Koutou Kaugana Kia Sehova, Kae Mole Kia Satana
ʼE feala kia tatou fuli ke tou fili. Peʼe tou kaugana kia Sehova, peʼe tou kaugana kia Satana pea mo tana ʼu temonio. ʼE mole feala ke tou fai te ʼu meʼa ʼaia e lua. Kae ʼe ko he aga poto te kaugana ʼaē kia Sehova!
ʼE agalelei Sehova
Ohage ko tatatou vakaʼi, ʼe leleiʼia e te ʼu temonio tanatou fai te aga kovi pea mo te fakahala. Kae mole feiā foki ia Sehova. ʼE ʼofa ia ki te hahaʼi ohage ko te ʼofa ʼa he tāmai ki tana fānau. Ko ia ʼaē ʼe ina foaki “te meʼa ʼofa matalelei fuli pea mo te mōlaga haohaoa fuli”. (Sake 1:17.) ʼE mole ina fakafisi te meʼa lelei ki te hahaʼi, tatau aipe peʼe lahi ʼaupito te meʼa ʼaia kia te ia. — Efesi 2:4-7.
Koutou fakakaukauʼi muʼa te ʼu meʼa neʼe fai e Sesu, te ʼAlo ʼo te ʼAtua, ʼi tana nofo ʼaē ʼi te kele. Neʼe ina toe faka fealagia ke palalau te kau gutu mate pea mo fakaāva te ʼu mata ʼo te kau kivi. Neʼe ina fakamālōlō te kau kilia pea te kau ketu. Neʼe ina kapu te ʼu temonio pea mo fakamālōlō te ʼu faʼahiga mahaki kehekehe. ʼAki te mālohi ʼo te ʼAtua, neʼe ina fakatuʼuake ai foki te kau mate ki te maʼuli. — Mateo 9:32-35; 15:30, 31; Luka 7:11-15.
ʼE mole ina fakamatala mai he ʼu loi moʼo fakahēʼi ʼo tatou, ʼe fakahā tuʼumaʼu pe e te ʼAtua te moʼoni. ʼE mole ina fakahalaʼi he tahi. — Faka au 23:19.
Koutou līaki te ʼu aga heʼe maʼa
Ohage ko te pilisoniʼi ʼo he foʼi namu e te fuluʼi kavelevele, ʼe toe feiā aipe ki te hoko mataku pea mo te loi ʼe nā pilisoniʼi te hahaʼi ʼe lauʼi miliona. ʼE nātou matataku ki te kau mate. ʼE nātou matataku ki te ʼu temonio. ʼE nātou tuʼaniaʼia te ʼu faitutuku, te ʼu kumi fakaʼiloga, te ʼu meʼa fakalalata pea mo te ʼu kiʼi tamapua. ʼE nātou kaugana ki te ʼu tui pea mo te ʼu talatisio ʼaē ʼe fakatafito ki te ʼu loi ʼa Satana te Tevolo. Ko te ʼu kaugana ʼa te ʼAtua ʼe mole nātou to ki te hele ʼo te ʼu faʼahiga meʼa ʼaia.
ʼE mālohi age Sehova ia Satana. Kapau ʼe koutou kaugana kia Sehova, ʼe ina hāofaki anai koutou mai te ʼu temonio (Sake 4:7). ʼE mole feala anai ke fakalauʼakauʼi koutou. Ohage la, ʼi Niselia, ko te ʼu tagata faifakalauʼakau e tolu neʼe nātou fia fakalauʼakauʼi he kau Fakamoʼoni ʼa Sehova ke mate koteʼuhi neʼe mole fia mavae ia ʼi te kolo. ʼI tanatou sio ifo ʼaē neʼe mole hoko te meʼa ʼaia, neʼe mataku ai te tahi ʼi te ʼu tagata faifakalauʼakau, ʼo ʼalu ia ki te kau Fakamoʼoni pea mo ina kole mamahi age ki ai ke fakamolemole age kia te ia.
Kapau ʼe gaohi koviʼi koutou e te ʼu temonio, ʼe feala hakotou pāui kia Sehova ʼaki tona huafa pea ʼe ina taupau anai koutou (Tāʼaga Lea 18:10). Kae ke koutou maʼu te taupau ʼa te ʼAtua, ʼe tonu ke koutou fakamamaʼo katoa mai te ʼu meʼa fuli ʼe ʼalutahi mo te ʼu meʼa fakatemonio pea mo te tauhi ki te ʼu temonio. Ko te meʼa ʼaia neʼe fai, ʼi te temi muʼa, e te hahaʼi atolasio ki te ʼAtua ʼi Efese. Neʼe nātou fakatahitahiʼi fuli tanatou ʼu tohi fai fakakikite pea neʼe nātou tutu (Gāue 19:19, 20). Ia ʼaho nei, ko te ʼu kaugana ʼa te ʼAtua ʼe tonu ke nātou fai feiā. Koutou fakamamaʼo ia koutou mai te ʼu meʼa fakalalata, te ʼu kiʼi kahoa, te ʼu meʼa “hāofaki”, te ʼu kiʼi tamapua, te ʼu tohi faifakalauʼakau pea mo te ʼatu ʼu meʼa ʼe pipiki ki te ʼu meʼa fakatemonio.
Maʼuliʼi te tauhi moʼoni
Kapau ʼe koutou loto ke leleiʼia koutou e te ʼAtua, ʼe mole gata ʼaki pe takotou situʼa ki te tauhi hāla pea mo te mole kei fai ʼaē ʼo te ʼu meʼa kovi. ʼE tonu ke koutou maʼuliʼi te tauhi maʼa. ʼE fakahā mai e te Tohi-Tapu te meʼa ʼaē ʼe tonu ke fai:
Koutou fakatahi mo te kau Fakamoʼoni ʼa Sehova
Ko Satana pea te kau temonio ʼe ʼi ai tanatou hahaʼi ʼi te kele ʼe nātou akonaki pea mo maʼuliʼi te ʼu meʼa kovi. Kae, mo Sehova foki ʼe ʼi ai tana ʼu kaugana. Ko te kau Fakamoʼoni ʼa Sehova (Isaia 43:10). ʼI te kele katoa, ʼe nātou laka ʼi te lauʼi miliona e fā. ʼE nātou faiga fuli ʼo fai te ʼu meʼa lelei pea mo akoʼi te moʼoni ki te hahaʼi. E lahi te ʼu fenua, ʼe feala aipe takotou felāveʼi mo nātou ʼi tonatou Fale ʼo te Puleʼaga, ʼaē ʼe nātou tali fakafiafia anai koutou.
Ko tanatou gāue ko te tokoniʼi ʼo tonatou ʼu kāiga ke nātou kaugana ki te ʼAtua. ʼE nātou ako anai te Tohi-Tapu mo koutou, ʼi tokotou ʼapi, mo tokoniʼi koutou ke koutou mahino peʼe feafeaʼi te atolasio lelei kia Sehova. ʼE mole koutou totogi anai te faʼahi ʼaia. Ko te kau Fakamoʼoni ʼe nātou fiafia ʼi te akoʼi ʼo te moʼoni koteʼuhi heʼe nātou ʼoʼofa ki tonatou kāiga pea ʼe nātou ʼoʼofa kia Sehova ʼAtua.