KAPITE 21
ʼE Fakaʼauha e Te Puleʼaga ʼo Te ʼAtua ʼOna Fili
1, 2. (1) Kotea ʼae ʼe fakamoʼoni ʼaki ai kua pule totatou Hau talu mai te taʼu 1914? (2) Kotea ʼae ka tou vakaʼi anai ʼi te kapite ʼaeni?
ʼE MAHINO ia kua malohi tatatou tui ʼi tatatou vakaʼi ia te ʼu gaue ʼae neʼe fai e te Puleʼaga ʼo te ʼAtua ʼi te lotolotoiga ʼo ʼona fili. (Pes. 110:2) Neʼe fakatuʼu e totatou Hau ia he kau faifakamafola kaugā malie pea mo lotolelei. Neʼe ina fakamaʼa ʼana tisipulo ʼi te faʼahi fakalaumalie pea mo te aga. Pea logo la te ʼu faiga ʼo te ʼu fili ʼo te Puleʼaga ke natou fakamavetevete tatou, kaʼe ʼe kei tou logotahi pe ia ʼaho nei ʼi te malamanei. Ko te ʼu gaue ʼaia neʼe tou vakaʼi pea mo ʼihi atu ʼae neʼe fakahoko e te Puleʼaga, ʼe ko he fakamoʼoni ʼaia ʼo te kua pule ʼo totatou Hau talu mai te taʼu 1914 ʼi te lotolotoiga ʼo te ʼu fili ʼo te Puleʼaga.
2 Pea ʼe ʼamanaki fakahoko e te Puleʼaga te tahi ʼu gaue fakatalakitupua. ʼE haʼu anai te Puleʼaga pea ʼe ina “fasifasii anai, pea e ina maumaui anai” ʼona fili. (Mat. 6:10; Tan. 2:44) Kaʼe ia muʼa, ʼe hoko anai te tahi ʼu aluʼaga maʼuhiga. Kotea te ʼu aluʼaga ʼaia? ʼE tali ki ai te ʼu lea fakapolofeta ʼi te Tohi-Tapu. Tou vakaʼi ʼihi ʼi te ʼu lea fakapolofeta ʼaia.
Te ʼu Aluʼaga ʼAe Ka Hoko ʼi Muʼa ʼo Te Fakaʼauha Fakapunamaʼuli
3. Kotea ia te ʼuluaki aluʼaga ʼae ka ʼamanaki hoko?
3 Te tala ʼo te tokalelei. ʼI tana faitohi ki te kau Tesalonika, neʼe fakaha e te apositolo ko Paulo ia te ʼuluaki aluʼaga ʼae ka ʼamanaki hoko. (Lau ia 1 Tesalonika 5:2, 3.) ʼI tana tohi ʼaia, ʼe talanoa ia Paulo ki te “aho o [Sehova]” ʼae ka kamata anai ʼaki te ʼohofi ʼo “Papilone lahi.” (Apk. 17:5) Kaʼe ʼi muʼa ʼo te kamata ʼo te ʼaho ʼo Sehova, ʼe tala anai e te ʼu puleʼaga “Tokalelei mo fimalie!” ʼE lagi tala tuʼa tahi anai e te ʼu puleʼaga ia te logo ʼaia peʼe natou fai tuʼa lahi anai ni palalau maʼuhiga ʼo ʼuhiga mo te tokalelei. ʼE toe kau anai koa ki ai te kau takitaki lotu? Mai tona aluʼaga ʼae ʼe natou kau ki te malama ʼaeni, ʼe lagi natou tala fakatahi anai mo te ʼu puleʼaga: “Tokalelei!” (Sel. 6:14; 23:16, 17; Apk. 17:1, 2) Ko te tala ʼaia ʼo te tokalelei mo te fimalie ʼe tou iloʼi ai kua vave kamata ia te ʼaho ʼo Sehova. Ko te ʼu fili ʼo te Puleʼaga ʼo te ʼAtua “e mole feala anai hanatou hao i ai.”
4. He ko ʼe ʼe ʼaoga ke tou mahino ki te lea fakapolofeta ʼa Paulo ʼo ʼuhiga mo te tala ʼo te tokalelei mo te fimalie?
4 He ko ʼe ʼe ʼaoga ke tou mahino ki te lea fakapolofeta ʼaia? ʼE ui fenei e Paulo: “E mole koutou nofo i te fakapouli, ke pooki koutou e te aho aia o hage e he tagata kaihaa.” (1 Tes. 5:3, 4) Koia, ʼe tou iloʼi ia te ikuʼaga ʼo te ʼu aluʼaga ʼae ʼe lolotoga hoko, ʼo mole hage ko te hahaʼi ʼo te malamanei. ʼE fakaalualu feafeaʼi anai ia te fakahoko ʼo te lea fakapolofeta ʼaia? ʼE tonu ke tou fakatalitali pea mo vakaʼi pe kotea ʼae ka hoko. Koia, “tou alaala pea tou fakapotopoto.”—1 Tes. 5:6; Sofo. 3:8.
ʼE Kamata Te Mamahi Lahi
5. ʼE feafeaʼi anai te kamata ʼo te “mamahi lahi”?
5 ʼE ʼohofi te ʼu lotu. Neʼe tohi fenei e Paulo: “I te temi ae e ui ai anai e te u tagata: Tokalelei mo fimalie! I te temi pe aia e fakamautoka anai natou e he tuutamaki fakapunamauli.” ʼE hage pe ko te tapa ʼo te hila pea hoa atu pe ki ai te pa ʼo te mana. Koia, ka natou ui anai “Tokalelei mo fimalie!” pea ʼe hoa atu pe anai ki ai “he tuutamaki fakapunamauli.” Kotea ʼae ka fakaʼauha? ʼUluaki, ko “Papilone lahi,” te kautahi fakamalamanei ʼo te ʼu lotu hala, ʼae ʼe toe higoa ko he “fafine faifeauaki.” (Apk. 17:5, 6, 15) Ko te fakaʼauha ʼaia ʼo te ʼu lotu ʼae ʼe natou ui ʼe natou Kilisitiano, ʼo feia mo te tahi ʼu kautahi fakalotu, ʼe ko te kamataʼaga ʼaia ʼo te “mamahi lahi.” (Mat. 24:21; 2 Tes. 2:8) ʼE punamaʼuli anai te tokolahi ki te fakaʼauha ʼaia. Kotea tona tupuʼaga? Koteʼuhi, ʼi muʼa ʼo tona fakaʼauha, ʼe kei manatu pe anai te fafine faifeauaki ko ia ko he “fafine aliki” pea ʼe mole ina “iloi te mamahi.” Kaʼe ʼe mahino vave pe anai kia ia tana faihala. ʼE pulihi fakavilivili anai, ohage ʼi “he aho e tahi.”—Apk. 18:7, 8.
6. Ko ai ʼae ka ina ʼohofi anai ia “Papilone lahi”?
6 Ko ai ʼae ka ina ʼohofi anai ia “Papilone lahi”? Ko te “manu” mo ʼona “tala e hogofulu.” ʼI te tohi ʼo Apokalipisi ʼe tou mahino ai ko te manu ʼaia, ʼe ko te Kautahi ʼo Te ʼu Puleʼaga Fakatahi. ʼE fakata e te ʼu tala ʼe hogofulu te ʼu malohi fakapolitike fuli ʼae ʼe lolotoga takitaki nei pea mo natou lagolago ki te “manu kula” ʼaia. (Apk. 17:3, 5, 11, 12) ʼE kovi anai tona fakaʼauha. Koteʼuhi ko te ʼu fenua ʼae ʼe kau ki te Kautahi ʼo Te ʼu Puleʼaga Fakatahi ʼe natou toʼo anai te ʼu koloa ʼo te fafine faifeauaki ʼaia, mo natou “kai anai ona kakano” pea mo “tutu anai ia ia i he afi.”—Lau ia Apokalipisi 17:16. *
7. ʼI te taʼu 66 H.T.S., neʼe hoko feafeaʼi ia te ʼu palalau ʼa Sesu ʼae ia Mateo 24:21, 22, pea ʼe hoko feafeaʼi anai ʼi te ka haʼu?
7 ʼE fakanounou anai te ʼu ʼaho ʼaia. Neʼe fakaha e totatou Hau pe kotea anai ka hoko ʼi te temi ʼaia ʼo te mamahi lahi. Neʼe ui fenei e Sesu: “O tupu ko te kau filifiliia, e fakasiisii [peʼe fakanounou] anai te u aho aia.” (Lau ia Mateo 24:21, 22.) Neʼe ʼuluaki hoko ia te ʼu palalau ʼaia ʼa Sesu ʼi hona aluʼaga veliveli ʼi te taʼu 66 H.T.S. ʼI te taʼu ʼaia neʼe fakanounou e Sehova ia te ʼohofi e te kautau Loma ia Selusalemi. (Mko. 13:20) Neʼe feala ai ke haofaki te kau Kilisitiano ʼi Selusalemi pea mo Sutea. Kaʼe kotea anai ka hoko lolotoga te mamahi lahi, ʼi te malamanei katoa? Ko Sehova, ʼaki totatou Hau, ʼe ina fakanounou anai te ʼohofi ʼo te ʼu lotu e te Kautahi ʼo Te ʼu Puleʼaga Fakatahi, ke mole fakaʼauha ai mo te lotu moʼoni. Koia, ka fakaʼauha anai ia te ʼu lotu hala fuli, ʼe haofaki pe anai ia te lotu moʼoni. (Pes. 96:5) Tou vakaʼi ia te ʼu aluʼaga ka hoko ki muli age.
Te ʼu Aluʼaga ʼAe Ka Hoko ʼi Muʼa ʼo Halamaketone
8, 9. Kotea ʼae neʼe lagi fakaʼuhiga ki ai te ʼu fakaʼiloga ʼae neʼe talanoa ki ai Sesu? Pea ʼe feafeaʼi anai ia te hahaʼi ʼi tanatou sisio ki te ʼu faʼahi ʼaia?
8 ʼI te ʼu lea fakapolofeta ʼa Sesu ʼo ʼuhiga mo te ʼu ʼaho fakaʼosi ʼe fakaha ai ʼe hoko anai te ʼu aluʼaga kehekehe ʼi muʼa ʼo Halamaketone. Ko te ʼu ʼuluaki aluʼaga ʼe lua ʼae ka tou vakaʼi anai ʼe tuʼu ʼi te ʼu Evaselio ʼo Mateo, mo Maleko pea mo Luka.—Lau ia Mateo 24:29-31; Mko. 13:23-27; Luka 21:25-28.
9 Te ʼu fakaʼiloga ʼi te lagi. Neʼe fakakikite fenei e Sesu: “E fakapouli anai te laa, pea e mole toe malama anai te mahina, pea e fetoki anai te u fetuu mai te lagi.” ʼE mahino ia ʼe mole kumi tokoni anai te hahaʼi ki te kau takitaki lotu ʼae hage ko he malama maʼa natou. Neʼe lagi toe talanoa ai ia Sesu ki ʼihi fakaʼiloga makehe ʼae ka hoko ʼi te lagi. (Esa. 13:9-11; Soe. 2:1, 30, 31) ʼE feafeaʼi anai ia te hahaʼi ʼi tanatou sisio ki te ʼu faʼahi ʼaia? ʼE natou “manavahe” anai koteʼuhi “e mole kei natou iloi he mea ke fai.” (Luka 21:25; Sofo. 1:17) ʼEi, ko te ʼu fili ʼo te Puleʼaga ʼo te ʼAtua, mai ‘te ʼu hau ki te kau popula,’ ʼe natou ‘matataku lahi ʼosi ʼi te talitali ki te ʼu meʼa ka hoko’ pea ʼe natou feholaki anai ʼo kumi honatou puipuiʼaga. Kaʼe ʼe mole feala anai ke natou hao mai te hauhau ʼo totatou Hau.—Luka 21:26; 23:30; Apk. 6:15-17.
10. Kotea te fakamau ka fai anai e Sesu, pea ʼe feafeaʼi anai ia natou ʼae ʼe lagolago ki te Puleʼaga ʼo te ʼAtua pea mo natou ʼae ʼe fakafeagai ki ai?
10 Te vaheʼi kehe ʼo te ʼu ovi mo te ʼu tao. Ko te ʼu fili ʼo te Puleʼaga ʼo te ʼAtua ʼe natou sisio fuli anai ki te aluʼaga ʼae ka ina fakaʼaʼasili anai tonatou matataku. Neʼe ui fenei e Sesu: “E [natou] sio anai ki te Foha o te tagata e hifo mai i te ao mo te malohi lahi pea mo te kololia.” (Mko. 13:26) Ko te aluʼaga fakaofoofo ʼaia ʼe ko te fakaʼiloga anai ʼo te haʼu ʼa Sesu ʼo fai he fakamau. ʼI te tahi lea fakapolofeta ʼa Sesu ʼo ʼuhiga mo te ʼu ʼaho fakamuli, neʼe ina fakamahino pe feafeaʼi anai te fai ʼo te fakamau ʼaia. ʼE tou maʼu te faʼahi ʼaia ʼi te lea fakata ʼo te ʼu ovi mo te ʼu tao. (Lau ia Mateo 25:31-33, 46.) Ko natou ʼae ʼe lagolago agatonu ki te Puleʼaga ʼo te ʼAtua ʼe tala anai ko natou ko te ʼu “ovi” pea ʼe natou “lagai ki oluga [ʼonatou] mata” he ʼe “kua ovi mai [tonatou] haofaki.” (Luka 21:28) Kaʼe ko natou ʼae ʼe fakafeagai ki te Puleʼaga ʼe tala anai ko natou ko te ʼu “tao” pea ʼe natou “fetagihi” anai he ʼe natou olo ki “te tautea heegata.”—Mat. 24:30; Apk. 1:7.
11. ʼI tatatou vakavakaʼi ia te ʼu aluʼaga ʼae ka hoko mai, kotea ʼae ʼe tonu ke tou manatuʼi?
11 ʼI te ʼosi fai e Sesu te fakamau ʼaia ʼo “te atu puleaga fuli,” ʼe hoko anai te tahi ʼu aluʼaga ʼi muʼa ʼo Halamaketone. (Mat. 25:32) ʼE tou vakaʼi anai te ʼu aluʼaga ʼe lua: te ʼohofi ʼo Koke pea mo te fakatahiʼi ʼo te kau fakanofo. ʼI tatatou vakavakaʼi ia te ʼu aluʼaga ʼaia ʼe lua, ʼe tonu ke tou manatuʼi ʼe mole fakaha mai ʼi te Tohi-Tapu te temi totonu ʼae ka hoko ai te ʼu aluʼaga ʼaia. ʼE lagi kamata anai te lua faʼahi kaʼe heʼeki ʼosi te ʼuluaki.
12. ʼE ʼohofi feafeaʼi anai e Satana ia te Puleʼaga?
12 Te ʼohofi fakamataku. ʼE ʼohofi anai e Koke ʼo Makoke te toe ʼo te kau fakanofo pea mo ʼonatou kaumea, te tahi ʼu ovi. (Lau ia Esekiele 38:2, 11.) Ko te ʼohofi ʼaia e Satana ia te Puleʼaga, ʼe ko tana ʼohofi fakamuli ʼaia, he ʼe talu mai tona kapu ʼae mai selo mo tana tauʼi ia te toe ʼo te kau fakanofo. (Apk. 12:7-9, 17) Talu mai te tanaki ʼo te kau fakanofo ki te kokelekasio Fakakilisitiano ʼae kua fakamaʼa, mo te faiga tafitō e Satana ke ina maumauʼi tonatou palatiso fakalaumalie, kaʼe neʼe mole hona fua. (Mat. 13:30) Kaʼe ʼe manatu anai e Satana kua ina maʼu he faigamalie. Koteʼuhi ʼi te temi ʼae kua fakaʼauha ai te ʼu lotu fuli ʼe hage leva te hahaʼi ʼa te ʼAtua ʼe natou nonofo “i ni kolo hala kaupa takatakai, pea e mole natou mau ni loka mo ni matapa.” ʼE ina uga anai tana hahaʼi agakovi ke natou ʼohofi ia natou ʼae ʼe lagolago ki te Puleʼaga.
13. Kotea ʼae ka fai anai e Sehova maʼa tana hahaʼi?
13 ʼE fakamatalatala e Esekiele te meʼa ʼae ka hoko. ʼO ʼuhiga mo Koke, ʼe ina ui fenei ʼi tana lea fakapolofeta: “E ke mavae anai i tou fenua, i te potupotu o te noleto, ia koe mo tau hahai kaugamalie ae e kau mo koe, ae e heheka fuli i ni hosi, ko he hahai lahi osi, ko he solia malohi osi. E ke haele anai ki taku hahai . . . o hage ko he ao ae ka ina uufi anai te fenua.” (Esk. 38:15, 16) Pea kotea ʼae ka fai anai e Sehova? ʼE “ita” anai ia Sehova ʼo ina ui fenei: “E au kalagai anai te heleta.” Koteʼuhi ʼi tanatou fafa ki tana hahaʼi ʼe hage pe ʼe natou fafa ki tona kano ʼi mata. (Esk. 38:18, 21; Sakl. 2:8.) ʼE haʼu anai Sehova ʼo tokoni ki ʼana kaugana ʼi te kele, ʼi Halamaketone.
14, 15. Kotea te tahi aluʼaga ka hoko anai ʼi te kua kamata e Satana tana ʼohofi?
14 Kaʼe ʼi muʼa ʼo tatatou vakaʼi pe haofaki feafeaʼi anai e Sehova tana hahaʼi ʼi te tau ko Halamaketone, tou vakaʼi te lua aluʼaga ʼae ka hoko. ʼE hoko anai ʼi te temi ʼae kua ʼosi kamata ia te ʼohofi ʼa Satana pea ʼi muʼa ʼo Halamaketone. Ohage ko tona ui ʼi te palakalafe 11, ko te lua aluʼaga ʼaia ʼe ko te fakatahiʼi ʼo te kau fakanofo ʼae kei ʼi te kele.
15 Te fakatahiʼi ʼo te kau fakanofo. ʼI te ʼu tohi ʼo Mateo mo Maleko, ko te ʼu palalau ʼae neʼe fai e Sesu ʼo ʼuhiga mo “te kau Mko. 13:27; Mat. 24:31) Ko te fakatahi fea ʼae neʼe talanoa ki ai Sesu? Neʼe mole talanoa ia ki te fakaʼiloga fakaʼosi ʼo te toe ʼo te kau Kilisitiano fakanofo, ʼae ʼe hoko anai ʼi muʼa pe ʼo te kamata ʼo te mamahi lahi. (Apk. 7:1-3) Kaʼe neʼe talanoa Sesu ki he aluʼaga ka hoko anai lolotoga te mamahi lahi. Koia, ʼi te kua kamata ʼohofi e Satana ia te hahaʼi ʼa te ʼAtua, ʼe fakatahiʼi anai ki selo te kau fakanofo ʼae kei ʼi te kele.
filifiliia,” ia te kau Kilisitiano fakanofo, ʼe kau ki te ʼu aluʼaga ka hoko anai ʼi muʼa ʼo Halamaketone. (Vakaʼi te palakalafe 7.) Neʼe fakakikite fenei e Sesu ʼo ʼuhiga mo ia, ʼi tona ʼuhiga Hau: “E ina fekaui anai te kau aselo, pea e ina tanaki fakatahi anai te kau filifiliia mai te u potu matagi e fa, mai te gataaga o te kele ki te gataaga o te lagi.” (16. Kotea ʼae ka fai anai e te kau fakanofo fuli ʼae ʼi selo ʼi te tau ʼo Halamaketone?
16 Kotea te pikipikiga ʼo te fakatahiʼi ʼo te toe ʼo te kau fakanofo pea mo te tau ʼae ko Halamaketone? ʼE katoa anai ʼi selo ia te kau fakanofo fuli ʼi muʼa ʼo te kamata ʼo Halamaketone, te tau ʼa te ʼAtua. Pea ʼi selo, ko te toko 144 000 ʼae ʼe kaugā hau mo Kilisito ʼe feala anai hanatou fakaʼaogaʼi mo Sesu “he tokotoko ukamea” moʼo fakaʼauha te ʼu fili fuli ʼo te Puleʼaga ʼo te ʼAtua. (Apk. 2:26, 27) Ko te kau fakanofo ʼaia ʼi selo, fakatahi mo te kau ʼaselo malolohi, ʼe natou muliʼi anai Kilisito, ʼi tona ʼuhiga Hau pea mo Tagata Tau, ʼo natou fetauʼaki ai mo te kau “solia malohi osi” ʼae ʼe natou tauʼi te hahaʼi ʼa Sehova. (Esk. 38:15) ʼE ko te kamata ʼaia ʼo Halamaketone.—Apk. 16:16.
Te Ikuʼaga ʼo Te Mamahi Lahi
17. ʼI Halamaketone, kotea anai ka hoko ki te ʼu “tao”?
17 Te fakaʼauha. Ko te ikuʼaga ʼo te mamahi lahi ʼe ko Halamaketone. ʼE fai anai e Sesu tana tahi gaue. ʼI tana ʼosi fai te fakamau ki te “atu puleaga fuli,” ʼe ina tauteaʼi te hahaʼi fuli ʼae neʼe ina tala ʼi muʼa atu ʼe ko he ʼu “tao.” (Mat. 25:32, 33) ʼAki he “heleta” loa pea mo masila, ko totatou Hau ʼe ina “tamatei ai [anai] te u puleaga.” Pea ko te hahaʼi fuli ʼae ʼe natou hage ko ni tao, mai “te u hau” ki te kau “popula,” “e olo anai natou . . . ki te tautea heegata.”—Apk. 19:15, 18; Mat. 25:46.
18. (1) Kotea ʼae ka hoko ki te aluʼaga ʼo te ʼu “ovi”? (2) Kotea ʼae ka fai e Sesu ke katoa ai tona malo?
18 ʼI toe fetogi lahi leva ka hoko ki te aluʼaga ʼo natou ʼae neʼe tala e Sesu ʼe ko he ʼu “ovi.” ʼE mole lava fakaʼauha anai natou e te ʼu kautau ʼa Satana, ʼae ko te ʼu “tao.” Ko te toe hahaʼi tokolahi ʼae ʼe natou hage ko he ʼu “ovi” ʼe mole honatou puipui, ʼe natou hao anai ʼi te ʼohofi ʼaia ʼa te fili pea ʼe natou “omai mai te mamahi lahi.” (Apk. 7:9, 14) Pea hili pe te malo ʼa Sesu ʼi te ʼu fili fuli ʼo te Puleʼaga ʼo te ʼAtua ʼi te kele, ʼe ina li anai ia Satana mo ʼana temonio ki te vanu. ʼE hage pe anai kua natou mamate, he ʼe mole kei natou fai hanatou gaue lolotoga taʼu ʼe afe.—Lau ia Apokalipisi 6:2; 20:1-3.
Tou Teuteu Ki Te ʼu Aluʼaga ʼAia Ka Hoko Mai
19, 20. ʼE feafeaʼi hatatou mulimuli ki te ako ʼae ʼe tou taʼofi mai te ʼu vaega ʼo Esaia 26:20 pea mo 30:21?
19 Kotea ʼae ʼe tonu ke tou fai ke tou teuteu ki te ʼu aluʼaga fakaofoofo ʼaia ka hoko mai? Neʼe ui fenei ʼi Te Tule Leʼo kua hili ki ai ni taʼu: “ ʼE fakalogo anai te hāofaki ki takita fakalogo.” He ko ʼe ʼe feala ke tou manatu feia? ʼE tou maʼu tona tali ʼi te fakatokaga ʼae neʼe fai e Sehova ki te hahaʼi Sutea ʼae neʼe ʼaunofo ʼi te kolo ko Papilone. Neʼe fakakikite e Sehova ʼe ʼohofi anai te kolo, kaʼe kotea ʼae neʼe tonu ke fai e te hahaʼi ʼa te ʼAtua ke natou teuteu ki te aluʼaga ʼaia? Neʼe ui fenei e Sehova: “Alu, siaku hahai, ulu ki tou kogafale, pea ke tapunu te matapa mai muli; nono i he kii temi nounou pe, o kaku ki te osi o te ita.” (Esa. 26:20) ʼE tou lava tokagaʼi neʼe ko te ʼu fakatotonu ʼae neʼe fai e Sehova kia natou, ʼi tana ui ʼae “alu,” mo “ulu,” mo “tapunu te matapa” pea mo “nono.” Neʼe fakalogo te kau Sutea ki te ʼu fakatotonu ʼaia, ʼo natou nonofo ʼi ʼonatou ʼapi, kaʼe mole natou fetauʼaki mo te kau solia ʼae neʼe natou ʼohofi te kolo. Koia, neʼe fakalogo tonatou haofaki ki tanatou mulimuli ki te ʼu fakatotonu ʼa Sehova. *
20 Kotea te ako kia tatou? Ohage ko te ʼu kaugana ʼa te ʼAtua ʼi te temi ʼaia, ʼe toe fakalogo totatou haofaki ki tatatou mulimuli ki te ʼu fakatotonu ʼa Sehova. (Esa. 30:21) ʼE tou maʼu ia te ʼu fakatotonu ʼaia ʼi te kokelekasio. Koia, ʼe tou fia maʼu ia he loto talagafua ki te takitaki ʼaia ʼo tatou. (1 Soa. 5:3) Kapau ʼe tou fakalogo ia ʼaho nei, pea ʼe faigafua anai hatatou fakalogo ʼi te ka haʼu, pea ʼe puipui ai anai tatou e tatatou Tamai, ia Sehova pea mo totatou Hau, ia Sesu. (Sofo. 2:3) ʼI te puipui ʼaia ʼo tatou e te ʼAtua, ʼe feala anai hatatou mamata ki te fakaʼauha katoa e te Puleʼaga ʼo te ʼAtua ʼona fili. ʼE mahino ia ʼe mole tou galoʼi anai te ʼaho ʼaia.
^ pal. 6 Ko te fakaʼauha ʼo “Papilone lahi” ʼe lagi fakaʼuhiga ki te fakaʼauha ʼo te ʼu kautahi fakalotu, kaʼe mole ko te hahaʼi lotu fuli. Koia, hili te fakaʼauha ʼaia, tokolahi ʼi te hahaʼi lotu ʼo Papilone ʼe kei maʼuʼuli pe anai pea ʼe lagi natou faiga anai ke natou fakaha ʼe mole natou kau ʼi he lotu, ohage ko tona fakaha ia Sakalia 13:4-6.
^ pal. 19 Kapau ʼe ke fia maʼu he tahi ʼu manatu, vakaʼi ia te tohi La prophétie dʼIsaïe, lumière pour tous les humains I, ʼi te ʼu pasina 282-283.