KAPITE 3
ʼE Fakaha e Sehova Tana Fakatuʼutuʼu
1, 2. Neʼe fakaha feafeaʼi e Sehova tana fakatuʼutuʼu ki te malamanei?
KO HE ʼu matuʼā ʼofa ʼe nā fakakau tanā fanau ki te ʼu faipalalau fakafamili. Kaʼe ʼe nā tokakaga ki te ʼu faʼahi ʼae ka natou faipalalau ki ai, ʼo nā fakaha age pe te ʼu faʼahi ʼae ʼe feala ke mahino ki ai tanā fanau ʼo mulimuli ki ʼonatou taʼu.
2 ʼO toe feia aipe, neʼe fakaha mamalie e Sehova tana fakatuʼutuʼu ki te malamanei. Kaʼe ʼi tona temi totonu pe. Tou vakaʼi pe neʼe fakaha feafeaʼi e Sehova ia te ʼu moʼoni ʼo ʼuhiga mo te Puleʼaga ʼaki te fakalaka ʼo te temi.
He Ko ʼe Neʼe Fakatuʼu Te Puleʼaga?
3, 4. Neʼe fakatuʼutuʼu fakatomuʼa koa e Sehova ia te ʼu aluʼaga fuli ʼae ʼe hoko anai ʼi te hisitolia ʼo te tagata? Fakamahino.
3 ʼI te kamataʼaga, neʼe mole fakatuʼutuʼu e Sehova ke ina fakatuʼu te Puleʼaga Fakamesia. Neʼe mole fakatuʼutuʼu fakatomuʼa e Sehova ia te ʼu aluʼaga fuli ʼae ka hoko anai ʼi te hisitolia ʼo te tagata, he neʼe ina fakatupu te tagata ʼaki te loto faʼitaliha. Koia, neʼe ina fakaha age kia Atama mo Eva tana fakatuʼutuʼu ʼo ʼuhiga mo te malamanei, ʼo ina ui fenei age: “Kolua fanaunau, kolua liuliuga, kolua fakahahai te kele, pea kolua pulei ia ia.” (Sen. 1:28) Neʼe toe kole age e Sehova kia naua ke nā fakalogo ki ʼana lekula ʼo ʼuhiga mo te meʼa ʼae ʼe lelei pea mo ʼae ʼe kovi. (Sen. 2:16, 17) Neʼe feala kia Atama mo Eva ke nā filifili pe nā fakalogo anai peʼe kailoa. Ka na neʼe nā fakalogo la, ʼo toe feia mo tonā hakoga, pea neʼe mole he ʼaoga ʼo te Puleʼaga, ʼae ʼe pule ai Kilisito, moʼo fakahoko ia te fakatuʼutuʼu ʼa te ʼAtua. Ka na ʼaua la kua fakafonu ia te kele e te hahaʼi haohaoa, ʼo natou tauhi fuli kia Sehova.
4 ʼI te agatuʼu ʼa Satana, mo Atama pea mo Eva, neʼe mole liakī ai e Sehova tana fakatuʼutuʼu ʼae ke ina fakafonu te kele ʼaki ni hahaʼi haohaoa. Kaʼe neʼe ina fai he tahi puleʼaki moʼona fakahoko. Ko tana fakatuʼutuʼu ʼe mole hage ko he saliote afi ʼe tonu ke alu ʼi tona ala ke aʼu ki he koga meʼa pea ʼe feala ke mafuli. Ka kua fakaha e Sehova tana fakatuʼutuʼu, ʼe mole he malohi ʼi te ʼatulaulau ʼe feala ke ina taʼofi tona fakahoko. (Lau ia Esaia 55:11.) Kapau ʼe hoko he fihifihia, ʼe fai e Sehova he tahi puleʼaki. * (Eke. 3:14, 15, MN) Ka ina tokagaʼi ʼe ʼaoga, pea ʼe ina fakaha ki ʼana kaugana agatonu tana puleʼaki foʼou ʼaia moʼo fakahoko tana fakatuʼutuʼu.
5. Kotea ʼae neʼe fai e Sehova hili te agatuʼu ʼi Eteni?
5 Hili te agatuʼu ʼi Eteni, neʼe fakatuʼutuʼu ai e Sehova ke ina fakatuʼu ia te Puleʼaga. (Mat. 25:34) ʼI te aluʼaga fakaʼofaʼofa ʼaia neʼe hoko, neʼe kamata fakamahino e Sehova te faʼahi ʼae ka ina fakaʼaogaʼi moʼo fakatokatoka te aluʼaga ʼo te malamanei, pea mo molehi te ʼu fua kovi ʼo te faiga ʼa Satana ke ina faʼao te tuʼulaga pule. (Sen. 3:14-19) Kaʼe neʼe mole fakaha e Sehova ʼi te lakaga ʼaia te ʼu faʼahi fuli ʼo ʼuhiga mo te Puleʼaga.
Neʼe Kamata Fakaha e Sehova Te ʼu Moʼoni ʼo ʼUhiga Mo Te Puleʼaga
6. Kotea ʼae neʼe fakapapau e Sehova? Kotea ʼae neʼe mole ina fakaha?
6 ʼI te ʼuluaki lea fakapolofeta ʼae neʼe ina fai, neʼe fakapapau e Sehova ʼe ko he “hakoga” ʼae ka ina malamalaki anai ia te ʼulu ʼo te gata. (Lau ia Senesi 3:15.) Kaʼe ʼi te temi ʼaia, neʼe mole ina fakaha ai pe ko ai te hakoga ʼaia pea mo te hakoga ʼo te gata. ʼI tona fakahagatonu, neʼe hili ki ai taʼu ʼe teitei 2 000 pea hoki foaki leva e Sehova he ʼu fakamahino ki ai. *
7. He ko ʼe neʼe filifili e Sehova ia Apalahamo, pea kotea te ako maʼuhiga ʼe feala ke tou taʼofi mai ai?
7 Neʼe filifili leva e Sehova ia Apalahamo ke hifo mai ai te hako ʼae neʼe fakapapauʼi. Neʼe filifili ia Apalahamo koteʼuhi neʼe “fakalogo” ki te leʼo ʼo Sehova. (Sen. 22:18) Ko te ako maʼuhiga ʼaeni ʼe feala ke tou taʼofi mai ai: ʼE fakaha pe e Sehova tana fakatuʼutuʼu kia natou ʼae ʼe ‘manavasiʼiʼ kia te ia.—Lau ia Pesalemo 25:14.
8, 9. ʼO ʼuhiga mo te hako ʼae neʼe fakapapauʼi, kotea te ʼu faʼahi neʼe fakaha e Sehova kia Apalahamo pea mo Sakopo?
8 Neʼe palalau ia Sehova ki tona kaumeʼa ko Apalahamo, ʼo ina fakaʼaogaʼi te ʼaselo. Neʼe hoki fakaha age ai e Sehova ia te faʼahi maʼuhiga ʼaeni ʼo ʼuhiga mo te hako ʼae neʼe fakapapauʼi: ʼE ko he tagata anai. (Sen. 22:15-17; Sakp. 2:23) Kaʼe ʼe malamalaki feafeaʼi anai e te tagata ʼaia ia te ʼulu ʼo te gata? Neʼe ko ai koa ia te gata? Neʼe hoki foaki te ʼu tali ki muli age.
9 Neʼe fakatuʼutuʼu e Sehova ke hifo mai te hako ʼae neʼe fakapapauʼi ia Sakopo, te mokopuna ʼo Apalahamo, he neʼe ina fakaha tana tui malohi ki te ʼAtua. (Sen. 28:13-22) ʼAki ia Sakopo, neʼe fakaha e Sehova ʼe hifo mai anai ia Ia ʼae neʼe fakapapauʼi ia Suta, te foha ʼo Sakopo. Neʼe fakakikite e Sakopo ko te tagata ʼaia ka hifo mai ia Suta ʼe ina maʼu anai “te pale fakahau,” ʼe ko te fakata ʼaia ʼo te pule fakahau, pea “e fakalogo anai kia ia te hahai fuli.” (Sen. 49:1, 10) Neʼe fakaha ai e Sehova, ko te Hako ʼae neʼe fakapapauʼi ʼe liliu anai ko he hau.
10, 11. He ko ʼe neʼe fakaha e Sehova tana fakatuʼutuʼu kia Tavite pea mo Taniela?
10 Hili ki ai taʼu ʼe teitei 650 ki te temi ʼo Suta, neʼe fakaha e Sehova te tahi faʼahi ʼo ʼuhiga mo tana fakatuʼutuʼu ki te Hau ko Tavite, ʼae neʼe hifo mai ia Suta. Neʼe ui e Sehova ʼo ʼuhiga mo Tavite ko he “tagata e tatau mo tona loto.” (1 Sam. 13:14; 17:12; Gaue 13:22) Mai tona aluʼaga ʼae neʼe manavasiʼi ia Tavite ki te ʼAtua, koia neʼe fai e Sehova he fuakava mo ia, ʼo ina fakapapau age ʼe ʼi ai te tahi ʼi tona hakoga ka pule anai ʼo talu ai.—2 Sam. 7:8, 12-16.
11 Hili ki ai taʼu ʼe teitei 500, neʼe fakaʼaogaʼi e Sehova ia te polofeta ko Taniela moʼo fakaha ia te taʼu ʼae ka ha ai ʼi te kele ia Ia ʼae neʼe fakanofo, ia te Mesia. (Tan. 9:25) Kia mata ʼo Sehova, ko Taniela neʼe “ko he tagata ofainai.” Kotea tona tupuʼaga? He neʼe fakaʼapaʼapa lahi ia Taniela kia Sehova pea mo tauhi agatonu kia te ia.—Tan. 6:16; 9:22, 23.
12. Kotea ʼae neʼe ui age kia Taniela ke ina fai, pea kotea tona tupuʼaga?
12 Neʼe fakaʼaogaʼi e Sehova he ʼu polofeta agatonu, ohage ko Taniela, moʼo tohi he ʼu faʼahi ʼo ʼuhiga mo te hako ʼae neʼe fakapapauʼi, ia te Mesia. Kaʼe kia Sehova, neʼe heʼeki hoko mai te temi ʼae ke ina fakamahino katoa age ki ʼana kaugana te fakaʼuhiga ʼo te ʼu manatu ʼaia neʼe natou tohi. Ohage la, neʼe ha kia Taniela ia te fakatuʼu ʼo te Puleʼaga ʼo te ʼAtua. Hili ia, neʼe ui age ke ina taupau fakalilo te lea fakapolofeta ʼaia, ʼo kaku ki te temi ʼae kua fakakatofa e Sehova. Pea ʼi te temi ʼaia, ʼe mahu anai ia te ʼatamai malama moʼoni.—Tan. 12:4.
Neʼe Fakamahino e Sesu Te Fakatuʼutuʼu ʼa Te ʼAtua
13. (1) Neʼe ko ai te hako ʼae neʼe fakapapauʼi? (2) Neʼe feafeaʼi te fakamahino e Sesu ia te lea fakapolofeta ʼae ʼe tuʼu ia Senesi 3:14, 15?
13 Neʼe tala e Sehova ʼe ko Sesu ia te hako ʼae neʼe fakapapauʼi, neʼe hifo mai ia Tavite pea ʼe liliu anai ko he Hau. (Luka 1:30-33; 3:21, 22) ʼI te kamata faifakamafola ʼa Sesu, neʼe ina fakamalamaʼi te hahaʼi ʼo ʼuhiga mo te fakatuʼutuʼu ʼa te ʼAtua. (Mat. 4:13-17) Ohage la, neʼe ina fakamahino lelei pe ko ai “te gata” ʼae ʼe talanoa ki ai ia Senesi 3:14, 15, ʼo ina ui ko te Tiapolo ʼe ko he tahi ʼe ‘faifakapoʼ talu mai te kamataʼaga pea ʼe ko “te tamai ia o te loi.” (Soa. 8:44) ʼI te ʼu faʼahi ʼae neʼe ina fakaha kia Soane, neʼe ui ai e Sesu ko “te gata afea” ʼe ko ia “ae nee higoa ko te tiapolo mo Satana.” * (Lau ia Apokalipisi 1:1; 12:9.) Pea neʼe toe fakamahino ai e Sesu pe feafeaʼi anai tana fakahoko ia te lea fakapolofeta ʼae neʼe fai ʼi Eteni pea mo ina malamalaki ʼo talu ai ia Satana, koteʼuhi ko ia te hako ʼae neʼe fakapapauʼi.—Apk. 20:7-10.
14-16. Neʼe mahino lelei tuʼumaʼu koa ia te kau ʼuluaki Kilisitiano ki te ʼu moʼoni ʼae neʼe fakaha e Sesu? Fakamahino.
14 Ohage ko tatatou vakaʼi ʼi te Kapite 1 ʼo te tohi ʼaeni, neʼe lahi te talanoa ʼa Sesu ki te Puleʼaga. Kaʼe neʼe mole ina fakamahino tuʼumaʼu ki ʼana tisipulo te ʼu faʼahi ʼae neʼe natou fia iloʼi. ʼE moʼoni neʼe palalau ia Sesu ki he ʼu faʼahi ʼo ʼuhiga mo te Puleʼaga. Kaʼe neʼe mole mahino katoa ki ai te ʼu tisipulo ʼa Kilisito. Neʼe hoki natou mahino ki ʼihi moʼoni ʼae neʼe fakaha age e tonatou Pule, ʼi te ʼu lau ʼi taʼu ki muli age.
15 Ohage la, ʼi te taʼu 33 H.T.S., neʼe tala e Sesu ko natou ʼae ka kaugā hau mo te Hau ʼo te Puleʼaga ʼo te ʼAtua, ʼe toʼo anai natou mai te kele pea ʼe fakatuʼuake ko he ʼu laumalie ʼi selo. Kaʼe neʼe mole mahino ʼana tisipulo ki ʼana palalau ʼaia. (Tan. 7:18; Soa. 14:2-5) Pea ʼi te taʼu pe ʼaia, neʼe fakamahino e Sesu ʼaki he ʼu lea fakata, ʼe fakatuʼu anai te Puleʼaga hili he temi loaloaga mai tana kua hake ʼae ki selo. (Mat. 25:14, 19; Luka 19:11, 12) Neʼe mole mahino ki te ʼu tisipulo te faʼahi maʼuhiga ʼaia, pea neʼe natou fehuʼi fenei age kia Sesu, ʼi tona kua fakatuʼuake: “Ko te temi koa aeni e ke toe fakatuu ai anai te puleaga o Iselaele?” Kaʼe neʼe mole foaki age e Sesu ʼi te temi ʼaia he fakamahino. (Gaue 1:6, 7) Neʼe toe talanoa Sesu ki te tahi ʼu ovi, pea ʼe mole natou kau ki te kiʼi fagaovi ʼae ka kaugā hau mo ia. (Soa. 10:16; Luka 12:32) Neʼe hoki mahino lelei te ʼu tisipulo ʼa Kilisito pe ko ai te ʼu kutuga ʼaia ʼe lua ʼi te hili ʼo te fakatuʼu ʼo te Puleʼaga ʼi te taʼu 1914.
16 Neʼe lahi te ʼu faʼahi neʼe feala ke fakaha age e Sesu ki ʼana tisipulo ʼi tana nofo ʼae mo natou ʼi te kele, kaʼe neʼe ina iloʼi neʼe mole natou lavaʼi. (Soa. 16:12) ʼE mahino ia, ʼi te temi ʼo te kau ʼuluaki Kilisitiano, neʼe ʼi ai te ʼu faʼahi neʼe kua mahino ki ai ʼo ʼuhiga mo te Puleʼaga. Kaʼe neʼe heʼeki hoko te temi ʼae ke mahu ai te ʼatamai malama.
ʼE Mahu Te ʼAtamai Malama Moʼoni ʼi “Te Temi Fakamuli”
17. Kotea ʼae ʼe tonu ke tou fai ke tou mahino ki te ʼu moʼoni ʼo te Puleʼaga, kaʼe kotea ʼae ʼe toe ʼaoga ki ai?
17 Neʼe fakapapau e Sehova kia Taniela, “e lau anai e he hahai kaugamalie te tohi” ʼi “te temi fakamuli” pea ʼe mahu anai te ʼatamai malama ʼo ʼuhiga mo te fakatuʼutuʼu ʼa te ʼAtua. (Tan. 12:4) Ko natou ʼae ʼe natou fia maʼu te ʼatamai malama ʼaia ʼe tonu ke natou faiga malohi ki ai. Ko te kupu Fakahepeleo ʼae neʼe fakaliliu ʼaki te kupu “lau,” ʼe fakaʼuhiga ki he tahi ʼe ina vakavakaʼi fakalelei he tohi. Kaʼe tatau aipe pe tou vakavakaʼi fakalelei ia te Tohi-Tapu, ʼe hoki feala hatatou mahino lelei ki te ʼu moʼoni ʼo ʼuhiga mo te Puleʼaga, mo kapau ʼe foaki mai e Sehova ia te fealagia ʼaia.—Lau ia Mateo 13:11.
18. Neʼe fakaha feafeaʼi e natou ʼae ʼe manavasiʼi kia Sehova tanatou tui mo tanatou agavaivai?
18 Neʼe fakaha mamalie e Sehova ia te ʼu moʼoni ʼo ʼuhiga mo Kapite 4 mo te 5 ʼo te tohi ʼaeni, lolotoga te ʼu taʼu ʼe 100 ʼaeni kua hili atu, neʼe tonu ke fetogi e te hahaʼi ʼa te ʼAtua tanatou mahino. Ko tona fakaʼuhiga koa ʼe mole tokoni ia Sehova kia natou? Kailoa ia. ʼE tokoni ia Sehova kia natou, koteʼuhi ko natou ʼae ʼe manavasiʼi kia te ia ʼe natou maʼu te ʼu kalitate ʼe lua ʼe ina leleiʼia, ʼae ko te tui mo te agavaivai. (Hep. 11:6; Sakp. 4:6) ʼE tui te ʼu kaugana ʼa Sehova ʼe hoko anai te ʼu fakapapau fuli ʼae ʼe tuʼu ʼi te Folafola ʼa te ʼAtua. Pea ʼe natou agavaivai heʼe natou fakamoʼoni neʼe natou mahino hala ki te fakahoko ʼo te ʼu fakapapau ʼaia. Neʼe ha tanatou agavaivai ʼaia ʼi Te Tule Leʼo ʼo te ʼaho 1 ʼo Malesio 1925, ʼae neʼe tohi fenei ai: “ ʼE tou iloʼi ʼe ko te ʼAliki ʼae ka ina fakamahino anai tana Folafola ki tana hahaʼi, ʼi hona aluʼaga ʼe lelei pea ʼi tona temi totonu.”
te Puleʼaga ʼo kaku mai ki te taʼu 1914, pea ʼe ina toe fai feia pe ʼi te temi fakamuli. Ohage ko tatatou vakaʼi anai ʼi te“ ʼE ko te ʼAliki ʼae ka ina fakamahino anai tana Folafola ki tana hahaʼi, ʼi hona aluʼaga ʼe lelei pea ʼi tona temi totonu”
19. Kotea ʼae kua fakagafua e Sehova ke tou mahino ki ai ia ʼaho nei, pea kotea tona tupuʼaga?
19 ʼI te fakatuʼu ʼo te Puleʼaga ʼi te taʼu 1914, neʼe mole mahino katoa te hahaʼi ʼa te ʼAtua ki te fakahoko ʼo te ʼu lea fakapolofeta ʼo ʼuhiga mo te Puleʼaga. (1 Ko. 13:9, 10, 12) ʼI tatatou fakaʼamu lahi ʼae ke tou sisio ki te fakahoko ʼo te ʼu fakapapau ʼa te ʼAtua, neʼe tou faihala ai ʼi ʼatatou fakamahino. Neʼe toe ui fenei ʼi te alatike ʼo Te Tule Leʼo ʼae neʼe tou talanoa ki ai ʼi te palakalafe ki muʼa atu: “ ʼE fakapotopoto te manatu ʼaeni: ʼE feala pe ke tou mahino ki he lea fakapolofeta moka kua ʼosi hoko peʼe moka lolotoga hoko.” ʼAki te temi, neʼe ha te totonu ʼo te ʼu palalau ʼaia. ʼI te temi fakamuli ʼaeni, ʼe lahi te ʼu lea fakapolofeta ʼo ʼuhiga mo te Puleʼaga kua hoko pea mo lolotoga hoko. ʼI te agavaivai ʼa te hahaʼi ʼa te ʼAtua pea mo tonatou lotolelei ke fakatonutonuʼi tanatou mahino, koia neʼe fakagafua e Sehova ke katoa age tatatou mahino ki tana fakatuʼutuʼu. Kua mahu ia te ʼatamai malama moʼoni ia ʼaho nei!
Ko Te ʼu Fakamahino Foʼou Neʼe Ko He ʼAhiʼahi Ki Te Hahaʼi ʼa Te ʼAtua
20, 21. Kotea te aluʼaga faigataʼa ʼae neʼe hoko ki te kau ʼuluaki Kilisitiano ʼuhi ko te ʼu fakamahino foʼou?
20 Ka fetogi e Sehova tatatou mahino ki te moʼoni, ʼe ʼahiʼahiʼi ai totatou loto. Ko tatatou tui pea mo tatatou agavaivai ʼe ina uga koa tatou ke tou tali te ʼu fetogi ʼaia? Ko te aluʼaga faigataʼa ʼaia neʼe hoko ki te kau ʼuluaki Kilisitiano. Fakakaukauʼi age mo ka na pau la neʼe ko koe ko he Kilisitiano Sutea ʼi te temi ʼaia. ʼE ke fakaʼapaʼapa lahi ki te Lao ʼa Moisese pea mo ke fia meʼameʼa ʼi tou ʼuhiga Sutea. Pea ʼe momoli atu te ʼu tohi e te apositolo ko Paulo, ʼe ui ai ʼe mole kei fakamaʼua ke mulimuli ki te Lao. Pea ʼe toe ui ai, kua liakī e Sehova te hahaʼi ʼo Iselaele kaʼe ʼe ina tanaki he Iselaele fakalaumalie, ʼe kau ki ai ni kau Sutea pea mo ni kau Senitile. (Loma 10:12; 11:17-24; Kal. 6:15, 16; Kol. 2:13, 14) ʼE ke tali feafeaʼi anai?
21 Ko te kau Kilisitiano agavaivai neʼe natou tali te ʼu fakamahino ʼae neʼe fai e Paulo ʼaki te takitaki ʼa te ʼAtua, pea neʼe tapuakiʼi natou e Sehova. (Gaue 13:48) Neʼe fakafisi ʼihi ki te ʼu fetogi ʼaia pea mo natou fia taupau tanatou mahino. (Kal. 5:7-12) Kapau neʼe mole natou fetogi, pea neʼe mole feala ke natou kaugā hau mo Kilisito.—2 Pet. 2:1.
22. Kotea tau manatu ki te ʼu fakamahino foʼou ʼo ʼuhiga mo te fakatuʼutuʼu ʼa te ʼAtua?
22 ʼI te ʼu taʼu pe ʼaeni kua hili atu, neʼe hikihiki e Sehova tatatou mahino ki te Puleʼaga. Ohage la, neʼe tokoni mai ke tou mahino lelei age ki te temi ʼae ʼe vaheʼi kehe ai te ʼu hahaʼi fakalogo ʼo te Puleʼaga mai ia natou ʼae ʼe mole fia fakalogo, ohage ko te vaheʼi kehe ʼo te ʼu ovi mai te ʼu tao. Neʼe ina toe fakaha mai te temi ʼae ka katoa ai te toko 144 000, mo te fakaʼuhiga ʼo te ʼu lea fakata ʼa Sesu ʼo ʼuhiga mo te Puleʼaga, pea mo te temi ʼae ka fakatuʼuake anai ki selo ia te ʼu Kilisitiano fakanofo fakamuli. * Kotea tau manatu ʼo ʼuhiga te ʼu fakamahino foʼou ʼaia? Neʼe toe malohi age ai koa tau tui? Kia koe, ʼe ko he fakamoʼoni koa ʼaia ʼe haga akoʼi e Sehova tana hahaʼi agavaivai? ʼAki te ʼu manatu ʼi te tohi ʼaeni, ʼe toe malohi anai tau tui papau ʼae ʼe fakaha mamalie e Sehova tana fakatuʼutuʼu kia natou ʼae ʼe manavasiʼi kia te ia.
^ pal. 4 ʼE haʼu ia te huafa ʼo te ʼAtua mai te kupu Fakahepeleo ʼe fakaʼuhiga ki te kupu “liliu.” Ko te huafa ʼae ko Sehova ko tona fakaʼuhiga ʼe ina Fakahoko ʼana fakapapau. Vakaʼi te fakamatala ʼae ʼi te ʼa takai “Te Fakaʼuhiga ʼo Te Huafa ʼo Te ʼAtua,” ʼi te pasina 43.
^ pal. 6 Logo la ʼe lagi loaloaga fau kia tatou te ʼu taʼu ʼaia, mai ia Atama kia Apalahamo, kaʼe ʼe tonu ke tou manatuʼi neʼe maʼuʼuli fualoa te hahaʼi ʼi te temi ʼaia. Koia, lolotoga te ʼu taʼu ʼaia neʼe maʼuʼuli ai te ʼu tagata ʼaeni ʼe toko fa: Ko Atama neʼe maʼuli ʼi te temi ʼae neʼe tupu ai ia Lameke, te tamai ʼa Noe. Ko Lameke neʼe kei maʼuli ʼi te temi ʼo Semi, te foha ʼo Noe. Pea ko Semi neʼe kei maʼuli ʼi te temi ʼo Apalahamo.—Sen. 5:5, 31; 9:29; 11:10, 11; 25:7.
^ pal. 13 Ko te higoa “Satana” ʼe ha tuʼa 18 ʼi te Koga Tohi-Tapu Fakahepeleo. Kaʼe ʼe ha tuʼa 30 ʼi te Koga Tohi-Tapu Fakakeleka. ʼE mahino ia neʼe mole faʼa talanoa ʼi te Koga Tohi-Tapu Fakahepeleo kia Satana, kaʼe neʼe talanoa tafitō ia ki te Mesia. Pea ʼi te ha leva ʼo te Mesia, neʼe ina fakamahino pe ko ai ia Satana, ohage ko tona tuʼu ʼi te Koga Tohi-Tapu Fakahepeleo.
^ pal. 22 Kapau ʼe ke fia iloʼi ʼihi fakamahino foʼou, vakaʼi te ʼu Tule Leʼo ʼaeni: ʼAho 15 ʼo Oketopeli 1995, ʼi te ʼu pasina 23-28; ʼaho 1 ʼo Sanualio 2008, ʼi te ʼu pasina 21-24; ʼaho 1 ʼo Sulio 2008, ʼi te ʼu pasina 27-32; ʼaho 15 ʼo Sulio 2013, ʼi te ʼu pasina 9-14.
^ pal. 61 Ko te ʼu mata ʼi tohi ʼaeni I.M.T.S. ko tona fakaʼuhiga: ʼI Muʼa ʼo te Temi ʼo Sesu.