KAPITE 38
Neʼe Fia Maʼu e Soane He Tali Mai Ia Sesu Totonu
-
ʼE FAIFEHUʼI IA SOANE PATITA ʼO ʼUHIGA MO TE GAUE ʼA SESU
-
ʼE VIKIʼI E SESU IA SOANE
Kua teitei taʼu katoa te pilisoni ʼa Soane Patita. Kaʼe neʼe logo ki te ʼu gaue taulekaleka ʼae neʼe fai e Sesu. Fakakaukauʼi age muʼa pe neʼe feafeaʼi te loto ʼo Soane ʼi te fakamatala age ʼae e ʼana tisipulo te fakatuʼuake e Sesu ia te tama ʼa te fafine vitua ʼi Naini. Kaʼe neʼe loto e Soane ke fakaha age e Sesu totonu te fakaʼuhiga ʼo te ʼu meʼa fuli ʼaia. Koia neʼe fekauʼi ai e Soane ʼana tisipulo ʼe toko lua. Kotea tona tupuʼaga? Ke nā fehuʼi fenei kia Sesu: “ ʼE ko koe koa ia Ia ʼae ʼe tonu ke haʼu, peʼe tonu koa ke matou fakaatalitali ki he tahi age?”—Luka 7:19.
ʼE matafaikehe koa ia te fehuʼi ʼaia? Ko Soane neʼe ko he tagata agatonu pea, ʼi tana papitemaʼi ia Sesu ia teitei taʼu ʼe lua ki muʼa atu, neʼe sio ki te hifo ifo ʼo te laumalie ʼo te ʼAtua kia Sesu pea neʼe logo ki te leʼo ʼo te ʼAtua neʼe ina fakaha tona ʼofa ia te ia. ʼE mole he tupuʼaga ke tou manatu ai kua vaivai te tui ʼa Soane. Ka na ʼaua la neʼe mole vikiʼi e Sesu ia Soane ki muli age. Kaʼe kapau la neʼe mole lotolotolua ia Soane, he koʼe neʼe ina fai te fehuʼi ʼaia kia Sesu?
Neʼe lagi loto e Soane ke fakamoʼoni age e Sesu totonu ʼe ko ia te Mesia. Neʼe feala ke fakalotomalohiʼi ai ia Soane ʼi tana nofo ʼaia ʼi te fale pilisoni. Pea neʼe lagi ʼi ai he tahi fakaʼuhiga ʼo te fehuʼi ʼaia neʼe fai e Soane. Neʼe ina iloʼi lelei te ʼu lea fakapolofeta ʼi te Tohi-Tapu ʼae ʼe fakaha ai ko te Fakanofo ʼa te ʼAtua ʼe liliu anai ko he hau pea ʼe ina fakaʼateainaʼi anai te hahaʼi. Kaʼe hili ni mahina ʼi te ʼosi papitema ʼa Sesu, neʼe kei pilisoniʼi pe ia Soane. Koia neʼe fia iloʼi e Soane pe ʼe ʼi ai he tahi age ʼe tonu ke haʼu, ke ina fetogi ia Sesu, pea ke ina fakahoko katoa te ʼu gaue fuli ʼae neʼe kua fakakikite ka fai anai e te Mesia.
Neʼe mole tali age e Sesu ki te ʼu tisipulo ʼa Soane: ‘ ʼEi, ko au ia Ia ʼae ʼe tonu ke haʼu.’ Kaʼe neʼe ina foaki he fakamoʼoni neʼe ina maʼu ia te tokoni ʼa te ʼAtua, ʼo ina fakamalolo te hahaʼi tokolahi neʼe tau mo te ʼu mahaki kehekehe. Pea neʼe ina ui fenei leva ki te ʼu tisipulo: “Kolua olo pea kolua fakamatala kia Soane ia te ʼu meʼa ʼaeni ʼe kolua sisio pea mo logo ki ai: Kua sisio te kau kivi, kua haʼele te kau ketu, kua fakamaʼa te kau kilia, kua logo te kau tuli, kua fakatuʼuake te kau mate pea kua tala ia te logo lelei ki te kau masisiva.”—Luka 7:22.
ʼI te fehuʼi ʼae neʼe fai e Soane, neʼe lagi ina fakaʼamu ʼe fai anai e Sesu he tahi age ʼu gaue ʼi te ʼu gaue ʼae kua ina fai pea ʼe lagi ina fakaʼateainaʼi anai ia ia. Kaʼe neʼe fakaha age e Sesu kia Soane ke ʼaua naʼa fakaʼamu ki he tahi age ʼu milakulo ʼi te ʼu milakulo ʼae neʼe kua fakamatala age e ʼana tisipulo.
ʼI te mavae ʼa te ʼu tisipulo ʼa Soane, neʼe fakaha e Sesu ki te hahaʼi ko Soane neʼe maʼuhiga age ia ʼi he polofeta. Neʼe ko “te tagata avelogo” ʼa Sehova ʼae neʼe fakakikite ia Malakia 3:1. Pea neʼe ko ia te polofeta ko Elia, ohage ko tona fakakikite ia Malakia 4:5, 6. Neʼe fakamahino fenei e Sesu: “ ʼE au tala moʼoni atu kia koutou, ia natou ʼae neʼe tutupu mai he ʼu fafine, ʼe mole he tahi ʼe lahi age ia Soane Patita, kaʼe ko ʼae ʼe veliveli ʼi te Puleʼaga ʼo selo ʼe lahi age ia ia.”—Mateo 11:11.
ʼI te ui ʼa Sesu ko ʼae ʼe veliveli ʼi te Puleʼaga ʼo selo ʼe lahi age ia Soane, neʼe ina fakaha ai ko Soane ʼe mole kau anai ki te Puleʼaga ʼae ʼi selo. Neʼe teuteuʼi e Soane ia te ala kia Sesu, kaʼe neʼe mate ia ʼi muʼa ʼo te avahi e Kilisito te ala ki selo. (Hepeleo 10:19, 20) Kaʼe ko Soane neʼe ko he polofeta agatonu ʼa te ʼAtua, pea ʼe maʼuli anai ʼi te kele ʼo fakalogo ki te Puleʼaga ʼo te ʼAtua.