mat. 6:33) He ko ʼe ʼe tou mulimuli ki te tokoni ʼaia? Koteʼuhi ʼe tou mahino ki te maʼuhiga ʼo te Puleʼaga, ʼae ʼe ko te koga tafitō ʼo te fakatuʼutuʼu ʼa te ʼAtua. Ohage ko te meʼa ʼae neʼe tou vakaʼi ʼi te kapite ʼaeni kua ʼosi, neʼe fakaha mamalie e te laumalie maʼoniʼoni ia te ʼu moʼoni maʼuhiga ʼo ʼuhiga mo te Puleʼaga. Ka malave te ʼu moʼoni maʼuhiga ʼaia ki totatou loto, ʼe uga ai tatou ke tou kumi muʼa ia te Puleʼaga ʼaia.
20. ʼE fakaha feafeaʼi ʼi te lea fakata ʼa Sesu ʼo te koloa ʼae neʼe fufu, te faʼahiga tali ʼo ʼana tisipulo ki te tokoni ʼae ke natou haga kumi muʼa ia te Puleʼaga?
20 Neʼe kua iloʼi e Sesu te faʼahiga tali ʼo ʼana tisipulo ki te tokoni ʼae ke natou haga kumi muʼa ia te Puleʼaga. Tou vakaʼi ia tana lea fakata ʼo he koloa neʼe fufu. (Lau ia Mateo 13:44.) ʼI te lea fakata ʼaia, neʼe maʼu e he tagata gaue kele lolotoga tana gaue ia he koloa neʼe fufu, pea neʼe mahino atu aipe ʼe ko he koloa maʼuhiga. Kotea ʼae neʼe ina fai? “I tona fiafia, e alu ia ia o fakatau te u mea fuli nee ina mau, pea e ina totogi te gaueaga aia.” Kotea te ako kia tatou? Ka tou maʼu ia te ʼu moʼoni ʼo te Puleʼaga pea mo tou mahino ki tona maʼuhiga, ʼe tou fai ni sakilifisio ke tou fakamuʼamuʼa tuʼumaʼu ʼi totatou maʼuli ia te ʼu gaue ʼo te Puleʼaga. d
21, 22. ʼE fakaha feafeaʼi e te kau lagolago agatonu ʼo te Puleʼaga ʼe natou kumi muʼa ia te Puleʼaga? Tuku mai he faʼifaʼitaki.
21 Ko natou ʼae ʼe lagolago agatonu ki te Puleʼaga, ʼe mole gata pe tanatou ui ʼae ʼe natou kumi muʼa ia te Puleʼaga. Kaʼe ʼe natou toe fakaha ʼaki he ʼu gaue. ʼE natou foaki tonatou maʼuli katoa, mo ʼonatou fealagia pea mo ʼonatou koloa moʼo fakamafola ia te Puleʼaga. Tokolahi neʼe natou fai ni sakilifisio ke feala hanatou hoko atu tanatou faifakamafola temi katoa. Ko te kau faifakamafola lotolelei fuli ʼaia, neʼe natou sisio mata ki tonatou tapuaki’i e Sehova he ʼe natou fakamuʼamuʼa ia te Puleʼaga. Tou vakaʼi te faʼifaʼitaki ʼaeni.
22 Ko te taumatuʼa ko Avery mo Lovenia Bristow neʼe nā pionie ʼi te potu saute ʼo Amelika ʼi te kamata ʼo te ʼu taʼu 1920. Ki muli age, neʼe manatuʼi fenei e te tuagaʼane ko Lovenia: “Talu mai ai mo tamā fiafia ʼi tamā pionie. Neʼe lahi te ʼu lakaga neʼe mole ma iloʼi pe ko ai ʼae neʼe ina foaki mai te foʼi falā ki tamā moʼi penisini peʼe ko te meʼa kai. Neʼe tokaga tuʼumaʼu pe ia Sehova kia maua. Neʼe hoko atu tamā pionie. Neʼe ma maʼu tuʼumaʼu pe te ʼu meʼa ʼae neʼe ʼaoga kia maua.” Neʼe manatuʼi e Lovenia tanā faifakamafola ʼi te kolo ko Pensacola, ʼi Floride, pea neʼe mole kei ʼi ai hanā foʼi falā pea mo hanā meʼa kai. ʼI tanā toe liliu ki tonā ʼapi, neʼe nā maʼu te ʼu kato meʼa kai ʼe lua pea mo te pepa neʼe tohi fenei ai: “Tomatou ʼofa ʼe ʼavatu, mai te Kokelekasio ʼo Pensacola.” ʼI tana manatuʼi ia te ʼu taʼu ʼaia ʼae neʼe pionie ai, neʼe ui fenei e Lovenia: “Neʼe mole liʼakina maua ʼi he temi e Sehova. Neʼe ina tapuakiʼi tuʼumaʼu pe maua, ʼuhi ko tamā falala ʼae kia te ia.”
23. Kotea tau manatu ʼo ʼuhiga mo te ʼu moʼoni ʼo te Puleʼaga ʼae neʼe ke maʼu, pea kotea ʼae ʼe ke fakatotonu ke ke fai?
23 ʼE mole tatau totatou temi faifakamafola, he ʼe kehekehe ʼotatou aluʼaga. Kaʼe kia tatou fuli, ʼe ko hotatou pilivilesio te tala ʼaki totatou loto katoa ia te logo lelei. (Kol. 3:23) ʼE maʼuhiga kia tatou ia te ʼu moʼoni ʼo te Puleʼaga ʼae neʼe tou maʼu. Koia, ʼe tou lotolelei ai ke tou fai te ʼu sakilifisio ʼae ʼe ʼaoga ke feala hatatou lagolago malohi ki te gaue ʼaia. ʼE mole koa la ko te faʼahi ʼaia ʼe ke fakatotonu ke ke fai?
24. Kotea te toe gaue lahi neʼe fai e te Puleʼaga ʼi te ʼu ʼaho fakamuli?
24 ʼI te ʼu taʼu ʼaeni ʼe teau kua hili, neʼe fakahoko e te Hau ia te faʼahi ʼae neʼe ina fakakikite pea ʼe tuʼu ia Mateo 24:14. Pea neʼe mole ina fakakinauʼi tana hahaʼi ke natou fakahoko ia te faʼahi ʼaia. ʼI te mavae ʼa tana hahaʼi mai te malamanei ʼae ʼe tahi manatu pe kia ia, neʼe natou lotolelei ʼo fakahoko ia te gaue faifakamafola. Ko tanatou fakamafola te logo lelei ʼi te kele katoa, ʼe ko he agaaga ʼaia ʼo te fakaʼiloga ʼo te ʼi heni ʼa Sesu ʼi tona ʼuhiga Hau kua fakanofo, pea ʼe ko te toe gaue lahi ʼaia ʼe fai e te Puleʼaga ʼi te ʼu ʼaho fakamuli.
a ʼI te Tohi-Tapu, ko te hahau ʼe ina fakata ia te mahu.—Sen. 27:28; Mik. 5:7.
b ʼI te kiʼi kaupepa “ ʼE Foaki Kia Ai Te Gaue” (Fakapilitania) neʼe fakamahino fenei ai: “Ko te gaue ʼo te LʼÂge dʼOr ʼe ko te fakamafola ia te logo ʼo ʼuhiga mo te puleʼaga. . . . ʼO hilifaki ki te fakaha ʼo te logo, ʼe toe tuku ʼi te ʼu ʼapi ia te nusipepa LʼÂge dʼOr.” ʼI te ʼu taʼu ki muli age, neʼe fakalotomalohiʼi ia te ʼu tehina ke natou fakaui ki te hahaʼi pe natou loto ke momoli tuʼumaʼu age ia te LʼÂge dʼOr pea mo Te Tule Leʼo. ʼO kamata ʼi te ʼaho 1 ʼo Fepualio 1940, neʼe fakalotomalohiʼi ia te hahaʼi ʼa Sehova ke natou tufa pea mo tohi te ʼu nusipepa ʼae neʼe natou tufa.
c ʼI te temi ʼaia, neʼe voteʼi e te kokelekasio ia te kau tagata ʼafeā. Koia, neʼe feala ke fakafisi ia he kokelekasio ke natou vote maʼa te ʼu tehina ʼae neʼe mole fia faifakamafola. ʼE tou vakaʼi anai ʼi te Kapite 12, te fetogi leva ʼae neʼe hoko, ʼae ko te fakanofo ʼo te kau tagata ʼafeā ʼo mulimuli ki te ʼu fakamaʼua ʼi te Tohi-Tapu.
d Neʼe toe talanoa ia Sesu ki te manatu ʼaia ʼi te lea fakata ʼo te tagata faikoloa feʼaluʼaki, neʼe ina kumi ia te mata ʼi tofe maʼuhiga ʼaupito. ʼI tana maʼu, neʼe fakatau e te tagata ʼaia ʼana meʼa fuli pea ina totogi. (Mat. 13:45, 46) ʼE tou ako mai te ʼu lea fakata ʼaia ʼe lua, ʼe kehekehe te ʼu aluʼaga ʼae ʼe tou maʼu ai te ʼu moʼoni ʼo te Puleʼaga. Ko ʼihi neʼe mole ʼaoga hanatou kumi kaʼe ko ʼihi neʼe natou faiga ʼo kumi. Kaʼe tatau aipe pe neʼe feafeaʼi tatatou maʼu ia te moʼoni, ʼe tou lotolelei ke tou fai te ʼu sakilifisio ke tou fakamuʼamuʼa ʼi totatou maʼuli ia te Puleʼaga.