KAPITE 5
ʼE Foaki e Te Hau He ʼu Fakamahino ʼo ʼUhiga Mo Te Puleʼaga
1, 2. Neʼe liliu feafeaʼi ia Sesu ko he tagata takitaki poto?
FAKAKAUKAUʼI age muʼa ʼe ke mamata ki he toe kolo matalelei. ʼE ko tau hoki sio ʼae ki te kolo ʼaia, ʼo feia mo natou ʼae ʼe kaugā olo mo koe. Koia ʼe kotou fakalogo lelei ai moka faifakamatala te tagata ʼae ʼe ina takitaki koutou. ʼE ke punamaʼuli ʼi ʼihi temi ʼi tau sio ki ʼihi agaaga ʼo te kolo. Pea ka ke fehuʼi ki te tagata ʼo ʼuhiga mo te ʼu agaaga ʼaia, ʼe mole ina foimo tali atu. Kaʼe ʼe hoki ina tali atu pe ʼi tona temi totonu. ʼE ke tokagaʼi ai tona poto, koteʼuhi ʼe ina fakaha atu te ʼu meʼa ʼae ʼe ʼaoga ke ke iloʼi ʼi tona temi totonu.
2 ʼE hage pe te kau Kilisitiano moʼoni ko ni hahaʼi mata fenua. ʼE tou fia iloʼi te kolo ʼae ʼe matalelei tokotahi, ia “te kolo ae e ina mau ni fakatafito malohi,” ia te Puleʼaga ʼo te ʼAtua. (Hep. 11:10) ʼI te kei maʼuli ʼa Sesu ʼi te kele, neʼe tokoni ki ʼana tisipulo ke natou mahino ki te Puleʼaga ʼaia. Kaʼe neʼe tali age koa e Sesu ki ʼanatou fehuʼi fuli pea mo ina tala fuli age ʼo ʼuhiga mo te Puleʼaga? Kailoa ia. Neʼe ina ui fenei: “E kei lahi te u mea e au mau ke fakaha atu kia koutou, kae e heeki feala ke kotou fua natou i te temi nei.” (Soa. 16:12) Ko Sesu, ʼae ʼe ko te tagata takitaki poto tokotahi ʼaia, neʼe mole ina fakaha age ki ʼana tisipulo he ʼu manatu neʼe heʼeki feala ke natou mahino ki ai.
3, 4. (1) Neʼe haga akoʼi feafeaʼi e Sesu tana hahaʼi agatonu ʼo ʼuhiga mo te Puleʼaga? (2) Kotea ʼae ka tou vakaʼi anai ʼi te kapite ʼaeni?
3 Ko te ʼu palalau ʼa Sesu ʼae ʼe tuʼu ia Soane 16:12, neʼe ina fai ʼi te po fakaʼosi ʼo tona maʼuli ʼi te kele. Kaʼe ʼi tana kua mate, ʼe ina haga akoʼi feafeaʼi anai tana hahaʼi agatonu ʼo ʼuhiga mo te Puleʼaga ʼo te ʼAtua? Neʼe ina fakapapau fenei ki ʼana apositolo: “[Ko] te Laumalie o te mooni, e ina taki anai koutou i te mooni katoa.” a (Soa. 16:13) ʼE feala ke tou fakata te laumalie maʼoniʼoni ki he tagata takitaki ʼe loto faʼa kataki. ʼE fakaʼaogaʼi e Sesu ia te laumalie ʼaia moʼo akoʼi ki tana hahaʼi ia meʼa fuli ʼe ʼaoga ke natou iloʼi ʼo ʼuhiga mo te Puleʼaga ʼo te ʼAtua, ʼi tona temi totonu.
4 Tou vakaʼi pe neʼe takitaki feafeaʼi e te laumalie maʼoniʼoni ʼo Sehova ia te kau Kilisitiano moʼoni ke natou mahino ki te Puleʼaga. ʼUluaki, ʼe tou vakaʼi anai pe neʼe feafeaʼi tatatou mahino ki te temi ʼae neʼe kamata pule ai te Puleʼaga ʼo te ʼAtua. Lua, ʼe tou vakaʼi anai pe ko ai natou ʼae ka hau ʼi te Puleʼaga, mo tana hahaʼi fakalogo, pea mo ʼanatou ʼamanaki. Pea ʼe tou vakaʼi anai pe neʼe mahino lelei feafeaʼi te ʼu tisipulo ʼa Kilisito ki te fakaʼuhiga ʼo te nofo agatonu ʼae ki te Puleʼaga.
Neʼe Natou Mahino ʼe Ko Te Taʼu Maʼuhiga
5, 6. (1) Kotea la he ʼu manatu hala neʼe maʼu e te Kau Ako ʼo Te Tohi-Tapu ʼo ʼuhiga mo te fakatuʼu ʼo te Puleʼaga pea mo te temi ʼo te taʼukai? (2) Ko te ʼu mahino hala ʼaia ʼe ha ai koa neʼe mole takitaki e Sesu ʼana tisipulo ʼaki tona laumalie? Fakamahino.
5 Ohage ko tatatou vakaʼi ʼi te Kapite 2 ʼo te tohi ʼaeni, lolotoga ni taʼu neʼe fakaha e te Kau Ako ʼo Te Tohi-Tapu ʼe maʼuhiga anai ia te taʼu 1914, koteʼuhi ʼe hoko ai te ʼu lea fakapolofeta ʼo te Tohi-Tapu. Kaʼe ʼi te temi ʼaia, neʼe natou mahino neʼe kamata ia te ʼi heni ʼa Kilisito ʼi te taʼu 1874, ʼe fakanofo hau ʼi selo ʼi te taʼu 1878, pea ʼe hoki katoa anai te faʼufaʼu ʼo te Puleʼaga ʼi te mahina ʼo Oketopeli 1914. Pea ʼe kamata te temi ʼo te taʼukai ʼi te taʼu 1874 ki te taʼu 1914, pea ʼe fakaʼosi ʼaki te tanaki ʼo te kau fakanofo ʼi selo. Ko te ʼu mahino hala ʼaia ʼe ha ai koa neʼe mole takitaki e Sesu ia te kau agatonu ʼaia ʼaki tona laumalie?
6 Kailoa ia! ʼE feala hau manatuʼi te fakata ʼae neʼe tou fakaʼaogaʼi ʼi te kamataʼaga. Ko te ʼu manatu pea mo te ʼu fehuʼi ʼa te hahaʼi mata fenua ʼe fakaha ai koa ʼe mole tuha te tagata takitaki mo te falala? Kailoa ia! Pea ʼo toe feia pe, logo la ʼi ʼihi temi neʼe faiga te hahaʼi ʼa te ʼAtua ke natou mahino ki ʼihi faʼahi ʼo te fakatuʼutuʼu ʼa Sehova ʼi muʼa ʼo tona fakamahino age e te laumalie maʼoniʼoni, kaʼe neʼe takitaki pe natou e Sesu. Koia neʼe lotolelei pe ia te kau agatonu ʼaia ke fakatonutonuʼi natou. Pea ʼaki he agavaivai, neʼe natou fetogi ʼanatou manatu.—Sakp. 4:6.
7. Kotea te ʼu fakamahino ʼi te faʼahi fakalaumalie neʼe maʼu e te hahaʼi ʼa te ʼAtua?
7 Hili te taʼu 1919, neʼe tapuakiʼi ia te hahaʼi ʼa te ʼAtua ʼaki he tahi ʼu fakamahino ʼi te faʼahi fakalaumalie. (Lau ia Pesalemo 97:11.) ʼI te taʼu 1925, neʼe ta ia te alatike maʼuhiga ʼi Te Tule Leʼo, ko tona kupu tafitō: “Te Fakatupu ʼo Te Puleʼaga.” Neʼe fakamoʼoni ai ʼaki ni vaega Tohi-Tapu, neʼe fakatuʼu ia te Puleʼaga Fakamesia ʼi te taʼu 1914, pea neʼe ko te fakahoko ʼaia ʼo te lea fakata ia Apokalipisi kapite 12, ʼe ui ai neʼe fanau ia te ʼohoana ʼo te ʼAtua ʼi selo. b Pea neʼe toe fakaha ʼi te alatike ʼaia, ko te ʼu fakataga pea mo te ʼu maveuveu ʼae neʼe hoko ki te hahaʼi ʼa Sehova ʼi te ʼu taʼu ʼaia ʼo te tau, neʼe ko te ʼu fakaʼiloga lelei ʼo te kua li ifo ʼa Satana mai selo, pea “kua mapula i he ita lahi, koteuhi e ina iloi kua nounou pe tona temi.”—Apk. 12:12.
8, 9. (1) Neʼe fakamaʼuhigaʼi feafeaʼi ia te Puleʼaga ʼo te ʼAtua? (2) Kotea te ʼu fehuʼi ʼae ka tou vakaʼi anai?
8 Neʼe fakamaʼuhigaʼi feafeaʼi ia te Puleʼaga? ʼI te taʼu 1928, neʼe kamata talanoa tafitō ʼi Te Tule Leʼo ki te maʼuhiga age ʼo te Puleʼaga ʼi te haofaki ʼo te hahaʼi ʼaki ia te sakilifisio ʼa Sesu. ʼE moʼoni te faʼahi ʼaia, koteʼuhi ʼe fakaʼaogaʼi anai e Sehova ia te Puleʼaga Fakamesia moʼo fakatapuha tona huafa, mo fakalakatonuʼi tana pule faʼitaliha, pea mo fakahoko ʼana fakatuʼutuʼu fuli ʼo ʼuhiga mo te malamanei.
9 Ko ai ʼae ka kaugā hau mo Kilisito ʼi te Puleʼaga ʼaia? Ko ai te hahaʼi fakalogo ʼo te Puleʼaga ʼaia? Pea kotea te gaue ʼe tonu ke fai e te ʼu tisipulo ʼa Kilisito?
Ko Te Tanaki ʼo Te Taʼukai Neʼe Fakaʼuhiga Tafitō Ki Te Kau Fakanofo
10. Kotea ʼae neʼe kua mahino ki ai te hahaʼi ʼa te ʼAtua ʼo ʼuhiga mo te toko 144 000?
10 ʼI muʼa ʼo te taʼu 1914, neʼe kua mahino ki te kau Kilisitiano moʼoni ʼe ko te toko 144 000 kau tisipulo agatonu ʼa Kilisito ʼae ka kaugā hau mo ia ʼi selo. c Ki te Kau Ako ʼo Te Tohi-Tapu ʼi te temi ʼaia, neʼe mole ko he numelo fakata ia, pea neʼe kamata fakatahiʼi natou ʼaia ʼi te temi ʼo te ʼu ʼuluaki Kilisitiano.
11. ʼO ʼuhiga mo tanatou gaue ʼi te kele, kotea te tahi ʼu faʼahi neʼe mahino ki ai ia natou ʼae ʼe kau ki te ʼohoana ʼo Kilisito?
11 Kaʼe kotea te gaue neʼe tonu ke fai e natou ʼaia ʼe kau ki te ʼohoana ʼo Kilisito, ʼi tanatou kei maʼuʼuli ʼi te kele? Neʼe natou tokagaʼi neʼe fakamaʼuhigaʼi e Sesu ia te gaue faifakamafola pea mo ina fakapipiki te gaue ʼaia mo te temi ʼo te taʼukai. (Mat. 9:37; Soa. 4:35) Ohage ko tatatou vakaʼi ʼi te Kapite 2, ʼi muʼa atu neʼe natou manatu, ʼe loaloaga anai te temi ʼo te taʼukai ia taʼu ʼe 40, pea ʼe fakaʼosi ʼaki te tanaki ʼo te kau fakanofo ʼi selo. Kaʼe hili te ʼu taʼu ʼaia ʼe 40, neʼe hoko atu pe ia te faifakamafola. Koia, neʼe ʼaoga ai he tahi ʼu fakamahino. ʼI te temi ʼaeni, kua tou mahino neʼe kamata ia te temi ʼo te taʼukai ʼi te taʼu 1914. Neʼe ko te temi ʼaia ʼae neʼe tuku keheʼi ai te fulumeto mai te vao kovi, ko tona fakaʼuhiga neʼe tuku keheʼi te kau Kilisitiano fakanofo agatonu mai te kau Kilisitiano loi. Neʼe ko te temi ʼaia ke tanaki te toe ʼo te kalasi ʼaia ka hake ki selo!
12, 13. Neʼe hoko feafeaʼi ʼi te ʼu ʼaho fakaʼosi ia te ʼu lea fakata ʼa Sesu ʼo ʼuhiga mo te ʼu taupoʼou ʼe toko 10 pea mo te ʼu tenalio?
12 Talu mai te taʼu 1919, neʼe haga takitaki pe e Kilisito te tagata faifekau agatonu mo poto ke ina fakamaʼuhigaʼi ia te faifakamafola. Neʼe ina foaki ia te gaue ʼaia ki ʼana ʼuluaki tisipulo. (Mat. 28:19, 20) Pea neʼe ina toe fakaha age te ʼu kalitate ʼae ʼe tonu ke natou maʼu moʼo fakahoko ʼaki te gaue ʼaia. Neʼe tonu ke natou fakahoko feafeaʼi? ʼI tana lea fakata ʼo ʼuhiga mo te ʼu taupoʼou ʼe toko 10, neʼe ina fakaha ʼe tonu ki te kau fakanofo ke natou nonofo ʼalaʼala pea mo nonofo tokaga ʼi te faʼahi fakalaumalie, mo kapau ʼe natou fia kau ki te katoaga ʼo te faiʼohoana lahi ʼi selo, moka fakatahiʼi anai ia Kilisito mo te toko 144 000, tona “ ʼohoana.” (Apk. 21:2, MN) Pea ʼi tana lea fakata ʼo ʼuhiga mo te ʼu tenalio, neʼe fakamahino e Sesu ʼe tonu ke faʼa gaue ʼana kaugana fakanofo ʼi te gaue faifakamafola ʼae neʼe ina tuku age kia natou.—Mat. 25:1-30.
13 Ko te kau Kilisitiano fakanofo neʼe natou nonofo tokaga pea mo natou faʼa gaue ʼi te ʼu taʼu ʼe teau ʼaeni kua hili atu. ʼE mahino ia, ʼe tapuakiʼi anai tanatou nonofo tokaga ʼaia! Kaʼe neʼe gata ai pe koa te tanaki ʼo te taʼukai mo te toe ʼo te toko 144 000 ʼae ka kaugā hau mo Kilisito?
ʼE Tanaki e Te Puleʼaga Tana Hahaʼi Fakalogo ʼi Te Kele
14, 15. Ko ai te ʼu kutuga ʼe fa ʼae neʼe talanoa ki ai ʼi te tohi Le mystère accompli?
14 Kua fualoa te fia mahino ʼa te hahaʼi tagata mo fafine agatonu pe ko ai te “hahai kaugamalie osi” peʼe ko te toe hahaʼi tokolahi, ʼae ʼe talanoa ki ai ia Apokalipisi 7:9-14. Koia, ʼi muʼa ʼo te hoko ʼo te temi ʼae ke fakamahino e Kilisito pe ko ai te hahaʼi kaugā malie ʼaia, neʼe lahi te ʼu fakamahino neʼe fai ʼo kaku mai leva ki te fakamahino lelei mo totonu ʼae kua tou maʼu pea mo leleiʼia ia ʼaho nei.
15 ʼI te taʼu 1917, neʼe ui ʼi te tohi Le mystère accompli ko kutuga ʼe lua ʼe ʼamanaki olo ki selo pea ko kutuga ʼe lua ʼe ʼamanaki maʼuʼuli ʼi te kele. Ko ai ia te ʼu kutuga ʼaia ʼe fa? ʼUluaki, ko te toko 144 000 ʼae ka kaugā hau mo Kilisito. Lua, ko te toe hahaʼi tokolahi. ʼI te temi ʼaia, neʼe natou manatu ko natou ʼaia neʼe ko te kau Kilisitiano, koteʼuhi neʼe natou tui, kaʼe neʼe kei natou kau pe ki te ʼu lotu ʼae ʼe ui ʼe natou tui kia Kilisito. Koia ʼe foaki ai kia natou he tuʼulaga ʼe malalo age ʼi selo. ʼO ʼuhiga leva mo natou ʼae ʼe ʼamanaki maʼuʼuli ʼi te kele, neʼe natou manatu ʼe ko te tolu kutuga, “te hahaʼi maʼuhiga ʼo te temi muʼa,” ohage ko Apalahamo, mo Moisese pea mo ʼihi atu, ʼae ka natou pule ki te fa kutuga, ia te hahaʼi ʼo te malamanei.
16. Ko te ʼu fakamahino fea neʼe maʼu ʼi te taʼu 1923 pea mo te taʼu 1932?
16 Neʼe takitaki feafeaʼi e te laumalie maʼoniʼoni ia te ʼu tisipulo ʼa Sesu ke natou maʼu ia te mahino ʼae ʼe tou leleiʼia ia ʼaho nei? Neʼe hoko mamalie ia te faʼahi ʼaia. ʼI te taʼu 1923, neʼe talanoa ʼi Te Tule Leʼo ki he kutuga ʼe mole olo ki selo kaʼe ʼe natou maʼuʼuli anai ʼi te kele ʼo fakalogo ki te pule ʼa Kilisito. Pea ʼi te taʼu 1932, neʼe palalau ʼi Te Tule Leʼo ʼo ʼuhiga mo Sonatape, te tagata ʼae neʼe lagolago kia Seu, te Hau Iselaele ʼae neʼe fakanofo e te ʼAtua, moʼo tauʼi ia te tauhi hala. (2 Hau 10:15-17) Neʼe ui ʼi te alatike ʼaia neʼe ʼi ai te kalasi ʼo te hahaʼi ʼi totatou temi neʼe natou hage ko Sonatape, pea ʼe haofaki anai e Sehova ia te kalasi ʼaia ʼi Halamaketone ke natou maʼuʼuli ʼi te kele.
17. (1) ʼI te taʼu 1935, kotea te tahi fakamahino neʼe fakaha? (2) Neʼe feafeaʼi ia te loto ʼo te kau Kilisitiano agatonu ʼi te fakamahino foʼou ʼaia ʼo ʼuhiga mo te toe hahaʼi tokolahi? (Vakaʼi te fakamatala ʼae ʼi te ʼa takai “Te Toe Fiafia Lahi.”)
17 ʼI te taʼu 1935, neʼe ʼi ai te tahi fakamahino. ʼI te fakatahi lahi ʼae neʼe fai ʼi Washington, ʼi Amelika, neʼe fakamahino ai ko te toe hahaʼi tokolahi neʼe ko he kalasi ʼo te hahaʼi ʼe natou maʼu ia te ʼamanaki ʼae ke natou maʼuʼuli ʼi te kele. ʼE toe fakaʼuhiga ki te kalasi ʼaia ia te ʼu ovi ʼi te lea fakata ʼa Sesu ʼo ʼuhiga mo te ʼu ovi mo te ʼu tao. (Mat. 25:33-40) ʼE kau te toe hahaʼi tokolahi ʼi te tahi ʼu ovi, pea neʼe ui fenei e Sesu ʼo ʼuhiga mo natou ʼaia: “Ko natou aia, e tonu ke au aumai natou.” (Soa. 10:16) Neʼe ui fenei e te tehina faiakonaki ko J. F. Rutherford: “ ʼE au kole atu kia natou ʼae ʼe natou ʼamanaki ke natou maʼuʼuli ʼo heʼe gata ʼi te kele, ke natou tutuʼu ake!” ʼI te lahi ʼaupito ʼo te hahaʼi ʼae neʼe tutuʼu ake, neʼe ui fenei e Rutherford: “Koʼeni! Te hahaʼi kaugā malie!” Tokolahi neʼe fiafia ʼaupito ʼi tanatou kua mahino leva ki tanatou ʼamanaki ki te ka haʼu.
18. ʼI tanatou minisitelio, kotea ʼae ʼe tokaga tafitō ki ai ia te ʼu tisipulo ʼa Kilisito, pea kotea ʼona fua?
18 Talu mai ai mo te takitaki e Kilisito tana hahaʼi ke natou tokakaga tafitō ʼo tanaki te toe hahaʼi tokolahi ʼaia ʼae ka hao anai ʼi te mamahi lahi. ʼI te kamata, neʼe hage ʼe mole kaugā malie anai ia natou ʼaia. Maʼia mo te tehina ko Rutherford, neʼe ina ui fenei: “ ʼE hage ia ʼe mole faʼa hahaʼi ia te ‘hahaʼi kaugā malie.ʼ ” ʼE mahino ia, kua tou iloʼi ʼi te temi nei neʼe tapuakina lahi e Sehova ia te taʼukai talu mai te temi ʼaia. ʼAki te takitaki ʼa Sesu pea mo te laumalie maʼoniʼoni, ko te kau Kilisitiano fakanofo pea mo te tahi ʼu ovi kua natou liliu ko “he faga ovi e tahi,” ʼe natou kaugā gaue fakatahi ʼo fakalogo ki “he tauhi ovi e tahi.”
19. ʼE tou lava kau feafeaʼi ki te fakakaugā malie ʼo te toe hahaʼi tokolahi?
19 ʼI te hahaʼi agatonu ʼa te ʼAtua, ʼe tokolahi age natou ʼae ka maʼuʼuli anai ʼo heʼe gata ʼi te palatiso ʼi te kele, ʼae ka puleʼi anai e Kilisito mo te toko 144 000. ʼE mole tou fiafia koa ʼi tatatou sisio ʼae pe neʼe takitaki feafeaʼi e Kilisito ia te hahaʼi ʼa te ʼAtua ke natou mahino lelei ki tanatou ʼamanaki? ʼE ko he toe pilivilesio tatatou vaevae ia te ʼamanaki ʼaia mo te hahaʼi ʼi tatatou minisitelio! Koia, tou gaue lahi ke kaugā malie age ia te toe hahaʼi tokolahi ʼaia, ke hake ai ia he toe fakavikiviki lahi ki te huafa ʼo Sehova!—Lau ia Luka 10:2.
Te Faʼahiga Agatonu Ki Te Puleʼaga ʼAe ʼe Fakamaʼua
20. Kotea te ʼu faʼahi ʼae ʼe natou faʼufaʼu ia te kautahi ʼa Satana? Kotea tona pikipikiga mo te nofo agatonu ʼa te kau Kilisitiano ki te Puleʼaga ʼo te ʼAtua?
20 Neʼe hoko atu ia te mahino ʼa te hahaʼi ʼa te ʼAtua ki te Puleʼaga. Neʼe natou toe mahino lelei age ki te fakaʼuhiga ʼae ʼo tanatou nonofo agatonu ki te puleʼaga ʼaia ʼi selo. ʼO ʼuhiga mo te faʼahi ʼaia, ʼi te taʼu 1922, neʼe fakaha ʼi Te Tule Leʼo ʼe ʼi ai kautahi ʼe lua: Te kautahi ʼa Sehova pea mo ʼae ʼa Satana. ʼE faʼufaʼu ia te kautahi ʼa Satana ʼaki te ʼu faʼahi ʼaeni: Te ʼu faifakatau koloa, mo te ʼu lotu pea mo te kau faipolitike. Ko natou ʼae ʼe nonofo agatonu ki te Puleʼaga ʼo te ʼAtua ʼae ʼe takitaki e Kilisito, ʼe mole tonu ke natou heʼe agatonu, ʼo natou kau ki he faʼahi pe ʼae ʼe faʼufaʼu ʼaki te kautahi ʼa Satana. (2 Ko. 6:17) Kotea tona fakaʼuhiga?
21. (1) Kotea te fakatokaga neʼe fai e te tagata faifekau agatonu ki te hahaʼi ʼa te ʼAtua ʼo ʼuhiga mo te ʼu faifakatau koloa? (2) ʼI te taʼu 1963, kotea ʼae neʼe fakamahino ʼi Te Tule Leʼo ʼo ʼuhiga mo “Papilone lahi”?
21 ʼE haga fakaha ʼi te ʼu tohi ʼa te tagata faifekau agatonu ia te kakā ʼo te ʼu faifakatau koloa pea mo fakatokaga ki te hahaʼi ʼa te ʼAtua ke ʼaua naʼa natou to ki te fia maʼu koloa. (Mat. 6:24) Pea ʼe haga fakaha ʼi ʼatatou tohi ia te ʼuhiga moʼoni ʼo te ʼu lotu, ʼae ʼe ko he faʼahi ʼo te kautahi ʼa Satana. ʼI te taʼu 1963, neʼe fakaha lelei ʼi Te Tule Leʼo ko “Papilone lahi” ʼe mole ina fakata pe ia te ʼu lotu ʼae ʼe ui ʼe natou tui kia Kilisito, kaʼe ʼe ko te kautahi fakamalamanei ʼo te ʼu lotu hala fuli. Koia, ohage ko tatatou vakaʼi anai ʼi te Kapite 10 ʼo te tohi ʼaeni, neʼe tokoni ki te hahaʼi ʼa te ʼAtua ʼi te ʼu fenua mo te ʼu aga ʼi fenua fuli ke natou “mavae maia ia,” ke natou fakamaʼa mai te ʼu aga fakalotu hala fuli.—Apk. 18:2, 4.
22. Lolotoga te ʼUluaki Tau Fakamalamanei, neʼe feafeaʼi te mahino ʼa te tokolahi ki te fakatotonu ia Loma 13:1?
22 Pea neʼe feafeaʼi leva ʼo ʼuhiga mo te kau faipolitike, ko te tahi faʼahi ʼaia ʼo te kautahi ʼa Satana? Neʼe feala koa ki te kau Kilisitiano moʼoni ke natou kau ki te ʼu tau? Lolotoga te ʼUluaki Tau Fakamalamanei, neʼe mahino ia te Kau Ako ʼo Te Tohi-Tapu ʼe mole tonu ki te ʼu tisipulo ʼa Kilisito ke natou matehi he tahi. (Mat. 26:52) Kaʼe ki te tokolahi, ko te fakatotonu ʼae ia Loma 13:1, ʼae ke fakalogo ki “te u pule e taki” neʼe ko tona fakaʼuhiga ke natou solia, mo natou teu solia pea mo toʼo he fana; kaʼe ka tonu ke natou fanahi he tahi, neʼe natou fakapa ki ʼoluga.
23, 24. Lolotoga te Lua Tau Fakamalamanei, neʼe feafeaʼi tatatou mahino kia Loma 13:1? Kaʼe kotea te tahi age fakamahino neʼe maʼu e te kau tisipulo ʼa Kilisito?
23 ʼI te kamata ʼo te Lua Tau Fakamalamanei ʼi te taʼu 1939, neʼe talanoa ʼi Te Tule Leʼo ʼo ʼuhiga mo te mole kau ʼa te kau Kilisitiano ki te ʼu tau. Neʼe fakaha lelei ʼi te alatike ʼaia, ʼe mole tonu ke kau te kau Kilisitiano ki te fetauʼaki ʼa te ʼu puleʼaga ʼo te malama ʼa Satana. Neʼe to tonu ia te fakamahino ʼaia! Koteʼuhi neʼe mole kau ai te ʼu tisipulo ʼa Kilisito ki te toe ligi toto fakamataku ʼae neʼe hoko ʼi te tau ʼaia. Kaʼe ʼi te taʼu 1929, neʼe fakamahino ʼi ʼatatou tohi ko te ʼu pule taki ʼae ia Loma 13:1 ʼe mole ko te kau takitaki ʼo te malama, kaʼe ʼe ko Sehova mo Sesu. Neʼe kei ʼaoga ke fakamahino lelei age ia te faʼahi ʼaia.
24 Neʼe takitaki e te laumalie maʼoniʼoni ia te ʼu tisipulo ʼa Kilisito ke natou mahino ki te faʼahi ʼaia ʼi te taʼu 1962. Neʼe ta ia te ʼu alatike ʼae neʼe talanoa kia Loma 13:1-7, ʼi Te Tule Leʼo ʼo te ʼaho 15 ʼo Novepeli pea mo ʼae ʼo te ʼaho 1 ʼo Tesepeli. Neʼe mahino leva ki te hahaʼi ʼa te ʼAtua ia te faʼahi ʼae neʼe talanoa ki ai ia Sesu, ʼo ʼuhiga mo te mole fakalogo katoa ʼae ki te ʼu pule taki. Neʼe ina ui fenei: “Koutou liufaki kia Sesale te mea a Sesale pea ki te Atua te mea a te Atua.” (Luka 20:25) Neʼe mahino ai ia te kau Kilisitiano moʼoni ko te kau pule taki ʼe ko te ʼu puleʼaga takitaki ʼo te malama ʼaeni, pea ʼe maʼua ke fakalogo ki ai te kau Kilisitiano. Kaʼe ʼe mole ko he fakalogo katoa. He ʼe kapau ʼe fakamaʼua mai e te ʼu puleʼaga ke tou talagataʼa kia Sehova ʼAtua, pea ʼe tou tali pe anai ohage ko te kau apositolo: “E tonu ke fakalogo age ki te Atua i te tagata.” (Gaue 5:29) ʼI te Kapite 13 mo te 14 ʼo te tohi ʼaeni, ʼe tou vakaʼi anai pe neʼe feafeaʼi te mole kau ʼa te hahaʼi ʼa te ʼAtua ki te ʼu tau.
25. He ko ʼe ʼe feala ke tou lotofakafetaʼi ʼo ʼuhiga mo te takitaki ʼa te laumalie maʼoniʼoni ke tou mahino ki te Puleʼaga ʼo te ʼAtua?
25 Fakakaukauʼi age muʼa ia te ʼu faʼahi ʼo ʼuhiga mo te Puleʼaga ʼae neʼe mahino ki ai te ʼu tisipulo ʼa Kilisito ʼi te ʼu taʼu ʼaeni ʼe teau kua hili. Neʼe tou mahino ki te taʼu ʼae neʼe fakatuʼu ai ia te Puleʼaga, ʼo feia mo te maʼuhiga ʼo te Puleʼaga ʼaia. Kua tou mahino lelei age ki te ʼu ʼamanaki ʼe lua ʼe feala ke maʼu e te hahaʼi agatonu, te ʼamanaki ʼae ke natou olo ki selo pea mo te ʼamanaki ʼae ke natou maʼuʼuli ʼi te kele. Pea kua tou iloʼi te fakaʼuhiga ʼo tatatou nofo agatonu ki te Puleʼaga ʼo te ʼAtua, logo la tatatou fakalogo ki te ʼu takitaki ʼo te malama ʼaeni. ʼE feala ke ke fai ia te fehuʼi ʼaeni: “Neʼe feala koa ke au mahino ki te ʼu moʼoni maʼuhiga ʼaia, mo ka na pau la neʼe mole takitaki e Sesu Kilisito ia tana tagata faifekau agatonu ʼi te kele ke mahino ki ai pea mo ina akoʼi leva ki te hahaʼi?” Ko he toe tapuakina lahi te takitaki ʼo tatou e Kilisito pea mo te laumalie maʼoniʼoni!
a Ohage ko tona ui ʼi te tohi, ko te kupu Fakakeleka ʼae neʼe fakaliliu ʼaki te kupu “taki” ʼi te vaega ʼaeni, ko tona fakaʼuhiga “fakahinohino ia te ala.”
b ʼI muʼa atu, neʼe tou manatu ko te meʼa ʼaia neʼe ha, neʼe ina fakata ia te fetauʼaki ʼo te ʼu lotu pagani Loma pea mo te lotu Katolika Loma.
c ʼI te mahina ʼo Sunio 1880, neʼe tohi ʼi Te Tule Leʼo, ko te toko 144 000 ʼe lagi ko te hahaʼi Sutea ʼae neʼe tafoki ʼi te taʼu 1914. Kaʼe ʼi te fakaʼosi ʼo te taʼu 1880, neʼe ta ia te fakamahino ki te faʼahi ʼaia neʼe tatau mo tatatou mahino talu mai ai.