ʼE Fakaloto Mālohiʼi e Te ʼu Temonio Te Fakafeagai Ki Te ʼAtua
Kae he koʼe ʼe faiga fakamālohi ia Satana pea mo tana ʼu temonio ke nātou fakahalaʼi te hahaʼi? Koteʼuhi ʼe nātou loto ke tou muliʼi nātou ʼi tanatou fakafeagai. ʼE nātou loto ke tou atolasio age kia nātou. ʼE nātou loto ke tou tui ki tanatou ʼu loi pea mo fai te ʼu meʼa ʼe mole leleiʼia e Sehova. ʼI te ʼu meʼa ʼaia, e lahi te ʼu agaʼi fenua ʼe pipiki ki te ʼu mate.
Ko te mate ʼo he tahi ʼe tou ʼofa mamahi ki ai ʼe ko he meʼa fakatupu mamahi ia. Ko te tagi ʼi to kita mamahi ʼe mole hona kovi peʼe mata faikehe. “Neʼe tagi loʼimata” Sesu ʼi te ʼosi mate ʼo Lasalo, tona kaumeʼa. — Soane 11:35.
ʼE ʼi ai foki te ʼu agaʼi fenua ʼe pipiki tahi mo te mate, pea ʼe kehekehe tona faʼahiga fai ʼi te mālama. E lahi ʼe mole fakafeagai ki te ʼu fakatuʼutuʼu faka tohi-tapu; kae, ko ʼihi ʼona ʼu fakaʼaoga ʼe fakatafito ki te manatu ʼaē ko te kau mate ʼe maʼuʼuli pea ʼe feala tanatou sisio mai ki te hahaʼi maʼuʼuli. Ko te ʼu ala mate, te ʼu putu fai fakavale pea mo te ʼu ʼavaifo fakaʼaliʼaliki, ko tonatou tupuʼaga tāfito ko te mataku ki te ʼu laumālie ʼo te kau mate. Kae, ʼuhi e ko te kau mate ʼe “mole kei nātou ʼiloʼi he meʼa e tahi”, ko nātou ʼaē ʼe nātou maʼuliʼi te ʼu meʼa ʼaia ʼe nātou lagolago ki te ʼu loi ʼa Satana. — Tagata Tānaki 9:5.
Ko ʼihi agaʼi fenua pe ko niʼihi ʼatu toʼotoʼoga ʼe haʼu mai te tui ʼaē, ʼe ʼui ko te kau mate ʼe ʼaoga kia nātou te tokoni ʼa te hahaʼi maʼuʼuli pea ʼe nātou fai he meʼa kovi ki te hahaʼi maʼuʼuli mo kapau ʼe mole nātou fīmālie. ʼI ʼihi fenua, ʼe fai ai he lafeti pea mo he ʼu sakilifisio ia ʼaho e 40 peʼe ʼi he taʼu katoa ʼi te hili ʼo te mate ʼa he tahi. Ko te lafeti ʼaia pea mo te ʼu sakilifisio ʼe ko he tokoni ki ʼaē kua mate ke “aʼu” ki te mālama ʼo te ʼu laumālie. Ko he agamahani te foaki meʼa ʼinu pea mo te meʼa kai ki te mate.
Ko te ʼu meʼa ʼaia ʼe mole lelei heʼe nātou lagolago te ʼu loi ʼa Satana ʼo ʼuhiga mo te kau mate. ʼE mole loto anai Sehova ke tou kau ki te ʼu agaʼi fenua ʼaē ʼe fakatafito ki te ʼu akonaki ʼa te ʼu temonio! — 2 Kolonito 6:14-18.
Ko te ʼu kaugana ʼa te ʼAtua moʼoni ʼe mole nātou kau ki te ʼu faʼahiga meʼa ʼe lagolago ki te ʼu loi ʼa Satana. Kae, ʼaki te ʼofa, ʼe nātou faiga ʼo tokoniʼi te hahaʼi kei maʼuʼuli pea mo fakafimālieʼi nātou. ʼE nātou ʼiloʼi ko Sehova tokotahi pe ʼe feala ke ina tokoniʼi he tahi neʼe hoki mate. — Sopo 14:14, 15.
ʼE tapuʼi e te ʼAtua te ʼu meʼa fakatemonio
Ko ʼihi hahaʼi ʼe nātou faka felogoi fakahagatonu mo te ʼu temonio, peʼe ʼaki he tahi ʼe faifakalauʼakau. ʼE higoa te faʼahi ʼaia ko te ʼu meʼa fakatemonio. Ko te votu, te faifakalauʼakau, te fai fakakikite, te ʼiloʼi fakatomuʼa ʼo te ʼu meʼa ka hoko pea mo te felogoi mo te kau mate ʼe ko he ʼu faʼahi ʼaia ʼo te ʼu meʼa fakatemonio.
ʼE tapuʼi fēnei e te Tohi-Tapu te ʼu meʼa ʼaia: “ ʼAua naʼa maʼu ʼi tou loto fale he tahi (...) ʼe fai fakakikite, he tahi ʼe gaohi meʼa mana, he tahi ʼe kumi ki he ʼu fakaʼiloga, he tahi ʼe faifakalauʼakau, he tahi ʼe na fakalauʼakauʼi he tahi ʼaki he faitoʼo, he tahi ʼe ʼalu ki he tagata ʼe palalau mo te ʼu laumālie, he tahi ko tana gāue te fai kikite ki te ʼu meʼa ka hoko mai, peʼe ko he tahi ʼe ina fakafehuʼi te ʼu mate. He ko ʼaē ʼe na fai te ʼu meʼa ʼaia ʼe ko he meʼa fehiʼaʼinaʼi ia e Sehova.” — Teutalonome 18:10-12.
He koʼe ʼe fakatokagaʼi mālohi tatou e Sehova ʼo ʼuhiga mo te ʼu faʼahiga meʼa ʼaia?
Ke tou nonofo fīmālie, neʼe fakatokagaʼi tatou e Sehova ʼo ʼuhiga mo te ʼu faʼahiga meʼa fakatemonio fuli. ʼE ʼofa ia ki te hahaʼi pea ʼe tokaga kia nātou, pea ʼe ina ʼiloʼi ko nātou ʼaē ʼe felogoi mo te ʼu temonio ʼe tau mo te ʼu mamahi.
Neʼe fakamoʼoni te faʼahi ʼaia e Nilda, ko te fafine faifakalauʼakau ʼi Pelesile. Neʼe maumauʼi tona maʼuli e te ʼu temonio. ʼO ina fakamatala fēnei: “Ko te ʼu laumālie (...) neʼe nātou ʼulusino ia te ʼau, ʼo nātou fakatotonuʼi ʼau. ʼI ʼihi temi ʼe ʼau mālama pea ʼi ʼihi temi ʼe ʼau fakapōʼuli ki te meʼa ʼe ʼau fai, pea neʼe ʼave ʼau ʼo māpunuʼi ki te fale vale. Neʼe lahi ʼaupito toku fakatagaʼi e te ʼu temonio ʼo ʼosi ai toku mālohi. Neʼe ʼau ʼinu te ʼu foʼi ʼakau mo ʼona fakafimālie pea neʼe kamata ai taku ʼinu kava pea mo suluka hoholo. Pea ko te meʼa ʼaia neʼe fai lolotoga te ʼu taʼu.”
Pea, ʼaki te tokoni ʼa Sehova pea mo tana kau Fakamoʼoni ʼi te kele, neʼe ʼāteaina ia Nilda mai te talatuʼu ʼa te kau temonio. ʼI te temi nei, kua maʼa tona maʼuli pea mo lelei. Neʼe ina ʼui fēnei: “ ʼE ʼau tokoni ki te hahaʼi fuli: ʼaua naʼa koutou fia felogoi mo te ʼu laumālie [agakovi], tatau aipe pe ko he kiʼi temi nounou.”