KAPITE 65
Neʼe Faiakonaki ʼi Tana Faifagona Ki Selusalemi
MATEO 8:19-22 LUKA 9:51-62 SOANE 7:2-10
-
TE MANATU ʼA TE ʼU TEHINA ʼO SESU ʼO ʼUHIGA MO IA
-
ʼE MAʼUHIGA FEAFEAʼI IA TE LAGOLAGO KI TE PULEʼAGA ʼO TE ʼATUA?
Kua fuafualoa pe ia te fakahoko e Sesu tana gaue ʼi Kalilea. Neʼe lelei age tona fakatalitali ʼi ai, ʼi te hahaʼi ʼae ʼi Sutea. Pea tahi ʼae meʼa, ʼi tana ʼi Selusalemi, “neʼe ʼaʼasili age te kumi e te kau Sutea ke natou matehi ia ia” he neʼe ina fakamalolo he tagata ʼi te ʼaho ʼo te Sapato.—Soane 5:18; 7:1.
Neʼe ko te mahina ʼo Sepetepeli peʼe ʼo Oketopeli ʼo te taʼu 32 H.T.S. pea neʼe kua ovi mai te ʼAho Lahi ʼo Te ʼu Tapenakulo (peʼe ko Te ʼu Pola). Neʼe fai te ʼaho lahi ʼaia lolotoga ʼaho ʼe fitu, pea ʼi te valu ʼaho neʼe fai ai te fakatahi mamalu. Neʼe fai te ʼaho lahi ʼaia ʼi te fakaʼosi ʼo te temi ʼae neʼe gaueʼi ai te ʼu kele. Neʼe ko he temi neʼe fakafiafia ai te hahaʼi pea mo natou foaki ai he fakafetaʼi kia Sehova.
Ko te ʼu tehina ʼo Sesu, ia Sakopo, mo Simone, mo Sosefo pea mo Sutasi, neʼe natou uga fenei ia ia: “Mavae ʼi heni ʼo alu ki Sutea.” Neʼe tauhi tafito te kau Sutea ki te ʼAtua ʼi Selusalemi. ʼI te taʼu fuli, lolotoga te ʼu ʼaho lalahi ʼe tolu, neʼe hahaʼi te kolo ʼaia. Koia neʼe ui fenei e te ʼu tehina ʼo Sesu: “ ʼE mole fai e he tahi he meʼa fakafufu moka ʼe ina loto ke iloʼi ia ia e te hahaʼi. Kapau ʼe ke fai te ʼu meʼa ʼaeni, fakaha ia koe ki te hahaʼi fuli.”—Soane 7:3, 4.
ʼI tona ʼuhiga moʼoni, ko te ʼu tehina ʼaia ʼe toko fa ʼo Sesu ‘neʼe mole natou tui’ ʼe ko ia te Mesia. Kaʼe neʼe natou loto ke sisio te hahaʼi ʼae neʼe fakatahitahi ki te ʼaho lahi ʼaia ki tana fai he ʼu milakulo. Neʼe iloʼi e Sesu neʼe feala ke tuʼutamaki ai tona maʼuli, ʼo ina ui fenei kia natou: “ ʼE mole he tupuʼaga ke fehiʼa te malamanei kia koutou, kaʼe ʼe fehiʼa ia kia au, koteʼuhi ʼe au fakamoʼoni ʼe kovi ʼana gaue. Kotou olo ki te ʼaho lahi. ʼE mole au alu ki te ʼaho lahi ʼaia, koteʼuhi heʼeki hoko mai toku temi.”—Soane 7:5-8.
Hili he ʼu ʼaho ʼi te ʼosi mavae ʼa te ʼu tehina ʼo Sesu mai te kau faifagona kaugā malie, neʼe olo fakafufu leva ia Sesu mo ʼana tisipulo, ke mole tokagaʼi natou e te hahaʼi. Neʼe mole natou toʼo te ala ʼae ʼe olo mahani ai te hahaʼi pea ʼe ovi ki te Vai Tafe ʼo Solotane, kaʼe neʼe natou toʼo te ala ʼae ʼe fakalaka ʼi Samalia. Neʼe ʼaoga leva ke maʼu e Sesu mo ʼana tisipulo he nofoʼaga ʼi Samalia, koia neʼe ina fekauʼi he kau ʼave logo ke natou muʼamuʼa ia natou moʼo fai he ʼu teuteu. Kaʼe, mai tona aluʼaga ʼae neʼe alu ia Sesu ki Selusalemi ki te ʼaho lahi ʼo te kau Sutea, koia ʼi he kolo ʼo Samalia neʼe mole fakatalitali lelei natou pea neʼe mole fakaha age kia natou te tali kaiga. Neʼe iita ia Sakopo pea mo Soane, ʼo nā kole fenei kia Sesu: “ ʼAliki, ʼe ke loto koa ke ma kole ke hifo mai te lagi he afi ʼo fakaʼauha natou?” (Luka 9:54) Neʼe pupulaʼi naua e Sesu ʼuhi ko tanā manatu ʼaia, pea neʼe hoko atu tanatou fagona.
ʼI te ala, neʼe ui fenei age e he sekelipa kia Sesu: “ ʼAliki, ʼe au muli anai ia te koe ʼi te potu fuli pe ʼe ke alu ki ai.” Pea neʼe tali fenei age e Sesu: “ ʼE maʼu e te ʼu lenato ʼonatou nofoʼaga pea mo te ʼu manulele ʼonatou moeʼaga, kaʼe ʼe mole maʼu pe la e te Foha ʼo te tagata he faʼahi ke malolo ai.” (Mateo 8:19, 20) Neʼe ina fakaha lelei ai, ʼe tau anai te sekelipa mo he ʼu faigataʼaʼia mo kapau ʼe liliu anai ko he tisipulo ʼa Sesu. Pea neʼe hage ia neʼe mole tali e te sekelipa te faʼahiga maʼuli ʼaia he neʼe fialahi fau. Koia, ʼe feala ke tou fai e tatou takitokotahi ia te fehuʼi ʼaeni: ‘ ʼE au fia muliʼi koa ia Sesu logo la te ʼu faigataʼaʼia?’
Neʼe ui fenei e Sesu ki he tahi age tagata: “Mulimuli mai ia te au.” Neʼe tali fenei age e te tagata: “ ʼAliki, fakagafua mai muʼa ke au alu ʼo ʼavaifo taku tamai.” Neʼe iloʼi e Sesu te aluʼaga ʼo te tagata ʼaia, ʼo ina ui fenei: “Tuku te kau mate ke natou ʼavaifo ʼanatou mate, kaʼe alu koe ʼo fakamafola ʼi te potu fuli pe te Puleʼaga ʼo te ʼAtua.” (Luka 9:59, 60) ʼE mahino ia neʼe heʼeki mate tana tamai. Ka na pau la neʼe kua mate, ʼe mahino papau ia neʼe mole lolotoga faipalalau te tama ʼaia mo Sesu ʼi te lakaga ʼaia. Koia, neʼe heʼeki loto te tama ke ina fakamuʼamuʼa ʼi tona maʼuli ia te Puleʼaga ʼo te ʼAtua.
ʼI te hoko atu ʼo tanatou faifagona ki Selusalemi, neʼe ui fenei e te tahi age tagata kia Sesu: “ ʼAliki, ʼe au mulimuli anai ia te koe, kaʼe fakagafua mai muʼa ke au tauʼine kia natou ʼo toku loto fale.” Neʼe tali fenei age e Sesu ki ai: “Ko he tahi ʼe kapa ki te saliote fuli kele pea mo sio ki te ʼu meʼa ʼae ʼi muli, ʼe mole tuha ia mo te Puleʼaga ʼo te ʼAtua.”—Luka 9:61, 62.
Ko natou ʼae ʼe fia liliu ko he ʼu tisipulo moʼoni ʼa Sesu, ʼe tonu ke natou sio fakamamaʼu ki te Puleʼaga ʼo te ʼAtua, ʼo natou lagolago ki ai. Kapau ʼe mole haga sio ki muʼa ia te tagata gaue kele ʼi tana toho tana saliote fuli kele, pea ʼe mole alu fakahagatonu anai ia. Pea kapau ʼe tuku ifo e te tagata tana saliote fuli kele he ʼe fia sio ki muli, pea ʼe mole lakalaka anai ki muʼa tana gaue. ʼO toe feia aipe, ko he tahi ʼe sio ki muli ʼi te tuʼu ʼafeā ʼaeni, ʼe feala ke to kehe mai te ala ʼae ʼe ina taki ki te maʼuli heʼe gata.