KAPITE 77
Neʼe Foaki e Sesu He ʼu Tokoni ʼo ʼUhiga Mo Te ʼu Koloa
-
TE LEA FAKATATA ʼO TE TAGATA MAʼU KOLOA
-
ʼE PALALAU IA SESU ʼO ʼUHIGA MO TE ʼU KOLOPO PEA MO TE ʼU LILIO
-
ʼE FOAKI ANAI KI TE “KIʼI FAGA OVI” IA TE PULEʼAGA ʼO TE ʼATUA
ʼI te lolotoga kai ʼa Sesu ʼi te ʼapi ʼo te Faliseo, neʼe fakatahitahi age ki tuʼa te toko lauʼi afe hahaʼi, ʼo natou fakatalitali ki ai. Neʼe kua hoko kia ia te aluʼaga ʼaia ʼi Kalilea. (Maleko 1:33; 2:2; 3:9) ʼI tana kua nofo ʼi Sutea, tokolahi neʼe natou fia sisio pea mo logo kia te ia, ʼo kehe ai tanatou aga mo ʼae ʼa te kau Faliseo ʼae neʼe kakai fakatahi mo ia.
Neʼe fai muʼa e Sesu he ʼu palalau maʼuhiga ki ʼana tisipulo, ʼo ina ui fenei: “Kotou tokakaga ki te meʼa fakatupu ʼa te kau Faliseo, ʼae ko te malualoi.” Neʼe kua foaki pe e Sesu te fakatokaga ʼaia ʼi muʼa atu, kaʼe ʼaki te meʼa ʼae neʼe sio ki ai ʼi tana kai mo te kau Faliseo, neʼe ha ai te maʼuhiga ʼaupito ʼo te tokoni ʼaia. (Luka 12:1; Maleko 8:15) Neʼe lagi faigaʼi e te kau Faliseo ke natou fufu tanatou agakovi, ʼaki hanatou fakahaha he aga fakalotu. Pea neʼe tonu ke iloʼi e te hahaʼi te faʼahi ʼaia, naʼa fakatupu kovi kia natou. Neʼe ui fenei e Sesu: “Ko meʼa fuli ʼe fufu lelei ʼe fakaha anai, pea ko meʼa fuli ʼae ʼe fakalilo ʼe iloʼi anai.”—Luka 12:2.
ʼI te hahaʼi ʼae neʼe fakatahitahi age kia Sesu, tokolahi neʼe lagi maʼuʼuli ʼi te koga fenua ʼo Sutea, pea neʼe mole natou logo ki tana faiakonaki ʼi Kalilea. Koia, neʼe toe fakaha ai e Sesu te ʼu manatu tafito ʼae neʼe kua ina fakaha ʼi muʼa atu. Neʼe ina fakalotomalohiʼi fenei te hahaʼi fuli: “ ʼAua naʼa kotou matataku ia natou ʼae ʼe natou matehi te sino pea ʼosi ʼaia ʼe mole feala ke natou fai he tahi age meʼa.” (Luka 12:4) Ohage pe ko tana fai ʼi muʼa atu, neʼe ina fakamaʼuhigaʼi te ʼaoga ʼae ke falala ʼana tisipulo ʼe tokaga anai te ʼAtua kia natou. Neʼe toe ʼaoga ke natou fakaha ʼe natou iloʼi te Foha ʼo te tagata pea ke natou mahino ʼe feala ki te ʼAtua ke tokoni age kia natou.—Mateo 10:19, 20, 26-33; 12:31, 32.
Pea neʼe ʼi ai te tagata ʼi te hahaʼi, neʼe ina fakaha te meʼa ʼae neʼe hoha tafito ki ai, ʼo ina ui fenei: “ ʼAliki, ui age ki toku tehina ke ina vahe mo au te tofiʼa.” (Luka 12:13) Neʼe fakatotonu ʼi te Lao ke foaki ki te foha lahi vahe ʼe lua ʼo te tofiʼa. Neʼe mole feala ke hoko ai he ʼu fihi. (Tetelonome 21:17) Kaʼe neʼe hage neʼe mole feʼaugaʼia e te tagata tona vahe ʼae neʼe tonu ke foaki age kia ia ʼo mulimuli ki te Lao. Neʼe aga fakapotopoto ia Sesu ʼi tana fakafisi ke kau mo he tahi ia naua. Neʼe ina fehuʼi fenei age: “Tagata, ko ai koa ʼae neʼe ina fakanofo au ko he tuʼi fakamau peʼe ko he tagata vahe tofiʼa maʼa koulua?”—Luka 12:14.
Pea neʼe fai leva e Sesu te tokoni ʼaeni kia natou fuli: “Kotou tokakaga ki te faʼahiga manumanū kehekehe, koteʼuhi maʼia mo ia ʼae ʼe maʼu koloa, ʼe mole fakalogo tona maʼuli ki te ʼu koloa ʼae ʼe ina maʼu.” (Luka 12:15) Tatau aipe pe ʼe lahi te ʼu koloa ʼae ʼe lagi maʼu e he tagata, kaʼe ʼe mole mate anai koa, pea ʼe ina tuku ai ia meʼa fuli ʼae ʼe ina maʼu? Neʼe fakaha lelei e Sesu te manatu ʼaia ʼaki tana fai he lea fakatata, ʼae neʼe toe ha ai te maʼuhiga ʼo te maʼu he matagafua ʼe lelei ia muʼa ʼo te ʼAtua. Neʼe ina ui fenei:
“Neʼe fua lelei te kele ʼo he tagata maʼu koloa. Koia neʼe fakakaukau fenei: ‘ ʼI te temi nei, kotea ʼae ka au fai anai, he ʼe mole kei ʼi ai he koga meʼa ke au tanaki ki ai te ʼu fua ʼo taku gaueʼaga?’ Pea ina ui ai leva: ‘Koʼeni te meʼa ka au fai anai: ʼE au holoʼi anai ʼoku fale tanakiʼaga mo laga ʼihi ʼe lalahi age, pea mo tanaki anai ki ai ʼaku fulumeto katoa mo ʼoku koloa fuli.’ ʼE ina hoko atu fenei: ‘Kua tapuke ʼaku meʼa lelei ki ni taʼu, ke au malolo la, mo kai, mo inu pea mo fakafiafia.’ Kaʼe neʼe ui fenei age e te ʼAtua ki ai: ‘Tagata vale, ʼi te po ʼaeni ʼe toʼo anai tou maʼuli. Ko ai anai ka ina maʼu te ʼu meʼa ʼae neʼe ke tanaki?’ Koia ʼe hoko feia anai ki te tagata ʼae ʼe ina tanaki he ʼu koloa maʼa ia totonu kaʼe ʼe mole maʼu koloa ia ki te ʼAtua.”—Luka 12:16-21.
Ko te ʼu tisipulo ʼa Sesu ʼo feia mo natou ʼae neʼe fagono kia te ia, neʼe feala pe ke natou to ki te hele ʼae ko te kumi peʼe ko te tanaki ʼo he ʼu koloa. Pe neʼe feala ke fakaleluʼi tanatou tauhi kia Sehova ʼuhi ko te ʼu tuʼania ʼo te maʼuli. Koia neʼe toe fai age e Sesu te tokoni lelei ʼae neʼe ina fai ʼi te taʼu katoa
vaelua ki muʼa atu, ʼi tana Akonaki ’i Te Moʼuga. Neʼe ina ui fenei:“Tuku takotou tuʼania ʼo ʼuhiga mo ʼokotou maʼuli pe kotea ʼae ka kotou kai anai, peʼe ʼo ʼuhiga mo ʼokotou sino pe kotea ʼae ka kotou tui anai. . . . Kotou tokagaʼi te ʼu kolopo: ʼE mole natou tūtū te pulapula peʼe utu, pea ʼe mole ʼi ai hanatou fale tanakiʼaga, kaʼe ʼe fafaga natou e te ʼAtua. ʼE mole kotou maʼuhiga age koa la ʼi te ʼu manulele? . . . Kotou tokagaʼi te maʼuli lelei ʼo te ʼu lilio: ʼE mole natou kinakina peʼe faifilo, kaʼe ʼe au tala atu kia koutou, maʼia mo Salomone, te tagata ʼae neʼe koloa’ia, neʼe mole teu ohage ko te ʼu lilio ʼaia. . . . Koia tuku takotou kumi pe kotea ka kotou kai anai mo inu anai, pea mo tuku foki takotou hoha fau. . . . ʼE iloʼi e takotou Tamai ʼe ʼaoga kia koutou te ʼu meʼa ʼaia. . . . Kotou haga fakamuʼamuʼa ia tona Puleʼaga, pea ʼe toe foaki atu anai mo te ʼu meʼa ʼaia kia koutou.”—Luka 12:22-31; Mateo 6:25-33.
Ko ai ʼae ka ina fakamuʼamuʼa ia te Puleʼaga ʼo te ʼAtua? Neʼe fakaha e Sesu ʼe ko he “kiʼi faga ovi,” peʼe ko he hahaʼi agatonu ʼe tokosiʼi. Neʼe fakaha ki muli age ʼe natou toko 144 000 pe. Kotea ʼae ʼe foaki kia natou? Neʼe fakapapau fenei e Sesu: “Kua tali e takotou Tamai ke ina foaki atu te Puleʼaga.” ʼE mole natou tokakaga tafito anai ʼo tanaki he ʼu koloa ʼi te kele, ʼae ʼe feala ke kaihaʼa. Kaʼe ʼe tuku anai ʼonatou loto ki te ʼu ‘koloa ʼae ʼe mole maumau,’ peʼe ko te ʼu “koloa ʼi selo,” ʼae ka natou kaugā hau ai mo Kilisito.—Luka 12:32-34.