ʼE lagi ke fiafia moka ke maʼu he logo ʼe lelei. Pea ʼe ʼi ai te logo lelei kia koe pea mo natou ʼae ʼe ke ʼofa ai.

Ko te logo lelei ʼaia ʼe maʼu ʼi te Tohi-Tapu. ʼE ko he tohi, neʼe fai ʼaki te takitaki ʼa Sehova ʼAtua te Tupuʼaga ʼo te ʼatulaulau kua hili ki ai he ʼu taʼu ʼe fualoa. ʼI te tohi ʼaeni, ʼe tou talanoa tafito ai anai ki he ʼu tohi ʼe fa ʼo te Tohi-Tapu ʼe maʼu ai he logo lelei maʼa tatou fuli. ʼE iloʼi te ʼu tohi ʼaia ʼaki te ʼu higoa ʼo te ʼu tagata ʼae neʼe fakaʼaogaʼi e te ʼAtua moʼo fai te ʼu tohi ʼaia, ko Mateo, mo Maleko, mo Luka pea mo Soane.

Tokolahi ʼe natou fakahigoaʼi te ʼu fakamatala ʼaia ʼe fa ko te ʼu Evaselio ʼe fa. ʼE fakamatala ʼi te ʼu tohi ʼaia ʼe fa ia te evaselio, peʼe ko te logo lelei ʼaeni ʼo ʼuhiga mo Sesu: Neʼe fakaʼaogaʼi ia ia e te ʼAtua moʼo haofaki ʼo te hahaʼi pea ʼi tona ʼuhiga Hau ʼo te Puleʼaga ʼo te ʼAtua ʼae ʼe ʼi selo, ʼe tapuakinaʼi anai e Sesu ʼo talu ai ia natou fuli ʼae ʼe tui kia te ia.—Maleko 10:17, 30; 13:13.

Neʼe lagi kua ke feʼekeʼaki pe koʼe neʼe takitaki e te ʼAtua ia te tohi ʼo te ʼu fakamatala ʼaia ʼe fa ʼo te maʼuli pea mo te ʼu akonaki ʼa Sesu.

ʼE ʼi ai te ʼu lelei ʼo tatatou maʼu te ʼu fakamatala ʼaia ʼe fa ʼo te ʼu meʼa ʼae neʼe ui pea neʼe fai e Sesu. Tou toʼo he faʼifaʼitaki: Fakakaukauʼi age muʼa ia he ʼu tagata ʼe toko fa ʼe tutuʼu ovi ki he tagata faiako ʼe iloa. Ko te tagata ʼae ʼe tuʼu ia muʼa ʼo te tagata faiako ʼe gaue ʼi te fale ʼo te ʼu tukuhau. o ia ʼae ʼe tuʼu ʼi te faʼahi mataʼu ʼe ko te toketa. Ko ia ʼae ʼe tuʼu ʼi te faʼahi hema, ʼe ko te tagata tautai pea ʼe kaumeʼa lelei mo te tagata faiako. Pea ko te fa tagata leva, ʼae ʼe tuʼu ʼi muli ʼe kei tupulaga age ia natou ʼae pea ʼe ina sioʼi te meʼa ʼae ʼe hoko. Ko te ʼu tagata ʼaia ʼe toko fa, ʼe natou aga fakahagatonu kaʼe ʼe mole tatau te ʼu meʼa ʼae ʼe natou tokagaʼi. Kapau ʼe natou tahi tohi te ʼu palalau pea mo te ʼu gaue ʼa te tagata faiako, ʼe mahino ia ʼe maʼu anai ʼi te ʼu fakamatala ʼaia ʼe fa ia he ʼu manatu peʼe ko he ʼu kiʼi faʼahi ʼe kehekehe. Koia, ʼi tatatou vakaʼi te ʼu fakamatala, kapau ʼe tou manatuʼi ʼe kehekehe ʼanatou faʼahiga sio pea mo ʼanatou fakatuʼutuʼu, ʼe tokoni mai anai ke tou mahino lelei ki te ʼu meʼa ʼae neʼe ui pea neʼe fai e te tagata faiako. ʼE ha ai pe ʼe lava feafeaʼi hatatou maʼu ia he ʼu lelei mai te ʼu fakamatala ʼaia ʼe fa ʼo te maʼuli ʼo te Tagata Faiako Lahi, ia Sesu.

Tou hoko atu te faʼifaʼitaki. Ko te tagata tanaki tukuhau ʼe loto ke malave tana fakamatala ki te hahaʼi  Sutea, koia ʼe ina fakatahiʼi ai te ʼu akonaki peʼe ko te ʼu aluʼaga ʼae neʼe hoko moʼo tokoni kia natou ʼaia ke natou mahino. Ko te toketa ʼe talanoa tafito ki te fakamalolo ʼo te hahaʼi mahahaki pea mo te hahaʼi maʼimoa, koia ʼe mole ina tohi anai ʼihi meʼa neʼe kua talanoa ki ai te tagata tanaki tukuhau, peʼe ina tohi te ʼu faʼahi ʼaia kaʼe ʼe mole tatau tona fakahoahoa. Ko te kaumeʼa lelei ʼe talanoa tafito ʼo ʼuhiga mo te ʼu meʼa ʼae ʼe logoʼi e te tagata faiako pea mo ʼona kalitate. Pea ko te fakamatala ʼa te tagata tupulaga ʼe nounou. Logo la te faʼahi ʼaia, kaʼe ko te ʼu fakamatala fuli ʼa te ʼu tagata takitahi ʼe totonu. ʼE ha lelei mai ai, ko tatatou maʼu te ʼu fakamatala ʼe fa ʼo te maʼuli ʼo Sesu, ʼe tokoni mai ke lahi age tatatou mahino ki ʼana gaue, mo ʼana akonaki pea mo tona ʼuluagaaga.

ʼE lagi ui e te hahaʼi ko te ‘Evaselio ʼa Mateo’ peʼe ko te ‘Evaselio ʼa Soane.’ ʼE mole hala, he ʼe tahi maʼu ʼi te ʼu fakamatala ʼaia ia “te logo lelei ʼo ʼuhiga mo Sesu Kilisito.” (Maleko 1:1) Kaʼe, ʼi hona tahi age aluʼaga ʼe ko te evaselio pe ʼe tahi, peʼe logo lelei, ʼo ʼuhiga mo Sesu ʼe tou maʼu ʼi te ʼu fakamatala ʼaia ʼe fa.

Tokolahi te kau ako ʼo te Folafola ʼa te ʼAtua neʼe natou fakatatau mo fakaalutahi te ʼu meʼa ʼae neʼe hoko pea mo te ʼu manatu ʼae ʼe maʼu ia Mateo, mo Maleko, mo Luka pea mo Soane. ʼI te teitei taʼu 170 H.T.S., a neʼe faigaʼi e te tagata faitohi Silia ko Tatien ke ina fai ia te faʼahi ʼaia. Neʼe ina fakamoʼoni ai ko te ʼu tohi ʼaia ʼe fa ʼe totonu pea ʼe haʼu mai te ’Atua. Neʼe ina fakatahiʼi ai te ʼu tohi ʼaia ʼe fa moʼo fai ʼaki te tohi ʼae neʼe ko te Diatessaron, pea neʼe fakahoahoa lelei ai te ʼu aluʼaga ʼae neʼe hoko ʼi te maʼuli ʼo Sesu pea mo tona minisitelio.

Neʼe toe fai feia mo te tohi ʼaeni Ko Sesu Te Ala, Mo Te Moʼoni Pea Mo Te Maʼuli, kaʼe ʼe totonu age ia pea mo katoa. Pea neʼe lava, koteʼuhi kua lahi te ʼu lea fakapolofeta pea mo te ʼu lea fakatata ʼa Sesu kua tou mahino lelei age ki tona fakahoko ʼi te temi nei. Koia, kua tou mahino lelei age ki te ʼu meʼa ʼae neʼe ina ui pea mo fai, ʼo toe feia aipe ki te fakahoahoa lelei ʼo te ʼu aluʼaga ʼae neʼe hoko. Pea ko te ʼu fekumi ʼa te kau alekeolosia, neʼe toe tokoni mai ke tou mahino lelei age ki ʼihi faʼahi pea mo te faʼahiga fakamatala ʼa te kau tagata faitohi ʼo te ʼu Evaselio. ʼE mahino ia, ʼe mole feala ke tou iloʼi papau ia te fakahoahoa ʼo te ʼu aluʼaga fuli ʼae neʼe hoko. Kaʼe ko te tohi ʼaeni Ko Sesu Te Ala, Mo Te Moʼoni Pea Mo Te Maʼuli, ʼe fakamatala ai te ʼu meʼa ʼae neʼe hoko ʼi hona aluʼaga ʼe fakapotopoto.

ʼI tau lau pea mo tau leleiʼia ia te tohi ʼaeni, faigaʼi ke ke manatuʼi ia te logo tafito kia koe pea mo natou ʼae ʼe ke ʼofa ai. Ke ke manatuʼi neʼe ui totonu fenei e Sesu Kilisito ki te apositolo ko Tomasi: “Ko au te ala, mo te moʼoni pea mo te maʼuli. ʼE mole he tahi ʼe haʼu ki te Tamai kaʼe ʼe mole fakalaka ia te au.”—Soane 14:6.

Ko te tohi ʼaeni Ko Sesu Te Ala, Mo Te Moʼoni Pea Mo Te Maʼuli, ʼe tokoni atu anai ke ke mahino pe koʼe ʼe feala ke tou tui papau ʼe ko Sesu “te ala.” ʼAki ia ia tokotahi ʼe feala ai ke tou fakaovi kia Sehova ʼAtua ʼi te faikole. Pea tahi ʼae, ʼaki ia Sesu ʼe feala ai hatatou fakatokatoka mo te ʼAtua. (Soane 16:23; Loma 5:8) Koia, ʼe hoki feala pe ʼaki ia Sesu ke tali e te ʼAtua ke tou felogoʼi pea mo ia.

Ko Sesu ʼe ko “te moʼoni.” Neʼe palalau pea mo maʼuli ʼo mulimuli ki te moʼoni. Pea neʼe lahi ia te ʼu lea fakapolofeta ʼae neʼe ina fakahoko, pea neʼe liliu fuli ʼo “ ‘ ʼio’ ʼaki ia [ia].” (2 Kolonito 1:20; Soane 1:14) Ko te ʼu lea fakapolofeta ʼaia ʼe tokoni mai ke tou mahino ki te gaue tafito ʼa Sesu ʼi te fakahoko ʼo te ʼu fakatuʼutuʼu ʼa te ʼAtua.—Fakaha 19:10.

Ko Sesu Kilisito ʼe ko “te maʼuli.” ʼAki te totogi, neʼe ina foaki ia tona maʼuli haohaoa pea mo tona taʼataʼa, ke feala ai hatatou maʼu ia “te maʼuli moʼoni” ko tona fakaʼuhiga ia “te maʼuli heʼe gata.” (1 Timoteo 6:12, 19; Efeso 1:7; 1 Soane 1:7) Pea ʼe liliu anai ia Sesu ko “te maʼuli” maʼa te toko lauʼi miliona ʼae kua mamate pea ʼe fakatuʼuake anai natou ʼaki te fealagia ʼae ke natou maʼuʼuli ʼi te Palatiso ʼo talu ai.—Soane 5:28, 29.

ʼE tonu kia tatou fuli ke tou mahino pea mo tou leleiʼia te gaue ʼa Sesu ʼi te ʼu fakatuʼutuʼu ʼa te ʼAtua. ʼOfa pe ke ke fiafia ʼi te ʼu meʼa ʼae ka ke ako anai ʼo ʼuhiga mo Sesu, ia “te ala, mo te moʼoni pea mo te maʼuli.”