KAPITE 137
Neʼe Sisio Kia Te Ia Te Toko Lauʼi Teau ʼi Muʼa ʼo Te Penikosite
MATEO 28:16-20 LUKA 24:50-52 GAUE 1:1-12; 2:1-4
-
ʼE HA IA SESU KI TE TOKOLAHI
-
ʼE HAKE IA SESU KI SELO
-
ʼE FOAKI E SESU IA TE LAUMALIE MAʼONIʼONI KI TE TOKO 120 TISIPULO
Hili te fakatuʼuake ʼo Sesu, neʼe ina fakatuʼutuʼu mo ʼana apositolo ʼe toko 11 ke natou felaveʼi ʼi he moʼuga ʼi Kalilea. Neʼe toe fakatahitahi ʼi te moʼuga ʼaia te tahi ʼu tisipulo, neʼe natou teitei toko 500, pea ko ʼihi ia natou neʼe kei lotolotolua pe. (Mateo 28:17; 1 Kolonito 15:6) Kaʼe ko te meʼa leva ʼae neʼe ui e Sesu neʼe tokoni kia natou takitokotahi ke natou tui papau kua maʼuli moʼoni.
Neʼe fakamahino age e Sesu neʼe tuku age e te ʼAtua kia te ia te pule katoa ʼi te lagi pea mo te kele. Pea neʼe ina fakalotomalohiʼi fenei natou: “Koia, kotou olo ʼo fai ni tisipulo ʼi te hahaʼi ʼo te ʼu fenua fuli pe, ʼo kotou papitemaʼi natou ʼi te huafa ʼo te Tamai mo te ʼAlo pea mo te laumalie maʼoniʼoni, ʼo akoʼi natou ke natou mulimuli ki te ʼu meʼa fuli ʼae neʼe au fakatotonu atu kia koutou.” (Mateo 28:18-20) ʼEi, neʼe kua maʼuli ia Sesu pea neʼe kei tokaga aipe ke fakamafola ia te logo lelei.
Neʼe fai ki te ʼu tisipulo fuli ʼa Sesu, tagata, fafine pea mo fanau, te fakatotonu ʼae ke natou fai he ʼu tisipulo. ʼE lagi faiga anai ia natou ʼae ʼe fakafeagai ke natou fakagata ia te faifakamafola pea mo te faiako, kaʼe neʼe fakapapau fenei e Sesu kia natou: “Kua tuku mai kia te au te pule katoa ʼi te lagi pea mo te kele.” Kotea tona fakaʼuhiga ki ʼana tisipulo? Neʼe ina ui fenei kia natou: “ ʼE au nofo anai mo koutou ʼi te ʼaho fuli pe ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaeni.” Neʼe mole ui e Sesu ʼe feala anai ke fai e natou fuli ʼae ka natou fakamafola ia te logo lelei, he ʼu milakulo. Kaʼe ʼe natou maʼu anai te tokoni ʼa te laumalie maʼoniʼoni.
Hili tona fakatuʼuake, neʼe ha ia Sesu ki ʼana tisipulo “lolotoga ʼaho ʼe 40.” Neʼe ha tuʼa lahi kia natou ʼi he ʼu sino fakakakano kehekehe, “ ʼo fakamoʼoni papau ai kua maʼuli,” pea mo “palalau age ʼo ʼuhiga mo te Puleʼaga ʼo te ʼAtua.”—Gaue 1:3; 1 Kolonito 15:7.
ʼE ha mai, ʼi te kei nonofo ʼa te kau apositolo ʼi Kalilea, neʼe fakatotonu age e Sesu ke natou toe liliu ki Selusalemi. ʼI tana fakatahi leva mo natou ʼi te kolo ʼaia, neʼe ina ui fenei age: “ ʼAua naʼa kotou mavae ʼi Selusalemi kaʼe kotou haga fakatalitali ki te meʼa ʼae neʼe fakapapauʼi e te Tamai pea neʼe au fakaha atu. ʼE moʼoni, neʼe faipapitema ia Soane ʼaki te vai, kaʼe ʼi te ʼu ʼaho ʼae ka hoa mai, ʼe papitemaʼi anai koutou ʼaki te laumalie maʼoniʼoni.”—Gaue 1:4, 5.
Ki muli age, neʼe toe felaveʼi ia Sesu mo ʼana apositolo. “Neʼe ina taki leva natou ʼo kaku ki Petania,” ʼae neʼe tuʼu ʼi te faʼahi esite ʼo te Moʼuga ʼo Oliveto. (Luka 24:50) Logo la te ʼu meʼa fuli ʼae neʼe fakaha age e Sesu kia natou ʼo ʼuhiga mo tana mavae, kaʼe neʼe kei natou tui pe ʼe ina fakatuʼu anai tona Puleʼaga ʼi te kele.—Luka 22:16, 18, 30; Soane 14:2, 3.
Neʼe fehuʼi fenei e te kau apositolo kia Sesu: “ ʼAliki, ʼe ko te temi koa ʼaeni ʼe ke liufaki ai te puleʼaga ki Iselaele?” Neʼe ina tali fenei kia natou: “ ʼE mole ʼa koutou te iloʼi ia te ʼu temi peʼe ko te ʼu fasiga taʼu, he ʼe gata pe ki te Tamai ʼe feala ke ina fakatuʼutuʼu te ʼu faʼahi ʼaia.” Pea neʼe toe fakaha lelei age e Sesu te gaue ʼae neʼe tonu ke natou fai, ʼi tana ui fenei: “ ʼE kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.”—Gaue 1:6-8.
Neʼe fakatahi te kau apositolo ʼi te Moʼuga ʼo Oliveto mo Sesu, ʼae neʼe kua fakatuʼuake, pea neʼe kamata hake ake ai ki selo. Mole fualoa, neʼe ʼaofi leva ia ia e he ʼao pea neʼe mole kei feala hanatou sisio kia te ia. Hili tona fakatuʼuake, neʼe ha ia Sesu ʼaki he ʼu sino fakakakano kehekehe. Kaʼe, ʼi tana ʼi te Moʼuga ʼo Oliveto, neʼe tuku leva e Sesu tona sino fakakakano, pea neʼe hake ake ki selo ʼaki he sino fakalaumalie. (1 Kolonito 15:44, 50; 1 Petelo 3:18) ʼI te maʼu sioa ʼa te kau apositolo agatonu ʼi tana hake, neʼe ha ʼi ʼonatou tafa “te ʼu tagata ʼe toko lua neʼe nā teu hina.” Neʼe ko he ʼu ʼaselo mo ni sino fakakakano, pea neʼe nā fehuʼi fenei kia natou: “ ʼU tagata ʼo Kalilea, he koʼe ʼe kotou tutuʼu ʼo sioʼi te lagi? Ko Sesu ʼae neʼe toʼo ake mai ia koutou ki te lagi, ʼe tatau pe anai tana haʼu mo tana alu ʼae ki te lagi, ohage ko takotou sisio ki ai.”—Gaue 1:10, 11.
Neʼe gata pe ki te ʼu tisipulo agatonu ʼa Sesu ʼae neʼe sisio ki tana hake ki selo. “ ʼE tatau pe anai” tana toe liliu mai, ko tona fakaʼuhiga ʼe gata pe anai ki ʼana tisipulo agatonu ʼae ka natou mahino ki tana kua ʼi heni ʼi tona ʼuhiga Hau ʼo te Puleʼaga ʼo te ʼAtua.
Neʼe toe liliu leva te kau apositolo ki Selusalemi. ʼI te ʼu ʼaho ki muli age, neʼe natou fakatahitahi mo te tahi ʼu tisipulo, ʼae neʼe kau ai “te ʼu tehina ʼo Sesu pea mo Malia, tana faʼe.” (Gaue 1:14) Neʼe natou kataki ʼi te faikole. Neʼe ʼi ai te faʼahi neʼe natou faikole ki ai: Ke filifili he tisipulo moʼo fetogi ia Sutasi Isekaliote pea ke toe katoa ai te toko 12 kau apositolo. (Mateo 19:28) Neʼe tonu ko he tisipulo neʼe sio mata ki te ʼu gaue ʼa Sesu pea mo tona fakatuʼuake. Neʼe natou toho ai ke natou iloʼi te finegalo ʼo te ʼAtua, pea neʼe mole toe palalau leva ʼi te Tohi-Tapu ki te faʼahiga fai ʼaia. (Pesalemo 109:8; Taaga Lea 16:33) Neʼe filifili ia Mateasi, ʼae neʼe kau ʼi te toko 70 ʼae neʼe fekauʼi e Sesu ke olo ʼo faifakamafola, pea “neʼe lau fakatahi leva ia ia mo te ʼu apositolo ʼe toko 11.”—Gaue 1:26.
Hili ʼaho ʼe hogofulu ʼi te ʼosi hake ʼa Sesu ki selo, neʼe hoko leva te ʼAho Lahi Fakasutea ʼo Te Penikosite ʼo te taʼu 33 H.T.S. Neʼe fakatahitahi te ʼu tisipulo ʼe teitei toko 120 ʼi he koga fale fata ʼi Selusalemi. Fokifa pe neʼe natou logo ki he logoaʼa neʼe hage ko he tuʼani matagi pea neʼe logo ʼi te ʼapi katoa. Pea neʼe natou sisio ki he ʼu ʼalelo neʼe hage ko he ʼu uloʼi afi, neʼe tahi tuʼu ia natou takitokotahi. Neʼe kamata palalau leva te ʼu tisipulo fuli ʼi te ʼu lea kehekehe. Neʼe ko te foaki ʼaia ʼo te laumalie maʼoniʼoni ʼae neʼe fakapapauʼi e Sesu.—Soane 14:26.