KAPITE 64
Te Maʼua Ke Fakamolemole
-
ʼE TONU KOA KE FAKAMOLEMOLE ʼO TUʼA FITU?
-
TE LEA FAKATATA ʼO TE TAGATA KAUGANA NEʼE MOLE LOTOMANAVAʼOFA
Neʼe logo ia Petelo ki te ʼu tokoni ʼae neʼe fai e Sesu moʼo fakatokatoka he fetokakoviʼaki ʼa he ʼu tehina ʼe toko lua, ke nā fakatokatoka e naua ʼateaina pe. Kaʼe neʼe hage neʼe fia iloʼi e Petelo pe ʼe tonu ke faiga ʼo tuʼa fia te fakatokatoka mo tona tehina.
Neʼe fehuʼi fenei age e Petelo: “ ʼAliki, ʼe tonu koa ke au fakamolemole ʼo tuʼa fia ki toku tehina ʼae ʼe agahala mai kia au? ʼO kaku ki te tuʼa fitu?” Neʼe akoʼi e ʼihi kau takitaki lotu neʼe tonu ke fakamolemole he tahi ʼo kaku ki te tuʼa tolu. Koia neʼe lagi manatu ia Petelo ʼe lahi tona ʼofa moka ʼe fakamolemole ki tona tehina “ ʼo kaku ki te tuʼa fitu.”—Mateo 18:21.
Kaʼe ko te lau ʼo te ʼu agahala ʼae neʼe fai mai e he tahi, ʼe mole alu tahi ia mo te akonaki ʼa Sesu. Koia, neʼe ina fakatonutonuʼi fenei ia Petelo: “ ʼE au tala atu kia koe, ʼo mole kaku ki te tuʼa fitu kaʼe ki te tuʼa 77.” (Mateo 18:22) Ko tona fakaʼuhiga, neʼe mole tonu ke ʼi ai he gataʼaga ʼo te fakamolemole ʼa Petelo ki tona tehina.
Pea neʼe fai leva e Sesu he lea fakatata moʼo fakaha lelei kia Petelo pea mo te tahi ʼu tisipulo te maʼua ʼae ke natou fefakamolemoleʼaki. Neʼe ko he lea fakatata ʼo ʼuhiga mo he tagata kaugana neʼe mole ina faʼifaʼitakiʼi tona pule lotomanavaʼofa. Neʼe kole e te hau ki ʼana kaugana ke natou huʼi ʼonatou maʼua. Neʼe ʼaumai ai kia ia he tagata kaugana neʼe ko tona maʼua ko taleta ʼe 10 000 [ko tenalio ʼe 60 miliona]. Kaʼe neʼe mole feala ke ina huʼi age tona maʼua. Koia, neʼe fakatotonu ai e te hau ke fakatau ia te tagata kaugana, mo tona ʼohoana, pea mo ʼana fanau moʼo huʼi ʼaki te maʼua. Neʼe tuʼutuli ifo te tagata kaugana ʼo hu ki tona pule, ʼo ina kole fenei: “ ʼAliki, ke ke tuku mai he temi, pea ʼe au huʼi fuli atu anai toku maʼua.”—Mateo 18:26.
Neʼe ʼofa mamahi ai te hau pea neʼe lotomanavaʼofa ʼo ina molehi te toe maʼua ʼaia ʼo te tagata kaugana. ʼI te kua ʼosi fai e te hau te faʼahi ʼaia, neʼe alu te tagata kaugana pea neʼe ina maʼu te tahi age tagata kaugana neʼe tonu ke ina huʼi age tenalio ʼe 100. Neʼe ina puke te tagata kaugana ʼaia pea neʼe ina kukumi tona kia, pea neʼe ina ui fenei age: “Huʼi mai tou maʼua.” Kaʼe neʼe tuʼutuli ifo te tagata kaugana ʼaia Mateo 18:28, 29) Kaʼe ko te tagata kaugana ʼae neʼe molehi e te hau tona maʼua, neʼe mole ina faʼifaʼitakiʼi tona pule. Neʼe ina kole ke pilisoniʼi te tagata kaugana ʼae neʼe veliveli age tona maʼua kia ia, ʼo kaku ki tana huʼi katoa tona maʼua.
pea mo ina kolekole fenei age: “Tehina, ke ke tuku mai he temi, pea ʼe au huʼi atu anai toku maʼua.” (Pea neʼe ui leva e Sesu neʼe sisio te tahi ʼu kaugana ki te meʼa ʼaia neʼe hoko, pea neʼe natou olo ʼo fakamatala ki te pule. Neʼe ita te pule pea neʼe ina fakatotonu ke ʼaumai te tagata kaugana ʼaia, ʼo ina ui fenei age: “Tagata kaugana agakovi, neʼe au molehi katoa tou maʼua ʼi tau kolekole mai. Pea neʼe mole tonu koa la ke ke manavaʼofa ki tou tehina ohage pe ko taku fakaha atu toku manavaʼofa?” Neʼe fakatotonu e te hau ke pilisoniʼi te tagata kaugana ʼae neʼe mole lotomanavaʼofa, ʼo kaku ki tana hoki huʼi katoa age tona maʼua. Pea neʼe fakaʼosi fenei e Sesu: “ ʼE toe fai feia pe anai kia koutou e taku Tamai ʼae ʼe ʼi selo, mo kapau ʼe mole kotou tahi fakamolemole ki tona tehina ʼaki tokotou loto katoa.”—Mateo 18:32-35.
ʼE ko he ako maʼuhiga ʼe tou maʼu ʼo ʼuhiga mo te fakamolemole! Neʼe fakamolemole mai e te ʼAtua ʼatatou tuʼuga agahala, ʼae ʼe hage ko he toe maʼua lahi. Kapau ʼe fakatatau ki ai, pea ko he hala ʼe fai mai kia tatou e hotatou tehina ʼe veliveli age ia. Pea ʼe mole fakamolemole mai e Sehova ʼo tuʼa tahi pe kaʼe ʼo tuʼa lahi. ʼE mole feala ai koa ke tou fakamolemole ʼo tuʼa lahi ki hotatou tehina, tatau aipe pe ʼe tonu tatatou mamahi ki ai? Ohage ko tona akoʼi mai e Sesu ʼi te Akonaki ’i Te Moʼuga, ‘ ʼe fakamolemole anai e te ʼAtua ʼatatou agahala, ohage ko tatatou fakamolemole kia natou ʼae neʼe agahala mai kia tatou.’—Mateo 6:12.