Ko Sehova ʼe ina pulihi katoa anai te agakovi ʼaē neʼe fakatupu e Satana. Neʼe ina fakanofo Sesu ko te Hau ki te kele katoa. ʼAki te taki ʼa te Hau ʼaia, ʼe liliu anai te kele ko he palatiso. — Taniela 7:13, 14; Luka 23:43.

Koʼeni te ʼu fakapapau ʼa Sehova:

• ʼE MAHU TE MEʼA KAI: “Ko te kele ʼe ina foaki mai anai tona fua; ko te ʼAtua, totatou ʼAtua, ʼe ina tapuakiʼi anai ia tatou.” “Pea ʼe mahu anai te meʼa kai ʼi te kele; ʼi te tumutumu ʼo te ʼu moʼuga ʼe tapuke anai ʼi ai.” — Pesalemo 67:6; 72:16.

• GATA TE ʼU TAU: “Koutou ʼomai, ʼo fakasiosio te ʼu gāue ʼa Sehova, pe neʼe feafeaʼi tana fai te ʼu fakatuʼutuʼu fakatalakitupua ʼi te kele. Neʼe ina fakagata te ʼu tau ʼo aʼu ki te potu taupotu ʼo te kele.” — Pesalemo 46:8, 9.

•  GATA TE AGAKOVI: “Koteʼuhi ko te kau agakovi ʼe pulihi anai nātou (...). Pea kei toe siʼisiʼi pe te temi, pea pulihi anai te tagata agakovi; pea ʼe mahino papau ia ʼe ke tokaga anai ki tona potu, ka kua puli anai ia.” — Pesalemo 37:9, 10.

• GATA TE MAHAKI, TE LOTOMAMAHI, MO TE MATE: “ ʼI te temi ʼaia ʼe ava anai te ʼu mata ʼo te kau kivi, pea ko te ʼu taliga ʼo te kau tuli ʼe ava anai. ʼI te temi ʼaia ko te ketu ʼe kake anai ohage he tia pea ko te ʼalelo ʼo te noa ʼe kalaga fakafiafia anai.” — Isaia 35:5, 6.

  “Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.” — Fakahā 21:3, 4.

ʼO kehekehe mo Satana pea mo tana ʼu temonio, ko Sehova ʼe mole gutuloi. Ko meʼa fuli neʼe ina fakapapau ʼe hoko ia (Luka 1:36, 37). ʼE ʼofa Sehova kia koutou pea ʼe loto ia ke koutou maʼuʼuli ʼi te Palatiso ka ina fakatuʼu anai. Koutou faka felogoi ki te kau Fakamoʼoni ʼa Sehova, ke kotou ako ke lahi age takotou mahino ki te ʼu moʼoni fakatalakitupua ʼe tou maʼu ʼi te Folafola ʼa te ʼAtua ʼo lahi age. Kapau ʼe koutou maʼuliʼi te moʼoni, ʼe koutou ʼāteaina anai mai te ʼu noʼo ʼo te loi, te hoko mataku, pea mo te fakapōʼuli. Pea, ʼe koutou toe hāo anai mai te agahala pea mo te mate. Neʼe ʼui e Sesu: “ ʼE koutou ʼiloʼi anai te moʼoni, pea ko te moʼoni ʼe ina hāofaki anai koutou.” — Soane 8:32.