KAPITE 138
Ko Kilisito ʼi Te Toʼomataʼu ʼo Te ʼAtua
-
ʼE HEKA IA SESU ʼI TE TOʼOMATAʼU ʼO TE ʼATUA
-
ʼE LILIU IA SAULO KO HE TISIPULO
-
ʼE ʼI AI TE TUPUʼAGA KE TOU FAKAFIAFIA
Hili ʼaho ʼe hogofulu ʼi te ʼosi hake ʼa Sesu ki selo, neʼe ina foaki te laumalie maʼoniʼoni ʼi te ʼaho ʼo te Penikosite, ʼo fakamoʼoni ai tana kua nofo ʼi selo. Pea neʼe ʼi ai te tahi fakamoʼoni ki te faʼahi ʼaia. ʼI muʼa pe ʼo te taumakaʼi ʼo te tisipulo ko Setefano ʼuhi ko tana faifakamafola agatonu, neʼe ina ui fenei: “ ʼE au sio ki te lagi kua ava, pea mo te Foha ʼo te tagata ʼi te toʼomataʼu ʼo te ʼAtua.”—Gaue 7:56.
ʼI te kua nofo ʼa Sesu mo tana Tamai ʼi selo, neʼe tonu ke fakatalitali ke fai age he fakatotonu makehe, ʼae neʼe fakakikite ʼi te Folafola ʼa te ʼAtua. Neʼe tohi fenei e Tavite, ʼaki te takitaki ʼa te ʼAtua: “Folafola a [Sehova] ki toku Aliki [Sesu]: Nofo ia koe i toku fahai matau, o kaku ki a taku fai ki ou fili tou hiliaga vae.” Pea ʼi te kua katoa leva ʼo te temi ʼae ʼe fakatalitali ai, ‘ ʼe pule anai ʼi lotomalie ʼo ʼona fili!’ (Pesalemo 110:1, 2) Kaʼe ʼi te fakatalitali ʼa Sesu ʼi selo ke ina tauʼi ʼona fili, kotea ʼae neʼe ina fai?
Neʼe fakatuʼu te kokelekasio Fakakilisitiano ʼi te Penikosite ʼo te taʼu 33 H.T.S. Neʼe kamata pule ia Sesu mai selo ki ʼana tisipulo ʼae neʼe fakanofo ʼaki te laumalie maʼoniʼoni. (Kolose 1:13) Neʼe ina takitaki natou ʼi tanatou faifakamafola pea ina teuteuʼi natou ki tanatou gaue ʼae ka natou fai ʼi te ka haʼu. Kotea te gaue ʼaia? Ko natou ʼae neʼe nonofo agatonu ʼo kaku ki te mate, ʼe fakatuʼuake anai natou ki muli age pea natou kaugā hau mo Sesu ʼi te Puleʼaga.
Ko Saulo, neʼe iloa ʼi tona higoa Fakaloma ko Paulo, neʼe ko he faʼifaʼitaki makehe ʼo he tahi ʼe liliu anai ko he kaugā hau ʼo Sesu. Neʼe ko he tagata Sutea pea neʼe fualoa tana mulimuli fakamalotoloto ki te Lao ʼa te ʼAtua. Kaʼe ʼi tona fakahalaʼi e te kau takitaki lotu Sutea, koia neʼe ina tali ai te taumakaʼi ʼo Setefano. Pea neʼe “fakamatakuʼi e Saulo ia te ʼu tisipulo ʼa te ʼAliki pea mo ina fia matehi natou,” koia neʼe alu ai ki Tamaso. Neʼe fakagafua age kia ia e te Pelepitelo Lahi ko Kaifa ke ina puke te ʼu tisipulo ʼa Sesu pea mo ina ʼaumai natou ki Selusalemi. (Gaue 7:58; 9:1) Kaʼe lolotoga te faifagona ʼaia ʼa Saulo, neʼe ha age ki ai he malama pea neʼe to ifo ki te kele.
Neʼe mole sio ki he tahi kaʼe neʼe logo ki he leʼo neʼe ina fehuʼi fenei age: “Saulo, Saulo, he koʼe ʼe ke fakatagaʼi au?” Neʼe fehuʼi fenei age e Saulo: “Ko ai ia koe?” Neʼe ina tali fenei: “Ko au ia Sesu, ʼae ʼe ke fakatagaʼi.”—Gaue 9:4, 5.
Neʼe ui age e Sesu kia Saulo ke hu ki Tamaso pea ke fakatalitali ai ki he tahi ʼu fakatotonu, kaʼe neʼe tonu ke taki ia ia e he tahi ki te kolo he neʼe kivi ʼuhi ko te malama ʼae neʼe ha fakamilakulo age ki ai. Pea neʼe ha age ia Sesu kia Ananiasi, neʼe ko hana tisipulo neʼe maʼuli ʼi Tamaso. Neʼe fakaha age e Sesu ki ai te ʼapi ʼae neʼe nofo ai ia Saulo pea ina ui age ke alu ki ai. Neʼe tuʼania ia Ananiasi kaʼe neʼe ui fenei e Sesu ki ai: “Ko te tagata ʼaia neʼe au filifili ke ina ʼave toku huafa ki te ʼu puleʼaga, ki te ʼu hau pea ki te ʼu foha ʼo Iselaele.” Neʼe toe sio leva ia Saulo, pea ʼi Tamaso, “neʼe kamata . . . faifakamafola . . . ʼo ina tala ʼe ko Sesu te ʼAlo ʼo te ʼAtua.”—ʼAki te tokoni ʼa Sesu, ko Paulo pea mo te tahi kau faifakamafola ʼo te logo lelei, neʼe natou hoko atu te gaue faifakamafola ʼae neʼe kamata e Sesu. Neʼe fua lelei tanatou gaue ʼaki te tapuakina ʼa te ʼAtua. Pea hili teitei taʼu ʼe 25 ʼi te kua ʼosi ha ʼa Sesu kia ia ʼi te ala ki Tamaso, neʼe tohi e Paulo ko te logo lelei “neʼe fakamafola ki te hahaʼi fuli ʼae ʼi te lalo lagi.”—Kolose 1:23.
ʼI he ʼu taʼu ki muli age, neʼe sio ia te apositolo ʼofaina ko Soane ki he ʼu meʼa neʼe ha age, mai ia Sesu pea ʼe tuʼu ʼi te Tohi-Tapu, ʼi te tohi ʼo Fakaha. Koia, ʼaki te ʼu meʼa ʼae neʼe ha, neʼe sio ia Soane ʼi tana kei maʼuli ki te toe liliu mai ʼa Sesu ʼi tona ʼuhiga Hau ʼo te Puleʼaga. (Soane 21:22) “Neʼe ʼave [ia Soane] e te laumalie maʼoniʼoni ki te ʼaho ʼo te ʼAliki.” (Fakaha 1:10) Neʼe hoko ʼanafea “te ʼaho” ʼaia?
ʼE fakaha ʼi te ʼu lea fakapolofeta ʼo te Tohi-Tapu, neʼe kamata “te ʼaho ʼo te ʼAliki” ʼi te taʼu 1914. Neʼe hoko ʼi te taʼu ʼaia te ʼUluaki Tau Fakamalamanei. Talu mai te temi ʼaia, kua lahi age te ʼu tau, mo te ʼu mahaki, mo te ʼu hoge pea mo te ʼu mafuike, ʼo feia mo he tahi ʼu aluʼaga ʼe fakamoʼoni ai ki te fakahoko ʼi te kele katoa ʼo “te fakailoga” ʼae neʼe talanoa ki ai ia Sesu. ʼE ko te fakailoga ʼo tana “ ʼi heni” pea mo “te fakaʼosi” ʼae neʼe ina fakamahino ki ʼana apositolo. (Mateo 24:3, 7, 8, 14) Ko te fakamafola ʼo te logo lelei ʼo te Puleʼaga ʼe mole fakahoko pe ʼi te ʼu koga meʼa ʼae neʼe puleʼi e te kau Loma, kaʼe ʼi te kele katoa.
Neʼe takitaki e te ʼAtua ia Soane ke ina fakamahino te fakaʼuhiga ʼo te ʼu meʼa ʼaia. Neʼe tohi fenei e Soane: “ ʼI te temi nei kua hoko mai te haofaki, kua fakaha te malohi ʼo totatou ʼAtua, pea kua fakatuʼu tona Puleʼaga pea kua kamata pule tana Kilisito.” (Fakaha 12:10) ʼEi, ko te Puleʼaga ʼo te ʼAtua ʼae ʼi selo, ʼae neʼe lahi tona fakamafola e Sesu, ʼe kua ʼafio moʼoni ia!
ʼE ko he logo fakafiafia maʼa te kau tisipulo agatonu fuli ʼa Sesu. ʼE maʼuhiga kia natou te ʼu palalau ʼaeni ʼa Soane: “Koia, ke kotou fiafia ia koutou ʼae ʼe nonofo ʼi selo. Malaʼia ki te kele pea mo te tai, koteʼuhi kua hifo atu kia koutou te Tevolo mo tona ita lahi, ʼi tana iloʼi ʼae kua nounou tona temi.”—Fakaha 12:12.
Koia, ʼe mole kei heka ia Sesu ʼo fakatalitali ʼi te toʼomataʼu ʼo tana Tamai. Kailoa ia, kaʼe ʼi tona ʼuhiga Hau, kua ʼafio ia pea kua vave pe anai tana pulihi ʼona fili fuli. (Hepeleo 10:12, 13) Kotea koa te ʼu aluʼaga fakafiafia ʼae ka tou sisio anai ki ai?
a Ko matou ʼae neʼe matou fakailoga keheʼi.