Ko Te ʼu Laumālie Neʼe Mole Maʼuʼuli Pea Mo Mamate ʼi Te Kele
ʼE ʼi ai te ʼu laumālie. ʼI te mālama fakalaumālie fakapulipuli, ʼe ʼi ai te ʼu laumālie agalelei pea mo te ʼu laumālie agakovi. Neʼe ko te ʼu tagata koa neʼe maʼuʼuli pea mo mamate ʼi te kele?
Kailoa. ʼO kehekehe mo te ʼu manatu ʼa ʼihi, kapau ʼe mate he tahi ʼe mole ʼalu ia ki te mālama fakalaumālie. ʼE feafeaʼi tatatou ʼiloʼi? Koteʼuhi ʼe fakahā mai e te Tohi-Tapu te faʼahi ʼaia. Ko te Tohi-Tapu ʼe ko he tohi moʼoni, ʼe haʼu mai te ʼAtua moʼoni e tahi, ko tona huafa ko Sehova. Neʼe fakatupu e Sehova te hahaʼi; ʼo ina ʼiloʼi lelei pe tonatou ʼaluʼaga mokā ʼe nātou mamate. — Pesalemo 83:18; 2 Timoteo 3:16.
Neʼe haʼu Atama mai te efu; neʼe toe liliu ia ki te efu.
ʼE ʼui mai e te Tohi-Tapu neʼe faʼu e te ʼAtua ia Atama, te ʼuluaki tagata, “ ʼaki te efu ʼo te kele”. (Senesi 2:7.) Neʼe ina tuku ia ki te Palatiso, te ʼōloto ʼo Eteni. Ka na pau la neʼe fakalogo ia Atama ki te lao ʼa Sehova, neʼe mole mate ia; ʼe kei maʼuli tuʼumaʼu pe ia ʼi te kele ia ʼaho nei. Kae, neʼe ina maumauʼi te lao ʼa te ʼAtua ʼi tana loto faʼitaliha, koia neʼe ʼui age ai e te ʼAtua: “ ʼE ke toe liliu [anai] ki te kele, he neʼe toʼo mai koe mai ai. Heʼe ko koe ko te efu pea ʼe ke toe liliu anai ki te efu.” — Senesi 3:19.
Koteā te ʼuhiga ʼo te palalau ʼaia? Tou vakaʼi muʼa te faʼahi ʼaenī: Neʼe ʼifea koa Atama ʼi te temi ʼaē neʼe faʼu ai ia e Sehova ʼaki te efu? Neʼe mole nofo ia ʼi he faʼahi. Neʼe mole nofo ia ʼi te lagi, ko he laumālie neʼe tonu ke tupu ko he tagata. Neʼe mole maʼuli ia. ʼI te ʼui ʼaē e Sehova ko Atama ‘ ʼe liliu anai ki te kele’, neʼe ina fia fakahā age ʼe mate anai ia. Neʼe mole mavae Atama ʼo ʼalu ki te mālama fakalaumālie. ʼI tona mate, neʼe toe liliu ia ohage ko te kamataʼaga mole gaūgaūe, ʼo pulinoa. Ko te mate, ko te puli ʼo te maʼuli.
Kae ʼe feafeaʼi te tahi atu ʼu mate? Kua gata koa tonatou maʼuli? Koʼeni te tali ʼa te Tohi-Tapu:
-
“Ko [te hahaʼi fuli ʼo feiā pe mo te ʼu manu] ʼe nātou ʼolo fuli ki te potu e tahi. Neʼe nātou ʼomai fuli mai te efu, pea ʼe nātou liliu fuli ki te efu.” — Tagata Tānaki 3:20.
-
“[Ko te kau] mate (...) ʼe mole kei nātou ʼiloʼi he meʼa e tahi.” — Tagata Tānaki 9:5.
-
“Ko tonatou ʼofa pea mo tonatou fehiʼa pea mo tonatou maheka kua puli ʼosi ia.” — Tagata Tānaki 9:6.
-
“ ʼE mole ʼi ai he gāue, he fakatuʼutuʼu, he ʼatamai, he poto, ʼi te Seole [te faitoka], te faʼahi ʼe ke ʼalu kiai.” — Tagata Tānaki 9:10.
-
“[Ko te tagata] ʼe toe liliu ia ki te kele; ʼi te ʼaho pe ʼaia ʼe puli ai tana ʼu fakakaukau.” — Pesalemo 146:4.
Gata pe ki te hahaʼi maʼuʼuli ʼe feala tanatou fai te ʼu meʼa ʼaia.
Ko te kau mate ʼe mole feala ke nātou tokoniʼi te hahaʼi ʼe hālofia peʼe ko te hāofaki ʼonatou ʼaē ʼe gaohi koviʼi.
ʼE hā mai koa ʼi te faʼahi ʼaia ʼe mole toe maʼuʼuli anai te kau mate ʼi he ʼaho? Kailoa. (ʼE tou palalau anai ki te fakatuʼuake ki muli mai.) Kae, ko tona ʼuhiga ʼaē ʼe mole ʼiloʼi e te kau mate te meʼa ʼaē ʼe koutou fai. ʼE mole feala hanatou sisio atu, fakalogo atu peʼe palalau atu kia koutou. ʼE mole ʼaoga ke koutou matataku kia nātou. ʼE mole feala hanatou tokoniʼi koutou, pea ʼe mole feala hanatou fakahalaʼi koutou. — Tagata Tānaki 9:4; Isaia 26:14.