KAPITE 96
Neʼe Tali Ia Sesu Ki He Tagata Pule Maʼu Koloa
MATEO 19:16-30 MALEKO 10:17-31 LUKA 18:18-30
-
ʼE FAIFEHUʼI HE TAGATA MAʼU KOLOA ʼO ʼUHIGA MO TE MAʼULI HEʼE GATA
ʼI te fakalaka ʼa Sesu ʼi Pele ʼo alu ki Selusalemi. Neʼe lele age he tagata tupulaga maʼu koloa ʼo tuʼutuli ifo ʼi ʼona muʼa. Ko te tagata ʼaia neʼe ko “te tahi ʼi te kau pule,” neʼe lagi ko he pule ʼi he sinakoka pe neʼe kau ki te Sanetualio. Neʼe ina fakalavelave fenei age: “ ʼAliki Agalelei, kotea ʼae ʼe tonu ke au fai ke au maʼu ai te maʼuli heʼe gata?”—Luka 8:41; 18:18; 24:20.
Neʼe ui fenei age e Sesu: “He koʼe ʼe ke ui ʼe au agalelei? Ko te tokotahi pe ʼe agalelei, ʼe ko te ʼAtua.” (Luka 18:19) Neʼe lagi fakaʼaogaʼi e te tagata tupulaga te kupu “agalelei” ohage ko he kupu fakaʼapaʼapa, ohage pe ko tona fai e te kau lapi. Logo la neʼe agalelei ia Sesu ʼi tana faiakonaki, kaʼe neʼe ina fakaha age ki te tagata ko te kupu “Agalelei,” ka fakaʼaogaʼi ohage ko he kupu fakaʼapaʼapa, neʼe fakahagahaga pe ki te ʼAtua.
Neʼe fai e Sesu te tokoni ʼaeni ki ai: “Kaʼe kapau ʼe ke fia maʼu ia te maʼuli, haga mulimuli ki te ʼu fakatotonu.” Pea neʼe fehuʼi fenei age e te tagata tupulaga: “Te ʼu fakatotonu fea?” Neʼe fakaha age e Sesu te ʼu folafola ʼe nima ʼi te ʼu Folafola ʼe Hogofulu, ʼo ʼuhiga mo te faifakapo, te tono, te kaihaʼa, te fai ʼo he fakamoʼoni loi, mo te fakaʼapaʼapa ki te ʼu matuʼā. Pea neʼe fakaha age leva e Sesu te fakatotonu ʼaeni ʼe maʼuhiga age: “ ʼE tonu ke ke ʼofa ki tou tatau ohage pe ko koe totonu.”—Mateo 19:17-19.
Neʼe tali fenei age e te tagata: “Kua au mulimuli ki te ʼu fakatotonu fuli ʼaia, kotea ʼae ʼe kei toe ke au fai?” (Mateo 19:20) Neʼe lagi manatu ia neʼe kei toe ke ina fai he gaue ʼe fakatalakitupua ke feala ai hana maʼu ia te maʼuli heʼe gata. Neʼe “ ʼofa” ia Sesu ki ai ʼi tana sio ki tana fakamalotoloto ʼi tana fai te fehuʼi ʼaia. (Maleko 10:21) Kaʼe neʼe ʼi ai te vaivaiʼaga ʼo te tagata ʼaia.
Neʼe manako te tagata ki ʼona koloa, koia neʼe ui fenei e Sesu: “Ko te meʼa pe ʼe tahi ʼe kei toe ke ke fai: Alu ʼo fakatau ʼou koloa pea mo ke foaki ki te kau masisiva, pea ʼe ke maʼu anai he koloa ʼi selo, pea ke haʼu ʼo mulimuli mai ia te au.” ʼEi, neʼe feala ke tufa e te tagata tana falā ki te kau masisiva, ʼae neʼe mole feala ke natou toe liufaki, pea liliu leva ko he Maleko 10:21, 22) Neʼe ui fenei e Sesu: “ ʼE faigataʼa ʼaupito anai kia natou ʼae ʼe maʼu koloa hanatou hu ki te Puleʼaga ʼo te ʼAtua!”—Luka 18:24.
tisipulo ʼa Sesu. Kaʼe neʼe tuʼu ake pea alu lotomamahi pea neʼe lagi sioʼi ia ia e Sesu pea neʼe ʼofa mamahi ai. Neʼe mole sio te tagata ki te koloa moʼoni, ʼuhi ko tana manako ki ʼona koloa, ʼae “neʼe lahi.” (Neʼe punamaʼuli te kau tisipulo ʼi te ʼu palalau ʼaia ʼa Sesu pea mo tana hoko atu fenei: “ ʼE faigafua age he hu ʼa he kamelo ʼi he pu ʼo he hui tuitui, ʼi he hu ʼa he tagata maʼu koloa ki te Puleʼaga ʼo te ʼAtua.” Neʼe fai ai e te ʼu tisipulo te fehuʼi ʼaeni: “Ko ai ʼape ʼae ka haofaki?” ʼE feala koa ke haofaki te tagata peʼe ko he meʼa ʼe faigataʼa fau? Neʼe sio fakahagatonu ia Sesu kia natou pea mo ina tali fenei age: “Ko meʼa ʼae ʼe mole feala ki te tagata ʼe feala ia ki te ʼAtua.”—Luka 18:25-27.
Pea neʼe fakaha lelei e Petelo neʼe kehe te tonu ʼae neʼe natou fai ʼi ʼae neʼe fai e te tagata maʼu koloa. Neʼe ina ui fenei: “Kua matou tuku ia meʼa fuli kaʼe matou mulimuli ia te koe. Kotea ʼae ka matou maʼu ai?” Neʼe fakaha age e Sesu te ikuʼaga fakaʼosi ʼo te tonu lelei ʼae neʼe natou fai, ʼo ina ui fenei: “ ʼI te fakafoʼou ʼo meʼa fuli, moka heka anai te Foha ʼo te tagata ʼi tona hekaʼaga fakahau fakakololia, ko koutou ʼae neʼe kotou mulimuli mai ia te au ʼe kotou heheka anai ʼi te ʼu hekaʼaga fakahau ʼe 12, ʼo kotou fakamauʼi te ʼu telepi ʼe 12 ʼo Iselaele.”—Mateo 19:27, 28.
ʼE mahino ia, neʼe manatu Sesu ki he temi ki ʼamuli, ʼae ka fakafoʼou ai ʼi te kele ia meʼa fuli pea mo toe fakatuʼu te ʼu aluʼaga ʼae neʼe maʼu ʼi te ʼoloto ʼo Eteni. ʼE fakapale anai ia Petelo pea mo te tahi ʼu tisipulo, ʼaki tanatou pule mo Sesu ki te Palatiso ʼi te kele. Neʼe tuha te fakapale ʼaia mo te ʼu sakilifisio fuli ʼae neʼe natou fai!
Kaʼe ʼe mole natou maʼu pe te ʼu fakapale fuli ʼi te ka haʼu. Neʼe ʼi ai ʼihi lelei neʼe kua maʼu e te ʼu tisipulo ʼa Sesu. Neʼe ui fenei e Sesu: “ ʼE au tala moʼoni atu kia koutou, ko he tahi kua ina tuku tona ʼapi, peʼe ko tona ʼohoana, peʼe ko ʼona tehina, peʼe ko ʼana matuʼā, peʼe ko ʼana fanau ʼuhi ko te Puleʼaga ʼo te ʼAtua, ʼe ina maʼu anai ʼo tuʼa lahi age ʼi te temi ʼaeni, pea ʼi te tuʼu ʼo te ʼu faʼahiga meʼa ka hoko mai, ia te maʼuli heʼe gata.”—Luka 18:29, 30.
ʼEi, ʼi he potu pe neʼe olo ki ai ʼana tisipulo, neʼe malohi pea mo maʼuhiga age ʼanatou felogoʼi mo te tahi ʼu tisipulo ʼi ʼonatou famili totonu. Meʼa fakaʼofaʼofa foki, he neʼe mole lagi maʼu e te tagata pule maʼu koloa ia te lelei ʼaia, ʼo feia mo te fakapale ʼae ke maʼuli ʼi te Puleʼaga ʼo te ʼAtua ʼae ʼi selo.
Pea neʼe ui fenei e Sesu: “Kaʼe tokolahi ia natou ʼae ʼe mumuʼa ʼe natou mumuli anai, pea ko natou ʼae ʼe mumuli ʼe natou mumuʼa anai.” (Mateo 19:30) Kotea tona fakaʼuhiga?
Neʼe kau te tagata pule maʼu koloa ia natou ʼae neʼe “mumuʼa,” he neʼe kau ʼi te kau takitaki Sutea. Neʼe mulimuli lelei ki te ʼu fakatotonu ʼa te ʼAtua, koia neʼe feala ia ke liliu ko he tisipulo ʼa Sesu pea neʼe lahi te ʼu meʼa neʼe feala ke ina fakahoko. Kaʼe neʼe ina haga fakamuʼamuʼa ʼi tona maʼuli ʼona koloa. Neʼe mole tatau ia mo te hahaʼi malalo ʼo te fenua, he neʼe natou mahino ko te faiakonaki ʼa Sesu neʼe ko te moʼoni pea ʼe ina taki ki te maʼuli. Neʼe natou “mumuli,” kaʼe neʼe natou liliu leva ʼo “mumuʼa.” Neʼe feala ke natou ʼamanaki heheka ʼi te ʼu hekaʼaga fakahau ʼi selo mo Sesu pea mo puleʼi te Palatiso ʼi te kele.