FAʼAHI 1
“E Au Kumi Anai Te Ovi Ae Nee Puli”
Neʼe hehe ia te kiʼi ovi. Lolotoga tana kai fealuʼaki ʼi te koga meʼa lunaʼia, neʼe to kehe ai mai te faga ovi. Neʼe mole kei sio ki te faga ovi pea mo te tauhi ovi. Pea kua fakaovi mai mo te poʼuli. Tahi ʼae, neʼe hehe ʼi he mafa ʼe feʼoloʼaki ai te ʼu manu fekai, koia neʼe mole kei maʼu hona puipuiʼaga. Kaʼe ʼe logo ki te leʼo ʼe ina iloʼi. Ko te leʼo ʼo te tauhi ovi ʼae neʼe lele mai ki ai. Neʼe fua ia ia e te tauhi ovi, mo ina kofukofu ʼaki tona kofu pea mo ina ʼave ki fale.
KO SEHOVA ʼe ina fakatatau liuliuga ia ia ki he tagata tauhi ovi. ʼI tana Folafola ʼe ina fakalotofimalieʼi tatou, koteʼuhi ʼe ina ui ʼe ina “kumi” anai ʼana ovi pea ʼe ina taupau anai natou.—Esekiele 34:11, 12, 16.
“Ko Te u Ovi o Toku Lotoa”
Ko ai te faga ovi ʼa Sehova? Ko te hahaʼi ʼae ʼe ʼoʼofa pea mo tauhi kia te ia. ʼE ui fenei ʼi te Tohi-Tapu: “Koutou omai, tou punonou, pea tou fakamalalo i ona mua, tou peluki otatou tuli ia mua o [Sehova], totatou tupuaga! Koteuhi ko ia ko totatou Atua, pea ko tatou ko te hahai o tana lotoa manu, ko te faga ovi ae e taki e tona nima.” (Pesalemo 95:6, 7) Ohage pe ko he ʼu ovi ʼe natou muliʼi he tagata tauhi ovi, pea ʼe toe feia pe mo te kau atolasio ʼa Sehova ʼe natou fia muliʼi ia tonatou Tauhi Ovi. Kaʼe ʼe natou haohaoa koa? Kailoa. Koteʼuhi ʼi ʼihi temi, ko te ʼu kaugana ʼa te ʼAtua ko he ʼu ovi ʼe ‘mavetevete,’ ʼe “pulinoa” pea mo “hehe.” (Esekiele 34:12; Mateo 10:6; 1 Petelo 2:25) Tatau aipe pe fakamamaʼo he tahi mai te kokelekasio, kaʼe ʼe fakaʼamu e Sehova ke toe liliu mai.
ʼE kei malave koa ʼi tou loto ko Sehova ʼe ko tou Tauhi Ovi? ʼE fakaha feafeaʼi e Sehova ʼe ko he Tauhi Ovi ia ʼaho nei? Tou vakaʼi te ʼu faʼahi ʼaeni ʼe tolu:
ʼE ina fafaga tatou ʼi te faʼahi fakalaumalie. ʼE ui fenei e Sehova: “E au fafaga anai natou i he gaueaga lelei, . . . i te u kogamea aia, e natou malolo anai i he maloloaga lelei, pea e natou mau anai ni gaueaga luna fului hega lelei.” (Esekiele 34:14) ʼE foaki tuʼumaʼu mai pe e Sehova he meʼa kai fakalaumalie fakalotomalohi mo kehekehe ʼi tona temi totonu. ʼE ke manatu koa ki he alatike, ki he akonaki peʼe ki he ʼata viteo neʼe tali ki tau faikole? Neʼe mole ko he fakamoʼoni koa ʼaia ʼe tokaga Sehova kia koe totonu?
ʼE ina puipui tatou pea mo lagolago mai. ʼE fakapapauʼi fenei mai e Sehova: “E au aumai anai ae nee hehe, pea e au hai anai te lavea o ae nee lavea, pea e au fakamalohii anai ae nee mahaki.” (Esekiele 34:16) ʼE fakamalohi e Sehova ia natou ʼae kua lotovaivai peʼe kua lahi fau tonatou lotohoha. ʼE ina faitoʼo tana faga ovi, mo tokoni kia natou ke natou malolō ʼi ʼonatou lavevea, maʼia pe neʼe tupu mai ʼi ʼonatou tehina mo tuagaʼane. Pea ʼe ina toe ʼaumai natou ʼae neʼe fakamamaʼo mai te kokelekasio pea mo natou ʼae ʼe natou tauʼi ʼanatou manatu fakalotovaivai.
ʼE ina iloʼi tona maʼua ʼae ke tokaga kia tatou. ʼE ui fenei e Sehova: “E au alu anai o kumi mai aku ovi, i te u kogamea fuli ae nee natou mavetevete ki ai. . . . E au kumi anai te ovi ae nee puli.” (Esekiele 34:12, 16) Kia Sehova, ʼe feala pe ki he ovi neʼe hehe ke toe liliu mai. ʼE ina iloʼi ka puli he ovi, pea ʼe alu ʼo kumi ia te ovi ʼaia pea ʼe fakafiafia ʼi te temi ʼae ʼe ina toe maʼu ai. (Mateo 18:12-14) ʼE moʼoni te faʼahi ʼaia, koteʼuhi ʼe ina fakahigoaʼi ʼana kau atolasio ko ‘ ʼana ovi, ko te ʼu ovi ʼo tona lotoʼa.’ (Esekiele 34:31) Pea ʼe ke kau mo koe ki tana faga ovi.
Kia Sehova, ʼe feala pe ki he ovi neʼe hehe ke toe liliu mai, pea ʼe fiafia ʼaupito mo kapau ʼe ina toe maʼu ia tana ovi
“Toe Foaki Mai Kia Matou Ni Aho o Hage Ko Te u Aho o Te Temi Mua!”
He koʼe koa ʼe kumi koe e Sehova pea ina fakaafe koe ke ke toe liliu mai kia te ia? Koteʼuhi ʼe ina loto ke ke fiafia. ʼE ina fakapapau ʼe “ko he ua anai ia ia o te tapuakina” ki tana faga ovi. (Esekiele 34:26) ʼE ko he fakapapau moʼoni ʼaia, he neʼe kua ke sio ki te ʼu fakamoʼoni ʼaia.
Manatuʼi te ʼu aluʼaga ʼae neʼe hoko kia koe ʼi te temi ʼae neʼe ke kamata iloʼi ai ia Sehova. Ohage la, kotea ʼae neʼe ke logoʼi ʼi tau kamata ako ia te ʼu moʼoni fakafiafia ʼo ʼuhiga mo te huafa ʼo te ʼAtua pea mo tana fakatuʼutuʼu ki te tagata? ʼE ke manatuʼi koa ia te fakalotomalohi ʼae neʼe ke maʼu ʼi tau fakatahi mo ʼou tehina mo tuagaʼane ʼi te ʼu fakatahi lalahi? ʼI te temi ʼae neʼe ke faifakamafola ai ki he tahi neʼe fia logo ki te logo lelei, neʼe mole koa la ke fiafia lahi ʼi tau liliu ki tou ʼapi?
ʼE feala ke ke toe maʼu te fiafia ʼaia. Neʼe faikole fenei te ʼu kaugana ʼa te ʼAtua ʼo te temi muʼa: “Fai ke matou toe liliu mai kia koe, oi [Sehova], pea e matou toe liliu mai anai! Toe foaki mai kia matou ni aho o hage ko te u aho o te temi mua!” (Tagi laulau 5:21) Neʼe tali ia Sehova ki te faikole ʼaia, pea neʼe toe liliu tana hahaʼi ʼo tauhi kia te ia ʼaki he lotofiafia. (Neemia 8:17) ʼE toe fai feia pe anai e Sehova te faʼahi ʼaia kia koe.
ʼE moʼoni, ʼe mole faigafua kia koe tau toe liliu mai kia Sehova. Kaʼe tou vakaʼi pe ʼe kotea ʼae ʼe feala ai ke faigataʼa ia tau toe liliu mai, pea ʼe feafeaʼi tau lava tauʼi ia te ʼu faʼahi ʼaia.