KAPITE 10
ʼE Fakamaʼa e Te Hau Tana Hahaʼi
1-3. Kotea ʼae neʼe fai e Sesu ʼi tana sio ʼae neʼe kua ʼulihi ia te fale lotu?
NEʼE fakaʼapaʼapa lahi ia Sesu ki te fale lotu ʼae ʼi Selusalemi, koteʼuhi neʼe ko te potu tafitō ʼaia ʼi te kele ʼae neʼe fakahoko ai te tauhi moʼoni talu mai fualoa. Kaʼe ko te tauhi ʼaia kia Sehova, te ʼAtua maʼoniʼoni, ʼe tonu ke maʼa. Koia, fakakaukauʼi muʼa koe, pe neʼe feafeaʼi ia Sesu ʼi tana haʼu ʼae ki te fale lotu ʼi te ʼaho 10 ʼo Nisani ʼo te taʼu 33 H.T.S., pea mo sio ki tona kua ʼulihi. Kotea koa ʼae neʼe hoko?—Lau ia Mateo 21:12, 13.
2 ʼI te malaʼe ʼo te fale lotu, ko te kau faifakatau koloa manumanū pea mo te hahaʼi fetogi paʼaga neʼe natou kakaʼi te hahaʼi tauhi ʼae neʼe ʼomai ʼo foaki meʼa ʼofa kia Sehova. * Koia neʼe haga ia Sesu ʼo kapu ki tuʼa ia “natou fuli ae nee faifakatau pea mo faikoloa i te fale tapu; nee ina tokatokahi leva te u laupapa o te kau fetogi paaga.” (Vakaʼi mo Neemia 13:7-9.) Neʼe ui e Sesu ʼe fakaliliu e te hahaʼi ʼaia ia te ʼapi ʼo tana Tamai “ko he ana o te kau kaihaa.” Neʼe ina fakaha ai tana fakaʼapaʼapa ki te fale lotu pea mo te meʼa ʼae ʼe ina fakafofoga. Neʼe tonu ke taupau maʼa ia te tauhi ʼae ki tana Tamai.
3 Hili ki ai ni lau ʼi taʼu, ʼi tona ʼosi fakanofo ko te Hau Fakamesia, neʼe toe fakamaʼa e Sesu ia te tahi fale lotu. ʼE ʼaoga anai te fakamaʼa ʼaia kia natou fuli ʼae ia ʼaho nei ʼe natou fia tauhi lelei kia Sehova. Ko te fale lotu feafeaʼi ʼae neʼe ina fakamaʼa?
Te Fakamaʼa ʼo “Te u Foha o Levi”
4, 5. (1) Neʼe fakamaʼa feafeaʼi te kau Kilisitiano fakanofo ʼi te taʼu 1914 ki te taʼu 1919? (2) Neʼe gata ai koa te fakamaʼa ʼo te hahaʼi ʼa te ʼAtua? Fakamahino.
4 Ohage ko tatatou vakaʼi ʼi te Kapite 2 ʼo te tohi ʼaeni, hili tona fakanofo hau ʼi te taʼu 1914, neʼe haʼu ia Sesu mo tana Tamai ʼo vakavakaʼi ia te fale lotu fakalaumalie, ʼae ko te ʼu fakatuʼutuʼu ʼae neʼe fai ʼo ʼuhiga mo te tauhi maʼa. * Hili tanā vakavakaʼi ʼaia, neʼe tokagaʼi e te Hau te ʼaoga ʼae ke fakamaʼa te kau Kilisitiano fakanofo, ia “te u foha o Levi.” (Mala. 3:1-3) Koia, ʼo kamata mai te taʼu 1914 ki te taʼu 1919, neʼe fakamaʼa e Sehova ia tana hahaʼi. Neʼe ina tuku ke hoko kia natou ni faigataʼaia pea mo ni fakataga, ke fakamaʼa ai natou. Meʼa fakafiafia foki, koteʼuhi ʼi te hili ʼo te temi ʼaia, neʼe kua maʼa te kau Kilisitiano fakanofo pea mo natou lotomalohi ai ʼo fakaha tanatou lagolago ki te Hau Fakamesia.
5 Neʼe gata ai koa ia te fakamaʼa ʼo te hahaʼi ʼa te ʼAtua? Kailoa ia. ʼI te ʼu ʼaho fakamuli, ʼe hoko atu pe ia te tokoni ʼa Sehova, ʼaki ia te Hau Fakamesia, ki tana hahaʼi ke natou maʼa, ke feala hanatou nonofo ʼi te fale lotu fakalaumalie. ʼI te ʼu kapite ʼe lua ʼae ka hoa mai, ʼe tou vakaʼi anai pe neʼe ina fakamaʼa feafeaʼi natou ʼi te faʼahi ʼo tanatou aga pea mo fetogi te ’u fakatuʼutuʼu ʼo tana kautahi. Kaʼe tou vakaʼi muʼa tana fakamaʼa natou ʼi te faʼahi fakalaumalie. ʼE malohi anai tatatou tui moka ʼe tou vakaʼi te ʼu gaue ʼae neʼe fai e Sesu moʼo tokoni ki ʼana tisipulo ke natou maʼa ʼi te faʼahi fakalaumalie. Ko ʼihi faʼahiga fai neʼe ha lelei, pea ko ʼihi neʼe fakapulipuli.
“Koutou Fakamaa”
6. Kotea tatatou mahino ʼo ʼuhiga mo te maʼa fakalaumalie ʼaki te ʼu fakatotonu ʼae neʼe fai e Sehova ki te kau Iselaele ʼae neʼe ʼaunofo ʼi Papilone?
6 Kotea te fakaʼuhiga ʼo te maʼa ʼi te faʼahi fakalaumalie? Moʼo tali ki ai, tou vakaʼi te ʼu fakatotonu ʼae neʼe fai e Sehova ki te kau Sutea ʼae neʼe ʼaunofo ʼi Papilone, ʼi tanatou ʼamanaki mavae mai ai ʼi te taʼu 537 I.M.T.S. (Lau ia Esaia 52:11.) Neʼe toe liliu ia te kau Sutea ʼaia ki Selusalemi, tafitō ʼo toe laga ia te fale lotu pea mo toe fakatuʼu ia te tauhi maʼa. (Eseta. 1:2-4) Neʼe loto e Sehova ke ʼaua naʼa mulimuli tana hahaʼi ki he ʼu agaaga ʼo te lotu ʼi Papilone. Neʼe ina fakatotonu age fenei: “Aua naa koutou fafa ki he mea uli! Koutou mavae i lotomalie o ia! Koutou fakamaa.” Neʼe mole tonu ke natou fio ia te tauhi maʼa mo te tauhi hala. ʼE tou mahino ai, ko te maʼa ʼi te faʼahi fakalaumalie ko tona fakaʼuhiga ke mole tou mulimuli ki he ʼu akonaki pea mo he ʼu aga ʼo te lotu hala.
7. Kotea ʼae neʼe fakaʼaogaʼi e Sesu moʼo tokoni ki ʼana tisipulo ke natou maʼa ʼi te faʼahi fakalaumalie?
7 ʼI te hili ʼo tona fakanofo Hau, neʼe fakaʼaogaʼi e Sesu ia te tagata faifekau agatonu mo poto moʼo tokoni ki ʼana tisipulo ke natou maʼa ʼi te faʼahi fakalaumalie. Neʼe fakanofo e Kilisito ia te tagata faifekau ʼaia ʼi te taʼu 1919. (Mat. 24:45) ʼI te taʼu ʼaia, neʼe kua maʼa ia te Kau Ako ʼo Te Tohi-Tapu, he neʼe lahi te ʼu akonaki fakalotu hala neʼe mole kei natou tui ki ai. Kaʼe neʼe kei ʼi ai pe ʼihi faʼahi neʼe tonu ke fakamaʼa ai natou ʼi te faʼahi fakalaumalie. Koia neʼe fakaʼaogaʼi e Kilisito ia te tagata faifekau agatonu ʼaia moʼo fakamahino mamalie ki ʼana tisipulo te ʼu faʼahi ʼae neʼe tonu ke natou liakī. (Taag. 4:18) Tou vakaʼi he ʼu faʼifaʼitaki.
ʼE Tonu Koa Ke Fai e Te Kau Kilisitiano Te Po Tapu?
8. ʼO ʼuhiga mo te Po Tapu, kotea ʼae neʼe kua mahino fualoa ki ai e te Kau Ako ʼo Te Tohi-Tapu, kaʼe kotea ʼae neʼe heʼeki natou fai?
8 Neʼe kua fualoa te mahino ʼa te Kau Ako ʼo Te Tohi-Tapu neʼe haʼu te Po Tapu mai te ʼu lotu pagani pea neʼe mole tupu ia Sesu ʼi te ʼaho 25 ʼo Tesepeli. Neʼe ui fenei ʼi Te Tule Leʼo ʼo Tesepeli 1881: “Ko te toko lau ʼi miliona hahaʼi pagani neʼe liliu ko ni hahaʼi lotu. Kaʼe neʼe ko te higoa pe ʼae neʼe fetogi, ohage la neʼe liliu te kau pelepitelo pagani ko he kau pelepitelo Fakakilisitiano * Kaʼe ʼi te temi ʼaia, neʼe mole manatu ia te Kau Ako ʼo Te Tohi-Tapu ke natou tuku tanatou fai ia te Po Tapu. Maʼia mo te famili ʼo te Petele ʼi Brooklyn neʼe hoko atu pe tanatou fai ia te Po Tapu. Kaʼe neʼe kamata hoko leva ni fetogi ʼi te taʼu 1926. Kotea tona tupuʼaga?
pea ko te ʼu ʼaho lalahi pagani neʼe fakatoʼo age ki ai ʼonatou higoa fakalotu, ʼo kau ki ai te Po Tapu.” ʼI te taʼu 1883, ʼi te kupu tafitō “Ko ʼAnafea ʼAe Neʼe Tupu Ai Sesu?” neʼe fakamahino ʼi Te Tule Leʼo ko Sesu neʼe tupu ʼi te kamata ʼo te mahina ʼo Oketopeli.9. Kotea ʼae neʼe mahino leva ki ai te Kau Ako ʼo Te Tohi-Tapu ʼo ʼuhiga mo te Po Tapu?
9 ʼI tanatou ʼosi vakavakaʼi fakalelei ia te faʼahi ʼaia, neʼe mahino leva ki te Kau Ako ʼo Te Tohi-Tapu ko te haʼuʼaga ʼo te Po Tapu pea mo te ʼu aga ʼae ʼe fai ai, ʼe natou moamoagaʼi ia te ʼAtua. Ko te alatike ko tona kupu tafitō “Te Ha’uʼaga ʼo Te Po Tapu” ʼi te nusipepa L’Âge d’Or ʼo te ʼaho 14 ʼo Tesepeli 1927, neʼe ui ai ko te Po Tapu ʼe ko he lafeti fakapagani, ʼe tokaga pe ia te hahaʼi ki te ʼu fakafiafia pea ʼe kau ki ai te tauhi tamapua. Neʼe fakaha lelei ʼi te alatike ʼaia neʼe mole fakatotonu e Kilisito ke fai te Po Tapu pea neʼe fakaʼosi fenei te alatike: “Mai tona aluʼaga ʼae ʼe fakamaʼuhigaʼi ʼi te ʼaho ʼaia ia te malama, mo te kakano, pea mo te Tiapolo . . . koia la ʼae ʼe mole kei fai ia te Po Tapu e natou ʼae kua foaki tonatou maʼuli katoa ki te tauhi kia Sehova.” ʼI te mahina ʼaia ʼo Tesepeli, neʼe mole fai e te famili ʼo te Petele ia te Po Tapu, ʼo talu mai ai.
10. (1) ʼI te mahina ʼo Tesepeli 1928, kotea te akonaki neʼe fai ʼo ʼuhiga mo te Po Tapu? (Vakaʼi mo te fakamatala ʼae ʼi te ʼa takai “ Te Haʼuʼaga ʼo Te Po Tapu.”) (2) Neʼe fakatokaga feafeaʼi te hahaʼi ʼa te ʼAtua ʼo ʼuhiga mo te tahi ʼu ʼaho lalahi ʼae ʼe tonu ke natou liakī? (Vakaʼi te fakamatala ʼae ʼi te ʼa takai “ Te Moʼoni ʼo ʼUhiga Mo Te Tahi ʼu ʼAho Lalahi.”)
10 ʼI te taʼu 1928, neʼe fakalogo e te Kau Ako ʼo Te Tohi-Tapu ia te akonaki neʼe talanoa ki te Po Tapu. ʼI te ʼaho 12 ʼo Tesepeli, *—Soa. 15:19; 17:14.
ko te tehina ko Richard H. Barber, ʼae neʼe gaue ʼi te Petele, neʼe ina fai ʼi te latio te akonaki neʼe fakamahino lelei ai te haʼuʼaga heʼe maʼa ʼo te Po Tapu. Neʼe tali feafeaʼi e te hahaʼi ʼa te ʼAtua ia te ʼu fakamahino ʼaia? Ko te tehina ko Charles Brandlein pea mo tona kiʼi famili, neʼe natou tuku te fai ʼo te Po Tapu. Neʼe ina ui fenei: “Neʼe faigataʼa koa kia matou te liakī ʼo te ʼu meʼa fakapagani ʼaia? Kailoa ia. . . . Neʼe hage pe ko te toʼo ʼo he teu ʼuli ʼo liakī.” Neʼe toe feia te manatu ʼa te tehina ko Henry A. Cantwell, ʼae neʼe taupau feʼaluʼaki. Neʼe ina ui fenei: “Neʼe matou fiafia ʼi te liakī ʼo he meʼa moʼo fakaha ai tomatou ʼofa ʼae kia Sehova.” Neʼe lotolelei ia te kau tisipulo agatonu ʼa Kilisito ke natou fai he ’u fetogi pea ke mole kei natou kau ki he lafeti neʼe toʼo mai te tauhi heʼe maʼa.11. ʼE tou fakaha feafeaʼi tatatou lagolago ki te Hau Fakamesia?
11 ʼE ko he faʼifaʼitaki lelei neʼe tuku mai e te Kau Ako ʼo Te Tohi-Tapu ʼo te temi ʼaia. Ka tou fakakaukauʼi tanatou faʼifaʼitaki, ʼe lelei ke tou fai ia te ʼu fehuʼi ʼaeni: “ ʼE au tali feafeaʼi te ʼu fakatotonu ʼae ʼe fai mai e te tagata faifekau agatonu? ʼE au tali lelei koa pea mo mulimuli ki ai?” Ko tatatou fakalogo ʼe fakaha ai tatatou lagolago ki te Hau Fakamesia, ʼae ʼe ina fakaʼaogaʼi te tagata faifekau agatonu moʼo tufa te meʼa kai fakalaumalie ʼi tona temi totonu.—Gaue 16:4, 5.
ʼE Tonu Koa Ke Fakaʼaogaʼi e Te Kau Kilisitiano Ia Te Koluse?
12. Lolotoga ni taʼu, neʼe kotea te manatu ʼa te Kau Ako ʼo Te Tohi-Tapu ʼo ʼuhiga mo te koluse?
12 Lolotoga ni taʼu, neʼe manatu ia te Kau Ako ʼo Te Tohi-Tapu ko te koluse ʼe ko he fakaʼiloga lelei ʼaia ʼo te Lotu Fakakilisitiano. 1 Ko. 10:14; 1 Soa. 5:21) ʼI te taʼu 1883, neʼe ui fakalelei ʼi Te Tule Leʼo ko “te tauhi tamapua ʼe ko he meʼa fakalialia ki te ʼAtua.” Kaʼe ʼi te kamata, neʼe mole koviʼia e te Kau Ako ʼo Te Tohi-Tapu ia te fakaʼaogaʼi ʼo te koluse. Ohage la, neʼe natou fakapipiki ki ʼonatou kofu te kiʼi fakaʼiloga ʼo te koluse mo te kolona. Neʼe fakaʼuhiga e te kiʼi fakaʼiloga ʼaia ki tanatou nonofo agatonu ʼo kaku ki te mate pea mo tanatou maʼu ia te kolona ʼo te maʼuli. ʼI te kamata ʼo te taʼu 1891, neʼe ha te fakaʼiloga ʼaia ʼi te takafi ʼo Te Tule Leʼo.
ʼE mahino ia neʼe mole natou tauhi ki te koluse, koteʼuhi neʼe natou iloʼi ʼe kovi te tauhi tamapua. (13. Kotea te ʼu fakamahino neʼe foaki ki te kau tisipulo ʼa Kilisito ʼo ʼuhiga mo te fakaʼaogaʼi ʼo te koluse? (Vakaʼi mo te fakamatala ʼae ʼi te ʼa takai “ Te Mahino ʼAki Te Temi Ki Te Fakaʼuhiga ʼo Te Koluse.”)
13 Neʼe leleiʼia e te Kau Ako ʼo Te Tohi-Tapu ia te kiʼi fakaʼiloga ʼo te koluse mo te kolona. Kaʼe, ʼi te fakaʼosi ʼo te ʼu taʼu 1920, neʼe mahino lelei age te ʼu tisipulo ʼa Kilisito ki te fakaʼaogaʼi ʼo te koluse. ʼI tana manatuʼi ia te fakatahi ʼae neʼe fai ʼi te taʼu 1928 ʼi te kolo ko Detroit, ʼi Amelika, neʼe ui fenei e te tehina ko Grant Suiter, ʼae neʼe kau ki muli age ki te Kolesi Pule: “ ʼI te fakatahi ʼaia, neʼe fakaha ai ko te kiʼi fakaʼiloga ʼo te koluse mo te kolona neʼe mole hona ʼaoga pea neʼe kovi tona fakaʼaogaʼi.” ʼI te ʼu taʼu ki muli age, neʼe foaki ai te tahi ʼu fakamahino. Neʼe mahino lelei ai ʼe mole tonu ke fakaʼaogaʼi ia te koluse ʼi te tauhi ʼae ʼe maʼa.
14. Neʼe tali feafeaʼi e te hahaʼi ʼa te ʼAtua ia te ʼu fakamahino ʼo ʼuhiga mo te koluse?
14 Neʼe tali feafeaʼi e te hahaʼi ʼa te ʼAtua ia te ʼu fakamahino ʼaia ʼo ʼuhiga mo te koluse? Neʼe natou haga leleiʼia pe koa te kiʼi fakaʼiloga ʼo te koluse mo te kolona? Neʼe manatuʼi fenei e te tuagaʼane ko Lela Roberts, kua fualoa tana tauhi kia Sehova: “ ʼI tamatou mahino ki tona fakaʼuhiga moʼoni, neʼe faigafua tamatou liakī.” Ko te tahi tuagaʼane agatonu ko Ursula Serenco, neʼe ina fakaha ia te manatu ʼa te tokolahi, ʼo ina ui fenei: “Neʼe matou leleiʼia te kiʼi fakaʼiloga ʼaia he neʼe ina fakata ia te mate ʼo totatou ʼAliki pea mo tatatou tauhi katoa. Kaʼe neʼe matou mahino leva neʼe ko he fakaʼiloga fakapagani ia. ʼO mulimuli kia Taaga Lea 4:18, neʼe matou lotofakafetaʼi ki te ʼu faʼahi ʼaia neʼe matou malama ki ai.” Neʼe mole loto e te kau tisipulo agatonu ʼa Kilisito ke natou fakahoko he aga heʼe maʼa ʼe pipiki ki te tauhi hala.
15, 16. ʼE tou lava fakaha feafeaʼi tatatou lotomalohi ʼae ke tou taupau maʼa te ʼu malaʼe ʼae ʼi te kele ʼo te fale lotu fakalaumalie ʼo Sehova?
15 ʼE tou toe feia mo tatou ia ʼaho nei. ʼE tou fakamoʼoni ki te fakaʼaogaʼi e Kilisito ia te tagata faifekau agatonu mo poto, moʼo tokoni ki tana hahaʼi ke natou maʼa ʼi te faʼahi fakalaumalie. Koia, ka foaki mai e te tagata faifekau ʼaia he ’u fakatokaga ʼo ʼuhiga mo he ʼu ʼaho lalahi peʼe ko he ʼu aga ʼe pipiki ki te tauhi hala, pea ʼe tou mulimuli ki ai. Ohage ko ʼotatou tehina mo tuagaʼane ʼae neʼe maʼuʼuli ʼi te kamata ʼo te ʼi heni ʼa Kilisito, ʼe tou lotomalohi ke tou taupau ke maʼa te ʼu malaʼe ʼae ʼi te kele ʼo te fale lotu fakalaumalie ʼo Sehova.
16 ʼI te ’u ʼaho fakamuli ʼaeni, ʼe toe fai e Kilisito he ʼu gaue fakapulipuli moʼo puipui te ʼu kokelekasio ʼa Sehova mai te ʼu
hahaʼi ʼae ʼe feala ke natou ʼulihi te ʼu kokelekasio. Tou vakaʼi pe kotea ʼae neʼe ina fai.Te Vaheʼi Kehe ʼo “Te Kau Agakovi Mai Te Kau Agatonu”
17, 18. ʼI te lea fakata ʼo ʼuhiga mo te kupega, kotea tona fakaʼuhiga (1) he kupega neʼe li ki te tai, (2) “nee . . . tanaki ni ika i te u faahiga kehekehe,” (3) neʼe tanaki te ʼu ika lelei ki ni kato, pea (4) ʼe laku te ʼu ika “ae e kovi”?
17 ʼE haga leʼoleʼo e te Hau ko Sesu Kilisito te ʼu kokelekasio ʼo te hahaʼi ʼa te ʼAtua ʼi te kele katoa. ʼE fakahoko e Sesu pea mo te kau ʼaselo he vaevae, ʼi hona aluʼaga fakapulipuli. Neʼe talanoa ia Sesu ki te gaue ʼaia ʼi tana lea fakata ʼo ʼuhiga mo te kupega. (Lau ia Mateo 13:47-50.) Kotea te fakaʼuhiga ʼo te lea fakata ʼaia?
18 “He kupega . . . nee li ki te tai.” ʼE fakata e te kupega ia te fakamafola ʼo te Puleʼaga, ʼae ʼe fakahoko ki te hahaʼi fuli. “Nee . . . tanaki ni ika i te u faahiga kehekehe.” Ko te hahaʼi kehekehe ʼae ʼe natou tali te logo lelei, ia natou ʼae kua liliu ko he kau Kilisitiano pea mo te tokolahi neʼe natou fia logo ʼi te kamata kaʼe neʼe mole natou liliu ʼo kau ki te tauhi maʼa. * Neʼe “tanaki ki ni u kato te mea ae e lelei.” Ko te hahaʼi fakamalotoloto ʼe tanaki natou ki te ʼu kokelekasio, pea ʼe feala ke natou foaki ai he tauhi ʼe maʼa kia Sehova. ʼE laku te ʼu ika “ae e kovi.” ʼI te ʼu ʼaho fakamuli ʼaeni, ko Kilisito pea mo te kau ʼaselo neʼe natou vaheʼi kehe “te kau agakovi mai te kau agatonu.” * Koia, ko natou ʼae ʼe mole lelei tonatou loto, neʼe mole lagi natou fia tuku te ʼu akonaki hala mo te ʼu aga ʼae ʼe kovi, ʼe mole feala ai ke natou ʼulihi te ʼu kokelekasio. *
19. ʼE feafeaʼi tokotou loto ʼi takotou iloʼi te gaue ʼae e fai e Kilisito moʼo taupau ke maʼa te hahaʼi ʼa te ʼAtua pea mo te tauhi moʼoni?
19 ʼE mahino ia, ʼe tou lotofimalie ʼi tatatou iloʼi ʼae ʼe puipui e totatou Hau ko Sesu Kilisito ia natou ʼae ʼe fakalogo kia te ia. Pea ʼe fakalotomalohi tatatou iloʼi ʼae ko tana faʼafai ʼi te tauhi maʼa, pea mo tokoni ki te hahaʼi tauhi moʼoni, ʼe kei malohi pe ia ʼaho nei ohage ko te temi ʼae neʼe ina fakamaʼa ai te fale lotu ʼi te taʼu 33 H.T.S. ʼE tou lotofakafetaʼi lahi kia Kilisito, ʼi tana gaue moʼo taupau ke maʼa te hahaʼi ʼa te ʼAtua ʼi te faʼahi fakalaumalie pea mo te tauhi moʼoni. ʼE tou lagolago ki te Hau pea mo tona Puleʼaga ʼaki tatatou fakamamaʼo mai te lotu hala.
^ pal. 2 Ko te kau Sutea ʼae neʼe ʼomai ki Selusalemi, neʼe tonu ke natou fetogi tanatou falā moʼo totogi te tukuhau ʼo te fale lotu. Ko te hahaʼi fetogi paʼaga neʼe natou fakatotogi te fetogi ʼaia ʼo te falā. ʼO hilifaki ki te tukuhau ʼaia, neʼe tonu ki te kau Sutea ʼaia ke natou totogi he ʼu manu ki te ʼu sakilifisio. Neʼe ui e Sesu ʼo ʼuhiga mo te hahaʼi faifakatau koloa, neʼe ko he “kau kaihaa,” koteʼuhi neʼe totogi kovi ʼaupito tanatou faikoloa ʼaia.
^ pal. 4 ʼE tauhi te hahaʼi ʼa Sehova ʼi te ʼu malaʼe ʼae ʼi te kele ʼo tona fale lotu lahi fakalaumalie.
^ pal. 8 Neʼe fakaha ʼi te alatike ʼaia, ko te ʼaho ʼae ʼe ui neʼe tupu ai ia Sesu ʼe to ʼi te temi momoko pea “ ʼe mole alu tahi ia mo te fakamatala ʼae ʼe ui neʼe nonofo te ʼu tagata tauhi manu ʼi tuʼa mo ʼanatou faga manu.”—Luka 2:8.
^ pal. 10 ʼI te tohi ʼae neʼe fai e te tehina ko Frederick W. Franz ʼi te ʼaho 14 ʼo Novepeli 1927, neʼe ina ui fenei ai: “ ʼE mole tou fai anai te Po Tapu ʼi te taʼu ʼaeni. Neʼe fakatotonu e te famili ʼo te Petele ke mole natou toe fai ia te Po Tapu.” ʼI ni mahina ki muli age, ʼi tana tohi ʼae neʼe ina fai ʼi te ʼaho 6 ʼo Fepualio 1928, neʼe ui fenei ai e te tehina ko Franz: “ ʼE haga fakamaʼa mamalie tatou e te ʼAliki mai te ʼu hala ʼae neʼe tou fai he neʼe kei tou taupau te ʼu agaaga ʼo te ʼu lotu hala ʼa te Tiapolo.”
^ pal. 18 Ohage la, ʼi te taʼu 2013, ko te laka foʼou ʼi te kau faifakamafola neʼe ko te toko 7 965 954, pea neʼe ko te toko 19 241 252 neʼe natou kau ki te Fakamanatu ʼo Te Mate ʼa Kilisito.
^ pal. 18 Ko te vaheʼi kehe ʼo te ʼu ika lelei mai te ʼu ika ʼae ʼe kovi ʼe mole tatau mo te vaheʼi kehe ʼo te ʼu ovi mo te ʼu tao. (Mat. 25:31-46) Ko te vaheʼi ʼaia, peʼe ko te fakamau fakaʼosi ʼo te ʼu ovi mo te ʼu tao, ʼe hoko anai ʼi te mamahi lahi ka hoko mai. ʼI muʼa ʼo te hoko mai ʼo te faʼahi ʼaia, ko natou ʼae ʼe natou hage ko he ʼu ika ʼe kovi ʼe feala ke natou toe liliu mai kia Sehova pea mo toe fakatahi mo te kokelekasio.—Mala. 3:7.
^ pal. 18 ʼI hona aluʼaga fakata, ko te kau agakovi ʼe li anai natou ki te afi kakaha, ko tona fakaʼuhiga ʼe fakaʼauha anai natou.