KAPITE 74
He ʼu Ako ʼo ʼUhiga Mo Te Tali Kaiga Pea Mo Te Faikole
-
ʼE ALU IA SESU KIO MALETA MO MALIA
-
ʼE MAʼUHIGA IA TE HAGA FAIKOLE
ʼI te faʼahi esite ʼo te Moʼuga ʼo Oliveto, neʼe tuʼu ai ia te kolo ko Petania ʼo ovi ki Selusalemi ia teitei kilometa ʼe tolu. (Soane 11:18) Neʼe alu ia Sesu ki ai pea neʼe hu ki te ʼapi ʼo te tau tehina, ko Maleta mo Malia. Ko naua pea mo tonā tokolua, ko Lasalo, neʼe ko he ʼu kaumeʼa ʼo Sesu, pea neʼe natou fakatalitali fakafiafia ia ia.
Neʼe ko he toe pilivilesio te haʼu ʼa te Mesia ki tonatou ʼapi. Neʼe faiga fakamalotoloto ia Maleta ke tokaga lelei kia Sesu, koia neʼe ina kamata teuteuʼi ai he toe meʼa kai. ʼI te lolotoga fetuʼuʼaki ʼa Maleta, ko tona tehina ko Malia, neʼe nofo ia vaʼe ʼo Sesu ʼo fakalogo ʼana palalau. Koia, neʼe ui fenei leva e Maleta kia Sesu: “ ʼAliki, ʼe mole ke koviʼia koa koe te haga ʼo toku tehina ʼo tuku au ke au fai tokotahi te ʼu gaue? Ui age kia ia ke haʼu ʼo tokoni mai.”—Luka 10:40.
Neʼe mole valoki e Sesu ia Malia, kaʼe neʼe ina foaki he ʼu tokoni kia Maleta he neʼe tuʼania fau ki te ʼu meʼa fakasino. Neʼe ina ui fenei age: “Maleta, Maleta, ʼe ke hoha mo feʼohoʼaki ki te ʼu tuʼuga meʼa. ʼE mole ʼaoga kia tatou he ʼu tuʼuga meʼa, kaʼe lagi ko he meʼa pe ʼe tahi. Koia ko Malia neʼe ina filifili ia te vahe ʼae ʼe lelei, pea ʼe mole toʼo anai mai ia ia.” (Luka 10:41, 42) ʼEi, neʼe fakaha lelei e Sesu ʼe mole ʼaoga ke pulinoa he toe temi lahi ki te teuteuʼi ʼo he tuʼuga meʼa kai. ʼE feʼauga pe he meʼa kai ʼe faigafua tona teuteuʼi.
Neʼe lelei te manatu ʼa Maleta, he neʼe ina fia fakaha te tali kaiga. Kaʼe ʼi tana tokaga fau ki te taupau maʼuli, neʼe mole kei maʼu ai hona temi ke fakalogo ki te ʼu akonaki maʼuhiga ʼae neʼe fai e te ʼAlo ʼo te ʼAtua. Neʼe fakaha lelei ai e Sesu neʼe fai e Malia he tonu ʼe fakapotopoto, he neʼe fua lelei kia ia ʼi tona maʼuli katoa pea ʼe tou maʼu fuli ai he ako ʼe tonu ke tou manatuʼi.
ʼI te tahi lakaga, neʼe akoʼi e Sesu he tahi age manatu neʼe toe maʼuhiga foki. Neʼe kole fenei age e he tisipulo: “ ʼAliki, akoʼi mai kia matou pe ʼe feafeaʼi te faikole, ohage ko te akoʼi age e Soane ki ʼana tisipulo.” (Luka 11:1) Neʼe kua ʼosi fakaha pe e Sesu te faʼahi ʼaia ʼi he taʼu katoa vaelua ki muʼa atu, ʼi tana Akonaki ’i Te Moʼuga. (Mateo 6:9-13) Kaʼe ʼi te temi ʼaia, neʼe lagi mole kau ai te tisipulo ʼaia, koia ʼae neʼe toe fakaha e Sesu te ʼu manatu tafito. Neʼe ina fai leva he lea fakatata moʼo fakamaʼuhigaʼi te ʼaoga ʼae ke haga faikole.
Neʼe ina ui fenei: “Kapau ʼe ʼi ai hou kaumeʼa pea ʼe ke alu age ki ai ʼi te maʼupo ʼo ui fenei age: ‘Kaumeʼa, foaki mai haku ʼu foʼi pane ʼe tolu, koteʼuhi neʼe hoki tau folau mai pe toku kaumeʼa pea ʼe mole haku meʼa ke au ʼavage ki ai.’ Kaʼe ʼe ina tali fenei age anai mai loto: ‘Tuku tau fakakinakinaʼi au. Kua fakamaʼu te matapa, pea kua matou momoe mo taku fanau. ʼE mole feala ke au tuʼu atu pea ʼe mole haku meʼa ke au ʼavatu.’ ʼE au tala atu, logope la ʼe mole tuʼu ake anai pea mo foaki age he meʼa ʼuhi he ʼe ko tona kaumeʼa, kaʼe ʼe mahino papau ia, ʼe tuʼu ake anai pea mo ʼavage te meʼa ʼae ʼe ʼaoga ki ai ʼuhi ko tana haga kole fakakinau.”—Luka 11:5-8.
Neʼe mole fia ui e Sesu neʼe mole loto e Sehova ke tali ki te ʼu faikole, ohage ko tona fai e te kaumeʼa ʼi te lea fakatata. Kaʼe neʼe ina fakaha, kapau ko he kaumeʼa logope la tana mole lotolelei ki ai kaʼe ʼe ina tali te ʼu kole ʼae ʼe haga fai age, pea ʼe mahino ia ko tatatou Tamai ʼofa ʼae ʼe ʼi selo ʼe tali mai anai ki te ʼu faikole fakamalotoloto ʼo ʼana kaugana agatonu. Neʼe hoko atu fenei e Sesu: “ ʼE au ui atu kia koutou, kotou haga kole, pea ʼe foaki atu anai. Kotou haga kumi, pea ʼe kotou maʼu anai. Kotou haga tukituki, pea ʼe avahi atu anai. He ʼe ko ʼae ʼe ina haga kole ʼe foaki age anai, ko ʼae ʼe ina haga kumi ʼe ina maʼu anai pea ko ʼae ʼe ina haga tukituki ʼe avahi age anai.”—Luka 11:9, 10.
Neʼe fakaha lelei leva e Sesu te manatu ʼaia ʼo ina toʼo te faʼifaʼitaki ʼo he tamai. Neʼe ina ui fenei: “Pe ko ai he tamai ia koutou, moka ʼe kole age e tona foha he ika, ʼe ina foaki age anai he gata kaʼe mole ko he ika? Peʼe ina kole age he fuaʼi moa kaʼe ʼe ina foaki age anai he sekolopio? Koia, logope ʼe kotou agakovi kaʼe ʼe kotou iloʼi ia te ʼu meʼa lelei ʼae ʼe tonu ke kotou foaki ki ʼakotou fanau. ʼO toe feia aipe mo takotou Tamai ʼae ʼe ʼi selo, ʼe ina foaki moʼoni age anai te laumalie maʼoniʼoni kia natou ʼae ʼe natou kole age.” (Luka 11:11-13) ʼE tou tui papau ai ʼe fia fagono tatatou Tamai ki ʼatatou faikole pea ʼe ina fia foaki mai te ʼu meʼa ʼae ʼe ʼaoga kia tatou.