ʼUluaki Palalau
ʼE fakamatala e Dauda ʼe nofo ʼi te kolo ko Siela Leone: “Neʼe ʼau lahilahi age ʼi te kiʼi kolo ʼo te potu Tokelau. ʼI he tahi ʼaho, ka kei ʼau veliveli, neʼe fihi toku famili pea mo te tahi famili ʼo ʼuhiga mo he kele. Neʼe nā loto tokolua ki te kele ʼaia. Moʼo fakatokatoka ʼo te fihi ʼaia, neʼe pāui leva te tagata faifakalauʼakau. Neʼe ina foaki te sioʼata ki he tagata, ʼo ina pulouʼi ʼaki he kie hina. Ko te tagata ʼaē neʼe pulou ʼaki te kie, neʼe mole tuai tana tekelili pea mo tafe kakava. ʼI tana sio ʼaē ki te sioʼata, neʼe ina ʼui fēnei: ‘ ʼE ʼau sio ki he tagata kua matuʼa ʼe fakaōvi mai! Ko tona ʼu mutuʼi meʼa ʼe lanu hina. ʼE lahi pea kua matuʼa, kua hihina tona fuluʼi ʼulu, pea ʼe haʼele tuʼa piko.’
“Neʼe ko taku kui tagata ʼaē neʼe sio ia ki ai! ʼOsi ʼaia pea neʼe ʼāvagaʼia ia pea neʼe kalaga ia ʼo fēnei: ‘Kapau ʼe mole koutou tui ki te meʼa ʼaē ʼe ʼau ʼui atu, koutou sio totonu!’ ʼE moʼoni, neʼe mole he tahi ia mātou neʼe mālohi ʼo fai te meʼa ʼaia! Neʼe fakafimālieʼi e te tagata faifakalauʼakau te tagata ʼaia ʼo ina afuhi ki ai te faitoʼo neʼe teuteuʼi ʼaki te ʼu lau ʼakau pea mo te moʼi vai neʼe ina ʼai ki he fāgogo.
“Neʼe palalau ia ʼaki te tagata ʼaē neʼe hā ʼi te sioʼata, ʼo fakatotonuʼi mai ‘e taku kui’ ko te kele, ʼa tomatou famili. Neʼe ina ʼui age ki taku kui fafine ʼe tonu ke ina gāueʼi te kele ʼo mole ina tuʼaniaʼi he meʼa. Neʼe tali e te famili ʼaē te tonu ʼaia. ʼO fakatokatoka ai leva te fihi ʼaia.”