Te ʼu Temonio Ko Te Kau Fai Fakapō!
Ko Satana pea mo te ʼu temonio ʼe nātou agakovi tuʼumaʼu pea mo fakatupu tuʼutāmaki. ʼI te temi muʼa, neʼe matehi e Satana te faga manu pea mo te ʼu kaugana ʼa te tagata agatonu ko Sopo. ʼOsi ʼaia pea ina matehi te ʼu toe e hogofulu ʼa Sopo ʼaki tana fakalagaʼi “he matagi lahi” ʼo maumau ai te ʼapi ʼaē neʼe nātou nonofo ai. ʼOsi ʼaia, neʼe ina fakamamahiʼi ia Sopo ʼaki “he ʼu foʼi polo kua kovi, mai te ʼalofi vaʼe ki te tumutumu ʼo tona ʼulu”. — Sopo 1:7-19; 2:7.
ʼI te ʼu ʼaho ʼo Sesu, neʼe fakaliliu e te ʼu temonio te hahaʼi ʼo ʼalelo mate pea mo kivi (Mateo 9:32, 33; 12:22). Neʼe nātou tautea he tagata ʼonatou faigaʼi ia ke lavea ʼaki te ʼu maka (Maleko 5:5). ʼO nātou gaohi koviʼi ai he tūpulaga ʼo nātou fakakēkē, mo fakatō ki te kele pea “mo faka kukuta fakamālohi”. — Luka 9:42.
Ko Satana pea mo tana ʼu temonio kei tuʼumaʼu aipe tanatou fekai, pea kua kovi ʼosi age foki tonatou agakovi talu tonatou kapu ifo mai te lagi. ʼI te malamanei katoa, kua hā ai tonatou fekai. ʼE nātou faiga ke mahahaki te hahaʼi, pea ko ʼihi, ʼe nātou fakamamahiʼi ʼi te pōʼuli, ʼo mole feala ai hanatou mamoe peʼe ko he ʼu moemisi fakamataku, ko ʼihi atu leva, ʼe nātou fai kia nātou he ʼu agakovi fakasino pea ko ʼihi ʼe nātou uga ke ulu vale, peʼe fai fakapō peʼe fakamate.
Neʼe fakamatala e Linitina, ko he fafine mai Suliname, ko he temonio, peʼe ko he laumālie agakovi, neʼe ina matehi te toko 16 ʼi tona famili pea mo fakamamahiʼi mo ia totonu, tona sino pea mo tana fakakaukau, ia taʼu e 18. ʼI tana mahino lelei ki te meʼa ʼaia koia ʼaē neʼe ina ʼui ai ko te ʼu temonio “ ʼe nātou leleiʼia te fakamamahiʼi ʼo te hahaʼi ʼaē ʼe fakafeagai ake kia nātou ʼo aʼu ki te mate”.
Kae ko Sehova ʼe feala tana hāofaki tana ʼu kaugana mai te ʼu agakovi ʼa Satana. — Tāʼaga Lea 18:10.