Ko Satana pea mo tana ʼu temonio ʼe mole fualoa anai tanatou fakahalaʼi te hahaʼi. Neʼe kua ʼosi kapu nātou e Sehova mai te lagi (Fakahā 12:9). Pea ʼi he temi kua ōvi mai, ʼe ina toe tauʼi anai Satana pea mo tana ʼu temonio, neʼe fakamahino te faʼahi ʼaia e te ʼapositolo ko Soane ʼi tana fakamatala te fakaʼaʼata neʼe fakahā age e te ʼAtua ki ai: “Pea neʼe ʼau sio ki he ʼaselo ʼe hifo mai te lagi mo te kalavi ʼo te luo mole hona takele pea mo he seini lahi ʼi tona nima. Pea neʼe ina toʼo te talakone, te gata olisinale, ʼaē ko te Tevolo pea ko te Satana, pea neʼe ina haʼi ia ʼi te ʼu taʼu e afe. Pea neʼe ina lī ia ki te luo mole hona takele ʼo ina pupunu pea mo haʼihaʼi ai ia, ke ʼaua naʼa ina toe fakahēʼi te hahaʼi ʼo aʼu ki te fakaʼosi ʼo te ʼu taʼu e afe.” (Fakahā 20:1-3). Ki muli mai, ko te Tevolo pea mo tana kau temonio ʼe fakaʼauha anai nātou ʼo talu ai. — Fakahā 20:10.

Ko te hahaʼi agakovi ʼe fakaʼauha anai foki mo nātou. — Pesalemo 37:9, 10; Luka 13:5.

ʼI te ʼosi fakamavae kehe ʼo Satana pea mo tana kau temonio, ʼe foaki anai e Sehova te ʼu tapuakina lahi ki te malamanei katoa. Kei koutou manatuʼi ko te ʼu mate ʼe mole nātou gaūeūe, ʼe nātou pulinoa. Neʼe fakatatau e Sesu te mate ki he moe — he moe loloto ʼo mole moemisi (Soane 11:11-14). Neʼe ina lavaʼi te faʼahi ʼaia koteʼuhi heʼe ina ʼiloʼi ʼe hoko mai anai te temi ʼe fakaʼaʼala ai nātou fuli ʼe momoe ʼi te mate? Neʼe ina ʼui fēnei: “ ʼE hoko mai te hola pea ko nātou ʼaē ʼe nonofo ʼi te loto faitoka (...) ʼe nātou hū mai anai ki tuʼa.” — Soane 5:28, 29; vakaʼi ia Gāue 24:15.

ʼE toe ʼaumai anai nātou ki te maʼuli, ʼi henī, ʼi te kele. Moʼo fetogi ʼo te ʼu logologo ʼo te ʼu mate, ʼe tou logo anai ki te ʼu logo fakafiafia: te ʼu higoa ʼo nātou ʼaē ʼe toe lagaʼi mai anai ki te maʼuli! ʼE ko he meʼa fakafiafia tatatou talifaki ia nātou ʼaē ʼe tou ʼoʼofa ai mokā nātou hū mai anai mai te faitoka!