KAPITE 25
Neʼe Ina Fakamalolo Te Tagata Kilia He Neʼe ʼOfa Ia Ki Ai
MATEO 8:1-4 MALEKO 1:40-45 LUKA 5:12-16
-
ʼE FAKAMALOLO E SESU IA HE TAGATA KILIA
ʼI te faifakamafola ʼa Sesu mo ʼana tisipulo ʼe toko fa ʼi te ʼu “sinakoka ʼo te potu fenua katoa ʼo Kalilea,” neʼe mafola ai te logo ʼo ʼuhiga mo te ʼu meʼa fakaofoofo ʼae neʼe ina fai. (Maleko 1:39) Neʼe mafola te logo ʼaia ʼo kaku ki te kolo neʼe nofo ai te tagata kilia. Neʼe fakamahino e te toketa ko Luka “neʼe kovi ʼosi tona kilia.” (Luka 5:12) ʼE kovi te mahaki fakamataku ʼaia he ʼe ina kaina mamalie te sino katoa.
Koia, ko te tagata kilia ʼaia neʼe kua kovi ʼaupito tona mahaki pea neʼe tonu ke maʼuli mamaʼo mai te hahaʼi. Pea tahi, moka ovi age ni hahaʼi kia ia neʼe tonu ke kalaga fenei “Uli! Uli!” ke ʼaua naʼa natou fakaovi kia ia kaʼe natou pikisia. (Levitiko 13:45, 46) Kaʼe kotea ʼae neʼe fai e te tagata kilia ʼaia? Neʼe fakaovi age kia Sesu pea tuʼutuli ifo mo ina kole mamahi fenei age: “ ʼAliki, kapau ʼe ke loto ki ai, ʼe feala ke ke fakamaʼa au.”—Mateo 8:2.
Neʼe tui malohi ia te tagata ʼaia kia Sesu. Pea neʼe fakaʼofaʼofa ia te agaaga ʼo ia ʼuhi ko tona mahaki. Kotea ʼae ka fai anai e Sesu? Ka na pau la neʼe ke ʼi ai, kotea anai ka ke fai? ʼI te ʼofa mamahi ʼa Sesu ki te tagata, neʼe ina faoʼi leva tona nima pea mo fa ki ai. Pea neʼe ui fenei age e Sesu kia ia: “ ʼE au loto ki ai! Ke ke maʼa.” (Mateo 8:3) Neʼe puli atu aipe ia te kilia ʼo te tagata pea neʼe lagi matafaigataʼa ki ʼihi hanatou tui ki te faʼahi ʼaia.
ʼE mole ke fia maʼu koa la he hau ʼe ʼofa kia tatou mo malohi ohage ko Sesu? Ko te aga ʼa Sesu ki te tagata kilia, ʼe ina fakamoʼoni ʼe ina fakahoko anai, moka Hau ki te kele katoa, te lea fakapolofeta Fakatohi-tapu ʼaeni: “E ofa anai ia ia i te gaegae mo te masiva, pea e ina fakamauli anai te mauli o te kau masiva.” (Pesalemo 72:13) ʼEi, ʼe fakahoko anai e Sesu ia tana fakaʼamu ʼae ke tokoni kia natou fuli ʼae ʼe mamahi.
Ke ke manatuʼi ʼi muʼa ʼo te fakamalolo ʼo te tagata kilia, neʼe gatutu te hahaʼi ʼuhi ko te minisitelio ʼa Sesu. ʼE natou logo anai ki te palalauʼi ʼo te meʼa fakaofoofo ʼaia neʼe ina fai. Kaʼe neʼe mole loto e Sesu ke tui te hahaʼi kia te ia ʼuhi pe ko te ʼu fakamatala ʼae neʼe natou logo ki ai. Neʼe ina iloʼi te lea fakapolofeta ʼae ʼe ui fenei ai “e mole logo anai ki tona leo i te u ala” moʼo fakakololiaʼi ʼo ia totonu. (Esaia 42:1, 2) Koia, neʼe foaki ai e Sesu ia te fakatotonu ʼaeni ki te tagata ʼae neʼe ina fakamalolo: “ ʼAua naʼa ke fakamatala ki he tahi, kaʼe ke ke alu ʼo ha ki te ʼu pelepitelo pea ke ke momoli te molaga ʼo mulimuli ki te Lao ʼa Moisese.”—Mateo 8:4.
ʼE mahino ia, neʼe fiafia ʼaupito ia te tagata ʼaia neʼe fakamalolo pea neʼe mole feala ke ina fufu te meʼa ʼae neʼe hoko. Koia neʼe alu ai pea neʼe ina fakamatala te logo ʼi te potu fuli ʼae neʼe fakalaka ai. Neʼe fakatuputupu ai ia te fia felaveʼi ʼa te hahaʼi mo Sesu. Pea neʼe mole kei feala ai ke hu fakahaha ia Sesu ki he kolo. Koia neʼe alu ai ki te ʼu koga meʼa lavaki ʼo nofo ai ʼi he kiʼi temi. Kaʼe neʼe hoko atu pe te ʼomai ʼo te hahaʼi mai te ʼu potu kehekehe ke ina akoʼi pea mo fakamalolo ia natou.