ʼI te fakafisi ʼa te kau sekelipa mo te kau Faliseo ki te kapu e Sesu te ʼu temonio ʼaki te malohi ʼo te ʼAtua, neʼe feala ke iku ki hanatou laukovi ki te laumalie maʼoniʼoni. Koia, ʼe natou kau anai kia ai, ki te ʼAtua peʼe kia Satana? Neʼe ui fenei e Sesu: “Kapau ʼe kotou tokakaga lelei ki te fuʼu ʼakau pea ʼe fua lelei anai, pea kapau ʼe mole kotou tokakaga ki te fuʼu ʼakau pea ʼe fua kovi anai. Koteʼuhi ʼe iloʼi anai pe ʼe lelei peʼe kovi te fuʼu ʼakau ʼi ʼona fua.”—Mateo 12:33.

Ko te kapu e Sesu te ʼu temonio neʼe hage ko he fuaʼi ʼakau ʼe lelei. Koia neʼe ko hanatou palalau vale te ui ʼae neʼe feala ke ina fai te faʼahi ʼaia he neʼe tauhi ia kia Satana. Ohage ko tona fakamahino e Sesu ʼi tana Akonaki ’i Te Moʼuga, kapau ʼe lelei te fua ʼo te fuʼu ʼakau, he ʼe maʼuli lelei te fuʼu ʼakau, kaʼe ʼe mole maʼuli kovi ia. Ko te ʼu tukugakovi loi ʼae neʼe fai e te kau Faliseo ʼo ʼuhiga mo Sesu, neʼe hage ko he fuaʼi ʼakau ʼe kovi. Koia kotea ʼae neʼe ha ai ʼo ʼuhiga mo te kau Faliseo? Neʼe natou kovi. Neʼe ui fenei e Sesu kia natou: “Faga ʼuhiʼi gata kafokona, ʼe lava feafeaʼi hakotou palalau ki he ʼu meʼa ʼe lelei kaʼe ʼe kotou agakovi? He ʼe haʼu mai te gutu te meʼa ʼae ʼe fonu ʼi te loto.”—Mateo 7:16, 17; 12:34.

ʼEi, ʼe fakaha e ʼatatou palalau pe ʼe feafeaʼi totatou loto pea ʼe fakamauʼi anai tatou ʼo mulimuli ki ʼatatou palalau. Koia neʼe ui fenei e Sesu: “ ʼE au tala atu kia koutou, ʼi te ʼAho ʼo Te Fakamau, ʼe fakamauʼi anai te hahaʼi ʼuhi ko te ʼu palalau vaʼiganoa fuli ʼae ʼe natou fai. Koteʼuhi ʼe fakatonuhia peʼe fakatuʼā anai koe ʼi ʼau palalau.”—Mateo 12:36, 37.

Logo la te ʼu gaue lalahi ʼae neʼe fai e Sesu, kaʼe neʼe kole e te kau sekelipa mo te kau Faliseo ke ina fai he tahi age meʼa. Neʼe natou ui fenei: “ ʼAliki, ʼe matou fia sio ki he fakailoga ʼe haʼu mai ia te koe.” Tatau aipe pe neʼe natou sisio peʼe kailoa ki te fakahoko e Sesu te ʼu milakulo, kaʼe neʼe lahi pe te hahaʼi neʼe sisio pea mo natou fakamoʼoni ki te ʼu meʼa ʼae neʼe ina fai. Neʼe feala ai ke ui e Sesu ki te kau takitaki Sutea ʼaia: “ ʼE haga kumi pe e te taʼiake agakovi mo heʼe agatonu ʼaeni ia he fakailoga, kaʼe ʼe mole foaki age anai he fakailoga kia natou, gata pe ki te fakailoga ʼo te polofeta ko Sonasi.”—Mateo 12:38, 39.

Neʼe fakamahino atu aipe e Sesu te fakaʼuhiga ʼo ʼana palalau, ʼo ina ui fenei: “Ohage pe ko te nofo ʼa Sonasi ʼi te fatu ʼo te toe ika lahi ia ʼaho ʼe tolu mo po ʼe tolu, ʼo toe feia pe mo te Foha ʼo te tagata, ʼe tuku anai ki te kele ia ʼaho ʼe tolu mo po ʼe tolu.” Neʼe folo ia Sonasi e te toe ika lahi kaʼe neʼe ina puʼaki age leva ki tuʼa, pea neʼe hage ko hona fakatuʼuake. Neʼe fakakikite ai e Sesu ʼe mate anai pea ʼe fakatuʼuake anai ʼi te tolu ʼaho. ʼI tona fakatuʼuake, ʼe fakafisi pe anai ia te kau takitaki Sutea ki ‘te fakailoga ʼo Sonasi,’ ʼo mole natou fia fakahemala pea mo fetogi. (Mateo 27:63-66; 28:12-15) Kaʼe ko “te hahaʼi ʼo Ninive” neʼe natou fakahemala hili te faifakamafola ʼa Sonasi kia natou. Pea ʼe natou fakatuʼā anai te taʼiake ʼaia. Neʼe toe ui e Sesu, ko te fineʼaliki ʼo Sepa ʼaki tana faʼifaʼitaki, ʼe ina toe fakatuʼā anai natou. Neʼe fia fagono ki te  poto ʼo Salomone, pea neʼe punamaʼuli ʼi tana logo ki ai. Pea neʼe ui leva e Sesu “ ʼe nofo ʼi heni he tahi ʼe maʼuhiga age ia Salomone.”—Mateo 12:40-42.

Neʼe fakatatau e Sesu te aluʼaga ʼo te taʼiake agakovi ʼaia ki he tagata neʼe mavae mai ia ia he laumalie kovi. (Mateo 12:45) Mai tona aluʼaga ʼae neʼe mole fetogi e te tagata te laumalie kovi ʼaki he ʼu meʼa ʼe lelei, koia neʼe toe liliu mai ai te laumalie kovi ʼaia mo te ʼu laumalie ʼe toko fitu neʼe agakovi age, pea neʼe natou ulu sino ia ia. ʼO toe feia aipe, ko te puleʼaga ʼo Iselaele neʼe fakamaʼa pea neʼe fai ki ai he ʼu fetogi, ohage pe ko te tagata ʼae neʼe mavae mai ia ia te laumalie kovi. Kaʼe neʼe mole tali e te puleʼaga ʼo Iselaele te kau polofeta ʼa te ʼAtua, ʼo kaku ki tanatou fakafeagai kia Sesu, logo la neʼe ha lelei neʼe ina maʼu ia te laumalie ʼo te ʼAtua. Neʼe ha ai neʼe kua kovi age te aluʼaga ʼo te puleʼaga ʼi tona kamata.

ʼI te lolotoga palalau ʼa Sesu, neʼe tau mai tana faʼe pea mo ʼona tehina ʼo tutuʼu fakatahi mo te hahaʼi. Ko natou ʼae neʼe heheka ʼo ovi kia te ia, neʼe natou ui fenei age: “Koʼeni tau faʼe mo ʼou tehina ʼe natou tutuʼu ʼi tuʼa he ʼe natou fia palalau mo koe.” Neʼe fakaha leva e Sesu te malohi ʼo tona vahaʼa mo ʼana tisipulo, ʼae neʼe natou hage kia te ia ko hona ʼu tehina, mo tuagaʼane pea mo faʼe totonu. Neʼe ina faoʼi tona nima ki ʼana tisipulo, pea neʼe ina ui fenei: “Ko taku faʼe mo ʼoku tehina, ʼe ko natou ʼaeni ʼe natou logo ki te folafola ʼa te ʼAtua pea mo natou maʼuliʼi.” (Luka 8:20, 21) Neʼe ina fakaha ai neʼe maʼuhiga age kia te ia tona vahaʼa mo ʼana tisipulo, logo la neʼe mole ina meʼa noaʼi ʼana felogoʼi mo tona famili. ʼE ko he meʼa fakalotomalohi kia tatou hatatou felogoʼi lelei mo ʼotatou tehina fakalaumalie, tafito la moka lotomahalohalo ʼihi ʼo ʼuhiga mo tatou peʼe natou valokiʼi tatou pea mo te ʼu gaue lelei ʼae ʼe tou fai.