Neʼe kei nofo ia Sesu ʼi Selusalemi ki te ʼAho Lahi ʼo Te ʼu Tapenakulo (peʼe ʼo Te ʼu Pola) pea neʼe hoko atu pe tana faiakonaki ʼo ʼuhiga mo te ʼu moʼoni maʼuhiga. Neʼe ui fenei age e ʼihi Sutea neʼe toe kau mo natou ki te ʼAho Lahi ʼaia: “Ko matou ko te hakoga ʼo Apalahamo pea neʼe mole matou kaugana.” Neʼe tali fenei age e Sesu: “ ʼE au iloʼi ko koutou ko te hakoga ʼo Apalahamo. Kaʼe ʼe kotou faigaʼi ke kotou matehi au, koteʼuhi ʼe mole tuputupu taku folafola ia koutou. ʼE au palalau ki te ʼu meʼa ʼae neʼe au sio ki ai ʼi taku nofo ʼae mo taku Tamai, kaʼe ʼe kotou fai koutou te ʼu meʼa ʼae neʼe kotou logo ki ai mai takotou tamai.”—Soane 8:33, 37, 38.

Neʼe fia fakaha age e Sesu te manatu ʼaeni: Ko tana Tamai ʼe kehe ia mo ʼanatou tamai. Neʼe mole mahino te kau Sutea ki te ʼu palalau ʼaia ʼa Sesu, koia neʼe natou toe ui fenei: “Ko tamatou tamai ko Apalahamo.” (Soane 8:39; Esaia 41:8) ʼE moʼoni, neʼe natou hihifo mai ia Apalahamo. Koia neʼe natou toe manatu foki ko Apalahamo, te kaumeʼa ʼo te ʼAtua, neʼe ko tanatou tamai fakalaumalie.

Kaʼe moʼo tali ki ai, neʼe fai e Sesu te ʼu palalau ʼaeni neʼe fakatupu ita kia natou: “Ka na pau la ko koutou ko te ʼu fanau ʼa Apalahamo, neʼe kotou fai te ʼu gaue ʼa Apalahamo.” ʼEi, ʼe faʼifaʼitakiʼi e he foha ia tana tamai. Neʼe hoko atu fenei e Sesu: “Kaʼe ʼe kotou faigaʼi ke kotou matehi au, ia au ʼae neʼe ina fakaha atu te moʼoni ʼae neʼe au logo ki ai mai te ʼAtua. Neʼe mole fai e Apalahamo ia te faʼahi ʼaia.” Neʼe fai leva e Sesu te ʼu palalau fakapunamaʼuli ʼaeni: “ ʼE kotou fai te ʼu gaue ʼo takotou tamai.”—Soane 8:39-41.

Neʼe heʼeki mahino te kau Sutea pe neʼe talanoa ia Sesu ʼo ʼuhiga mo ai. Neʼe natou lau ko natou ko te ʼu foha moʼoni ʼo te ʼAtua, ʼo natou ui fenei: “ ʼE mole ko matou ko ni fanau taka, kaʼe ko tamatou Tamai pe ʼe tahi, ko te ʼAtua.” Kaʼe neʼe ko tanatou Tamai koa ia te ʼAtua? Neʼe ui fenei e Sesu: “Ka na pau la neʼe ko te ʼAtua takotou Tamai, neʼe kotou ʼoʼofa ia au, he neʼe au haʼu mai te ʼAtua pea ʼe au ʼi heni. Neʼe mole au haʼu ʼi toku loto faʼitaliha, kaʼe neʼe ko Ia ʼae neʼe ina fekauʼi mai au.” Pea neʼe fai e Sesu te fehuʼi ʼaeni: “He koʼe ʼe mole kotou mahino ki ʼaku palalau?” Neʼe tali e ia totonu ki ai, ʼo ina ui fenei: “Koteʼuhi ʼe mole feala ke kotou fagono ki ʼaku folafola.”—Soane 8:41-43.

Neʼe faiga ia Sesu ke ina fakaha age kia natou te ʼu nunuʼa ʼo tanatou mole tali ia ia. Kaʼe neʼe ina ui fakahagatonu fenei leva kia natou: “ ʼE kotou ʼomai mai takotou tamai te Tevolo, pea ʼe kotou fia fakahoko te ʼu holi ʼo takotou tamai.” Neʼe feafeaʼi tanatou tamai? Neʼe ui fenei e Sesu ʼo ʼuhiga mo ia ʼaia: “Ko ia ʼaia neʼe faifakapo ʼi te kamataʼaga, pea neʼe mole haga nofo ia ʼi te moʼoni.” Neʼe ina hoko atu fenei: “Ko ʼae ʼe haʼu mai te ʼAtua, ʼe fagono ki te ʼu folafola ʼa te ʼAtua. Ko te tupuʼaga ʼaia ʼo takotou mole fagono, he ʼe mole kotou ʼomai mai te ʼAtua.”—Soane 8:44, 47.

Neʼe iita te kau Sutea ʼi tonatou tukugakoviʼi ʼaia, ʼo natou ui fenei: “Neʼe mole tonu koa la tamatou ui fenei: ‘Ko koe ko he Samalitana pea ʼe nofo ia koe he temonio’?” ʼI tanatou fakahigoaʼi ia Sesu ko “he Samalitana,” neʼe natou fakaha ai tanatou meʼa noaʼi ia ia. Kaʼe neʼe mole tokagaʼi e Sesu. Neʼe ina tali fenei age: “ ʼE mole nofo ia au he temonio kaʼe ʼe au fakamaʼuhigaʼi taku Tamai, pea ʼe kotou fakalainoaʼi au.” Neʼe ha te maʼuhiga ʼo te ʼu palalau ʼaia ʼa Sesu ʼi te fakapapau fakapunamaʼuli ʼaeni neʼe ina fai: “Kapau ʼe mulimuli he tahi ki taku folafola, ʼe mole mate anai.” Neʼe mole fia ui e Sesu ʼe mole mamate anai te kau apositolo pea mo natou ʼae ʼe natou mulimuli ia te ia. Kaʼe ko tona fakaʼuhiga ʼe mole hoko anai kia natou te fakaʼauha heʼe gata, “te lua mate,” ʼae ʼe mole he ʼamanaki ki te fakatuʼuake.—Soane 8:48-51; Fakaha 21:8.

Kaʼe neʼe mole mahino te kau Sutea ki te ʼu palalau fakata ʼaia ʼa Sesu, ʼo natou ui fenei: “Kua matou iloʼi leva ʼe nofo ia koe he temonio. Kua mate ia Apalahamo, ʼo toe feia mo te kau polofeta, kaʼe ʼe ke ui fenei koe: ‘Kapau ʼe mulimuli he tahi ki taku folafola, ʼe mole mate anai ia ʼi he temi.’ ʼE ke lahi age koa la koe ʼi tamatou tamai ko Apalahamo, ʼae kua mate? . . . Koia, ui mai pe ko ai ia koe.”—Soane 8:52, 53.

ʼE mahino mai ai, neʼe loto ia Sesu ke natou mahino ʼe ko ia te Mesia. Kaʼe neʼe mole ina tali fakahagatonu age ki tanatou fia iloʼi ʼae pe ko ai ia ia. Neʼe ina ui fenei: “Kapau ʼe au fakakololiaʼi au, pea ʼe mole he ʼuhiga ʼo toku kololia. Kaʼe ʼe fakakololiaʼi au e taku Tamai, ia ia ʼae ʼe kotou ui ʼe ko tokotou ʼAtua. Kaʼe ʼe mole kotou iloʼi ia ia, kaʼe ʼe au iloʼi au ia ia. Pea kapau  neʼe au ui ʼe mole au iloʼi ia ia, ʼe au liliu anai ko he tagata gutuloi, ohage ko koutou.”—Soane 8:54, 55.

Neʼe toe talanoa leva ia Sesu ki te faʼifaʼitaki ʼo tanatou kui agatonu, ʼo ina ui fenei: “Ko Apalahamo takotou tamai neʼe fakafiafia lahi ʼi tana ʼamanaki ʼae ke sio ki te ʼu meʼa ʼae ka au fai anai, pea neʼe sio ki ai pea neʼe fakafiafia.” ʼEi, neʼe tui ia Apalahamo ki te fakapapau ʼa te ʼAtua, koia neʼe ʼamanaki ai ki te haʼu ʼa te Mesia. Neʼe ui fenei e te kau Sutea ʼi tanatou punamaʼuli: “Heʼeki ke taʼu 50 kaʼe kua ke sio koe kia Apalahamo?” Neʼe tali fenei age e Sesu: “ ʼE au tala moʼoni atu kia koutou, ʼi muʼa ʼo te tupu ʼo Apalahamo, neʼe kua au maʼuli au.” Neʼe talanoa ia ʼo ʼuhiga mo tona maʼuli ʼi selo, ʼi tona ʼuhiga ʼaselo malohi, ʼi muʼa ʼo tana haʼu ki te kele.—Soane 8:56-58.

ʼI te ui ʼae ʼa Sesu neʼe kua maʼuli ia ʼi muʼa ʼo te tupu ʼo Apalahamo, neʼe iita ai te kau Sutea ʼo natou fia taumakaʼi ia ia. Kaʼe neʼe mavae ia Sesu, ʼo hao mai ai.