KAPITE 62
He Ako Maʼuhiga ʼo ʼUhiga Mo Te Agavaivai
MATEO 17:22–18:5 MALEKO 9:30-37 LUKA 9:43-48
-
ʼE TOE TALA FAKATOMUʼA E SESU IA TONA MATE
-
ʼE INA TOTOGI TE TUKUHAU ʼAKI HE FOʼI PIESI NEʼE ʼI TE GUTU ʼO TE IKA
-
KO AI ʼAE ʼE LAHI AGE ANAI ʼI TE PULEʼAGA?
Hili te ha ʼa Kilisito ʼi tona kololia ʼi te temi ʼae neʼe fetogi ai tona agaaga, pea mo tana fakamalolo te tama ʼae neʼe ulu sino ai te temonio ʼi te koga fenua ʼo Sesalea Filipo, neʼe alu leva ki Kapenaume. Neʼe ko ia pe mo ʼana tisipulo, he “neʼe mole ina loto ke iloʼi” e te hahaʼi kaugā malie. (Maleko 9:30) Neʼe ina maʼu ai he faigamalie ke ina teuteuʼi ʼana tisipulo ki tona mate pea mo te gaue ʼae ka natou fakahoko anai. Neʼe ina fakamahino fenei: “ ʼE tuku anai te Foha ʼo te tagata ki te ʼu nima ʼo ʼona fili, pea ʼe natou matehi anai ia ia, kaʼe ʼe fakatuʼuake anai ʼi te tolu ʼaho.”—Mateo 17:22, 23.
Neʼe mole ko he logo foʼou ʼaia ki ʼana tisipulo. ʼI muʼa atu, neʼe palalau ia Sesu ʼo ʼuhiga mo tona matehi, kaʼe neʼe mole fia tui ki ai ia Petelo. (Mateo 16:21, 22) Pea neʼe sisio te ʼu apositolo ʼe toko tolu ki tana ha ʼi tona kololia ʼi te temi ʼae neʼe fetogi ai tona agaaga, pea neʼe natou logo ki te faipalalau ʼo ʼuhiga mo te “mavae” ʼa Sesu. (Luka 9:31) Neʼe “lotomamahi ʼaupito” ʼana tisipulo, logo la neʼe mole natou mahino katoa ki te fakaʼuhiga ʼo te ʼu palalau ʼaia ʼa Sesu. (Mateo 17:23) Kaʼe neʼe natou tuʼania ʼi te faifehuʼi kia te ia.
Neʼe natou tau leva ki Kapenaume, te kolo ʼae neʼe tau nofo ai Sesu lolotoga tana fakahoko tona minisitelio pea neʼe tutupu ai ʼihi ʼo te kau apositolo. Neʼe olo age kia Petelo te ʼu tagata ʼae neʼe natou tanaki te tukuhau ʼo te fale lotu. Neʼe lagi natou faiga ke tukugakoviʼi ia Sesu takua ʼe mole ina totogi te ʼu tukuhau. Koia neʼe natou fehuʼi fenei: “ ʼE totogi koa e takotou tagata faiako ia te tukuhau [ʼo te fale lotu]?”—Mateo 17:24.
Neʼe tali fenei e Petelo: “’Ei.” Ki muli age, ʼi tana hu ki te ʼapi, neʼe kua ʼosi iloʼi ia e Sesu te meʼa ʼae neʼe hoko. Koia neʼe mole atali ia Sesu ke fakamatala age e Petelo te faʼahi ʼaia, kaʼe neʼe ina fehuʼi fenei age: “Kotea tau manatu Simone? ʼE maʼu maifea e te ʼu hau ʼo te kele ia te ʼu tukuhau kehekehe? Mai ʼanatou fanau peʼe mai te hahaʼi kehe?” Neʼe tali fenei e Petelo: “Mai te hahaʼi kehe.” Neʼe ui fenei age leva e Sesu: “Pea ʼe mahino ia ʼe mole totogi e te fanau te ʼu tukuhau.”—Mateo 17:25, 26.
Ko te Tamai ʼa Sesu ʼe ko te Hau ʼo te ʼatulaulau pea ʼe ko Ia ʼae neʼe atolasio ki ai te hahaʼi ʼi te fale lotu. Koia, ʼo mulimuli ki te lao, neʼe mole fakamaʼua ke totogi e te ʼAlo ʼo te ʼAtua te tukuhau ʼo te fale lotu. Kaʼe neʼe ui fenei e Sesu: “Ke mole natou tukia, alu ki te tai ʼo mātaʼu, pea ko te ʼuluaki ika ʼae ka ke fusi, avahi tona gutu pea ʼe ke maʼu ai anai he foʼi piesi siliva [ko he setatele ʼe tahi peʼe ko talame ʼe fa]. Toʼo te foʼi piesi ʼaia pea ke foaki age kia natou maʼa taua.”—Mateo 17:27.
ʼI te kua fakatahitahi ʼa te ʼu tisipulo, neʼe natou fia fehuʼi age kia Sesu pe ko ai ʼae ʼe lahi age anai ʼi te Puleʼaga. Neʼe heʼeki faʼa fualoa, ko te ʼu tagata ʼaia neʼe natou tuʼania ʼi te faifehuʼi kia Sesu ʼo ʼuhiga mo tona mate, kaʼe ʼi te temi leva ʼaeni, ʼe mole natou tuʼania te faifehuʼi kia te ia ʼo ʼuhiga mo tonatou ka haʼu. Kaʼe neʼe iloʼi e Sesu tanatou manatu. Neʼe ko he faʼahi ia neʼe kua natou ʼosi fefihi ki ai lolotoga tanatou muliʼi ia ia ʼi tanatou toe liliu ki Kapenaume. Koia neʼe fehuʼi fenei e Sesu kia natou: “Neʼe kotea ʼae neʼe kotou fefihiʼaki ai ʼi te ala?” (Maleko 9:33) Neʼe ufiufi te ʼu tisipulo pea neʼe natou nonofo fakalogologo he neʼe natou fefihiʼaki pe ko ai ʼae ʼe lahi age ia natou. Ki muli age leva, neʼe natou fai age kia Sesu te fehuʼi ʼaeni neʼe natou talanoa ki ai: “Ko ai ʼae ʼe lahi age ʼi te Puleʼaga ʼo selo?”—Mateo 18:1.
ʼE lagi matafaikehe te fihi ʼa te ʼu tisipulo ki he faʼahi feia kaʼe kua teitei taʼu tolu tanatou sisio ki te aga ʼa Sesu mo logo ki ʼana akonaki. Kaʼe neʼe ko he ʼu tagata agahala. Pea talu mai tanatou kei liliki, neʼe akoʼi age kia natou e tanatou lotu, ʼe maʼuhiga te maʼu tuʼulaga ʼa he tahi. Tahi ʼae meʼa, neʼe heʼeki
faʼa fualoa ki ai, neʼe fakapapauʼi age e Sesu kia Petelo te ʼu “kalavi” ʼo te Puleʼaga. Neʼe lagi fiameʼalahi ai ia Petelo. Neʼe lagi toe manatu feia ia Sakopo mo Soane, he neʼe nā sisio mata kia Sesu ʼi tona kololia.Logo la ʼe mole tou iloʼi tanatou manatu, kaʼe neʼe fakatonutonuʼi natou e Sesu. Neʼe ina pauʼi te kiʼi tamasiʼi ʼo ina fakatuʼu ʼi ʼonatou muʼa, pea neʼe ina ui fenei: “Kapau ʼe mole kotou fetogi katoa takotou aga ʼo kotou liliu ohage ko ni kiʼi tamaliki, pea ʼe mole feafeala anai ke kotou hu ki te Puleʼaga ʼo selo. Koia, ko ʼae ʼe ina fakamalaloʼi ia ia ohage ko te kiʼi tamasiʼi ʼaeni, ʼe ko ia ʼae ʼe lahi age ʼi te Puleʼaga ʼo selo. Pea ko ʼae ʼe ina tali he kiʼi tamasiʼi ohage ko ia ʼaeni ʼuhi ko toku huafa, ʼe ina toe tali foki mo au.”—Mateo 18:3-5.
ʼE ko he faʼahiga fai lelei ʼaia moʼo akoʼi ʼo te hahaʼi. Neʼe mole ita ia Sesu ki ʼana tisipulo pea neʼe mole ina ui age neʼe natou lotomanumanū peʼe fia maʼu tuʼulaga. Kaʼe moʼo akoʼi age he manatu maʼuhiga, neʼe ina fakaʼaogaʼi te ʼu kihiʼi tamaliki, ʼae ʼe mole natou fia maʼu tuʼulaga peʼe fiameʼalahi. Neʼe fakaha ai e Sesu ki ʼana tisipulo te ʼaoga ʼae ke natou maʼu e natou te faʼahiga manatu ʼaia. Pea moʼo fakaʼosi tana akoʼi ʼaia ʼana tisipulo, neʼe ui fenei e Sesu: “Ko ʼae ʼe veliveli ʼosi ia koutou fuli ʼe ko ia ʼae ʼe lahi.”—Luka 9:48.