Ko te logo ʼo ʼuhiga mo te toe liliu mai ʼa Sesu mai Tekapole, neʼe mafola ʼi te kau Sutea ʼae neʼe maʼuʼuli ʼi te potu noleto uesite ʼo te Tai ʼo Kalilea. Neʼe lagi logo te tokolahi ki te fakagona e Sesu te matagi pea mo te tai ʼi te afā ʼae neʼe hoki ʼosi age pe. Pea neʼe lagi iloʼi e ʼihi tana fakamalolo te ʼu tagata ʼae neʼe ulu sino ai te ʼu temonio. Koia, neʼe fakatahitahi ai “he hahaʼi kaugā malie” ʼi te matatai, lagi ʼi te tafaʼaki ʼo Kapenaume, ʼo fakatalitali ia Sesu. (Maleko 5:21) ʼI tana hifo ʼi te vaka, neʼe natou fakaʼamu ke natou sisio ki te ʼu meʼa ʼae ka ina fai.

Neʼe kau ia natou ʼae neʼe fakaʼamu ke sisio kia Sesu ia Sailusi, neʼe ko he pule ʼo te sinakoka, ʼae neʼe lagi tuʼu ʼi Kapenaume. Neʼe tuʼutuli ifo ki te ʼu vaʼe ʼo Sesu pea ina kole tuʼa lahi fenei: “ ʼE mahaki kovi toku ʼofafine. Fakalelei siʼou loto kaʼe ke haʼu pea ke hili ki ai ʼou nima, ke malolo pea mo maʼuli ai.” (Maleko 5:23) Kotea anai ka fai e Sesu moʼo tali ki te kole mamahi age e Sailusi ke tokoni ki tona ʼofafine ʼulu tokotahi? Neʼe kei taʼu 12 pe pea neʼe ʼofa mamahi ai.—Luka 8:42.

ʼI tana alu ki te ʼapi ʼo Sailusi, neʼe felaveʼi ia Sesu mo he tahi age aluʼaga neʼe malave loto. Tokolahi ia natou ʼae neʼe olo fakatahi mo Sesu neʼe natou fiafia, he neʼe natou feʼekeʼaki pe ʼe feala anai ke natou sisio ki hana fakahoko he tahi milakulo. Kaʼe neʼe ʼi ai te fafine ʼi te hahaʼi tokolahi ʼaia, neʼe hoha tafito ʼo ʼuhiga mo te mahaki kovi ʼae neʼe tau mo ia.

Ko te fafine Sutea ʼaia neʼe kua taʼu 12 tana mahaki, neʼe maligi te toto ia ia. Neʼe lahi te ’u toketa ʼae neʼe alu ki ai, ʼo puli fuli tana foʼi falā ʼi te totogi ʼo te ’u faitoʼo ʼae neʼe foaki age. Kaʼe neʼe mole pe la fimalie ai. ʼI tona fakahagatonu, “neʼe ʼaʼasili kovi age ia.”—Maleko 5:26.

ʼE lagi feala ke ke mahino ki tona gaʼegaʼe mo tona ufiufi ʼuhi ko tona mahaki. ʼI te agamahani, neʼe mole palalau he tahi ki te hahaʼi ʼo ʼuhiga mo hona mahaki feia. Pea tahi ʼae, ʼi te Lao ʼa Moisese, neʼe heʼe maʼa he fafine moka neʼe maligi te toto ia ia. Ko ʼae neʼe fāfā kia ia peʼe ki ʼona mutuʼi meʼa ʼae neʼe pulepule, neʼe tonu ke maʼanu pea neʼe heʼe maʼa ʼo kaku ki te afiafi.—Levitiko 15:25-27.

Ko te fafine ʼaia neʼe “logo ki te ʼu fakamatala ʼae neʼe fai ʼo ʼuhiga mo Sesu,” pea neʼe ina kumi ai ia ia. ʼUhi ʼae neʼe heʼe maʼa, neʼe fakahaohao ai ʼi te lotolotoiga ʼo te hahaʼi, ʼo faiga ke mole tokagaʼi ia ia. Neʼe manatu fenei: “Kapau ʼe au fa pe ki tona kofu tuʼa pea ʼe au malolo anai.” ʼI te temi pe ʼae neʼe fa ai ki tona tapaʼi kofu, neʼe ina logoʼi ʼi tona sino neʼe malū te toto. Neʼe “kua malolo mai te mahaki faigataʼa ʼaia.”—Maleko 5:27-29.

Neʼe ui fenei leva e Sesu: “Ko ai ʼae neʼe fa mai?” ʼI tau manatu, neʼe feafeaʼi te fafine ʼi tana logo ki te fehuʼi ʼaia? Neʼe lagi manatu e Petelo neʼe mole he ʼuhiga ʼo tana fehuʼi, he neʼe ina tali fenei age: “ ʼE fakaʼefihi atu pea mo ʼa takai koe e te hahaʼi.” Kaʼe he koʼe koa neʼe fehuʼi e Sesu pe ko ai ʼae neʼe fa age ki ai? Neʼe fakamahino fenei e Sesu: “Neʼe fa mai te tahi, koteʼuhi ʼe au iloʼi neʼe mavae he malohi ia te au.”—Luka 8:45, 46.

ʼI tana sio ʼae kua iloʼi te meʼa ʼae neʼe ina fai, neʼe tuʼutuli ifo ki te ʼu vaʼe ʼo Sesu, neʼe mataku mo tekelili. Ia muʼa ʼo te hahaʼi, neʼe ina fakaha age te moʼoni ʼo ʼuhiga mo tona mahaki pea mo tana kua malolo. Neʼe agalelei ia Sesu ʼo ina fakalotofimalieʼi fenei ia ia: “Taʼahine, kua fakamalolo koe e tau tui. Alu la ʼi te fimalie, he ʼe kua ke malolo mai tou mahaki faigataʼa.”—Maleko 5:34.

ʼE mahino papau ia, ko Ia ʼae neʼe filifili e te ʼAtua ke pule ki te kele, ʼe ko he tahi ʼe agalelei mo lotomanavaʼofa. ʼE tokaga ki te hahaʼi pea mo ina maʼu te malohi ke tokoni kia natou.